Сэлэнгэ аймгийн Сайхан сумын Цагдаагийн хэсгийн эрүүгийн төлөөлөгчөөр ажиллаж байсан Ц.Ууганжаргал энэ оны нэгдүгээр сард согтуугаар машин жолоодож яваад замын хажуугаар явж байсан иргэн М-ыг дайрч, амь насыг нь хохироож хэргийн газраас зугтсан билээ. Хэргийг шалгаад хэрэгтэнд гурван жил, нэг сар хорих ял оноосон. Харин тэрбээр уг ялыг эсэргүүцэн давж заалдсан бөгөөд өчигдөр Давж заалдах шатны IX шүүх хэлэлцэн анхан шатны шүүхээс оноосон ялыг хэвээр үлдээжээ.
Category: нийгэм
“Монгол хурандаа” нийгэмлэг ТББ-аас санаачлан анх удаа хурандаа нарын анхдугаар нэгдсэн чуулганыг зохион байгуулахаар болжээ. Чуулганд Зэвсэгт хүчин, Тагнуул, Цагдаа, Шүүхийн шийдвэр гүйцэтгэх байгууллага, Шүүхийн шинжилгээний үндэсний хүрээлэн, Авлигатай тэмцэх газар, Онцгой байдлын ерөнхий газар зэрэг цэргийн болон тусгай чиг үүрэг хэрэгжүүлэгч байгууллагад одоо ажиллаж буй болон алба хааж чөлөөндөө гарсан хурандаа, дэд хурандаа нар оролцох юм байна.
Хурандаа нарын чуулган ЦЕГ-ын Лицензийн төвийн хурлын танхимд маргаашийн /XI.26/ 12:00 цагт эхлэх аж.
УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаан өнөөдөр болж, УИХ-ын гишүүн Д.Оюунхорол нарын өргөн мэдүүлсэн Нийгмийн даатгалын тухай хуульд нэмэлт өөрчлөлт оруулах тухай хуулийн төслийг хэлэлцээд гишүүдийн 91 хувийн саналаар “Төслийг хэлэлцэх нь зүйтэй” хэмээн үзлээ.
Хуулийн төслийн үндсэн агуулга нь малчдыг Нийгмийн даатгалд хамруулж, тэтгэвэрт гарах нөхцөл бололцоог хангахад чиглэжээ. Өнөөдрийн байдлаар НДШ-д хамрагдаж байгаа нийт иргэдийн ердөө зургаан хувь нь малчид аж. Нөгөө талдаа одоогийн үйлчилж байгаа хуулиар НДШ-ийг сар бүр тогтмол төлөхөөр заасан байдаг. Гэвч сум, орон нутгаасаа хол мал мал аж ахуй эрхэлдэг малчдад НДШ-ээ сар бүр тогтмол төлөх бололцоо бага аж. Энэ нь орлоготой нь ч мөн холбоотой юм байна. Тиймээс дээрх нөхцөл байдлыг харгалзан үзэж, малчин нь НДШ-ээ жилдээ 2-3 удаа бөөнд нь төлж байх эрх зүйн орчинг бүрдүүлэхэд энэхүү төслийн гол зорилго чиглэжээ.
Мөн тэтгэвэрт гарах насыг нь таван насаар урагшлуулахаар төсөлд заасан байна. Хуулийн төсөл санаачилсан УИХ-ын гишүүн Д.Оюунхоролын тайлбарласнаар малчдын насжилт төв суурин газар амьдардаг иргэдийнхээс 5-7 насаар богино байгаа нь судалгаагаар батлагджээ. Энэ нь хүнд нөхцөлд ажил эрхэлдэгтэй нь холбоотой гэнэ. Тиймээс Монголын төр малчидаа суурин аж ахуй эрхлэх хүртэл нь тэтгэврийн насыг нь харж үзэх шаардлага байна гэдгийг энэ үеэр онцолж байлаа. Үүнтэй байнгын хорооны хуралдаанд оролцсон гишүүд санал нэгдэж, хуулийн төсөл дэмжигдсэн юм.
Онцлоход, хувиараа хөдөлмөр эрхлэгчид буюу тогтмол орлогогүй иргэд НДШ-ээ малчдын нэгэн адил төлөх боломжийг энэхүү хуулийн хүрээнд тусгаж өглөө.
