Category: нийгэм

Өнөөдөр энэ жилийн хамгийн том сансрын аялалын үр дүн гарна. Учир нь, Росетта нэртэй сансрын хөлөг хөргөгчний хэмжээтэй роботыг (Филай) нэгэн аварга солир дээр буулгах юм. Солир нь дэлхийгээс 6.4 тэрбум километрийн зайд байгаа.

Хэрвээ амжилттай болвол хүн төрөлхтөн түүхэндээ анх удаа солир дээр робот буулгасан үйл явдал болох ажээ.

67P/Чурюмов-Герасименко нэртэй солир нь хад чулуунаас бүрдсэн гадаргатай, Ангараг, Бархасбадь гаригуудын хооронд оршдог гэнэ.Росетта хөлгийн 10 жилийн аялалын гол зорилго ердөө л уг солир дээр робот буулгах аж.

Европын Сансрын агентлагийн удирдаж байгаа уг аялал амжилттай болох магадлал 70 хувь байгаа гэж мэргэжилтнүүд мэдээлжээ. Хэрвээ ажиллагаа буух цэгээсээ нэг миллиметр л зөрвөл бүтэлгүйтэх юм байна. Робот газардуулах ажиллагаа орон нутгийн цагаар 16.35 эхэлж долоон цаг орчим үргэлжилнэ.

Энэхүү үйл явдлын дүрсийг Европын сансрын агентлаг шууд дамжуулах аж.

Нэгдүгээр курсийн оюутнууд нийтийн тээврээр зорчих виза картаа өнгөрсөн долоо хоногоос эхлэн авсан. Гэвч оюутнуудын виза картны зураг солигдож, зураг нь бүдэг гарчээ. Энэ талаар МОХ-ны нийтийн тээвэр хариуцсан хэлтсийн дарга Г.Ууганбаяр “Өмнөх жилүүдэд Төрийн банк оюутнуудын мэдээллийг скайнердаж оруулснаар виза картыг удаашралтай гаргадаг байсан. Тиймээс энэ жил тухайн сургуулийн оюутны зөвлөлөөр дамжуулан захиалгыг авсан нь хурдан гэж үзсэн юм.МОХ нь тухайн сургуулиас ирсэн мэдээллийн дагуу Төрийн банк руу шилжүүлсэн гэсэн үг. Энэ асуудал бүх сургуулийн оюутнуудад гараагүй. Тухайн сургуулийн өгсөн мэдээллээс шалтгаалж, харилцан адилгүй байгаа” гэв.

Сургууль тус бүр дээр карт нь алдаатай гарсан хүүхдүүдийн мэдээлэл, зургийг дахин авч, алдаагаа засч байгаа аж.

Хот доторх авто машин, сэлбэгийн худалдааны есөн зах, 34 цэгийг нэгтгэн “Авто Худалдааны Цогцолбор” руу нүүлгэн шилжүүлэхээр болсон.

Уг цогцолбор ашиглалтад орсноор агаарын болон хөрсний бохирдлыг багасгаж, замын хөдөлгөөний ачаалал, түгжрэл, ослыг бууруулна гэж үзэж байгаа.
“Авто Худалдааны Цогцолбор” нь 130 га эдэлбэр газрыг хамарч, нийт 14000 авто машины зогсоолтой. Эхний ээлжинд дөрвөн блокоос бүрдсэн 6300 автомашины зогсоолыг ашиглалтад оруулах бөгөөд одоогоор ажлын явц 85 хувьтай явж байна. Гэнэтийн хүндрэл гарахгүй бол “Авто худалдааны цогцолбор”-ын эхний ээлжийг энэ сарын 15-20-ны хооронд ашиглалтад оруулах төлөвлөгөөтэй ажиллаж байгаа юм.

Одоогоор нийт 20.4 га талбайд далангийн дүүргэлт хийж, асфальтаар хучжээ. Мөн автомашины зогсоол, хэрэглэгчдийн зогсоол, авто тээврийн хэрэгслийн улсын бүртгэл, улсын дугаарын үйлдвэр, банк, даатгал, цайны газар, нийтийн бие засах газрын хэмжээг нэмээд 30 га талбайг ашиглалтад оруулна гэдгийг гүйцэтгэгч компанийхан хэлж байна. Цаашид тус цогцолборт авто машины сэлбэг хэрэгслийн худалдаа, техникийн хяналтын үзлэг, оношлогооны төв, тээврийн хэрэгслийн мэргэшсэн жолооч бэлтгэх сургалт, дамжаа, жолоодлогын аюулгүй байдлын төв, автомашины туршилтын талбай зэрэг авто техниктэй холбоотой бүхий л үйлчилгээг багтаасан, нэгдсэн харуул хамгаалалт бүхий нэг цэгийн худалдаа, үйлчилгээг бий болгох юм.

