Category: гадаад

Өмнөд Солонгосын армийн мэдээлснээр Хойд Солонгосын дронуудхоёр улсын хилээр хэд хэдэн удаа нэвтэрчээ. Өмнөдийн Кёнги мужийн хилийн бүсээрХойд Солонгосын дронууд орон нутгийн цагаар 10:30-д Өмнөд Солонгосын агаарын орон зайг зөрчсөн гэж тус улсын штабын дарга нарын нэгдсэн хороо мэдэгдэв. Эдгээр дронуудын нэг нь Сөүлийн хойд дүүрэг дээгүүр ниссэн аж.

Өмнөд Солонгосын арми хэд хэдэн удаа анхааруулах буудлага хийж, дараа нь сөнөөгч онгоц, нисдэг тэрэгнүүдээ хөөргөсөн байна. Энэхүү хамгаалах ажиллагаанд оролцсон Өмнөд Солонгосын цэргийн нисэх онгоцны нэг болох “КА-1” гэх хөнгөн дайрагч онгоц осолдсон бөгөөд хоёр нисгэгч нь шүхрээр бууж амжсан аж.

Тус улсын Агаарын цэргийн хүчний албан мэдээгээр, Сөүл хотын хойд хэсэгт орших Хоенсонг суурин дээгүүр ниссэн дрон удалгүй газарт унасан байна.

Сүүлийн үед Пхеньян нэлээд олон пуужингийн туршилт хийсэн бөгөөд эдгээр дроны нислэг нь Солонгосын хойгийн хурцадмал байдал шинэ үе шатанд гарсны нотолгоо болж байна.

Өмнөд Солонгосын цэргийн өндөр албан тушаалтан “Манай арми Хойд Солонгосын энэхүү өдөөн хатгалгад хатуу хариу арга хэмжээ авах болно” гэж мэдэгдсэн бөгөөд хамгийн сүүлд таван жилийн өмнө 2017 оны зургадугаар сард хоёр Солонгосынхурцадмал байдал дээд цэгтээ хүрэх үед Хойд Солонгосын дронӨмнөдийн хилээр нэвтэрч байсан гэж“BBC” мэдээлэв.

Г.АМАРСАНАА

Барууны орнууд Оросын нефтэд үнийн дээд хязгаар тогтоосны эсрэг хариу арга хэмжээ авах зарлигт Путин гарын үсэг зурлаа. Түүний зарлигаар үнийн дээд хязгаарыг шууд болон шууд бусаар даган мөрдөж байгаа бүх улс орон, компаниудад Оросын нефтийг борлуулахгүй байхаар шийдвэрлэжээ.

Энэ сарын эхээр “Их 7”-гийн бүлгийн орнууд болон Европын Холбоо, Австрали улсууд Оросын экспортын газрын тосонд нэг баррель нь 60 ам.доллар байх үнийн дээд хязгаарыг тогтоох зөвшилцөлд хүрсэн нь энэ сарын 5-наас хүчин төгөлдөр болж хэрэгжиж эхэлсэн. Энэ шийдвэр нефтийн борлуулалтын үнэ баррель нь 60 ам.долларыг давбал Оросын нефтийн тээвэрлэлтэд даатгал, санхүүгийн үйлчилгээ үзүүлэхийг хориглоно гэж заасан юм.. Харин барууны энэ хоригт нэгдсэн орнуудад оросын нефтийг нийлүүлэхгүй байх Путины шийдвэр ирэх оны 2-р сарын 1-нээс 7-р сарын 1-нийг хүртэл таван сарын хугацаатай үргэлжлэх аж. Гэхдээ энэ хугацаанд хоригт хамрагдсан зарим улсуудад нийлүүлэлтийн “Тусгай зөвшөөрөл” өгч болно гэж Путины зарлигт тусгажээ.

Украйны Бахмут хот руу довтолж буй “Вагнер”-ийн хөлсний цэргүүд Оросын жанжин штабын дарга Валерий Герасимов фронтын шугамд хангалттай хэмжээний сум нийлүүлэхгүй байгааг буруутгаж, доромжилсон бичлэгийг тэднийг үүсгэн байгуулагч Евгений Пригожин дэмжсэн байна. Хөлсний цэргүүд гэрээт цэргүүдээс илүү гэдгийг харуулах гэсэн ийм “мөргөлдөөн” гарах нь Путины эхлүүлсэн дайны 11 дэх сард энгийн үзэгдэл болоод байгааг “BBC” онцолжээ.

