Category: гадаад

Зөвлөлтийн үед байгуулагдсан бөмбөгдөлтөөс хоргодох байрнуудаа сэргээн засварлах болсон тухай Казахстаны эдийн засгийн төв Алматы хотын захирагч өчигдөр мэдэгджээ.

Хотын захирагч Ерболат Досаев өчигдөр Алматы хотын Алмалы дүүргийн иргэдтэй уулзах үеэрээ энэ тухай ярьсан байна.

Казахстаны ерөнхийлөгч Касым-Жомарт Токаев ойрын гурван жилийн дотор хоргодох байруудыг сэргээн засварлахыг өөрт нь биечлэн захисан тухай тэр ярьжээ.

Ямар шалтгаанаар ийм арга хэмжээ авах болсныг иргэд асуухад Досаев тус хот газар хөдлөлтийн идэвхтэй бүсэд оршдог тул “аюулгүй байдлыг хангах үүднээс” гэж тайлбарласан байна.

Бас Зөвлөлтийн үеийн түүхэн дурсгалуудыг сэргээх ажлын нэг хэсэг гэж тайлбарлажээ.

Казахстаны хэвлэлүүдийн мэдээлснээр Алматы хотод Зөвлөлтийн үед байгуулсан 300 орчим хоргодох байр байдаг гэнэ. Эдгээрээс 100 орчим нь өнөөдөр ашиглах боломжтой байгаа ажээ.

1991 онд Зөвлөлт Холбоот Улс задарсны дараа эдгээрийн ихэнх нь дэлгүүр, ресторан, баар, казино зэрэг хувийн бизнесийн зориулалтаар ашиглагдах болсон юм байна.

Зарим хүмүүс Алматы хотын захиргааны төлөвлөгөөг Оросын цэрэг Украинд халдан довтолсонтой холбоотой гэсэн таамаг дэвшүүлжээ.

Украины дайн эхэлснээс хойш Казахстаны эрх баригчид Орос, Хятад, НАТО-гийн гишүүн Турк улстай харилцах харилцаагаа тэнцвэртэй хадгалахыг хичээж байгаа.

Мөн Украины дараа Казахстан улс Оросын түрэмгийлэлд өртөж болзошгүй гэх айдас улам нэмэгдсэн юм.

Өнгөрсөн сард Казахстаны ерөнхийлөгч Токаев үндэснийхээ батлан хамгаалах зардлыг 441 тэрбум тэнгэгээр ($939 сая) өсгөх захирамжид гарын үсэг зурж байв. Ингэснээр батлан хамгаалах төсөв нь өмнөх оны $1.7 тэрбумаас бараг 1.5 дахин өссөн юм.

Эх сурвалж: Radio Free Europe

Дэлхий дахинд алдаршсан дуучин PSY өнгөрсөн сард Өмнөд Солонгосын Ганвон мужийн Ганнюн хотод тоглолтоо хийсний дараа нэгэн эмгэнэлтэй явдал тохиолдсон билээ.

Долдугаар сарын 31-ний өдөр тоглолтын тайзыг буулгах үеэр гэрээт байгууллагын ажилтан болох 20 гаруй насны Монгол улсын иргэн өндрөөс унаж амиа алдсан юм. Талийгаач нь PSY-гийн менежмэнтийг хариуцдаг P Nation компанийн туслан гүйцэтгэгч байгууллагад ажиллаж байжээ.

Өмнөд Солонгосын эрх баригчид уг осол хөдөлмөрийн аюулгүй байдлын дүрэм журам зөрчигдсөнөөс болсон эсэхийг шалгаж байгаа.

Тэгвэл цагдаа нар Пүрэв гарагт Сөүл хот дахь P Nation компанийн төв байранд нэгжлэг явуулсан тухай Өмнөд Солонгосын хөдөлмөрийн яамны Ганвон мужийн салбар өчигдөр мэдээлжээ.

Тухайн өдрийн өглөөний 9:30 цагийн үед PSY-ийн P Nation компани болон талийгаачийн ажилладаг байсан туслан гүйцэтгэгч компанийн байранд цагдаа нар прокурорын зөвшөөрөлтэй нэвтэрсэн юм байна.

Япон улсын засгийн газар ерөнхий сайд агсан Абэ Шинзогийн төрийн ёслолын оршуулгад $1.8 саяыг зарцуулахаар болсноо өчигдөр зарлажээ.

Тус улсын түүхэнд ерөнхий сайдаар хамгийн удаан ажилласан Абэ долдугаар сарын 8-ны өдөр зэвсэгт халдлагад өртөж, амиа алдсан юм.