Монголын Залуучуудын холбооны дэргэдэх Залуучуудын гэр бүлийн дэмжих хороо нь залуу гэр бүлийн үнэ цэнэ, үүрэг хариуцлагаа ухамсарлахад чиглэсэн сургалт, зөвлөгөө өгөх, залуу гэр бүлийг дэмжих зорилгоор “Тогтвортой гэр бүл” өдөрлөгийг 11 сарын 19-ний өдөр зохион байгуулах гэж байна. Уг өдөрлөгт Нийслэлийн зургаан дүүрэг тус бүрээс 15 гэр бүл оролцох бөгөөд “Гэр бүлийн үнэ цэнэ, үүрэг хариуцлага”, “Хэвлий дэх хүүхдийн тань хэлэх үг”, “Амаржихуйн гайхамшиг” сэдвээр сургалтад хамрагдаж, мэргэжлийн багш нараас зөвлөгөө авах боломжтой аж. Түүнчлэн оролцсон хосууддаа “Даймонд” гэрэл зургийн студи, “Мишка” орос өлгийн дэлгүүр, нярайн асаргааны зөвлөмж DVD, Хүүхдийн угаадаг даавуун живх зэргийг хөнгөлөлтэй үнээр худалдан авах эрхийн бичгүүдийг гардуулан өгөх юм байна. Анхныхаа үрээ тэврэх гэж буй залуу ээж аавууд тус өдөрлөгт идэвхитэй хамрагдахыг Монголын залуучуудын холбооноос уриаллаа.

Нийслэлийн Эрүүл мэндийн газрын 2014 он гарснаас хойш есөн сарын эрүүл мэндийн статистик үзүүлэлтээр 01-5 хүртэлх насны хүүхдийн эндэгдэл 95 бүртгэгдсэнээс 48 тохиолдол буюу 50.52 хувь нь осол гэмтлийн шалтгаанаар эндсэн байна.

Эндэгдэлийн 77.08 хувь нь түлэгдэлт , 18.75 хувь нь зам тээврийн ослоор, 2.08 хувь нь хахсан, 2.08 хувь нь өндрөөс унаж нас барсан байна. Иймд эцэг эхчүүд хүүхдэдээ тавих хараа хяналтаа сайжруулан болзошгүй осол гэмтлээс урьдчилан сэргийлэхийг Нийслэлийн Эрүүл мэндийн газраас иргэдэд сэрэмжлүүлж байна.

Монголбанк болон үл хөдлөх хөрөнгийн “Тэнхлэг зууч”, “Актив зууч”, “Монголиан Пропертис” компаниудын консерциум хамтран сар бүр “Орон сууцны үнийн индекс”-ийн судалгааг олон нийтэд танилцуулж байгаа. Энэхүү тооцоонд тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин бүх төрлийн орон сууцны үнийг хамруулан тооцдог юм.
Өнгөрсөн сарын судалгаагаар өмнөх сараас -2.68 хувь буурсан үзүүлэлт гарсан. Өөрөөр хэлбэл, зах зээлд нийлүүлэгдэж буй орон сууцны зах зээлийн үнэ өнгөрсөн сард өмнөх сараас 2.68 хувь буурчээ. Харин уг индексийг оны эхэн үетэй харьцуулахад 0.076 хувь өссөн бол, өнгөрсөн оны мөн үетэй харьцуулахад 1.86 хувийн өсөлттэй байна.
Энэ удаа Орон сууцны үнийн индексийг нийслэлийн орон сууцны зах зээлийн онцлогт хамгийн сайн тохирсон гэж үзсэн шинэ загвараар тооцож, өмнөх саруудын тооцооллыг урагш нөхөж шинээр тооцжээ.

Нийслэлийн угсармал орон сууцнуудад дулаан, техникийн шинэчлэл хийснээр III, IV хорооллыг дулааны эрчим хүчээр хангахуйц эх үүсвэр бүхий нөөц бий болох боломжтой юм байна. Одоогоор нийслэлийн хэмжээнд 1965-2000 онд баригдсан 1077 угсармал орон сууц байдаг аж. Эдгээр орон сууцанд 45.4 мянган өрх амьдарч байна. Хуучны гэх тодотголтой тус барилга нь дулаан алдагдал өндөртэй тул гадна талыг нь дулаалах замаар дулааны алдагдлыг арилгах боломжтой гэж хөтөлбөрт тусгажээ. Ингэснээр эрчим хүчний хэмнэлт 30 хувьд хүрэхээс гадна халаалтын системийг шинэчилж тоолууржуулснаар хэмнэлт 50 хувьд хүрэх боломжтой гэж тооцоолсон байна. Хөтөлбөрийн санхүүжилтийн хувьд үе шаттайгаар хэрэгжүүлэх шаардлагатай гэж “Хас” банкны зүгээс үзэж байгаа аж. Мөн санхүүжилтийг шийдвэрлэх боломжит хувилбаруудыг гаргасан байна. Тиймээс угсармал орон сууцанд дулаан, техникийн шинэчлэл хийх дэд хөтөлбөрийг Нийслэлийн иргэдийн төлөөлөгчдийн хурлын тэргүүлэгчдийн хуралдаанаар хэлэлцүүлэхээр болжээ.

