Category: гадаад

Европ тивд кокаины гуравны нэгийг дангаараа хууль бусаар нийлүүлдэг “супер картель”-ийг зургаан улсын хууль сахиулагчид хамтран илрүүлснийг “Европол” байгууллага зарлав. Арван нэгдүгээр сарын 8-19-ны хооронд Европын орнууд болон Арабын Нэгдсэн Эмират Улсад явуулсан ажиллагааны үеэр нийт 49 сэжигтнийг баривчилсан байна. Сэжигтнүүдийн ихэнхийг Нидерланд улсаас, гол толгойлогчдыг нь АНЭУ-ын Дубай хотоос баривчилсныг “Интерпол”-ын мэдэгдэлд дурдсан байна. “Operation Desert Light” нэртэй уг ажиллагаа нууц гэмт хэргийн сүлжээний төв удирдлага, түгээх дэд бүтцийг илрүүлэх зорилготой байсныг “Интерпол” онцолжээ. Ажиллагааны үеэр Испани, Франц, Бельги, Нидерланд, АНЭУ-ын нутаг дэвсгэрээс нийтдээ 30 гаруй тонн кокаин илрүүлэн хураасан байна. Энэ нь өнөөдрийг хүртэл Европ тивээс илрүүлж байсан хамгийн их хэмжээ бөгөөд хамгийн цэвэр найрлагатай, хамгийн хямд үнэтэй кокаин байсныг мэргэжилтнүүд онцолжээ.

Талибууд засгийн эрхэнд гарч, гаднаас орж ирэх мөнгөний урсгал зогссон Афганистан улсад олон сая хүн өлсгөлөнд нэрвэгдэх аюул нүүрлэсэн өвөл ирж байна. Олон афганчууд нүүр тулсан өлсгөлөнгөөс ангижрахын тулд амьдралаа хэрхэн залгуулж байгааг “BBC” газар дээрээс нь сурвалжилжээ. Афганистаны гурав дахь том хот болох Херат хотын захад байх дайн, байгалийн гамшгаас зугтсан хүмүүсээр дүүрсэн олон мянган жижиг шороон байшингийн нэгэнд амьдардаг Абдул Вахаб “Бид хоолгүй байгаагаас манай хүүхдүүд тасралтгүй уйлж, унтаж чадахгүй байна. Бид эмийн санд очиж тэндээс тайвшруулах, унтуулах эм авч хүүхдүүддээ өгөн аргалж байна” гэж хэлжээ. “BBC”-ийн сурвалжлагч Абдул болон түүний эргэн тойронд цугларсан өөр арав орчим эрчүүдээсхүүхдүүдээ унтуулахын тулд тайвшруулах эм өгдөг эсэхийг асуухад”Бид бүгд л тэгдэг. Энд маш олон хүн тэгдэг” гэж хариулсан байна. “Бид хаана ч очсон гэр бүлээ тэжээхийн тулд цөхрөнгөө барсан алхмууд хийж буй хүмүүстэй таарч байлаа”гэж сурвалжлагч бичжээ.Аммар гэх залуу гурван сарын өмнө нэг бөөрөө зарсан байна. Тэргэдэснээсээ нуруу хүртэл үргэлжилсэн урт ягаан сорвио харуулаад “Орон нутгийн эмнэлэгт бөөрөө зарж болно гэж сонссон. Тэгээд нэг бөөрнийхөө оронд 270,000 афган (ойролцоогоор 3,100 ам.доллар) шагнал авсан” гэв. Тэрээр мөнгөнийхөө ихэнхийг нь гэр бүлээ хоол хүнсээр хангахын тулд авсан өрөө төлөхөд өгсөн аж. Бид бас хоосон, хүйтэн байшинддолоон сарын өмнө бөөрөө зарсан залуу ээжтэй уулзсан. Тэрээр мөн лөрөө төлөх гэж бөөрөө авахуулсан байна. Бөөрнийхөө төлөө тэр эмэгтэй 240 мянган афган (ойролцоогоор 2700 доллар) авчээ. “Одоо бид хоёр настай охиноо зарах гэж байна. Бидний мөнгө зээлсэн хүмүүс өдөр бүр дарамталж, өрөө төлж чадахгүй бол охиноо өг гэж шаардаж байна” гэж тэр эмэгтэй ярьсан байна.

