Category: гадаад

БНХАУ-ын Гадаад хэргийн сайд Ван И манай улсад энэ сард айлчилна. Манай улсын гадаад харилцаа, худалдааны гол түнш, стратегийн чухал харилцагч орны хувьд энэ удаагийн айлчлал өндөр ач холбогдолтойг эдийн засагчид болон судлаачид хэлж байна. Эдийн засаг, нийгмийн томоохон төслүүдэд хамтарч ажиллах чухал яриа хэлэлцээр хүлээгдэж буйг онцолж байна. Айлчлалаар хоёр орны эдийн засаг, худалдааны болон хил, боомтын асуудал, томоохон төслүүд, түүнчлэн БНХАУ, ОХУ-тай яригдаж буй гурван талын Эдийн засгийн коридор, эдийн засгийн төслийн асуудлыг хөндөж, мэдэж бүс нутгийн хамтын ажиллагааны талаар ярилцана гэдийг Гадаад харилцааны сайд Б.Батцэцэг өнгөрсөн 7 хоногт болсон Засгийн газрын ээлжит хуралдааны үеэр танилцуулсан юм.

Олон улсын судлаач, профессор Ж.Баясах, “БНХАУ-ын дарга Ши Жиньпин анх Монгол Улсад төрийн айлчлал хийснээс хойш хоёр орны харилцааг иж бүрэн стратегийн түвшинд дэвшүүлэн хөгжүүлж байна. Түүнээс хойш Монгол, Хятад, Орос гурван орон “Эдийн засгийн коридор” байгуулахын төлөө хамтран зүтгэж, энэ ажилд ахиц дэвшил гарсаар буй”-г онцлон дурдаж байна.

БНХАУ-ын Гадаад хэргийн сайдын айлчлалаар эрчим хүч, хилийн боомтын асуудлыг хэлэлцэх хүлээлэлттэй байна.

Айлчлалын үеэр Эрдэнэбүрэнгийн УЦС болон Багануурын ДЦС-ын бүтээн байгуулалтын талаар эцэслэн ярилцаж, хилийн боомтуудтой холбоотой асуудал хүлээгдэж буйг “Шинэ сэргэлтийн бодлогын хурдасгуур төв”-ийн гүйцэтгэх захирал, эдин засагч Б.Дөлгөөн тодотгож байна. Эрдэнэбүрэнгийн УЦС-ын бүтээн байгуулалтын ажлыг энэ намар эхлүүлснээр 5 жилийн дараа бүрэн ашиглалтад оруулах талаар Засгийн газрын “Шинэ сэргэлтийн бодлого”-д тусгаад байгаа юм.

Баруун бүсийг эрчим хүчээр хангах стратегийн чухал төслийн санхүүжилтийг айлчлалын үеэр шийдвэрлэнэ гэсэн хүлээлэлттэй байна. Мөн Гашуунсухайт, Ганц мод, Шивээхүрэн, Сэхээ, Бичигт,Зүүнхатавч зэрэг боомтын төмөр замыг холбох ажлыг шуурхайлах зэрэг эдийн засагт нэн түрүүнд шаардлагатай, хүлээлэлттэй байгаа асуудлыг хөрш оронтой хэлэлцэх хүлээлэлттэй байна.

Энэ талаар “Шинэ сэргэлтийн бодлогын хурдасгуур төв”-ийн гүйцэтгэх захирал, эдин засагч Б.Дөлгөөн хэлэхдээ, хилийн боомтуудаас гадна дээр дурдсан УЦС, ДЦС-ын бүтээн байгуулалтад БНХАУ-тай хамтран оролцох, хөрөнгө оруулах чиглэлтэй байгааг тодотгож байна. Энэ талын яриа хэлцэл урагшлавал бүтээн байгуулалтын ажил хурдасна хэмээн хэлж байна.

Урт хугацаанд урд хөрш рүү гарах хилийн боомтуудыг нээж нэмснээр, бараа, бүтээгдэхүүний нийлүүлэлт болон эрэлт нэмэгдэж, улмаар эдийн засаг тэлж, гадаад валютын нөөц бүрэлдэх боломжтойг шинжээчид онцолж байна.

