Category: гадаад

Орос улс, Стратегийн давшилтын зэвсэглэлийг хорогдуулах гэрээний хүрээнд хийгддэг үзлэг шалгалтад цөмийн байгууламжуудаа хамруулахыг түр хугацаагаар зогсоосноо АНУ-д мэдэгджээ. “Америкийн нутаг дэвсгэр дээр мөн ижил үзлэг явуулах Москвагийн эрхийг хангалгүйгээр, Америкийн талд дангаар давуу байдал үүсгэсэн нөхцлөөр энэ үзлэг шалгалтыг сэргээхээр Вашингтон мугуйдлан зүтгэж байгаа нь ОХУ-ыг ийм арга хэмжээ авахаас аргагүй болголоо” гэж Оросын ГХЯ-ны мэдэгдэлд тэмдэглэсэн байна.

Мөн энэ шийдвэрээ, Стратегийн давшилтын зэвсэглэлийг хорогдуулах гэрээний нэр бүхий заалтад нийцүүлэн гаргасан гэдгээ Москва мэдэгдэлдээ дурджээ. Вашингтоноос тавьж байгаа шаардлагууд нь цөмийн байгууламжуудад хийгдэх үзлэг шалгалтад эрх тэгш байх зарчмыг хангахгүй байна гэдгийг мэдэгдсэн боловч хариу өгөөгүй болохыг оросын тал мөн тодотгосон байна.

Үүний зэрэгцээ энэ арга хэмжээ нь түр хугацааных гэдгийг оросын Гадаад яам дурдаад, хяналт шалгалтын үйл ажиллагаатай холбоотой бүх асуудлыг гадны түншүүдтэйгээ харилцан зохицсоны дараа нэн даруй цуцлах болно гэдгийг заасан байна.

Харин АНУ Украинтай холбоотойгоор Оросын эсрэг тогтоосон хоригуудын улмаас энэ гэрээний тал дээр хоёр улсын хоорондын нөхцөл байдал өөрчлөгдсөн гэж мэдэгдэв.

Тухайлбал, АНУ төдийгүй Их Британи, Европын холбооны орнууд зэрэг холбоотнууд нь Оросын нисэх онгоцнуудыг нутаг дээгүүрээ нэвтрүүлэхийг хориглож агаарын орон зайгаа хаасан нь энэ гэрээг ёсчлон биелүүлэхэд саад учруулж байгаа нөхцөл болж байгааг Вашингтон мэдэгдсэн байна.

АНУ, ОХУ хооронд хүйтэн дайнаас хойш мөрдөгдөж байгаа гол ганц гэрээ болох Стратегийн давшилтын зэвсэглэл буюу цөмийн зэвсгийн нөөцийг хорогдуулах, хязгаарлах тухай 3 дахь гэрээний хүчинтэй хугацаа 2026 онд дуусгавар болно. Үүнтэй холбогдуулж Москва, Вашингтон хоёр шинэ гэрээний шалгуур нөхцөлүүдээр зөвшилцөж эхлээд байсан боловч Украины дайны улмаас энэ үйл явц тасарсан. АНУ-ын Ерөнхийлөгч Жо Байден саяны даваа гарагт дээрх гэрээг орлох шинэ системийн талаар “даруй ярилцаж тохироход өөрийнх нь засаг захиргаа бэлэн байгааг” мэдэгдсэн. Гэхдээ Оросын талаас мөн адил санаа зорилго илэрхийлэх шаардлагатай гэдэг байр суурь илэрхийлээд байгаа юм.

Үүний зэрэгцээ Орос, Америк хоёрыг энэ гэрээний хүрээний дагуух үзлэг шалгалттай холбоотой бүх асуудлаа шийдвэрлэж, шинжээчдийг нэвтрүүлэхийг НҮБ уриаллаа. НҮБ-ын ерөнхий нарийн бичгийн дарга Антонио Гутеррешийн албан ёсны төлөөлөгчийн орлогч Фархан Хак Москвагийн дээрх шийдвэрт холбогдуулан ийм уриалга дэвшүүлснийг Риа “Новости” мэдээлсэн байна.

“Орос, Америкийн Цөмийн зэвсэглэлд хяналт тавих тухайд хоёр тал хооронд үйлчилж байгаа цор ганц хэлэлцээр гэдгээрээ энэ гэрээ олон улсын энх тайван, аюулгүй байдал болон цөмийн зэвсэг хураах, үл дэлгэрүүлэх дэглэмийн чухал бүрэлдэхүүн хэсэг. Тиймээс хоёр тал зөрчилдөөнтэй бүх асуудлаа шийдвэрлэж, энэ чухал гэрээний хяналт шалгалтыг хэрэгжүүлэх боломжийг шинжээчдэд олгох ёстой” гэж НҮБ-ын албан ёсны төлөөлөгч мэдэгдэлдээ цохон дурджээ.