Монгол бахархалын өдөр буюу энэ сарын 23-нд Сингапур улсад зохион байгуулагдсан “Мистер Ази” тэмцээнд сэтгүүлч, зохиолч, найруулагч Д.Төрмөнхийн хүү Т.Энхтүвшин II байрт шалгарсан амжилт гаргажээ. Тус тэмцээнд 36 орны оролцогчид өрсөлдсөн бөгөөд 13 дахь жилдээ зохион байгуулагдаж байна. Олон улсын чанартай тус тэмцээнд ийнхүү анх удаагаа монгол залуу шалгарч, шилдгүүдийн эгнээнд дуудагдсан юм. Тэрбээр тэмцээний II байрт шалгарахаас гадна “Asian best model”, “Best photogenic” модель гэсэн гурван шагналыг давхар хүртсэн байна. Түүнтэй дэлхийд долоон салбартай Сингапурын томоохон загварын агентлаг найман сар хамтран ажиллах гэрээ байгуулсан аж.
Тэмцээний нэгдүгээр байрт Филипини, гуравдугаар байрт Малайз улсын оролцогчид шалгарчээ.
Нийслэлийн Засаг даргын 2013-2016 оны үйл ажиллагааны хөтөлбөр, Ухаалаг Улаанбаатар төслийн хүрээнд Нийслэлийн ЗДТГ-аас нийслэлийн хороо, дүүрэгт эрүүл аюулгүй байдлын индекс тогтоож, индексийг сайжруулах чиглэлээр ажиллаж байна. Нийслэлийн хороо, дүүрэг бүр, нутгийн захиргааны байгууллагуудад тогтоож буй Эрүүл аюулгүй байдлын индекс нь нийслэлийн иргэдийн амьдрах эрүүл, аюулгүй, ээлтэй орчинг бүрдүүлэхэд шаардлагатай багц үзүүлэлтүүдийг боловсруулдаг нотолгоонд суурилсан үзүүлэлт юм.
Энэхүү “Эрүүл аюулгүй байдлын индексийн шалгуур үзүүлэлтийг тооцоолох систем”-ийг Нийслэлийн Мэдээллийн технологийн газраас боловсруулж нэвтрүүлжээ. Ингэснээр хороо, дүүрэг, агентлагийн холбогдох албан хаагчдын ажлыг автоматжуулж, мэдээллийн системээр удирдах, Майкрософт Эксел дээрх гар ажиллагааг хөнгөвчлөн ажилтны цаг завыг хэмнэх, үр бүтээмжийг нэмэгдүүлэх, бодит үнэн мэдээлэл гаргах, нийслэл болон дүүргүүдийн Эрүүл аюулгүй байдлын индексийн дундаж үзүүлэлтийг нэгдсэн хэлбэрээр тооцож графикаар дүрслэн гаргахад хялбар болох аж.
Мөн иргэд өөрийн амьдарч байгаа орчны индексийн мэдээллийг авах, тэдгээр индексүүдийг дээшлүүлэхэд саналаа тусгах, мөн тухайн дүүрэг хороодын ЭАБИ-ийг сайжруулахад холбогдох албан тушаалтан болон иргэдийн оролцоог нэмэгдүүлэх зэрэг давуу талтай. Нийслэлийн иргэд өөрийн амьдарч буй хорооныхоо эрүүл аюулгүй байдлын индексийн үзүүлэлтийг www.eabi.ub.gov.mn цахим хаягаар нэвтрэн тоон, графикан, газрын зургаар харж, эрүүл аюулгүй байдлын индексийг нэмэгдүүлэхэд өөрийн саналаа оруулах боломжтой ажээ.
Банкууд өнгөрсөн сард нийт 1953 зээлдэгчид 111.9 тэрбум төгрөгийн ипотекийн зээл шинээр олгосноор банкуудын ипотекийн зээлийн үлдэгдэл 2703.8 тэрбум төгрөг болжээ. Мөн орон сууцны 8 хувийн хүүтэй зээлдэгчдийн нийт тоо 63652 хүрчээ. Энэ сарын эцэст банкуудын ипотекийн зээлийн үлдэгдлийн жилийн өсөлтийн хурдыг өмнөх сартай харьцуулахад, 8.1 хувиар, оны эхнээс 75.0 хувиар, өмнөх оны мөн үеэс 63.1 нэгж хувиар тус тус буурсан байна.
Хууль зүйн яамнаас ОХУ-ын Мансууруулах бодисын эргэлтэд хяналт тавих холбооны албаны мэргэжлийн сургагч багш нарыг урьж Монгол Улсын Хууль зүйн салбарын албан хаагчдад зориулсан мэргэшил дээшлүүлэх сургалтыг зохион байгуулжээ.