“Би таван настай охиноо 100,000 афганаар зарсан” гэж Низамуддин гэх аав хэлэхдээ уруулаа хүчтэй хазаж, нүд нь нулимсаар дүүрч байв. Нутгийн ахмадуудын нэг Абдул Гафар “Бид Исламын хууль тогтоомжийн эсрэг, хүүхдүүддээ аюул учруулж байгаагаа ойлгож байгаа ч үүнээс өөр гарц байхгүй байна гэж хэлсэн” хэмээн “BBC”бичсэн байна.

Талибанууд нь исламын шашны тулгуур үзэлтэнгүүд юм. Харин исламын шашин нь хамгийн “залуу” шашин учир харьцангуй олон хүнийг хамардаг гэдэг билээ.

БНХАУ-ын нийслэл Бээжин, Гуанжоу болон Өрөмч хотын эрх баригчид оршин суугчид нь ковидтой тэмцэх арга хэмжээг эсэргүүцэж байгаатай холбогдуулан коронавирусээс урьдчилан сэргийлэх зарим арга хэмжээг илүү оновчтой болголоо гэж Хонконгийн “South China Morning Post” сонин мэдээлжээ.

Тус сонинд мэдээлснээр, Бээжин хотын эрх баригчид вирусний халдвар тархах эрсдэл ихтэй бүсүүдийг тогтоож, байшин, барилгад хөл хорио тогтоох шийдвэр гаргажээ. Халдварын эх үүсвэр тодорхойгүй эсвэл вирус нийгэмд хурдацтай тархаж байгаа тохиолдолд эдгээр бүсийг өргөжүүлж магадгүй. Өмнө нь эрх баригчид нэг өвчтөн илрэхэд л бүхэл бүтэн орон сууцны цогцолборуудыг “хааж” байсан юм.

Үүнээс гадна, нийслэлийн удирдлагууд эрсдэл ихтэй бүс гэж тогтоосон газруудыг хаахдаа “хатуу зүйл” ашиглахыг хоригложээ. Түүнчлэн барилга руу орох хаалгыг болон нүүлгэн шилжүүлэн гарцыг хаахыг хориглосон байна.

Өмнөд Хятадын Гуандун мужийн засаг захиргааны төв болох Гуанжоу хотод эрх баригчид ковидын хязгаарлалтын улмаас гэрээсээ гарахгүй байгаа иргэдийг өдөр бүр заавал өгөх шинжилгээнээс чөлөөлсөн байна. Тодруулбал, цахимаар хичээллэж буй багш, оюутнууд, мөн гэрээсээ ажиллаж буй ажилчдыг чөлөөлжээ.

БНХАУ-ын баруун хойд нутагт орших Шинжаан-Уйгурын өөртөө засах орны нийслэл Өрөмч хотод мөн халдвараас урьдчилан сэргийлэх арга хэмжээг сулруулжээ. Вирусний халдвар тархах эрсдэл багатай хотын дүүргүүдэд нийтийн тээвэр, хүргэлтийн үйлчилгээг сэргээсэн байна. Тус хотод ковидтой тэмцэх арга хэмжээг эсэргүүцсэн жагсаал болсны дараа ийм шийдвэр гарчээ.

Хятадад өрнөсөн эсэргүүцлийн жагсаал

Өнгөрсөн амралтын өдрүүдэд Хятадын хэд хэдэн хотод ковидтой тэмцэх арга хэмжээг эсэргүүцсэн жагсаал болсон юм. Бээжин хотын Чаоян дүүрэгт болсон эсэргүүцлийн жагсаалд л гэхэд хэдэн зуун хүн оролцжээ. Жагсагчид эрх баригчдаас ковидтой тэмцэх арга хэмжээг сулруулахыг шаардсан байна. Жагсагчдын зарим нь “11 дүгээр сарын 24-нд Өрөмч хотод амиа алдсан эх орон нэгтнүүдийн дурсгалд зориулав” гэсэн бичигтэй цаас барьсан байжээ.

Олон нийтийг хамарсан эсэргүүцлийн жагсаал өрнөх болсны нэг шалтгаан нь Хятадын Шинжаан-Уйгурын өөртөө засах орны Өрөмч хотын нэгэн өндөр байшинд өнгөрсөн долоо хоногийн пүрэв гарагт гарсан гал юм. Энэхүү эмгэнэлт явдлын улмаас 10 хүн амиа алдаж, есөн хүн түлэгдэж гэмтсэн байна. Тус байрны оршин суугчдыг ковидын дэгдэлтийн улмаас хөл хорионд оруулсан байжээ.

