Японы Засгийн газрын тэргүүн Ш.Абэ тус улсын парламентын доод танхмыг татан буулгах шийдвэр гаргасан байна. Энэ тухайгаа албан ёсоор өнөөдөр мэдэгдлээ. Ш.Абэ хууль батлах дээд байгууллагад намынхаа байр суурийг бэхжүүлэх зорилгоор ийм шийдвэр гарагсан байна. Ингэснээр Ерөнхий сайдын эдийн засгийн шинэчлэл хийхэд парламентын зүгээс дэмжлэг хүртэх юм байна.
Ээлжит бус сонгууль ирэх арванхоёрдугаар сард болох аж.
Ю.Дэлгэр
Их Британийн парламентын байр болох Вестминстерийн ордон зарим газраараа нурж байгаа гэнэ. Яаралтай засвар хийх шаардлагатай болсон бөгөөд хууль батлах байгууллагын зарим гишүүд ийм байранд хуралдахыг хүсэхгүй байгаагаа илэрхийлжээ. Гэтэл тус ордонг засварлахад 4.7 тэрбум ам.доллар шаардлагатай хэмээн нэгэн албаны хүн мэдэгдсэн байна. Гэтэл хөрөнгө мөнгөний асуудлыг шийдэж чадахгүй байна.
Ю.Дэлгэр
Өчигдөр Айова мужийн нэгэн оршин суугч Цагаан ордон руу нэвтрэхийг завдсан хэрэг гарсан билээ. Түүний машиныг шалгахад зэвсэг, сум, хутга гарсан. Гэтэл өнөөдөр Цагаан ордны хажууханд буутай эмэгтэйг Нууцын албаныхан саатуулсан байна. Бүсэндээ гар буу авч явж байсан эмэгтэй Мичиган мужийн оршин суугч юм байна. Сүүлийн үед Цагаан ордон руу дайрч орох гэсэн оролдлого байнга гарсаар байгаа.
Ю.Дэлгэр
Ирэх сарын 9-нд Их Британийн нийслэл Лондон хотод зохион байгуулагдах “Дэлхийн мисс 2014”-д эх орноо төлөөлөн оролцох Гондурас улсын гоо бүсгүй 19 настай Мариа Хосе Алварадо өнгөрсөн долоо хоногийн эхээр эгчийнхээ хамт сураггүй алга болсон юм. Тэгвэл цагдаагийнхан Мариа болон эгчийнх нь цогцсыг өчигдөр 20.00 цагийн үед олсон гэж “www.dailymail.co.uk” мэдээллээ. Хоёр бүсгүйн цогцсыг Санта Барбара хотын баруун хэсэгт орших голоос олжээ. Цагдаа нар энэ хэрэгт холбоотой хоёр хүнийг баривчилж, мэдүүлэг авч эхэлжээ. Энэхүү хэрэгт мисс Мариагийн эгч 23 настай Софиа Тринидадын найз залууг холбоотой хэмээн таамаглаж, эрэн сурвалжиж эхэлсэн байна. Дэлхийн миссийн холбооны удирдлагууд амиа алдсан Гондурас улсын мисс Мариа Хосе Алварадогийн гэр бүлд эмгэнэл илэрхийлж, гэмт хэрэгтэнг тэмцээнээс өмнө барихыг тус улсын цагдаа нараас хүсчээ. Тус холбооны орлогч захирал Сесилиа Песк твиттертээ “Гоо бүсгүйн үхэл дэлхийг цочирдууллаа” хэмээн жиргэжээ.
ОХУ-д айлчлал хийж буй Хойд Солонгосын “Хөдөлмөрийн нам”-ын Төв Хорооны улс төрийн товчооны тэргүүлэгч гишүүн, Төв хорооны нарийн бичгийн дарга Чхве Рён Хэг өчигдөр тус улсын Ерөнхийлөгч В.Путин хүлээн авч уулзсан тухай “www.dailymail.co.uk” мэдээллээ. Уулзалтын эхэнд Чхве Рён Хэ Хойд Солонгосын удирдагч Ким Чен Уны гараар бичсэн захиа болон бэлэг дурсгалын зүйлийг гардуулан өгсөн гэж “KCNA” агентлаг мэдээлэв. АНУ-ын Тагнуулын газраас “Удирдагч Ким Чен Ун Орост айлчлах хүсэлтээ Путинд гаргасан. Ким Чен Ун Оросын тусламжтайгаар Батлан хамгаалахын салбараа шинэчлэхийн хүсч буй. Тиймээс тэрбээр улсдаа хоёрдугаарт бичигддэг эрхмээ Орос руу илгээсэн” гэжээ.
