Үйлдвэр хөдөө аж ахуйн сайд Ш.Түвдэндорж холбогдох албаны хүмүүстэй хамт энэ сарын 7, 8-ны өдрүүдэд Москва хотноо айлчилжээ. Айлчлалынхаа үеэр ОХУ-ын Хөдөө аж ахуйн сайд Н.В.Федоров, Мал эмнэлэг хорио цээрийн албаны дарга А.С.Данкверт нартай уулзжээ. Ийнхүү уулзахдаа ОХУ руу экспортлох мах, махан бүтээгдэхүүн болон хөдөө аж ахуйн уламжлалт зарим бүтээгдэхүүнд тус улсаас ногдуулж буй татварыг тэглэх, махны экспортын хорио цээрийн нөхцөлийг хөнгөвчлөх, Монгол-Оросын Засгийн газар хоорондын комиссын хөдөө аж ахуйн ажлын хэсгийн анхдугаар хурлын мөрөөр хэрэгжүүлэх арга хэмжээ гэсэн гурван багц асуудлаар тохиролцоонд хүрсэн байна.
Ингээд Монгол Улсаас ОХУ-д экспортлох зарим бараа бүтээгдэхүүнд ногдуулж буй тариф тэглэх боломжийг судлах хамтарсан ажлын хэсгийг энэ онд багтаан байгуулж хэлэлцээ хийх, Монголын талын хүсэлтийг ОХУ-ын Засгийн газарт уламжилж нааштайгаар шийдвэрлүүлэхэд дэмжлэг үзүүлэхээр болсон байна. Харин экспортлох махны тухайд эрүүл, аюулгүй байдлын баталгааг хангасан тохиолдолд Монголын нийлүүлж чадах хэмжээгээр Оросын тал махны импортын зөвшөөрөл, квот өгөхөд бэлэн гэдгээ илэрхийлжээ.
Түүнчлэн уулзалтын үеэр Монголын мах бэлтгэлийн үйлдвэрүүдийг С ангилалаас В ангилалд оруулах, мөн ойрын үед Монголын мах ангилах, мах нөөшлөх ба хиамны үйлдвэрүүдийг аттестатчилах ажлыг эхлүүлэх зорилгоор нөөшилсөн мах экспортлох аж ахуйн нэгж, байгууллагын жагсаалт, хүчин чадал, бараа бүтээгдэхүүний төрөл зүйл зэрэг тодорхой мэдээллийг багтаасан албан хүсэлтийг ОХУ-ын хөдөө аж ахуйн байгууллагад хүргүүлэхээр тохиролцсон байна. 2014 оны есдүгээр сард Монголын махны үйлдвэрүүдийг аттестатчилсан дүнгийн урьдчилсан байдлаар зургаан үйлдвэрийн экспортлох эрхийг сэргээх, хоёр үйлдвэрт шинээр зөвшөөрөл олгох асуудлаар Гаалийн холбооны улсуудтай зөвшилцөн ойрын үед эцсийн хариуг ирүүлэхээр болсон байна. Харин хянан баталгаажуулалтад тэнцээгүй үйлдвэрийн стандартыг сайжруулах зөвлөмж ирүүлж, улмаар дахин аттестатчилахаар талууд тохиролцсон байна.