Хорионд орсны улмаас иргэд орон сууцнаас хурдан гарч чадаагүй, зам хаасны улмаас гал сөнөөгчид, тусгай техник хэрэгсэлтэйгээ ослын газарт очиход удсан гэх батлагдаагүй мэдээлэл Хятадын олон нийтийн сүлжээгээр гарсан юм. Харин эрх баригчид энэ мэдээллийг үгүйсгэсэн байна.

Дэлхийн эрүүл мэндийн байгууллага /ДЭМБ/ сармагчны цэцэг өвчний нэршлийг ялгаварлан гадуурхах үзэгдлээс ангид байлгахын тулд “mpox” болгон өөрчилсөн талаараа даваа гарагт мэдэгдлээ.

ДЭМБ-ийн хэвлэлийн мэдэгдэлд дурдсанаар, “mpox” болон сармагчны цэцэг гэх хоёр нэршлийг нэг жилийн хугацаатай хамтад нь хэрэглэж, улмаар цаашид сармагчны цэцэг гэх нэршлийг хэрэглээнээс хална.

Энэ оны долоодугаар сард ДЭМБ сармагчны цэцэг өвчний тархалт эндемик болсон Африкийн орнуудаас гадна олон улс оронд бүртгэгдсэнтэй холбогдуулан олон улсын хэмжээнд онцгой байдал зарласан юм.

ДЭМБ-ын мэдээллээр бямба гаргийн байдлаар, дэлхийн 110 улс оронд халдварын 81 107 тохиолдол батлагдаж, 55 хүн нас барсан байна. Өнгөрсөн дөрвөн долоо хоногт илэрсэн тохиолдлуудын дийлэнх нь Америк /92.3 хувь/, Европт /5.8 хувь/ илэрчээ.

Дэлхийн хэмжээнд 11 дүгээр сарын 21-27-ны өдрүүдэд илэрсэн халдварын тохиолдлын тоог өмнөх долоо хоногийнхтой харьцуулахад 46.1 хувиар буурсан байна.

Сармагчны цэцэг өвчний хамгийн олон тохиолдол АНУ /29 001/, Бразил /9905/, Испани /7405/, Франц /4107/, Колумби /3803/, Их Британи /3720/, Герман /3672/, Перу /3444/, Мексик /3292/, Канадад /1449/ илэрсэн бөгөөд эдгээр нь дэлхийн хэмжээнд илэрсэн нийт тохиолдлын тоо 86 хувийг эзэлж байна гэж “Agence France-Presse” агентлаг мэдээлжээ.

Түрэгийн орнуудын байгууллага (ТОБ) нь түрэг үндэстнүүдийн хамтын ажиллагааны олон улсын байгууллага бөгөөд тус байгууллагын IX дээд хэмжээний уулзалт энэ сарын 11-12-нд Узбекистаны Самарканд хотноо болж өнгөрлөө. Дээд хэмжээний уулзалтад тус байгууллагын гишүүн Азербайжан, Казахстан, Кыргызстан, Турк, Узбекистан болон ажиглагч Туркменистан, Унгар улсын төрийн тэргүүн нар оролцлоо. Тус байгууллагыг Түрэгийн зөвлөл нэртэй 2009 онд байгуулж, өнгөрсөн жилээс ТОБ болон өргөжин тэлжээ.

Уулзалтад Азербайжаны Ерөнхийлөгч И.Алиев, Казахстаны Ерөнхийлөгч К.Токаев, Кыргызстаны Ерөнхийлөгч С.Жапаров, Туркийн Ерөнхийлөгч Р.Эрдоган, Туркменистаны Ардын их хурлын дарга Г.Бердымухамедов, Унгарын Ерөнхий сайд В.Орбан нар оролцож, уулзалтыг Узбекистаны Ерөнхийлөгч Ш.Мирзоёев Самарканд хотын “Мөнхийн хот” цогцолборт зохион байгуулж, удирдан явууллаа (зураг дээр).