Дэд бүтцийн асуудлаа шийдэх замаар, нөгөө талаар харилцан бие биедээ ашигтай худалдааг илүү дэлгэрүүлэх талаас нь ярилцаж, ойлголцолд хүрэх тусам манай улсад орж ирэх валютын урсгал нэмэгдэж, ингэснээр валютын хуримтлал бий болж, ирэх онд төлөх гадаад, дотоодын өрийг барагдуулах боломж бүрдэнэ хэмээн дүгнэж байна.

Айлчлалаар тээвэр-логистикийн асуудлыг ярилцан шийдэж чадвал өнөөдрийг хүртэл тулгараад буй тээврийн зардал буурах боломжтой. Энэ нь өнөөдрийн импортын өндөр зардал, инфляцийн дарамтад ороод буй энэ цаг үед чухал нөхцөл болно гэж шинжээч судлаач нар үзэж байна.

Испани Баасан гаригт сармагчны цэцэгөвчнөөр өвчилсөн хүннас барсан гэжмэдээлсэн нь Европт уг өвчнөөр нас барсан анхны тохиолдол болов. Үүнээс өмнө Африк тивд хоёр хүн нас барсан юм.

Бразил улс өнгөрсөн Баасан гаригт Африк тивээс гадуур сармагчны цэцэг өвчнөөр өвчилсөн анхны тохиолдол бүртгэгдсэн тухай мэдээлжээ.

ДЭМБ-ын долдугаарсарын 22-ны өдрийн тайлангаас харахад дэлхий даяар ердөө таван хүн нас барсан нь бүгд Африкийн бүс нутагт бүртгэгдсэн байв. ДЭМБ өнгөрсөн Бямба гаригт , хурдацтай тархаж буй дэгдэлтийг дэлхийн эрүүл мэндийн онцгой байдлын хэмжээнд зарлаж, хамгийн өндөр түвшний сэрэмжлүүлэг зарлажээ.

Испанийн Эрүүл мэндийн яам сүүлийн тайландаа тус улсад 4,298 тохиолдол батлагдсан гэж мэдэгджээ.Мэдээлэл авсан 3750 өвчтөний 120 нь эмнэлэгт хүргэгдэж, нэг нь нас барсан гэж мэдэгдсэн.

Украин улс дайнаас хойш анхны үр тарианы хөлөг онгоц боомтоос хөдлөхөд бэлэн болжээ. Ерөнхийлөгч Зеленский экспортыг сэргээх НҮБ-ын хэлэлцээрээс долоо хоногийн дараа Чорноморск боомтод айлчлах үеэрээ ингэж хэлсэн байна. Украины боомтуудыг бүсэлсэн нь хүнсний хомсдол үүсгэж, үнэ өсөхөд хүргэсэн.

АНУ-ын Төрийн нарийн бичгийн дарга Энтони Блинкен, ОХУ-ын Гадаад хэргийн сайд Сергей Лавров нар өчигдөр /2022.07.29/ хэлэлцээ хийх үеэр үр тарианы асуудал хурцаар хөндөгдсөн. Блинкен хэлэхдээ, “Орос улс Украинаас үр тариа экспортлохыг зөвшөөрөх амлалтаа илэн далангүй ярилцаж биелүүлэх ёстой. Мөн Украины нутаг дэвсгэрийг Орост нэгтгэхийг дэлхий нийт хүлээн зөвшөөрөхгүй” гэжээ.

Албаныхны мэдээлснээр одоо 17 хөлөг онгоц 600 мянган тонн ачаатай хүлээж буй. “Хар тэнгисээр дамжин өнгөрөх замыг эцэслэн шийдсэн үед л экспортыг аюулгүйгээр үргэлжлүүлэх боломжтой” гэж НҮБ-ын тусламжийн албаны дарга Мартин Гриффитс хэлэв

Оросууд түрэмгийлэхээс өмнө тус хоёр улс дэлхийн улаан буудай, арвайн экспортын гуравны нэгийг эзэлж байсан.