“Жанжин штабын дарга аа! Чи бол пидор!(Оросын ижил хүйстнийг доромжилсон нэр – BBC), хараал идсэн чөтгөр царайлсан******* (тааламжгүй үг)! Бидэнд сум байхгүй, тэнд залуус бидний төлөө үхэж байна, Бид тэдэнд тусалж чадахгүй энд сууж байна” гэж нүүрээ халхалсан хоёр хөлсний цэрэг гаубиц их буу, сумны хоосон хайрцаг, өнгөлөн далдлах тороор арын дэвсгэр хийсэн бичлэгээ “PMC Wagner”-тай холбоотой телеграм сувгуудаар тараагаадбайгаа аж.

Г.Амарсанаа

Сүүлийн долоо хоногт “Вагнер”-ийн1000 орчим хөлсний цэрэг Бахмутын ойролцоо нас барсан. Тэдний 80 хувь нь хоригдлууд байсан гэж АНУ-ын Үндэсний аюулгүй байдлын зөвлөлийн зохицуулагч Жон Кирби мэдэгдэв.”Украинд тулалдаж буй “Вагнер”-ийн дайчдын 80 орчим хувь нь энэ дайнд оролцохоор элсүүлсэн шоронгийн хоригдлууд байх магадлалтай.“Вагнер”-ийннийт50 мянга орчим дайчдын 40 мянга нь хоригдлууд бөгөөд тэдний заримынх нь эрүүл мэндийн ноцтой асуудал ноцтой болсон” гэж Кирби “CNN”-д ярьжээ. Жон Кирби, “Вагнер”-ийн эзэн Евгений Пригожин “Бахмут хотыг оросуудын цогцосоор дүүргэх гэж зорьж байгаа юм шиг харагдаж байна. Амь үрэгдэгсдийн 90 хувь нь хоригдлууд байсан гэж бид үзэж байна” гэжээ. Кирби мөн “Вагнер”-ийн эзэд Украины дайнд сард 100 сая ам. доллар зарцуулдаг болохыг илчилсэн аж. Мөн өнгөрсөн сард Хойд Солонгосоос пуужин, гранат харвах төхөөрөмжавсан нь Орос болон түүнийтүншүүд барууны хориг арга хэмжээ, экспортын хяналтыг тойрч гарах арга зам эрэлхийлсээр байгааг харуулж байна. Энэ нь Украин дахь байлдааны ажиллагааг дорвитой өөрчилнө гэдэгт АНУ итгэхгүй байгаа ч БНАСАУ Орост шинэ зэвсгийн нийлүүлэлт хийхээр төлөвлөж байхыг үгүйсгэхгүй гэж “CNN” онцолсон байна.

Г.АМАРСАНАА

Өнгөрсөн баасан гарагт Парис хотод Курд гаралтай гурван хүн үндсэрхэх үзэлтний гарт амиа алдсанаас үүдэлтэй эмх замбараагүй байдал бий болов. Жагсагчид гудамжинд байсан автомашинуудыг хөмрөн, заримыг нь галдан шатааж, цагдаа нартай мөргөлджээ. Хариуд нь цагдаа нар нулимс асгаруулагч хий хэрэглэсэн байна.

Франц дахь Курдын нийгэмлэгийн олон зуун төлөөлөгч арьс өнгөөр ялгаварлах үзлийг эсэргүүцэн бямба гарагт Парисын төв талбайд жагссан. Тайван замаар эхэлсэн тус жагсаал удалгүй эмх замбараагүй байдал болон хувирчээ. Өнгөрсөн баасан гарагт Курдын соёлын төвийн ойролцоо курд үндэсний ресторанд гарсан зэвсэгт халдлагад нэг эмэгтэй, хоёр эрэгтэй амиа алдсан юм. Хохирогчид бүгд Курдууд байсан бөгөөд халдлага үйлдсэн 69 настай эрэгтэйг цагдаа нар хэргийн газарт баривчилсан аж. Дүрвэгсдийн төвд халдлага үйлдсэн хэргээр өмнө нь баривчлагдаж байсан уг этгээдцагаачдыг үзэн яддаг гэдгээ байцаалтын үеэр мэдүүлжээ. Түүний гарт амиа алдсан хохирогч эмэгтэй нь Курд эмэгтэйчүүдийн эрхийн төлөө идэвхтэй тэмцэгч байсан бол өөр нэг хохирогч эрэгтэй нь Францид улс төрийн орогнох эрх авсан зураач байсан байна.