Дээд хэмжээний уулзалтыг “Түрэгийн соёл иргэншлийн шинэ эрин үе: хамтын хөгжил цэцэглэлтийн замд” сэдвийн дор явуулж, “Түрэг ертөнцийн алсын хараа-2040” үзэл баримтлал, Түрэгийн орнуудын байгууллагын ирэх таван жилийн стратеги, гишүүн болон ажиглагч орнуудын хамтын ажиллагааны улс төр, эдийн засаг, худалдаа, тээвэр, гаалийн салбар дахь төсөл, баримт бичгүүдийг хэлэлцэж, Самаркандын тунхаглалыг батлан гаргалаа. Улмаар гишүүн орнууд хоорондын худалдааг хөнгөвчлөх, гаалийн хялбаршуулсан коридор, Түрэгийн Хөрөнгө оруулалтын сан, Түрэгийн Хөгжлийн банк байгуулах шийдвэр гаргалаа. Мөн Узбекистан-Кыргызстан-Хятад болон Термиз-Мазари-Шариф-Кабул-Пишеверын чиглэлийн төмөр замын бүтээн байгуулалтыг эхлүүлэх, Баку-Тбилиси-Карсын төмөр замын шугамын хүчин чадлыг нэмэгдүүлэх, Европ-Азийг холбосон бусад тээврийн холболтыг төрөлжүүлэх, усан цахилгаан станц барих төслүүдийг дэмжлээ.

Уулзалтын төгсгөлд гаргасан Самаркандын тунхаглалд Түрэгийн ертөнцөд хамтын ажиллагааг цаашид гүнзгийрүүлэх, ялангуяа эдийн засгийн салбар дахь интеграцийг улам өргөжүүлэх, тус байгууллагыг бүс нутаг, дэлхийд нөлөөлөхүйц олон улсын бүтэц болгон хөгжүүлэх, олон улсын тавцанд ч, дэлхийн дэг журам, аюулгүй байдалд тулгарч буй сорилтуудын хүрээнд ч Түрэгийн орнууд ижил зарчим, үнэт зүйлийг баримталж, бие биедээ тогтвортой, найдвартай түнш байх, засгийн газар, төрийн байгууллагуудын хоорондын байнгын зөвлөлдөх уулзалтыг үргэлжлүүлэх, батлан хамгаалах үйлдвэр, цэргийн салбарын асуудлыг нягт уялдуулахаар тусгажээ.

Дээд хэмжээний уулзалтаар Узбекистан тус байгууллагыг даргалах дараагийн үүрэгт ажлыг Казахстанд хүлээлгэн өгсөн бөгөөд мөн бүрэн эрхийн хугацаа нь дуусгавар болсон Ерөнхий нарийн бичгийн дарга Б.Амреевын оронд Кыргызстан улсын элчин сайд К.Омуралиевыг батламжиллаа.

Уулзалтын үеэр Түрэгийн ард түмний эв нэгдлийг бэхжүүлэх үйлсэд оруулсан хувь нэмрийг үнэлж, Туркменистаны Ерөнхийлөгч асан Г.Бердымухамедов, Туркийн Ерөнхийлөгч Р.Эрдоган нарыг Түрэгийн ертөнцийн дээд одонгоор шагналаа. Шагналыг хурал даргалагч Узбекистаны Ерөнхийлөгч Ш.Мирзоёев гардуулсан болно.

Уулзалтаар 2023 оныг “Түрэгийн соёл иргэншлийн жил” болгон зарласан бөгөөд энэ удаагийн дээд хэмжээний уулзалтын уриа нь “Түрэг соёл иргэншлийн шинэ эрин үе, дэлхийн дэг шинэ журамд Түрэгийн орнуудын аюулгүй байдал, тогтвортой хөгжил, хамтын ажиллагаа, хөгжил цэцэглэлтийн замд хамтдаа” гэсэн агуулгатай байгаа нь цаашдын хөгжлийн чиг хандлагыг өөдрөгөөр тодорхойлоход хүргэж байна.

ЭХ СУРВАЛЖ: iss.gov.mn

Канадын эрх баригчид Энэтхэг-Номхон далайн бүс нутгийн эдийн засаг, дипломат харилцааныхаа шинэ стратегийг танилцуулж, тус бүс нутагт хөрөнгө оруулахад бараг 2.3 тэрбум канад доллар (1.65 тэрбум евро) хуваарилж байгааг танилцуулав. Уг баримт бичгийг өнгөрсөн ням гарагт тус улсын засгийн газрын “вэбсайтад” нийтэлсэн байна.

