Зам тээврийн сайд А.Гансүх инженер Ц.Батыг уучилжээ. Тэрбээр энэ уучлалаа өөрийн твиттер хуудсаараа дамжуулан илэрхийлж, жиргээчдийн хүсэлт гэдгийг давхар дайжээ. Мөн сайд “Цаашид олон хүн гүтгэлэг доромжлолын золиос битгий болоосой гэж итгэж энэ алхмыг хийлээ. Монгол хүний саруул ухаанд би итгэдэг” хэмээн жиргэжээ.
Инженер Ц.Бат нь Зам тээврийн сайд А.Гансүхийн нэр хүндэд халдсан хэргээр шүүхээс 100 хоногийн баривчлах ял сонсч, сар орчмын хугацаанд хоригдсон юм. Харин давж заалдах шатны шүүхээс түүний хэргийг мөрдөн байцаалтад буцааж, Ц.Батыг батлан даалтад гаргаад байгаа юм.
Ц.Мөнхбаяр нар УИХ-д өргөн барьсан урт нэртэй хуулийг эсэргүүцэн Уул уурхайн яам болон “Централ тауэр”-т тэсрэх бодис тавьсан, төрийн ордон руу буу шийдэмтэй заналхийлж, олон нийтэд айдас төрүүлсэн хэмээн буруутгагдаж, өнгөрөсөн жилийн энэ өдөр хоригдож байжээ.
Монгол Улсын Боловсрол, шинжлэх ухааны яам болон Бүгд найрамдах ардчилсан Солонгос ард улсын Шинжлэх ухаан, технологийн үндэсний хорооны хооронд байгуулах “Шинжлэх ухаан, технологийн хамтын ажиллагааны санамж бичиг”-т гарын үсэг зурах ёслол Пхеньян хотын Ардын соёлын ордонд болжээ. Санамж бичигт Монголын талаас БНАСАУ-д суугаа Онц бөгөөд Бүрэн эрхт Элчин сайд М.Ганболд, Солонгосын талаас БНАСАУ-ын Шинжлэх ухаан, технологийн үндэсний хорооны орлогч дарга Жан Рён Хёг нар гарын үсэг зурсан байна. Ёслолын арга хэмжээнд тус ЭСЯ-ны дипломат ажилтнууд болон БНАСАУ-ын Шинжлэх ухаан, технологийн үндэсний хорооны албан тушаалтнууд байлцжээ.
Зурагтын шинэ эцсээс Баянхошууны уулзвар хүртэлх Хувьсгалчдын гудамжны 4.6 км авто замыг өргөтгөж шинэчлэх ажлыг “Экспресс зам” ХХК гэрээ байгуулан гүйцэтгэж байгаа юм. Тус замын төгсгөлийн хэсэг буюу Жанцангийн уулзвараас Баянхошууны уулзвар хүртэлх нэг км замын суурь болон өнгө асфальтбетон хучилтын ажлыг гүйцэтгэн өнөө өглөө замын хөдөлгөөнийг бүрэн нээлээ. 14 метр өргөнтэй зорчих хэсгийн тэмдэг, тэмдэглэгээг маргааш буюу есдүгээр сарын 17-нд хийнэ. Тавдугаар сарын 9-нөөс эхлэн замыг хэсэгчлэн хааснаар далан суурийн нягтруулалт, хуучин хучилтыг дахин боловсруулж ресайклдах, цементээр бэхжүүлсэн суурь хийх, замын доогуур ус зайлуулах таван төмөрбетон хоолой цутгаж угсрах ажлууд хийгдсэн юм. Гэрэлтүүлэг, явган хүний замын ажлууд хийгдэх бөгөөд зам барилгын ажлын гэрээ энэ оны 10 дугаар сарын 30-нд дуусгавар болно гэж Нийслэлийн Авто замын газраас мэдээллээ.
Монгол Улсын Ерөнхийлөгч Ц.Элбэгдорж өнөөдөр 11 цагт Төрийн ордноо Ажиа гэгээнийг хүлээн авч шагнал гардуулах юм байна. Ажиа гэгээн сүүлийн жилүүдэд манай оронд хэрэгтэй хүмүүнлэгийн үйлсэд гар бие оролцож байгаа бөгөөд сүүлийн жишээ гэхэд “Хүүхдийн цусны эмгэг, хавдрын эмнэлэг”-ийг ашиглалтад оруулсан билээ. Ямартай ч өнөөдөр Ажиа гэгээнт Төрийн тэргүүн Алтангадас одон гардуулахаар болсон бололтой. 
Өвөрхангай аймгийн Сант суманд энэ сарын 10-ны өдөр 15 настай С.Мягмарсүрэн тарваганы давсаг залгиснаас болж, залгиур хоолойн тарваган тахал өвчин туссантай холбогдуулан тус газарт хөл хорио тогтоогоод байсан билээ. Харин өчигдөр Эрүүл мэндийн яамнаас мэдээлэл хийж, тус суманд тогтоосон хориог өнөөдөр цуцлахаар болсныг мэдэгдсэн. Тарваган тахал өвчнөөр өвдөж, эмнэлэгт хүргэгдсэн хүүгийн бие сайжирсан бөгөөд түүний ээж, аав болоод өвчний голомттой бүсэд байсан 62 иргэнийг үзлэгт хамруулахад өвчний шинж тэмдэг илрээгүй ажээ.
Нийслэлийн Засаг дарга бөгөөд Улаанбаатар хотын Захирагч Э.Бат-Үүл агаарын бохирдлыг бууруулах ажлын хүрээнд 100 хувь цахилгаанаар ажилладаг автомашин үйлдвэрлэдэг Япон Улсын “Митсубиши моторс” корпорацид хамтран ажиллах санал тавьсан. Нийслэлийн Засаг даргын саналын дагуу өнгөрсөн 6-р сард тус корпораци 2 цахилгаан автоамшиныг Хотын захиргаанд хандивлаж, туршилтын шугамаар албан хэрэгцээнд ашиглаж байна. Туршилтаар ашиглах явцад нэг сарын хугацаанд 60 000 төгрөгийн цахилгааны зардлын тооцоо гарчээ. Уг автоамшиныг бүтэн цэнэглэсэн тохиолдолд хэрэглээнээсээ хамаарч 4000 төгрөгөөр 130-150 км зам туулах хүчин чадалтай бөгөөд утаагүй, хүлээмжийн ялгаруулдаггүй давуу талтай.
Улаанбаатар хотын Захирагчийн ажлын алба АНУ-ын Азийн сантай хамтран нийслэлийн орон сууцны болон гэр хорооллын 152 хороонд амьдрах орчны газрын зураглалыг гаргаж байгаа. Энэ зураглалыг хийхэд Захирагчийн гэр хороолол дахь ажлын албад, хороодын хэсгийн ахлагч нар, иргэдтэйгээ хамтран хорооныхоо үндсэн мэдээллийг газрын зураглалд тэмдэглэн, дүүргүүдийн мэдээлэл технологи хариуцсан мэргэжилтнүүд мэдээллийн санд оруулж байна. 
Нийслэлийн ИТХ-ын Тэргүүлэгчдийн 2014
“Ном бол оюун санааны тусгаар тогтнол” уриатай номын баяр энэ сарын 20-нд буюу ирэх бямба гаригт Чингисийн талбай дээр болно. Энэ үеэр тэргүүний уншигч хүүхдүүдэд шагнал гардуулах, үнэт ховор номын үзэсгэлэн, хамгийн их уншлагад гарсан, уншлагад гараагүй номын үзэсгэлэн дэлгэгдэх аж.