Г.АМАРСАНАА

Covid-19 өвчний талаар өдөр тутмын тоо баримтаа Хятадын Эрүүл Мэндийн Үндэсний Хороо зарлахаа зогсоов. Тус байгууллагаасгаргасан мэдэгдэлд “Цар тахалтай холбоотой мэдээллийг Хятадын Халдварт Өвчний Хяналт, Урьдчилан Сэргийлэх Төв цаашдаа нийтэлж байх болно” гэсэн байна.

Украины Ерөнхийлөгч В.Зеленский АНУ-д айлчлах үеэр буюу энэ сарын 21-ний өдөр Украинд олгосон 1.8 тэрбум ам.долларын цэрэг, эдийн засгийн тусламжийн багцад агаарын довтолгооноос хамгаалах дэвшилтэт Патриот (Patriot) систем багтсан юм.

Патриот нь нисэх онгоц, далавчит пуужин, ойрын зайн баллистик пуужингийн эсрэг газар-агаар ангиллын залуурт пуужингийн систем бөгөөд 1980-аад оноос ашиглаж ирсэн. Тухайлбал, байг илрүүлж, мөрдөх радар; холбоо, харилцааны хэрэгсэл; удирдлага, хяналтын станц; пуужин харвах суурь гэсэн дөрвөн үндсэн багцаас бүрдэх харилцан уялдсан, аюулгүй, нэгдмэл, хөдөлгөөнт систем аж.

Тус системийн үндсэн зориулалт нь анх баллистик пуужингийн эсрэг байсан бөгөөд түүнд олон удаагийн хөгжүүлэлтийг хийж чадавхыг нь сайжруулсаар ирсэн. Үйлдвэрлэгч АНУ-ын Рэйтион (Raytheon) компани системийг 2048 он, түүнээс цааш зэвсэгт хүчнүүдэд ашиглагдах боломжтой гэж мэдэгдсэн. Одоогоор системийг НАТО-гийн зүүн хил болох Польш улс, түүнчлэн Герман, Япон, Израил зэрэг дэлхийн 17 улс худалдан авч ашиглаж байна.

Патриотын радар нь 150 орчим км-ийн цаана байх 50 гаруй агаарын байг нэгэн зэрэг хяналтад байлгаж, 70 гаруй км зайд пуужингаар байг устгана. Пуужин нь 5.2 метр урттай, 320 кг жинтэй,15-23 км-ийн өндөрт харвах чадвартай бөгөөд 5000 км цагийн хурдтай нисдэг. АНУ-ын хуурай замын хүчин уг системийг өргөн ашигладаг бөгөөд Патриот системийг цаг агаарын ямар ч нөхцөлд, агаарын ямар ч аюулыг таслан зогсоодог, практикт шалгарсан хамгийн дэвшилтэт агаарын довтолгооноос хамгаалах систем гэж үздэг. Одоо АНУ-ын хуурай замын хүчинд 16 Патриотын батальон байгаа гэж үздэг. Эдгээрт 50 батарей байна гэж үзвэл нийт 1600 пуужингийн систем байгаа юм байна.[1]

Үйлдвэрлэгч Рэйтион компани “Патриот нь 2015 оноос хойш 150 баллистик пуужинг амдан сөнөөсөн, ашигт үйлийн коэффициент 70-80 хувьтай” гэж мэдэгддэг.