“Энэ стратеги нь ирэх 10 жилд Энэтхэг-Номхон далайн бүс нутагт үйл ажиллагаагаа гүнзгийрүүлэх, бүс нутгийн энх тайван, аюулгүй байдалд тус улсаас оруулах хувь нэмрийг нэмэгдүүлэх, эдийн засгийн өсөлт, уян хатан байдлыг бэхжүүлэхэд чиглэсэн иж бүрэн замын зураглал юм” гэжээ. Мөн тус бүс нутгийн кибер аюулгүй байдлыг ханган хөгжүүлэхэд Канадын тэнгисийн цэргийн оролцоог бэхжүүлэх, Канадын Зэвсэгт хүчний тус бүс нутгийн цэргийн сургуулилтад оролцох оролцоог нэмэгдүүлэхэд 540 орчим сая доллар зарцуулахаар төлөвлөсөн байна. Энэ мөнгөний 240.6 сая нь бүс нутгийн худалдаа, хөрөнгө оруулалтыг өргөжүүлэх, 750 сая нь Канадаастус бүс нутагт хувийн хэвшлийг хөгжүүлэхэд зориулагдах гэнэ.

Энэхүү стратегийн нэлээд хэсэг нь Канадын Хятадтай харилцах харилцааг хөгжүүлэхэд зориулагдсан бөгөөд уг баримт бичигт ” Хятад бол дэлхийд улам бүр аюул учруулах гүрэн” гэж тодорхойлсон байна. “Хятад улсын ашиг сонирхол, өөрийн үнэт зүйлсдээ илүү таатай орчин бий болгох эрмэлзлэл нь олон улсын дэг журам, манай улсын эрх ашигтай улам бүр зөрчилдөж байна” гэж уг стратегид онцолжээ. Гэсэн ч уг баримт бичигт “Хятадын асар том хэмжээ, нөлөө нь цаг уурын өөрчлөлт, биологийн олон янз байдлыг хамгаалах, дэлхийн эрүүл мэнд, цөмийн зэвсгийн тархалт зэрэг дэлхийн амар амгалан оршин тогтнох, учирч буй сорилтуудыг шийдвэрлэхэд тэдэнтэй хамтран ажиллах зайлшгүй шаардлагыг бий болгож байна” гэдгийг хүлээн зөвшөөрч, Хятадын эдийн засаг “Канадын экспортлогчдод чухал боломжууд олгож байдаг” гэж онцолсон байна.

“Канад улс үндэснийхээ эрх ашгийг ямагт тууштай хамгаалах болно. Бидний Хятадад хандах хандлага нь өнөөгийн Хятад улсын талаар бодитой, ухаалаг үнэлэлт дүгнэлтэнд суурилж байна. Үзэл бодлын гүн гүнзгий хагарал үүсэх асуудал дээр бид Хятадын эсрэг хатуу байр суурь баримтлах болно” гэж уг стратегид дурджээ.

Канад улсын худалдааны 68 хувийг АНУ, харин Хятад долоон хувийг бүрдүүлдэг гэж “Ройтерс” агентлаг онцолжээ. Канад улсаас өмнө Их Британи Хятад улсыг өөрийн гол дайсан улс хэмээн зарлаад байсан юм.

Г.АМАРСАНАА

ОХУ тив хоорондын шинэ “Сармат” баллистик пуужингийн туршилтыг бүрэн дуусгаж, ирэх сард зэвсэглэлд оруулахаар үйлдвэрлэж эхэлсэн[1] бөгөөд тус пуужин нь агаарын довтолгооноос хамгаалах системийг даван туулах чадвартай төдийгүй хэт авианы “Авангард” пуужингийн цогцолборыг сансарт гаргах чадалтай.

Ойрын 50 жилд Оросын стратегийн цөмийн зэвсэглэлийн үндсийг бүрдүүлэх үүрэг зориулалттай тав дахь үеийн тив хоорондын цөмийн пуужин “Сармат” буюу “Сатан-2” нь 200 тонн жинтэй, 35 метр урттай, секундэд 7 км хурдтай, 18000 км алсын тусгалтай, тус бүр нь 750 килотонн хүчин чадалтай арван цөмийн цэнэгт байлдааны хошуу тээх чадалтай.

Өмнөх Сатан-1 буюу РС36 пуужингийн хөдөлгүүр, эд ангийг Украинд үйлдвэрлэж байснаас шалтгаалж, шинэ хөдөлгүүрт суурилсан шинэ загварын “Сармат” пуужинг сүүлийн арваад жилийн хугацаанд зохион бүтээж, энэ онд багтаан зэвсэглэлд оруулахаар үйлдвэрлэж эхлээд байна.