Өмнөд Солонгосын Гадаад хэргийн сайд Пак Жин даваа гаригт БНХАУ-ыг зорьсон. Тэрээр Өмнөд Солонгосын шинэ Ерөнхийлөгч Юн Сук Ёл Засгийн эрхэнд гарснаас хойш БНХАУ-д айлчилж буй хамгийн өндөр албан тушаалтан болж байна.

Сөүлийн Гадаад хэргийн яамны мэдэгдэлд Пак зүүн хэсгийн Чиндао боомт хотод гурав хоног байх бөгөөд энэ үеэр Хятадын Гадаад хэргийн сайд Ван И-тэй хэлэлцээ хийнэ гэжээ.

Шинжээчдийн үзэж буйгаар Юны Засгийн газар АНУ болон БНХАУ-ын хооронд үүсээд буй хурцадмал байдлыг үл харгалзан Бээжинтэй харилцаагаа бэхжүүлэхийг хичээж байна гэж дүгнэжээ.

Тухайлбал, АНУ-ын Төлөөлөгчдийн танхимын дарга Ненси Пелоси Тайваний айлчлалаа өндөрлөөд БНСУ-д айлчилсан. Тухайн үед Ерөнхийлөгч Юн Сук Ёл ээлжийн амралтаа авсан гэх шалтгаанаар биечлэн уулзаагүй бөгөөд хоёр тал утсаар ярилцсан юм.

Түүний үйлдлийг хууль тогтоогч болон эрх баригч намынхан нь хурцаар шүүмжилсэн билээ.

Эх сурвалж: Reuters

Монгол Улсын Ерөнхийлөгч Ухнаагийн Хүрэлсүхийн урилгаар НҮБ-ын Ерөнхий нарийн бичгийн дарга Антонио Гутерреш 2022 оны 08 дугаар сарын 08-11-ний өдрүүдэд Монгол Улсад албан ёсны айлчлал хийнэ.

Ерөнхий нарийн бичгийн дарга А.Гутерреш айлчлалынхаа хүрээнд Монгол Улсын Ерөнхийлөгч У.Хүрэлсүхэд бараалхаж, УИХ-ын дарга Г.Занданшатар, Ерөнхий сайд Л.Оюун-Эрдэнэ, Гадаад харилцааны сайд Б.Батцэцэг нартай тус тус уулзалт хийнэ. Мөн НҮБ-ын Суурин зохицуулагчийн газарт зочилж, манай улсын санаачлан байгуулсан Далайд гарцгүй хөгжиж буй орнуудын Олон улсын судалгааны төвийн үйл ажиллагаа, Монгол Улсын түүх, соёл, зан заншил, байгаль, хүрээлэн буй орчинтой танилцахаар төлөвлөж байна.

НҮБ-ын Ерөнхий нарийн бичгийн дарга А.Гутерреш 1949 оны 04 дүгээр сарын 30-нд Португал Улсын Лиссабон хотноо төржээ. Тэрбээр Португал Улсын Парламентын гишүүн, Европын Зөвлөл дэх Португал Улсын төлөөлөгч, Европын Зөвлөлийн Ерөнхийлөгч, Социалист намын Ерөнхий нарийн бичгийн дарга, Социалист Интернационалын Дэд ерөнхийлөгч, Ерөнхийлөгч, Португал Улсын Ерөнхий сайд, Дүрвэгсдийн асуудал эрхэлсэн НҮБ-ын Дээд комиссарын албыг хашиж явсан туршлагатай улс төрч, дипломатч юм.

А.Гутерреш нь 2017 оны 01 дүгээр сарын 01-ний өдрөөс НҮБ-ын 9 дэх Ерөнхий нарийн бичгийн даргаар ажиллаж байгаа ба хүний эрх, эрх чөлөөг хангах, энхийн зуучлагч болж, шинэчлэл, инновацыг хөхиүлэн дэмжихийг үйл ажиллагааныхаа гол зорилт болгон ажиллаж байна.

НҮБ-ын Ерөнхий нарийн бичгийн даргын түвшинд Монгол Улсад дөрвөн удаа айлчилж байснаас хамгийн сүүлд Ерөнхий нарийн бичгийн дарга Бан Ги Мүүн 2009 онд айлчилсан.

Франц улсад түүхэнд тохиолдож байгаагүй ган гачиг нүүрлээд буй тул засгийн газар хямралтай тэмцэх багийг байгуулжээ. Тус улсын 93 бүс нутагт ундны усны хэрэглээг хязгаарлаад байна. Ерөнхий сайдын ажлын албанаас мэдээлснээр энэ нь Францын түүхэнд бүртгэгдсэн хамгийн хүнд ган гачиг аж.