Монгол-Оросын хөдөө аж ахуйн салбарын хамтын ажиллагаа цаашдаа эрчимжих учраас Улаанбаатарт шинээр байгуулагдах Оросын Худалдааны төлөөлөгчийн газарт мал эмнэлгийн хорио цээрийн асуудал хариуцсан байнгын төлөөлөгч томилон ажиллуулах боломжтой гэдгийг ОХУ-ын хөдөө аж ахуйн салбарынхан онцолсон байна. Энэ талаар ОХУ-ын Эдийн засгийн хөгжлийн яамтай зөвшилцөн шийдвэрлэнэ гэдгээ ч амлажээ. Уулзалтын үеэр яригдсан асуудлуудын нэг нь Монголын хөдөө аж ахуйн салбарын мэргэжилтнүүд, малын эмч, байцаагч зэрэг 100 хүнийг ОХУ-д сургахад хамтран ажиллахаар болжээ. Ийнхүү хамтын ажиллагаа өргөжиж байгаа тул Мал эрүүлжүүлэх хөтөлбөрийн 2 дугаар үе шатны хөтөлбөрийг шинэчлэн үйл ажиллагаа, хамрах хүрээг тодорхойлох зорилгоор энэ оны арваннэгдүгээр сард Оросын талын экспертийн багийг хүлээн авч хамтран ажиллах, 2015 оноос хэрэгжүүлж эхлэхэд хамтран ажиллахаар болсон байна. Хөтөлбөрийн хүрээнд манай талаас хоёр аймгийн мал эмнэлгийн лабораторийн оношилгооны тоног төхөөрөмжийг шинэчлэх, гурван жил дараалан тус бүр 12 сая тун вакцин тусламжаар авах, вакцин тээвэрлэх тусгай зориулалтын автомашин авах, ОХУ-ын Владимирын институтэд жилд 2-4 малын эмчийг магистр, докторын зэрэгт сургах тодорхой сэдвийн хүрээнд хамтарсан судалгаа хийх санал тавьсныг Оросын тал зарчмын хувьд дэмжиж байгаагаа энэ үеэр илэрхийлжээ. Энэ дагуу Монгол Улсын Засгийн газраас мал эрүүлжүүлэх хөтөлбөрийг хүмүүнлэгийн тусламжийн хүрээнд хэрэгжүүлэх албан ёсны хүсэлтийг ОХУ-ын Засгийн газарт хүргүүлэхээр болсон байна. Цаашдаа Европ, Зүүн хойд Азийн улс орнуудаас амьд мал, хөдөө аж ахуйн гаралтай бүтээгдэхүүн экспортолж, импортлох үеийн дамжин өнгөрөх хорио цээрийн асуудлаар Оросын талтай хамтран ажиллахаар ч тогтсон байна. Хоёр улсын хөдөө аж ахуйн сайдууд ганц махны экспортыг ярилгүй Монголын цаг уурын нөхцөлд тохирсон үр тарианы шинэ сортыг үржүүлэх, нутагшуулах хамтарсан хөтөлбөр боловсруулахад хамтран ажиллахаар боллоо.
Нийслэлийн Засаг даргын “2014 оны хоёрдугаар ээлжийн цэрэг халах, татах ажлыг зохион байгуулах тухай” А/774 дугаар захирамжийн дагуу нийслэлийн хэмжээнд цэргийн жинхэнэ алба хаах хугацаа дуусч бэлтгэлээр халагдсан байлдагч, түрүүчийг хүлээн авах, цэргийн жинхэнэ албанд иргэдийг татах, гэрээт цэрэгт элсүүлэх ажлыг эхлүүлэх нь. Цэрэг татлага энэ сарын 15-19-ний өдрүүдэд зохион байгуулагдах юм байна. Нийслэлийн хэмжээнд цэргийн жинхэнэ албаны татлагыг удирдан зохион байгуулж ажиллах “Цэрэг татлагын товчоо”-г нийслэлийн ЗДТГ-ын дарга Ё.Гэрэлчулуун ахалж байгаа бөгөөд дүүрэг бүрт цэрэг татлагын товчоо байгуулжээ.
Инчоны Азийн наадмын дараа Балба, Шри-Ланка, Бангладеш, Палестины тамирчдаас долоон хүн зугтаж үлдсэн гэнэ. Тамирчдын визний хугацаа аравдугаар сарын 19-нд дуусах юм байна. Энэ хугацаанаас хойш тэд хууль бусаар дүрвэгчид гэж тооцогдох нь. Пусаны Азийн тоглолт 2002 онд болоход 16 тамирчин “Солонгост” харлаж байжээ. 