АНУ-ын цэргийн шинжээч, бэлтгэл хошууч генерал Жэймс “Украинд одоо ашиглаж байгаа агаарын довтолгооноос хамгаалах системүүдээс[2] Патриотын тусгал улам цэцэн болж хөнөөл учруулах түвшин нэмэгдэнэ. Газар орон дээр ямар объектыг хамгаалахыг хүсэж байгаагаа тухайлан сонгох л шаардлагатай” гэсэн бол Стратеги, олон улс судлалын төвийн мэдээлэлд “’Патриотын системийн агаарын объектыг хянах, мөрдөх, устгах бүх үйл ажиллагаа нь нэг багц учраас бусад агаарын довтолгооноос хамгаалах системээс илүү. Ирж буй агаарын аюулд хариу цохилт өгөх үйл ажиллагаа нь үндсэндээ бүрэн автомат учраас ажиллуулж буй хүн зөвхөн пуужин харвах товчлуур дарахад л хангалттай” гэжээ.

Орос-Украины дайн эхэлснээс хойш Украин АНУ-аас алсын тусгалтай, дэвшилтэд агаарын довтолгооноос хамгаалах систем авах хүсэлт гаргасаар ирсэн. АНУ-ын БХЯ сүүлийн үед ОХУ Украины томоохон хотуудын ус, дулаан, цахилгааны дэд бүтцэд өргөн хэмжээний пуужин, дроны цохилт өгч буй дайны өнөөгийн нөхцөл байдал энэхүү тусламжийг олгоход нөлөөлсөн гэж мэдэгдэв.

АНУ-аас Патриотын нэг батарей (харвагч тус бүр нь 4, нийт 32 пуужинтай, 8 харвагчтай) өгч байгаа бөгөөд нэг батарейг ажиллуулахад 90 цэрэг шаардлагатай байдаг. Уг систем дээр ажиллах америк цэргийг 1 жилийн хугацаанд сургалтад хамруулдаг байна. Украины уг систем ажиллуулах бүрэлдэхүүнийг Германы Графенвоер дахь АНУ-ын хуурай замын цэргийн баазад сургалтад хамруулах юм байна.

Патриот системийг Украинд өгч буй талаар ОХУ-ын Гадаад хэргийн яамнаас энэ сарын 15-ны өдөр “АНУ-ын зүгээс нөхцөл байдлыг хурцатгаж буй алхам бөгөөд Москвагийн зүгээс хариу арга хэмжээ авахад хүргэнэ”, В.Путин “Энэ бол манай С-300 систем шиг ажилладаггүй хуучин систем. Бид асуудлыг авч үзнэ. Хариу арга хэмжээ байнга л байдаг” гэж мэдэгдсэн байна.[3]

Стратеги, олон улс судлалын төвийн Пуужингийн хамгаалалтын төслийн ахлагч Том Карако “Патриот систем нь өнөөдөр байгаа хамгийн найдвартай, хамгийн өргөн ашиглагдаж байгаа агаарын довтолгооноос хамгаалах систем юм. Баллистик пуужингийн агаарын довтолгооноос хамгаалах чадавх нь Украиныг Иранаас нийлүүлэх баллистик пуужингаас хамгаалах боломжтой” гэж мэдэгдсэн.

Зарим ажиглагчдын үзэж байгаагаар Орос-Украины дайнд энэ системийн үр нөлөө хязгаарлагдмал бөгөөд дайны явцад зарчмын өөрчлөлт хийхгүй байх магадлалтай. Патриот системийн харвагч нь 10 сая ам.доллар, 1 багц буюу 4 пуужин нь 4 сая ам.долларын үнэтэй байна. Үүнээс үзэхэд 50 мянган ам.долларын үнэтэй дроныг 1 сая ам.долларын үнэтэй пуужингаар харвахад үр ашгийн асуудал гарах бөгөөд жижиг дроны эсрэг ашиглах боломжгүй юм.

Эх сурвалж: iss.gov.mn

Украины хилээс 600 км зайтай оршдог ОХУ-ын Энгельс агаарын баазад дахин дараалан дэлбэрэлт болсон тухайхоёр талын эх сурвалжууд мэдээлжээ. Агаарын баазад дараалсан хоёр дэлбэрэлт болсныг Украины хэвлэл мэдээлсэн бол хүчтэй дэлбэрэх чимээ гарч, агаарын түгшүүр зарласан тухай орон нутгийн иргэдийн мэдээлэлд үндэслэн Оросын “ Baza” болон “Кровавая барыня” сайт мэдээлжээ.