Хуурай нөхцөл байдал дор хаяж 14 хоног үргэлжлэх төлөвтэй байна. Эх газрын Францыг тэр аяар нь хамарсан гэхэд болох эл ган гачиг нь тариалангийн ургацыг бууруулж, Украины дайны улмаас үүсээд байсан хүнсний хямралыг улам хурцатгаж болзошгүй. Орос, Украины үр тарианы экспорт хэвийн хэмжээнээс хамаагүй доогуур байгаа тул Европ тив хүнсний бүтээгдэхүүний үнийн өсөлттэй тэмцэж буй.

Хэт халалт зургадугаар сараас хойш үргэлжилж буй тул мод, бутнууд навчаа гөвж, эрт намар айлчилжээ. Долдугаар сард л гэхэд ердөө 9.7 мм бороо орсон нь 1961 оны гуравдугаар сараас хойших хамгийн хуурай сар болсныг Францын үндэсний цаг уурын алба мэдээлэв. Тус улсын баруун хойд болон зүүн өмнөд хэсгийн ихэнх хэсэгт ус хэмнэх үүднээс усалгаа хийхийг хориглосон байна.

Малын тэжээлд голчлон ашигладаг эрдэнэ шишийн ургац энэ жил 2021 оноос 18.5 хувиар бага байх төлөвтэй байна. Эрдэнэ шиш тариалдаг гол бүс нутаг нь зүүн боллон баруун бүс нутгийн Альзас нутаг юм. Энд ургац хураалт хэдийнэ эхэлжээ. Францаар зогсохгүй Унгар, Румын, Болгар зэрэг улсад эрдэнэ шишийн экспорт хэт халалтаас шалтгаалаад мөн л буурах төлөвтэй байна. Экспортын хэмжээ буурснаар үнэ өсөх юм.

Хятадын Ардын чөлөөлөх армийн томоохон хэмжээний цэргийн сургуулилалт Тайванийн эргэн тойронд эхэлсэнтэй холбогдуулан Тайбэй хотын Таоюань нисэх онгоцны буудал пүрэв гарагт 40 орчим нислэгээ цуцалжээ.

Энэ тухай лхагва гарагт Тайванийн “Жунши Синьвэньван” сонин агаарын тээврийн салбарын эх сурвалжаас эш татан мэдээлсэн байна.

Эх сурвалжийн мэдээлснээр, Хятадын Ардын чөлөөлөх армийн сургуулилалтууд Тайванийг дайран өнгөрдөг олон улсын маршрутыг хааж, арлын агаарын хөдөлгөөнд ихээхэн нөлөөлсөн байна. Үүнтэй холбоотойгоор нислэгийн хуваарьт зохицуулалт хийжээ.

АНУ-ын Сенатын танхим Умард Атлантын цэргийн эвсэл (NATO)-ийг өргөжүүлэх протоколыг соёрхон батлах тухай тогтоолыг баталлаа. Ингэснээр Швед, Финланд улсууд цэргийн эвсэлд нэгдэхэд нэг алхам ойртож буй.

Ерөнхийлөгч Жо Байден дээрх тогтоолыг Сенат баталсныг сайшааж, Швед, Финландыг NATO-д элсүүлэх тухай баримт бичигт гарын үсэг зурж, ойрын хугацаанд эвсэл рүү илгээхээ мэдэгдлээ.

Швед, Финланд улсууд 2022 оны 5 дугаар сарын 18-нд эвсэлд нэгдэх хүсэлт гаргасан ч Туркийн эсэргүүцэлтэй тулгарсан юм. Хожим 6 дугаар сарын сүүлээр Мадридад болсон дээд хэмжээний уулзалтын үеэр Туркийн Ерөнхийлөгч Тайип Эрдоган, Финландын Ерөнхийлөгч Саули Ниинистэ, Шведийн Ерөнхий сайд Магдалена Андерссон, Умард Атлантын эвслийн ерөнхий нарийн бичгийн дарга Йенс Столтенберг нар хэлэлцээ хийж, хоёр улсыг NATO-д элсүүлэх тухай санамж бичигт гарын үсэг зурсан билээ. Гэхдээ шинэ гишүүн элсүүлэх асуудлыг эвслийн бүх гишүүн орнууд соёрхон батлах ёстой.

АНУ-ын Конгрессын Төлөөлөгчдийн танхимын дарга Нэнси Пелоси аюулгүй байдал, эдийн засаг болон харилцан сонирхсон бусад салбарын асуудлуудыг хэлэлцэх зорилгоор Тайваньтай парламент хоорондын харилцааг өргөжүүлэх санал тавьжээ.

“Бид парламент хоорондын хамтын ажиллагаа, яриа хэлцээг өргөжүүлэхийг хүсэж байна” гэж тэрбээр лхагва гарагт Тайванийн хууль тогтоох байгууллагын дэд дарга Цай Цичантай уулзах үеэрээ мэдэгдсэн байна.