Хэдийгээр Японы иргэдийн олонх нь түүний оршуулгад төсвийн мөнгө зарцуулахыг эсэргүүцэж байгаа ч ерөнхий сайд Фүмио Кишида есдүгээр сарын 27-ны өдөр Токио хотын Ниппон Будокан ордонд ёслолын арга хэмжээг зохион байгуулах шийдвэр гаргасан юм.

Өчигдөр тэр энэхүү ёслол, хүндэтгэлийн ажиллагаанд зарцуулах мөнгөний хэмжээг зарлажээ.

Өнгөрсөн Ням гарагт үр дүн нь нийтлэгдсэн санал асуулгад оролцогчдын 53 хувь төрийн оршуулга зохион байгуулахыг эсэргүүцсэн байна.

Ялангуяа эрх баригч намын улс төрчдийн Өмнөд Солонгосоос гаралтай Эв нэгдлийн сүмтэй тогтоосон хэлхээ холбоо Абэгийн аллагын дараа ил болсон нь иргэдийг нэлээд бухимдуулсан юм.

Ерөнхий сайд Фүмио Кишидагийн рэйтинг унахад энэ асуудал гол нөлөө үзүүлж байгаа.

Эв нэгдлийн сүмийг дэмждэг гэсэн шалтгаанаар Абэ агсны амийг хөнөөснөө аллагын сэжигтэн мэдүүлсэн юм.

Одоо түүний сэтгэцийн эрүүл мэндийг шалгаж, үнэлэх ажил үргэлжилж байгааг хэвлэлүүд мэдээлж байна.

Япон улсын засгийн газар хамгийн сүүлд 1967 онд ерөнхий сайд агсан Шигерү Ёшидад төрийн оршуулга зохион байгуулж, зардлыг нь төсвөөс бүрэн гаргаж байжээ. Абэ Шинзогийн төрийн оршуулгын зардлыг засгийн газар, эрх баригч Либерал Ардчилсан нам хувааж гаргах юм байна.

Эх сурвалж: Aljazeera

Финландын хамгийн залуу Ерөнхий сайд гэртээ үдэшлэг зохион байгуулж, дуулж, бүжиглэж буй бичлэг цахим сүлжээнд цацагдаж дуулиан шуугиан дэгдээгээд байсан билээ. Тус бичлэг задарсан даруйд тэрээр олны шүүмжлэлд хурцаар өртөж, сөрөг хүчний намын дарга түүнийг мансууруулах бодисын шинжилгээ өгөхийг шаардаж байсан юм.

Үүнтэй холбогдуулан сөрөг хүчний улс төрчид 36 настай Ерөнхий сайд Санна Маринийг мансууруулах бодис хэрэглэсэн байж болзошгүй гэсэн хардлагыг үгүйсгэхээр шинжилгээнд хамрагдсанаа мэдэгдсэн юм. Түүний шинжилгээнээс ямар ч мансууруулах бодис илрээгүй гэдгийг тус улсын Засгийн газраас мэдэгдлээ. Тэрээр өөрийгөө хэзээ ч хууль зөрчиж байгаагүй, өсвөр насандаа ч мансууруулах бодис хэрэглэж байгаагүй гэдгээ онцолж байсан юм. Шинжилгээгээр кокайн, амфетамин, каннабис, унтуулагч бодис, дектропропоксифен гэх зэрэг мансууруулах бодисыг шалгасан гэж Залуу Ерөнхий сайдын тусгай зөвлөх Лида Валлин AFP агентлагт мэдээлжээ.

Өнгөрөгч долоо хоногт болсон хэвлэлийн бага хурлын үеэр 2019 оноос хойш Ерөнхий сайдаар ажиллаж байгаа Санна Маринаас сэтгүүлчид “Үдэшлэгт байх үед тань Засгийн газрын шуурхай бөгөөд хариуцлагатай шийдвэр гаргах тохиолдол гарсан бол та чадах байсан уу?” гэж асуухад “Би өөрийн үүрэг хариуцлагаа хангалттай сайн биелүүлдэг. Шөнө дундад Төрийн зөвлөлийн ордонд очих шаардлага нэг ч удаа гарч байгаагүй. Харин үдэшлэгт явсан тэр өдөр ямар ч хурал болоогүй” гэжээ. Мөн “Үдэшлэгт дуулж, бүжиглэж, найзуудтайгаа тэврэлдэж, согтууруулах ундаа хэрэглэснээс өөр юу ч болоогүй. 2022 онд шийдвэр гаргах түвшний хүмүүс ч дуулж, бүжиглэж, үдэшлэгт явахыг хүлээн зөвшөөрнө гэж найдаж байна” гэв.