Татвар төлөхөөс зайлсхийсэн поп од Шакирад найман жилийн хорих ял, 24 сая еврогоор торгох шийтгэл төлөвлөснөө Испани улсын прокурорууд өчигдөр зарлажээ.

Колумбын дуучин 2012-2014 оны хооронд олсон орлогоосоо 14.5 сая еврогийн татвар төлөөгүй гэсэн хэрэгт холбогдоод байгаа юм.

Энэ долоо хоногийн эхээр шүүх Шакирад торгуулийн хэмжээг тохиролцох замаар хэргийг хаах санал тавьсан ч дуучин бүсгүй хүлээж аваагүй байна.

Шакира өөрийгөө ямар ч буруугүй гэдэгт итгэлтэй байгааг төлөөлөгчөөрөө дамжуулан мэдэгджээ.

Поп одын татвартай холбоотой хэрэг 2018 оноос сөхөгдөж эхэлсэн юм. 2012-2014 онуудад Испанид амьдарч байсан ч албан ёсны бүртгэлээ өөр газарт хадгалах замаар татвар төлөхөөс зайлсхийсэн гэж прокурорууд үзэж байгаа.

Испани улсад зургаан сараас дээш хугацаагаар оршин суусан бол татвар төлж эхлэх хуультай юм байна. Харин Шакира дээр дурдсан хугацааны ихэнх үед Испанид байгаагүй гэж мэдүүлжээ.

Шалгалтын үр дүнд дуучин бүсгүй 2012 онд Барселона хотод амины орон сууц худалдан авч, тухайн үед найз залуу нь байсан хөл бөмбөгчин Жерар Пикетэй хамт амьдарч байсныг тогтоосон юм байна.

45 настай Шакира, 35 настай Пике нар 11 жил хамт амьдрахдаа хоёр хүүгийн эцэг эх болсон юм. Тэд энэ оны зургаадугаар сард гэр бүлээ салгаж байв.

Шакирагийн дараагийн шүүх хурлын тов зарлагдаагүй байна.

Эх сурвалж: BBC

ХӨСҮТ-ийн Эрт сэрэмжлүүлэг, хариу арга хэмжээний нэгжийн дарга Н.Сувдмаа сармагчны цэцэг өвчний талаар мэдээлэл өглөө.

Тэрээр “Сармагчны цэцэг өвчний анхны тохиолдол өнгөрсөн тавдугаар сард бүртгэгдсэн. Өнөөдрийн байдлаар тус өвчин зургаан бүсийн 76 улс оронд бүртгэгдээд буй. Манай улс сармагчны цэцэг өвчнийг зөөвөрлөгдөн орж ирэхээс сэргийлэн хариу арга хэмжээ авч ажиллаж байна.

Энэ хүрээнд бид тус өвчний талаар эрсдэлийн үнэлгээ хийгээд байна. Үнэлгээ хийхэд сармагчны цэцэг өвчин манай улсад зөөвөрлөгдөн орж ирэх болон тархах эрсдэл “Дунд” гэж гарсан. Үүнтэй холбогдуулан цэврүүт өвчний талаарх асуумжийг хил гааль болон бусад холбогдох газруудаас авч байгаа. Мөн ДЭМБ-ын зөвлөмжийг үндэслэж Эрүүл мэнэдийн сайд сармагчны цэцэг өвчний үед илрүүлэх тандалт, оношилгоо, эмчилгээний түр зааврыг баталсан. Бид уг өвчнийг илрүүлэх тандалтыг эрчимжүүлэх талаар хэд хэдэн албан тоот, зөвлөмжүүдийг холбогдох байгууллагуудад хүргэсэн. Сармагчны цэцэг өвчин Европын холбооны бүс болон Америкийн бүсэд хамгийн ихээр бүртгэгдэж байгаа. Тиймээс онцын шаардлагагүй тохиолдолд халдвар бүртгэгдсэн газраар аялахгүй байх, аялах шаардлага гарвал энгийн зөвлөмжүүдийг мөрдөж, амны хаалт зүүж, зай барьж, гараа тогтмол савандаж угаах хэрэгтэй гэдгийг зөвлөж байна” гэлээ.