“Улаанбаатар” олон улсын кино наадам 2014″үзэсгэлэнгийн Туркийн кино өдөрлөгнээлтээ хийлээ. Уг өдөрлөг 2014 оны 10 дугаар сарын 9 –ний өдөр “Тэнгис” кино театрт болсон юм. Өдөрлөгийн үеэр олон улсын кино наадмуудын шагналт Туркийн алдарт “Эрвээхэйн зүүд”, “Өвлийн ичээ”, “Хонь” зэрэг бүтээлүүд дэлгэцнээ гарч үзэгчдийн хүртээл болох юм. Тус өдөрлөгийг Нийслэлийн урлаг Соёлын газар, Туркийн элчин сайдын яам, Монголын Урлагийн зөвлөл, Монголын Кино Урлагийн зөвлөлтэй хамтран зохион байгуулж бөгөөд олон улсын кино наадам нь энэ сарын 12 –ныг хүртэл үргэлжлэх аж. Турк улс манай оронтой найрамдалт харилцаа тогтоосны 45 жилийн ойг дохиолдуулан тус кино өдөрлөгийг зохион байгуулж байгаа гэдгийг Туркийн элчин сайдын яамны хэвлэл мэдээллийн албанаас мэдэгдлээ. 
Нийслэлийн 375 жилийн ойг тэмдэглэн өнгөрүүлэх арга хэмжээний хүрээнд “Хотын гудамж – Миний нутаг” өдөрлөгийг Чингэлтэй дүүрэг, Бага тойруу, Анкарагийн гудамжинд хоёр дахь жилдээ зохион байгуулах гэж байна. Уг арга хэмжээ 2014 оны 10 дугаар сарын 10-ны өдрийн 13:00 цагаас 2014 оны 10 дугаар сарын 11-ний 18:00 цаг хүртэл Соёл урлагийн их сургуулийн зүүн урд уулзвараас “Зоос гоёл” ХХК-ий уулзвар хүртлэх замд явагдах тул замын хөдөлгөөнийг түр хугацаагаар хязгаарлахаар болсныг Нийслэлийн Замын цагдаагийн газрын Урьдчилан сэргийлэх хэлтсээс мэдээлж байна. 
“Олон улсын хараа хамгаалах өдөр” өчигдөр боллоо. Эл өдрийг дэлхий нийтээр аравдугаар сарын хоёр дахь долоо хоногийн пүрэв гаригт тэмдэглэдэг билээ.Өнөөдрийн байдлаар Монгол улсын хэмжээнд хараагүй 15 мянган иргэн байдаг байна. Сул хараатай болон хараагүй иргэдийн 80 хувь нь өвчнөөсөө урьдчилан сэргийлэх боломжтой байдаг ч, мэдээлэл дутмаг, урьдчилан сэргийлэх эмчилгээ авдаггүй, нүдээ хайрладаггүй нь улмаас хараагүй болдог аж. Түүнчлэн сүүлийн үед техник, технологи өндөр хөгжих болсонтой холбогдуулан харааны эмгэг эхсэж, бага наснаасаа залхуу нүдтэй, харааны гажигтэй болох нь ихэсчээ. Иймд “Олон улсын хараа хамгаалах өдөр”-ийг “Хүүхдийн харааг хамгаалъя” уриан дор тэмдэглэн 58 дугаар сургуулийн бүх нэгдүгээр ангийнхүүхдүүдийн харааны түвшинг тогтоож өгчээ.Харааны бэрхшээлээс урьдчилан сэргийлэхийн тулд хүүхдээ 3-5 насанд нь нүдний эмчид үзүүлж, харааны хугарлын гажгийг илрүүлэнулмаар шил зүүлгэн эмчлэх ёстой аж.Зургаан наснаас хойш нэгэнт муудсан хараа эмчлэгдэх нь муу байдаг байна. Иймд жил бүр хүүхдийнхээ нүдийг шалгуулж тохирсон шил зүүлгэж, нүдний дасгал хийлгэж байвал хараа муудахаас сэргийлэх боломжтой талаар нүдний эмч, анагаах ухааны доктор Т.Булган ярьсан юм. 