Өнгөрөгч онд тэрээр коронавирусээр халдварласан хүнтэй ойр харилцсаныхаа дараа шөнийн клубт орсондоо хүлцэл өчиж байсан юм.

АНУ-ын төрийн болон цэргийн өндөр албан тушаал хашиж байсан 20 хүн гарын үсгээ зурж Цагаан ордонд илгээсэн нээлттэй захидалд “Орос Украины дайн бол зөвхөн энэ хоёр улсын хооронд болж буй дайн бус АНУ-ын эрх ашгийг хөндөн, дарангуйлал ялах уу,ардчилсан тогтолцоо ялах уу гэдгийг шийдэж байгаа дайн! Иймээс Цагаан ордон өөрсдийн гаргаж буй хулчганасан, шалчиганасан шийдвэрээ Украиныг шууд дэмжсэн эрс шийдэмгий шийдвэрүүдээр цаг алдалгүй,яаралтай солихгүй аваас украинчуудын гарт орж ирсэн ялалт Путинд шилжих магадлалтай болоод байна” гэж анхааруулав.

Орос, Францын ерөнхийлөгч Владимир Путинболон Эммануэль Макрон нар утсаар ярьж Запорожийн АЦС-ын асуудлыг хэлэлцэж уг АЦС-д Олон улсын МАГАТЭ-н төлөөлөгчдийг Украины газар нутгаар дамжуулан оруулахад Оросын тал бэлэн байгааг мэдэгдэв.

Ерөнхийлөгч асан Д.Трампын харшаас хураасан 20 хайрцаг материал дотор нэрийг нь ч хэлж болохгүй олон нууц материал байгаа бөгөөд хэлж болох зах зухаас нь дурдахад В.Путин, В.Зеленскийтэй хийсэн Д.Трампын ярианы бүрэн эх, АНУ–ын цахим тагнуулын сүлжээний бүрэн эх материал байсан нь Хууль зүйн яам нууцын материалын хууль зөрчсөн, эх орныхоо эрх ашигт аюул учруулсан хэргээр түүнд эрүүгийн хэрэг үүсгэх өндөр магадлалтай болоод буйг тус улсын нэр хүнд бүхий мэдээллийн хэрэгслүүд мэдээлж эхэллээ.

Украины сайн дурынхан өөрийн цэргийнхэнд зориулан Байрактар дрон худалдан авахаар 17 сая ам.доллар цуглуулаад байтал Туркийн үйлдвэр уг дроныг украинчуудад үнэгүй бэлэглэсэн тул уг мөнгөөр ямар ч цаг агаарын нөхцөлд газар дор болон байшинд буй зүйлсийг нэвт хардаг Америкийн хиймэл дагуулыг нэг жилийн хугацаатай түрээслэн өөрийн армид бэлэглэв.

АНУ–аас Украинд ээлжит 775 сая ам.долларын тусламж үзүүлэхээр шийдвэрлэж нийт тусламжий н хэмжээ 10.6 тэрбум ам.доллар болов.

Украинд байлдаж буй оросын 200 орчим цэрэг хоолны хордлого болж Крымын хойгийн эмнэлэгт хүргэгдэв.

Хайрч буй хоол наалддаггүй хайруулын таваг, ус нэвтрүүлдэггүй даавуу, гал унтраагч хөөс зэрэг олон бүтээгдэхүүнд ашиглагдаж байгаа “PFAS” хэмээх химийн бодис агаар, хөрс, усыг бохирдуулж, бага хэмжээгээр хүний биед ороход элэг гэмтээх, холестеролын хэмжээг нэмэгдүүлэх, дархлааны системийг сулруулах, хэд хэдэн хорт хавдар үүсгэх зэрэг олон эрсдэл үүсгэн хүмүүсийн эрүүл мэндэд сөргөөр нөлөөлж байгаа учир Америк, Хятадын эрдэмтдийн хамтарсан баг цельсийн 80–120 хэмийн температурт халааж, энгийн уусгагч ашиглан урвалд оруулах замаар уг бодисыг амархан задалдаг аргыг нээсэн байна.

Г.АМАРСАНАА

Олон жилийн турш Орос улс дэлхийн тавцанд илүү түрэмгий бодлого явуулах ёстой хэмээн ухуулж, Украинд явуулж буй дайныг талархан дэмжиж байсан ОХУ-ын ерөнхийлөгч Владимир Путины ойрын холбоотон, философич Александр Дугиний охин хорлогдсон тухай Оросын гол хэвлэлүүд мэдээлэв. Александр Дугин нь Оросын хэт үндсэрхэг үзлийг номлогч бөгөөд “Путины тархи”, “Путины Распутин” гэх зэргээр хочлогддог нэгэн юм.