Хариуд нь Цай Цичан Н.Пелосиг “Тайванийн ард түмний агуу найз” гэж нэрлээд, аралд хийсэн айлчлалыг нь өндрөөр үнэлэв. Товч угтах хэсгийн дараа улс төрчид хэвлэлийнхний хувьд хаалттай горимд яриа хэлэлцээгээ үргэлжлүүлжээ.

АНУ-ын Төлөөлөгчдийн танхимын дарга Тайванийн парламентад хүрэлцэн ирсэн талаар хэвлэлүүд өмнө нь мэдээлсэн. Тэрбээр арлын улс төрийн намуудын төлөөлөлтэй уулзах төлөвтэй байна. Түүнийг ирэхэд нь зориулан парламентын ордны гол хаалганы орох хэсэгт улаан хивс дэвсжээ.

Н.Пелоси Тайбэйд наймдугаар сарын 2-ны орой хүрэлцэн очсон юм. ОХУ түүний айлчлалыг АНУ-ын зүгээс Хятад улсыг өдөөн хатгасан үйлдэл гэж үзсэн байна. Н.Пелосигийн Тайваньд хийсэн айлчлалтай холбоотойгоор АНУ томоохон хариу арга хэмжээтэй тулгарна гэж Хятадын ГХЯ мэдэгдээд байна.

БНХАУ-ын эсэргүүцлийг үл харгалзан АНУ-ын Төлөөлөгчдийн танхимын дарга Нэнси Пелоси Тайвань аралд айлчлал хийхээр өнгөрсөн шөнө буулаа. Түүнийг Тайванийн Гадаад хэргийн сайд Жозеф Ву, АНУ-ын Тайвань дахь төлөөлөгч Сандра Оудкирк нар угтан авсан юм. Лхагва гарагийн өглөө тэрээр Тайванийн Ерөнхийлөгч Цай Инвэнтэй уулзах төлөвтэй байна. Тайваньд буусан даруйдаа хатагтай Пелоси “Дэлхий даяар дарангуйлал, ардчилал хоёрын аль нэгийг сонгох цаг мөч тулгараад байгаа өнөө үед Тайванийн 23 сая хүнтэй АНУ эв санааны нэгдэлтэй байх нь урьд өмнөхөөсөө илүү чухал болж байна” хэмээн твиттер хуудсаараа мэдэгджээ.

Түүнийг ирэхтэй зэрэгцэн Хятадын Ардын чөлөөлөх арми (ХАЧА) өндөржүүлсэн бэлэн байдалд шилжсэнээ зарлаж, Тайванийн зүүн эрэгт пуужингийн туршилт хийн, гол арлыг тойрсон усан хилд цэргийн сургуулилалт явуулахаа зарлалаа.

Нэнси Пелосигийн Тайваньд хийж буй айлчлалыг дэмжиж АНУ-ын Сенатын 25 гишүүн мэдэгдэл гаргажээ. Уг мэдэгдэлд “АНУ-ын Конгрессын гишүүдийн Тайваньд хийж буй энэ айлчлал нь АНУ-ын Конгрессоос 1979 онд батлан гаргасан Тайваньтай Харилцах харилцааны тухай хууль, АНУ болон БНХАУ-ын хамтарсан мэдэгдэл, АНУ-ын зүгээс Тайваний асуудлаар баримталж ирсэн бодлого, зарчимтай зөрчилдөөгүй. АНУ-ын зүгээс өнөөгийн тогтсон Тайваний статусийг өөрчлөхийн эсрэг байр суурьтай байна” гэжээ.

Хятадтай найрсаг харилцаа тогтоохыг эрхэмлэдэг Тайванийн сөрөг хүчний Гоминдан нам ч уг айлчлалыг сайшаан хүлээн авчээ.

Тэгвэл БНХАУ-ын Гадаад хэргийн яам хатагтай Пелосиг Тайваньд буусан даруйд дахин эсэргүүцсэн мэдэгдэл гаргалаа. Тус яамны хэвлэлийн төлөөлөгч Хуа Чуньин “Хятад улс Тайваний тусгаар тогтнол руу чиглэсэн салан тусгаарлагчдын үйл ажиллагаа, гадны хүчин хөндлөнгөөс оролцохыг эрс эсэргүүцэж байна. АНУ Тайванийг улс төрийн хөзөр болгон тоглох оролдлогоо орхих ёстой” хэмээн мэдэгджээ.

Шинжээчдийн үзэж буйгаар айлчлалын хугацаанд Хятадаас шууд дайсагнасан цэргийн ажиллагаа явуулах магадлал бага. Гэвч хариу арга хэмжээ нь сүүлийн жилүүдэд ажиглагдсан бусад үйлдлүүдээс давах магадлалтай байна.