ОХУ “Сармат” пуужинг Красноярскад үйлдвэрлэж, тус хязгаарын Ужур суурины 62 дугаар пуужингийн дивиз, Оренбург мужийн Ясное суурины 13 дугаар пуужингийн дивизийг эхний ээлжид зэвсэглэж, 2025 он гэхэд Стратегийн цөмийн хүчнээ “Сармат” пуужингаар бүрэн зэвсэглэж, дуусгах төлөвлөгөөтэй аж.

Сарматын тусламжтай сансарт хөөргөх “Авангард” хэт авианы пуужингийн цогцолбор нь 27 мах буюу секундэд 9 орчим км хурдтай, өндөр маневрлах чадвартай, одоо байгаа пуужингийн болон агаарын довтолгооноос хамгаалах системийг нэвтлэх чадвартай.

“Сармат” пуужингийн анхны туршилтыг 2022 оны дөрөвдүгээр сарын 20-нд хийж, Плесецкийн сансрын буудлаас хөөргөсөн тус пуужин Камчаткийн Курагийн сургалтын талбайн байг оносон бөгөөд хоёр дахь туршилтыг мөн саяхан 11 дүгээр сарын 18-нд амжилттай хийсэн.

Эх сурвалж: iss.gov.mn

Хятадын коммунист намын ХХ их хурал дээр тус улсын тэргүүн Си Жиньпин “0-COVID” үйл ажиллагааг үргэлжлүүлнэ, баячуудын хөрөнгийг хурааж ядуучуудад өгөх ажлаа үргэлжлүүлнэ гэж хэлсэн. Эдгээр бодлогооос шууд шалтгаалж Хятадын эдийн засгийн гол тулгуурууд болох үл хөдлөх хөрөнгийн гүйлгээ царцаж, үйлдвэрлэл, худалдаа хумигдаж эхлэв. БНХАУ-ын экспорт, импорт өнгөрсөн сард гэнэт уналтад орсон нь 2020 оны тавдугаар сараас хойшхи анхны нэгэн зэрэг явагдсан том уналт болсон. Аравдугаар сард экспортын тээвэрлэлт өмнөх оны мөн үетэй харьцуулахад 0.3 хувиар буурч, есдүгээр сард 5.7 хувийн өсөлттэй байсан эдийн засагт огцом эргэлт гарсан нь 4.3 хувиар өснө гэж байсан эдийн засгийн шинжээчдийн хүлээлтээс хамаагүй бага үзүүлэлт болов.

“Capital Economics”-ийн эдийн засагч Зичун Хуан “Ирэх улиралд экспорт улам буурна гэж бид тооцоолж байна … Хятадын төр засгийн санхүүгийн түрэмгий бодлого буюу их мөнгө олох тусам нь их мөнгө улс хурааж авах бодлого, өндөр инфляциас шалтгаалсан бодит орлогын бууралт ирэх онд Хятадын эдийн засгийг уналтад оруулна гэж бид үзэж байна” гэжээ. “Ройтерс” агентлаг хятадын гаалийн мэдээлэлд тулгуурлан тус улсын автомашины экспортын тоо хэмжээ өмнөх оны мөн үетэй харьцуулахад огцом буурч, 60 хувьд хүрсэн нь Хятадын эдийн засагт бараа бүтээгдэхүүний эрэлт буурч үйлчилгээ рүү шилжиж байгааг харуулж байна гэж мэдэгдэв. Импортын ачаа эргэлт 9-р сард 0.3 хувийн өсөлттэй байсан нь өмнөх үеэс 0.7 хувиар буурч, 2020 оны 8-р сараас хойшхи хамгийн сул үр дүн болов. Дэлхий дахины эдийн засгийн өсөлтийн удаашралтаас гадна дотоодын эрэлт суларч байгаа нь Хятадын эдийн засагт илүү их дарамт учруулах болно гэж шинжээчид үзэн “Дотоодын эрэлт хангалтгүй байгаа нь Хятадын богино хугацааны сэргэлт, урт хугацааны өсөлтөнд саад болж байна” гэж “Jones Lang Lasalle”-ийн ахлах эдийн засагч Брюс Панг хэлэв.