Өнгөрсөн бямба гаригийн орой Дугин охинтойгоо хамт Москвад болсон нэгэн арга хэмжээнд оролцоод гэртээ харих болсон байна. Эхлээд тэд нэг автомашинаар явах гэж байсан ч эцсийн мөчид Дугин тусдаа унаагаар явах болжээ. Ийнхүү түүний охин Дарья Дугинагийн жолоодож явсан автомашин Москвагийн ойролцоо Большие Вяземы тосгоны дэргэд замдаа дэлбэрсэн байна.Телеграм сүлжээнд тарсан дүрс бичлэгт цочролд орсон Дугиний царай болон шатсан автомашиныг харуулж байв.

Дугиний 30 настай охин Дарья Дугина нь алдартай сэтгүүлч, Украины дайныг дэмждэг нэгэн байсан билээ. Тэрээр өнгөрсөн тавдугаар сард хэвлэлд өгсөн ярилцлагадаа Украины дайныг “соёл иргэншлүүдийн мөргөлдөөн” хэмээн нэрлэж, Өрнөдийн улсуудын тавьсан эдийн засгийн хоригт аавынхаа хамт багтсанаа бахархан ярьж байсан юм. Хөндлөнгийн ажиглагчид түүний эцэг, философич Александр Дугиний номлол ерөнхийлөгч Владимир Путины ертөнцийг үзэх үзэлд гүнзгий нөлөөлсөн гэж үздэг билээ.

Г.АМАРСАНАА

ОХУ-ын төрийн мэдлийн эрчим хүчний компани энэ сарын сүүлчээс эхлэн Герман руу чиглэсэн байгалийн хийн хоолойг засвар үйлчилгээ хийхийн тулд гурван өдрийн турш хаана гэж мэдэгдлээ. Хойд урсгалаар дамжуулан байгалийн хий нийлүүлэхээ наймдугаар сарын 31-нээс есдүгээр сарын 2-ныг хүртэл зогсооно гэж “Газпром” баасан гаригт мэдэгдэв.

Жил бүр засвар үйлчилгээ хийдэг гэсэн шалтгаанаар “Газпром” мөн долдугаар сард хоолойгоор нийлүүлэхээ зогсоосон.Үүний дараа пүүс хоолойг нээсэн боловч хүргэлт нь анхны түвшнийг бодвол 20 орчим хувьтай хэвээр байна.

Эх сурвалж: NHK Japan

Хятадын мэргэжилтнүүд дэлхийд анхны агаараар явдаг соронзон галт тэргийг туршиж эхэлжээ.

Соронзон зам дээр явдаг галт тэргийг ерөнхийд нь “maglev” (magnetic levitation) гэж нэрлэдэг. Уламжлалт “maglev” нь цахилгаан гүйдлээр соронзлогдсон зам дээр явдаг юм.

Харин Хятадад туршиж байгаа галт тэрэг нь агаарт татсан замаас дүүжлэгдэж явдгаараа онцлог. Бас цахилгаан огт хэрэглэхгүй, тогтмол соронз ашиглаж явдгаараа давуу талтай юм байна.

Тогтмол соронзон материал нь газрын ховор элементийн төрөлд багтдаг ба Хятад улс ийм түүхий эдийн дэлхийн хамгийн том олборлогч юм.

Ингэхдээ соронзын ижил туйлууд хоорондоо түлхэлцдэг зарчмыг ашигладаг тул галт тэрэг болон төмөр зам хоёр хоорондоо хүрэлцдэггүй байна.

Газраас 10 метр өндөрт өргөгдсөн 800 метр урт туршилтын замыг өнгөрсөн долоо хоногт Хятадын өмнөд бүсийн Жяньси мужийн Шиньгуо дүүрэгт нээжээ.

Туршилтын үеэр галт тэрэг цагт 80 км хурдлах ба туршилт дууссаны дараа замыг 7.5 км уртасгаж, хурдыг 120 км/цаг болгон өсгөх гэнэ.

Хэрвээ амжилттай хэрэгжвэл байгаль орчинд ээлтэй, цахилгаан эрчим хүч болон түлш ашиглалгүй зөвхөн физикийн хуулийг ашиглаж явдаг дэвшилтэт тээврийн хэрэгсэл болох юм байна.