ОХУ-д суугаа Хойд Солонгосын элчин сайд Ким Ен Же “ОРТ 1” телевизэд ярихдаа “Чхве Рён Хэг Оросын удирдлагууд болон ард түмэн нь найрсагаар хүлээн авсан. Энэ бүхэн удирдагч Ким Чен Унд итгэл хайрласан. Энэ ондоо багтааж удирдагч Путиний урилгын дагуу тус улсад гурван хоногийн хугацаатай төрийн айлчлал хийнэ. Аюулгүй байдлын үүднээс цаг хугацааг нийтэд зарлах боломжгүй” гэсэн байна.
Энэ сарын 15-ны өдөр дуучин Селена Гомез Беверли-Хиллзэд 25 настай жүжигчин эр Дэвид Генритэй романтик болзоонд явжээ. Тэд “Il Cielo” итали зоогийн газар оройн зоог барьж, дараа нь жүжигчин эр 22 настай дуучин бүсгүйг машиндаа суулгаад аваад явсан байна.
“Вейверли Плейсийн шидтэнгүүд” кинонд хамтран тоглосон тэднийг хайр сэтгэлийн холбоотой болсон хэмээн шуугиж байна. Тэднийг зоогийн газраас гарч ирэхэд папараццичид олзолсон бөгөөд Гомес бага зэрэг бишүүрхсэн царай гаргаж байсан бол Генри тайван байж, бүр папараццичид руу харан инээмсэглэсэн байна. Сонирхуулахад энэ долоо хоногийн эхээр Селена Гомезийн экс найз залуу Жастин Бейбер түүнийг “Instagram” дахь найзуудынхаа бүртгэлээс хассан билээ. Гэхдээ Селена энэ үйлдлийг Жастиныхаас сар гаруйн өмнө эхэлж хийсэн юм. Үүний шалтгаан нь Жастиныг дэлхийд алдартай гоо сайхны “Estee Lauder” фирмийн шинж дүр төрх болох 19 настай загвар өмсөгч Кендалл Женнертэй амрагийн холбоотой гэдгийг мэдсэн даруйдаа ийм алхам хийжээ. Гэтэл зарим нэг эх сурвалжийн мэдээгээр Жастин, Кендалл хоёрыг жирийн найзууд хэмээн мэдээлсэн байдаг билээ. Дашрамд дурдахад Кендалл Женнер бол теле од Ким Кардашьяны эх нэгтэй дүү юм.
Технологийн аварга Apple компани өнөөдөр шинэ зохиогчийн эрх бүртгүүлсэн тухай AppleInsider мэдээллээ.
Тэд сканнертай хулгана зохион бүтээхээр ажиллаж байгаа аж. Хулганад байрлуулсан сканнераар хэрэглэгч хүссэн зургаа хуулж аван, хулгана дээрх дэлгэцээр харуулна. Түүнчлэн энэ хулганы сканнер нь гадаргууг мэдрэх мэдрэгчтэй байх юм. Компанийн хамгийн сүүлд бүтээсэн “Magic Mouse” ч мөн ийм технологийг хослуулсан бөгөөд мэдрэгч бүхий энэ хулгана зөвхөн хулганы pad гэлтгүй ямар ч гадаргуу дээр ажилладаг. Гэхдээ шилэн гадаргуугаас бусад дээр нь шүү дээ.
Тэгэхээр шинэ зохиогчийн эрхтэй холбогдуулан Apple компани дараагийн үеийн хулганыхаа загварт нэг их өөрчлөлт оруулахгүй нь. Ямартай ч Apple дараагийн үеийн “Шидэт хулгана”-г тун өвөрмөц технологитой хослуулах нь.
Учир зах зээл дээр байгаа ижил төрлийн бүтээгдэхүүнүүд болон бүтээгдэхүүн үйлдвэрлэгчид одоогоор ийм технологийг бүтээж эхлээгүй байгаа. Хэдийгээр уламжлалт сканнераас арай өөр үйлдэлтэй ч таны гар дор боломжийн сканнер байна гэдэг тун давгүй зүйл. Сонирхуулахад Apple өнгөрсөн долдугаар сард “Шилэн iPhone”-ий зохиогчийн эрхийг авч байсан билээ.