Сургалтыг Мансууруулах болон сэтгэцэд нөлөөлөх бодисын хууль бус эргэлттэй тэмцэх сэдвээр явуулсан бөгөөд ЦЕГ, ХХЕГ, ШШҮХ, ХСИС гэсэн байгууллагуудаас нийт 88 албан хаагч хамрагджээ. 10 хоногийн турш үргэлжилсэн сургалт өчигдөр өндөрлөж суралцагсдад сургалтын гэрчилгээг гардууллаа.
Хамгийн элбэг тохиолддог ч сайн эмчлэхгүй бол хүний дархлалын системийг сулруулж байдаг ханиадыг гэрийн нөхцөлд хэрхэн хурдан, үр дүнтэй эмчлэх аргуудыг хүргэж байна. Зарим төрлийн эм бэлдмэдүүд нь ханиадыг зөвхөн тухайн үедээ дарж бүрэн эмчилдэггүй бөгөөд дахин тухайн төрлийн вирусаар халдварлах магадлал ихтэй байдаг байна. Харин эмийн бус байгалийн гаралтай бэлдмэлүүд нь хүний биеийн өвчин эсэргүүцэх чадварыг улам нэмэгдүүлж өгдөг ажээ.
Сармистай сүүгээр ханиад дарах арга: Буцалсан нэг аяга сүүнд зөгийн бал, 3-5 хумс сармис жижиглэн хийгээд унтахын өмнө халуунаар ууж, хөлрөн хөнжилдөө орох х нь ханиадыг маш сайн эдгээдэг.
Нимбэгний шүүс, аньсаар ханиад дарах арга: Дөнгөж эхэлж буй ханиаданд нимбэгний шүүсийг аньстай хольж халуунаар нь нэг аягыг унтахын өмнө уугаарай. 200 мл буцлам халуун усан дээр 1-2 ширхэг нимбэг, 1 аяга аньс хийж халуунаар нь ууна.
Үхрийн нүдний навчаар ханиад дарах арга: Нэг хоолны халбага үхрийн нүдний хуурай навчин дээр аяга буцласан халуун ус хийж хандлана. Ингэхдээ 4 цаг дарж хандлах бөгөөд өдөрт 4-5 удаа 125 мл-ийг ууна.
Нимбэгний хальс сармисаар ханиад дарах арга: 2 ширхэг нимбэгийг хальстай нь үрүүлд үрнэ. Мөн 10 хумс сармис нухаж нимбэгтэй хольж хутган,1 литр бцласан бүлээн усанд хийж таглана. Уг шингэнээ хөргөгчинд хийж хонуулаад өглөө өлөн элгэн дээрээ, орой унтахын өмнө нэг хоолны халбагыг ууна. Ханиалгахаа болилоо гээд уухаа зогсоож болохгүй. Бэлдмэлээ дуустал нь ууж байж таны бие дэх ханиадны нянг устгах болно.
Сонгинотой сүүгээр ханиад дарах арга: Нэг бөөрөнхий сонгиныг нухаш болтол нь жижиглээд нэг аяга буцалсан сүүнд хийж 30 минут таглаж дарна. Үүний дараа сонгиноо шүүж, үлдсэн шингэнээ ууна. Уг бэлдмэлээ өдөрт 2-3 удаа хагас аягаар уух хэрэгтэй.
Зөгийн балаар ханиад дарах арга: Нэг цайны халбага зөгийн балыг 2.5 цайны халбага манжингийн шүүстэй хольж өдөрт дөрвөн удаа, хамрын нүхэнд тав таван дуслаар дусааж хэрэглэнэ. Бага насны хүүхдэд манжингийн шүүсийг хамарт дусааж хэрэглэнэ. Нярай хүүхдэд нэг цайны халбага зөгийн балыг хоёр цайны халбага бүлээн усанд уусгана. Бэлдсэн шингэнээ хөвөнд шингээж хамрын нүхэнд 20 минут орчим байлгана. Хүүхэд тавгүйтэж, уур уцаартай байвал хамрын нүхийг ээлж ээлжээр арчиж цэвэрлэх нь зохимжтой.
Сүүгээр ханиад дарах арга: 500 гр сүүг бага зэрэг халааж дотор нь өндөг нэг ширхэг өндгийг хагалж хутгана. Дээрээс нь нэг цайны халбага зөгийн бал, хоёр цайны халбага цөцгийн тос нэмээд сайтар хутгана. Бэлтгэсэн сүүгээ унтахын өмнө ууна. Энэ аргыг ханиадны шинж тэмдэг дөнгөж илэрч эхлэх үед хэрэглэвэл үр дүнгээ өгнө. Сүүнд чихэр өвс чанаж өдөрт гурван удаа ууж болно. Цагаан тос, зөөхий хольж өглөө өлөн элгэн дээрээ шар тостой хольж идвэл ханиалга намдаах сайн эмчилгээ болно.
