Өмнөд Солонгост осолдсон “Sewol” хөлгийн ахмад Ли Жүн Сеок болон ахлах инженер, түүний нэг, хоёрдугаар орлогчийг хүн амины хэрэгт буруутган яллаж буйгаа мөрдөн байцаах ажиллааг явуулж буй ахлах прокурор Ян Жүн Жин мэдэгджээ. Хэрэв тэднийг шүүхээс гэм буруутай гэж үзвэл бүх насаар нь хорих ажээ. Мөн хөлөг онгоцны 11 ажилтанг аюулгүй ажиллагааг хангаж чадаагүй гэдэг үндэслэлээр яллахаар болжээ. Дөрөвдүгээр сарын 16-нд болсон дээрх ослоор 284 зорчигч амиа алдаж, сураггүй алга болсон 20 гаруй хүнийг одоо болтол хайсаар байна.
Өнөөдөр орой Каннын олон улсын кино наадам эхэлж албан ёсоор нээлтээ хийх юм. 67 дахь удаагаа болж буй уг наадам нь 12 хоног үргэлжлэх бөгөөд нээлтээ Францын найруулагч Оливье Даанагийн “Монакогийн гүнж” киноогоор хийх гэнэ. Уг бүтээлийг Оскарын шагналт нэрт жүжигчин, Монакогийн гүнтэй гэр бүл болсон Грейс Келлигийн амьдралаар сэдэвлэн хийжээ. Гол шагналын төлөө дэлхийн 11 орноос ирүүлсэн 18 кино өрсөлдөх юм. Энэ жил шүүгчдийн бүрэлдэхүүнд Францын жүжигчин Кароль Буке, Америкийн жүжигчин Уиллем Дефо, Мексикийн жүжигчин Гаэль Гарсиа Берналь, Өмнөд Солонгосын жүжигчин Чон До Ен нар оржээ.
Нигер дахь “Боко Харам” хэмээх лалын бүлгийнхэн 200 охидыг хулгайлсан хэрэг өнгөрсөн дөрөвдүгээр сарын 14-нд гарсан билээ. Тэднийг хаана барьцаалсан тухай тодорхой мэдээлэл одоо болтол байхгүй байгаа. Нигерийн Борно мужийн захирагч охидуудын байгаа талаар мэдээлэл авсан хэмээн ВВС-д мэдээлжээ. Тиймээс үүнийг шалгуулахаар цэргийнхэнд мэдэгдсэн байна. Ямар ч байсан барьцаалагсад нь Нигерт байгаа гэдэг нь тодорхой аж. 
Украины Донецк, Луганск мужуудад тус бүс нутаг нь цаашид бүгд найрамдах улс болох эсэх талаар өчигдөр бүх нийтийн санал асуулга явуулсан байна. Донецк мужийн Сонгуулийн төв хорооны тэргүүний мэдэгдсэнээр саналын хуудсыг харьцангуй тоолсон аж. Санал хураалтанд оролцогсдын 89.7 хувь нь тусгаар улс байгуулах хүсэлтэйгээ илэрхийлжээ. Харин Луганск мужид болсон санал хураалтын дүнг өнөөдөр тус мужийн нийслэлд болох цуглаан дээр зарлах гэнэ.