Царт тахал гараад бараг гурван жил болж байхад Хятад улс “COVID-19”-ийн эсрэг хатуу бодлого баримталж, эдийн засагтаа ихээхэн хохирол учруулж, нийтийг хамарсан бухимдал үүсгэсээр байна. Хамгийн гол нь Си даргын “0-COVID”, баячуудын хөрөнгийг ядуучуудад өгнө гэдэг бодлого хятадын иргэдийн амьдралын төвшинг эрс бууруулж магадгүй болоод байна. Ингэх аваас БНХАУ дотроосоо бут үсрэх болно. Учир нь хятадууд хэнээр удирдуулж буйгаа огт тоодоггүй, харин амьдрал нь буурангуут шууд босдог онцлогтой ард түмэн. Иймээс хятадууд бусад улсаас хамгийн олон буюу 10-н түүхэн том бослого гаргаж хамгийн урт буюу 1927-1950 он хүртэл иргэний дайн хийж байсан ард түмэн билээ. Ядаж байхад “0-COVID” гэх хатуу хөл хорио тогтоосон хотуудад дарга нарын ойрын хамаарал бүхий этгээдүүд иргэдийн хүнс, өргөн хэрэглээний барааны ханган нийлүүлэлтийг хариуцан баяжиж байна гэсэн мэдээлэл нийтийн сүлжээгээр тараад байгаа нь иргэдийн эсэргүүцэл, дургүйцлийг өдөөгөөд байна.

Шинжаан-Уйгурын Өөртөө засах орны Өрөмч хотод коронавирусын эсрэг хатуу хязгаарлалтыг эсэргүүцсэн олныг хамарсан эсэргүүцлийн бичлэг Хятадын олон нийтийн сүлжээнд тавигджээ. Нийт 10 хүн амиа алдсан орон сууцны өндөр байшинд гал гарсны дараа жагсаал эхэлсэн гэж мэдээлж байна. Уг бичлэгт орон нутгийн оршин суугчид олонх нь маск зүүж, харанхуй болсны дараа хотын гудамжинд цугларч байгааг харуулжээ. Үүний дараа цагдаа нартай жагсагчдын сөргөлдөөн эхэлж, хүмүүс “Ковидын хязгаарлалтанд төгсгөл!” хэмээн хашгирч байв. Өөр нэг бичлэгт олон хүн үймээн самуун дэгдээн тусгай хаалтыг нэвтэлж байгааг харуулав. Жагсаал болсон газрын байршлыг “Ройтерс” агентлаг баталгаажуулсан бол өнгөрсөн баасан гарагийн орой “ВВС”-ийн дамжуулалтаар хотын захиргааны гадаа цугларсан эсэргүүцэгчдийн жагсаалыг бас харуулав. Мөн Гуанжоу хотод гарсантай адил явдал өнгөрсөн ням гаригт шилжих шөнө Бээжин, Сиань, Чунцинь, Нанжин зэрэг том хотуудад болж иргэд төр, засгийнхаа эсрэг жагсжээ. Олон нийтийн сүлжээнд тавигдсан видео бичлэгүүд дээр жагсаж буй залуус “Коммунист нам зайл! Си Жиньпин зайл!” хэмээн хашгиралдаж байв. Цагдаа нар удалгүй баривчилгаа явуулж эхэлсэн байна. Цар тахал эхэлснээс хойш бараг гурван жилийн дараа ч гэсэн Хятадын хил хүртэл хаалттай хэвээр байна. Энэ бол хятадын коммунистууд иргэдээ ковидын вакцинд бүрэн хамруулаагүй гэсэн үг гэж зарим судлаачид онцолсон байна. Мөн эдгээр хотоос гадна Бээжин, Нанжин хотын их дээд сургуулиудын оюутнууд коммунист төр, засгийн бодлогыг эсэргүүцэн жагсаал хийж эхэлжээ.

Дарангуйлагч дэглэмтэй Хятадад төр засгаа шууд эсргүүцсэн ийм ил тод илрэл маш ховор болдог гэж барууны хэвлэлийн агентлагууд гайхаж байгаагаа нуулгүй онцлон тэмдэглэсэн байна.

Урд хөршийн Коммунист засаглал уруудах замдаа оров.

Г.Амарсанаа

Кремлийн хэвлэлийн алба өнгөрсөн баасан гарагт ОХУ-ын ерөнхийлөгч Владимир Путин Украины эсрэг дайнд оролцож буй дайчилгаа, гэрээт цэрэг, сайн дурынхны эхчүүдтэй уулзсан тухай мэдээлэв. Энэхүү арга хэмжээ Путины Ново-Огарёво дахь өргөөнд болсон байна. ОХУ-ын ерөнхийлөгчийн хэвлэлийн албаны албан ёсны мэдээгээр Оросын Холбооны Улсын янз бүрийн субьект, түүнчлэн ОХУ-д нэгдсэн Украины бүс нутгаас ирсэн 17 эмэгтэй оролцсон уулзалтын танилцуулга хэсгийн видео бичлэгийг олон нийтэд тараажээ.