“Өнгөрсөн онд дэлхий даяар 18 мянган хүн террорист халдлагын золиос боллоо” гэж НҮБ-ын ерөнхий нарийн бичгийн дарга Бан Ги Мүн мэдэгдсэн тухай “Ройтерс” агентлаг мэдээллээ. 2011 онд халдлагаар 11 мянган амиа алдсан бол 2012 онд 12 мянган хүн амиа алдсан гэж “Global Terrorism Index” судалгааны байгууллагаас мэдэгдэв. 2013 онд өмнөх жилийнхээс 44 хувиар их буюу 10 мянга орчим террорист халдлага үйлдэгдсэн байна. Алан хядах ажиллагаа нэг жилийн дотор ийнхүү нэмэгдэх болсон шалтгааныг судлаачид Сирийн иргэний дайнтай холбон тайлбарлаж буй. “Террорист халдлагын улмаас амь насаараа хохирч буй хүмүүсийн ихэнх нь буюу 6000 нь Иракт бүртгэгдсэн. Түүний дараа Афганистан, Пакистан, Нигери, Сири зэрэг улс орж байна. Терроризмын улмаас амь үрэгдсэн хүмүүсийн 82 хувь нь дээрх улсын иргэд гэнэ. “Халифын вант улс”, “Аль-Каида”, “Боко Харам”, “Талибан” гэсэн алан хядах дөрвөн бүлэглэлийн гэнэтийн халдлагийн үеэр хамгийн багадаа 50-100 хүн амиа алддаг” гэж Бан Ги Мүн онцолсон байна. Иракийн хэт даврагчид ганцхан сарын дотор 400 гаруй хүний аминд хүрсэн гэж тус улсын Ерөнхий сайд Хайдер аль-Абади мэдэгджээ.
Холливудын нэрт жүжигчин Жорж Клуни Их Британийн өмгөөлөгч Амаль нар хоёр сарын өмнө хуримласан билээ. Залуу хосууд дайн болж буй Сириэс хүүхэд үрчилж авах гэнэ. Энэ тухай “Woman’s Day Magazine” сэтгүүлд бичжээ. Ингэснээр дайны улмаас эцэг эхээ алдсан Сирийн хүүхдүүдэд жаахан ч гэсэн туслах хүсэлтэй гэнэ. Амаль нь хүний эрхийг хамгаалах чиглэлээр мэргэшсэн бөгөөд Wikileaks-ийг үндэслэн байгуулагч Жулиан Ассанжийн өмгөөлөгчөөр ажиллаж байгаа. Мөн НҮБ-ын ерөнхий нарийн бичгийн даргын Сирийн асуудал хариуцсан зөвлөхөөр давхар ажилладаг.
Хонконгийн захирагч Лин Чун-Иен өнгөрсөн амралтын өдөр хотын төв болон захиргааны байрны өмнө байршуулсан хаалт, хашлага зэргийг хураахыг оюутнуудад сануулсан юм. Өнөөдөр өглөөний 8.00 цагаас цагдаа, хүчнийхэн оюутнуудыг албадлагаар тарааж хаалт, хашлага зэргийг хурааж эхэлсэн тухай “www.dailymail.co.uk” мэдээллээ. Дээрх үйл явдлын дараа оюутнууд дургүйцлээ илэрхийлж мөргөлдөөн үүссэн байна. Мөргөлдөөний улмаас 50 гаруй оюутанг саатуулжээ. Цагдаа нар төв замуудыг хаагаад буй оюутнуудын эсрэг даралттай ус ашиглаж, майхан зэргийг нь хураан авчээ.
Хонконгийн оюутны холбооны дарга Алекс Чоу болон дэд тэргүүн Эсон Чун, Ардчилсан оюутан холбооны тэргүүн Натан Ло нарыг Бээжинд нэвтрэхийг хориглосны дараа оюутнууд бухимдаж, Захирагч Лин Чун-Иений гэрийг эзлэхийг завдсан юм. Энэ сарын эхээр оюутнууд 28 цагийн турш захирагчийнхаа гэрийг бүсэлж, эсэргүүцлээ илэрхийлсэн билээ.