“Багануур”компани Багануур дүүргийнхээ төв талбайд нээлттэй өдөрлөг зохион байгуулжээ. Өдөрлөгийн үеэр дүүргийнхээ ЕБС-ын нийт сурагчдын дунд “Миний мэдэх Багануурын уурхай” сэдэвт зохион бичлэг, гар зургийн уралдааныг нас насны ангилалаар зохион байгуулж,ЕБС-ын дунд ахлах ангийн 2300 сурагчдад “Алтан уурхай Багануур ХК”сэдэвт нэг цагийн хичээл бэлтгэн мэргэжлийн багш нараар заалгажээ. Мөннийт уурхайчдаасаа хандив цуглуулж 4.6 сая төгрөгөөр Багануур дүүргийн Эрүүл мэндийн нэгдлийн төрөх тасагт шаардлагатай байсан ургийн монитор, пульс аксиометр гэсэн хоёр тоног төхөөрөмжийг авч өгсөн байна. Дүүргийн тавдугаар хорооноос судалгаа авсны үндсэн дээр нийгмийн эмзэг бүлгийн 20 өрхөд тус бүр 1.2 тонн нүүрс үнэ төлбөргүй өгч буцалтгүй тусламж үзүүлжээ.
Монголын залуучуудын холбооноос жил бүр уламжлал болгон “Залуу хүн” цуврал лекцийг зохион байгуулдаг билээ. Оюутан, залуусыг хөгжүүлэх зорилготой тус цуврал илтгэлд “Эзэнт гүрний туульс” номын зохиогч С.Эрдэнэболд, УДЭТ-ын ерөнхий найруулагч Н.Наранбаатар, СТА жүжигчин Б.Навчаа гэх мэт амжилт бүтээлээрээ тэргүүлж яваа олны танил алдартнуудыг урин оруулдаг. Зөвхөн хаврын улиралд зохион байгуулдаг байсан тус лекцийг энэ жилээс залуусын хүсэлтээр хавар, намарт цувралаар хүргэхээр болжээ. Түүнчлэн залуусын хүсэлтийг харгалзан үзэх үүднээс онлайн санал асуулга явуулж , оролцогчдыг тодруулдаг болжээ. 
Сүхбаатар дүүргийн Замын цагдаагийн тасаг нь Дүүргийн цагдаагийн хэлтсийн зүүн хойд талд байрлаж байсан бол энэ оны аравдугаар сарын 06-ны өдрөөс Сүхбаатар дүүргийн нутаг Сөүлийн гудамж хуучин Хүнсний 50 дугаар дэлгүүрийн зүүн хойд талд буюу Нийслэлийн цагдаагийн газар түр байрлаж байсан байранд шилжин нүүж үйл ажиллагаагаа хэвийн явуулж байгаа талаар Нийслэлийн Замын цагдаагийн газрын Урьдчилан сэргийлэх хэлтсээс мэдээлж байна.
Нийслэлийн авто тээврийн газар, Замын цагдаагийн газартай хамтран өнөөдрөөс Е, С зөвшөөрөлгүй ачаа, тээврийн хэрэгслийг замын хөдөлгөөнд оролцуулахгүй юм байна. Тус зөвшөөрлийг өнгөрсөн сарын 22-ноос ТҮЦ машинаар олгож эхэлсэн юм. Ингэхдээ В ангиллын 3500 кг-аас бага бүх жинд 10, С ангиллын 3500 кг-аас дээш бүх жинд 15, Е ангиллын 5000 кг-аас дээш чиргүүлтэй бүх жинд 20 мянган төгрөгийг төлж зөвшөөрөл олгожээ. Замын цагдаагийн газраас өгч байгаа мэдээллээр одоогоор 500 гаруй ачаа тээвэр эрхлэгчид зөвшөөрлөө авсан байна.