Монгол Улсын нийгэм, эдийн засгийн энэ оны эхний 10 сарын мэдээллийг Үндэсний статитикийн хорооноос гаргажээ. Тоон үзүүлэлтүүдээс харахад улсын хэмжээнд эхний арван сард төрсөн хүүхдүүдийн тоо өмнөх оноос 3.2 хувиар өссөн байна. Түүнчлэн ажилгүйдлийн хэмжээ болоод өрхийн орлого, зарлага хэр өөрчлөгдснийг зурган файлаар дэлгэрэнгүй үзүүллээ.

Монголын Залуучуудын Холбоо сүүлийн хоёр жилд эрчимтэй ажиллаж, олон залуучуудын оролцоог нэмэгдүүлэн, нэгтгэж, мөн төрийн болоод төрийн бус, албан байгууллага, аж ахуйн нэгжтэй хамтран ажиллах цар хүрээгээ улам өргөжүүлэн тэлж байгаа юм. Монгол орны хаана ч очсон МЗХ-ны залуучууд ажиллаж байна, үйл ажиллагаа нь сэргэж, цар хүрээ нь өргөжиж, залуучууд одоо л нэг нам гэж хуваагдахгүйгээр эх орон, нутаг усныхаа төлөө хийе гэсэн чин эрмэлзэлтэй болж байна гэсэн яриа дуулдах боллоо. Энэ бүхэн яалт ч үгүй МЗХ-ны сүүлийн 2 жилд хийсэн ажлын үр дүн юм.

МЗХ-ны Ерөнхийлөгч Аюушийн Мөнхбат, МОХ-ны шинэ Ерөнхийлөгч Д.Батбаярыг хүлээн авч уулзсан байна. Уулзалтын үеэрээ бодитой ажиллууд дээр хамтарч ажиллах талаараа ярилцсан байна. Оюутан залуучуудыг нам болгож хуваахгүйгээр нэгтгэж, тэдэн рүү чиглэсэн үр дүнтэй ажлуудыг хамтран зохион байгуулах, “Авлига би авахгүй, би өгөхгүй”, “Спирт үү спорт уу” аянд 218000 оюутныг уриалан оролцуулах, 2016 оны сонгуульд шинэ залуу үеийг гарч ирэхэд нь хамтарч дэмжихээр тохирчээ.

Монголын Оюутны Холбоо оюутнуудыг хамгаалдаг байгууллага байсан бол одоо төлөвшил тал руу нь илүү анхаарсан үйл ажиллагаа явуулдаг байгууллага болно гэдгээ уулзалтын үеэр МОХ-ны Ерөнхийлөгч Д.Батбаяр онцлон хэлсэн юм.
Өнөөдрийн залуучууд ирээдүйд эх орноо авч явах, үр хүүхдээ зөв замруу чиглүүлж, төлөвшүүлэх хүмүүс юм. Тиймээс өнөөдрөөс хамтарч, нэгдэж, хийж бүтээх цаг ирснийг энэхүү хоёр байгууллагын уулзалт харууллаа.

Нийслэлийн Баянзүрх дүүрэгт өчигдөр барилгын осол гарч хүний амь нас хохирсон байна. БЗД-ийн хоёрдугаар хорооны нутаг дэвсгэрт “Арвин-Очир” компанийн захиалгаар баригдаж буй барилгын дөрөвдүгээр давхарт төмөр тулгуур буулгаж байсан туслах ажилтан унаж хүнд гэмтжээ. Хохирогч Хөвсгөл аймгийн харьяат 23 настай, эрэгтэй Б-г ГССҮТ-д хүргэсэн боловч нас барсан аж. Уг хэргийг БЗД-ийн цагдаагийн II хэлтэст шалгаж байна.

Иймд барилгын үйл ажиллагаа явуулж буй аж ахуй нэгж байгууллагууд хөдөлмөр хамгааллын аюулгүй ажиллагааны журмыг баримтлан ажиллахыг цагдаагийн байгууллагаас анхааруулж байна.