“We Can Explain”агентлаг уг уулзалтанд Нэгдсэн Орос намын орлогч дарга Ольга Белцева, Москва муж дахь Бүх Оросын Ардын фронтын гүйцэтгэх хорооны дарга Юлия Белехова,намын гишүүн Марина Мигунова, Уст-Абакан хотын дайчлагдсан хүмүүсийн хүмүүнлэгийн тусламжийн зохицуулагч “Байлдааны ахан дүүс” байгууллагын тэргүүн Надежда Узунова, үнэн алдартны шашинд тулгуурлан “эх оронч” кино найруулдаг Олеся Шигина зэрэг Кремлийн албан ёсны төлөөлөл болохэмэгтэйчүүд оролцсон бөгөөдхарин тэдний төрөл төрөгсөд Украинд тулалдаж байгаа эсэх нь тодорхойгүй байна гэжтэмдэглэжээ.

Путин Украинд тулалдаж буй хүмүүсийн ээжүүдтэй уулзах гэж буйг Кремль арваннэгдүгээр сарын 22-нд зарласан. Иймээс дайчлагдсан болон хугацаат цэргийн алба хаагчдын төрөл төрөгсдийг нэгтгэсэн “Цэргийн эхчүүдийн хороо” болон “Эхчүүдийн зөвлөл”-ийн аль аль нь Путинтэй уулзахыг хүссэн боловч манай төлөөлөгчдийг оролцуулаагүй, харин урьдчилан бэлтгэсэн “халаасны эмэгтэйчүүд”-ийг урьсан гэжэдгээр байгууллагын удирдлага мэдэгдсэн болохыг уг агентлаг онцолсон байна. Уг уулзалтын нийт 7-н минутын бичлэг дээр В.Путин хөвгүүд нь Украинд амь үрэгдсэн эхчүүдэдхандан “”Хэзээ нэгэн цагт бид бүгд энэ хорвоог орхих болно. Энэ бол зайлшгүй. Гол асуулт нь бид хэрхэн амьдарч байсан юм гэдэгт байгаа юм. Зарим хүмүүс амьдралаа огт ойлгомжгүй өнгөрөөдөг. Манай улсад жилд 30-н мянган хүн авто ослоор, мөнтооны хүн архинд хордож үхдэг.Харин таны хүүгийн зорилго биелсэн. Тэр эх орноо хамгаалж амьдралаа утга учиртай өнгөрөөсөн” гэж хэлжээ.Түүнийхээр хүний нутагт гэнэт довтолж, цэргийн хамаагүй илүү хүчээр дайрсан ч ялагдаад эхлэнгүүт энгийн иргэдийг нь устгаж, эд хөрөнгийг нь дээрэмдэж, эмэгтэйчүүдийг хүчиндэж, хүүхдүүдийг алж буй нь эх орноо хамгаалж байгаа явдал юм байна. Бас авлигад идэгдсэн ОХУ-д “2018 оноос жил болгон үхэл төрөлтөөс дунджаар 1,2%-иар нэмэгдэж, хүн амынхаа өсөлтөөр 221 улсаас 201-д жагсах болж, зөвхөн архидалтаас 2020 онд50435 хүн нас барж, энэ тоо жилээс жилднэмэгдэжбайна”гэсэн “Росстат”-ынх нь албан албан ёсны мэдээ болон өөрсдийнх нь судалгаагаар энэ улсын насанд хүрэгчдийнх нь 80% хувь архи байнга хэрэглэж, найман сая хар тамхичинтай болоод буйн гол буруутан хэн юм бол?!

Дайчилгаа ээлжит цэрэг татлага биш. Энд 18-тай залуучууд бус амьдрал үзсэн, юмны цаад наадахыг ойлгох боловсролтой хүмүүс татагдана. Путин эхчүүдтэй уулзаж, ээлжит хуурамчжүжгийнхээ гол дүрд өөрөө тоглож байна гэдэг Оросын дайчилгаа дампуурч эхэлсний том дохио. Өөр юу ч биш.

Г.АМАРСАНАА