Хий ханиалгасан үед: Чацарганыг сайн нухаж няцлаад 200 гр усанд 10 гр-ыг хийж 30 минут буцалгана. Бэлтгэсэн шингэнээ өдөрт гурван удаа хоолны халбагаар ууна Цагаан гааны буцалсан шүүсийг бага тунгаар өдөрт гурван удаа ууж болно.Яншуй гурван ширхгийг 150 гр усанд хийж 2-3 минут буцалгана. Бэлтгэсэн шингэнээ бүлээнээр нь хэрэглэнэ. Хөх дэгд, цагаан дэгд, царван, цагаан лууванг адил хэмжээтэй хольж өдөрт гурван удаа буцалгаж уугаарай.
Ханиаднаас урьдчилан сэргийлэх арга: Ханиаднаас урьдчилан сэргийлэхийн тулд гараа байнга бүлээн усаар дахин дахин угааж, амны хөндий, хоолойгоо содтой усаар зайлж байх хэрэгтэй. Мөн нэг гр аскорбины хүчлийг өглөөний цайны дараа уугаарай.
Дашрамд дурдахад, шоколадтай сүү уух нь цэр ховхлодог ажээ.
Энэ сарын 27-ны өдөр “Олон нийт цагдаагийн хамтын ажиллагааны төвийн хурлын их танхимд “Олон нийт-Цагдаагийн хамтын ажиллагааны өдөр” болно. Тус Олон нийт цагдаагийн хамтын ажиллагааны төв ньХууль зүйн салбарын шинэчлэлийн хүрээнд Олон нийт цагдаагийн хамтын ажиллагааны төв нь ЦЕГ-ын даргын 2014 оны хоёрдугаар сарын 10-ны өдрийн 70-р тушаалаар байгуулагдсан байна.
Олон-нийт цагдаагийн хамтын ажиллагаа нь иргэд , олон нийтийн аюулгүй, амар тайван ажиллаж амьдрах орчин нөхцлийг бүрдүүлэхийн тулд тулгарч буй асуудлаа засаг захиргаа цагдаагийн байгууллага, иргэдийн оролцоонд тулгуурлан хамтран шийдвэрлэхэд чиглэсэн үйл ажиллагааны цогц юм.
Тус төвийн гол зорилго нь цагдаагийн байгууллагын үйл ажиллагааг олон нийтэд сурталчилж, тэдний итгэл, дэмжлэг, оролцоонд түшиглэсэн нээлттэй, үйлчилгээний байгууллага. Мөн иргэд олон нийтийн амар амгалан амьдрах орчныг бүрдүүлэх, гэмт хэрэг зөрчлийг бууруулахад чиглэсэн олон талт ажлыг олон нийт-цагдаагийн хамтын ажиллагаа, итгэлцэл,түншлэлд тулгуурлан зохион байгуулж, хууль зүйн салбарын шинэчлэлийг гүнзгийрүүлэх үндсэн чиглэлтэйгээр үйл ажиллагаагаа явуулж байна.
Үүний зэрэгцээ цагдаагийн хамтын ажиллагааны ач холбогдлыг бүхий л арга хэлбэрээр сурталчлах, иргэд аж ахуй нэгж байгууллагатай хамтран ажиллах түншлэл бий болгох, гэмт хэрэг зөрчлийг бууруулахад иргэдийн оролцоо, сайн дурын бүлгийг нэмэгдүүлэх, идэвхжүүлэх, иргэд олон нийт болон цагдаагийн алба хаагчдал чиглэсэн соён гэгээрүүлэх ажил зохион байгуулж байгаа юм.
Говь-Алтай аймгийн Алтай суманд хүний амь хөнөөчихөөд өөрийгөө хөнөөсөн хэрэг гарчээ. Тодруулбал, тус сумын Мэргэжлийн сургалт үйлдвэрлэлийн сургуулийн уурын зуухны дэргэд хутгалуулсан хүн байна гэх дуудлагын дагуу цагдаагийн байгууллага очиж шалгахад Есөнбулаг сумын Жаргалант багт оршин суух иргэн Б-ийн амь насыг хохироосон байжээ. Цагдаагийн байгууллагын мөрдөн байцаалтын явцад хохирогчийг хөнөөсөн этгээд хэргийн газраас зугтаж явахдаа өөрийнхөө амийг мөн егүүтгэжээ. Хэрэг гарсан шалтгааныг тодруулахаар аймгийн цагдаагийн газрын мөрдөн байцаагчид ажиллаж байгаа гэнэ.