Өнөөдөр АНУ-д Талархалын өдрийг тэмдэглэж байна. Уламжлалт ёсоор Ерөнхийлөгч Б.Обама Цагаан ордны баярын ширээнд тавих хоёр цацагт хяруулыг адисласан байна. Мак, Чиз нэртэй цацагт хяруулууд нь тус бүр 21 кг жинтэй аж. Энэ өдөр Цагаан ордонд Талархлын өдөрт зориулсан баярын арга хэмжээ болжЕрөнхийлөгч Б.Обама үг хэлсэн байна.
Ю.Дэлгэр
Хятадын Гадаад харилцааны сайд Ван И энэ сарын 24-нд Вена хотноо болж буй Ираны цөмийн хөтөлбөрийн талаарх зургаан орны хэлэлцээнд оролцсон байна. Тэрээр “Хятадын тал Ираны цөмийн хэлэлцээрт идэвхтэй оролцсоор ирсэн гол оролцогч юм. Бид шударга байр суурь баримтлан, хэлэлцээрийг урагшлуулахад талуудын хооронд зуучлах, олон удаа ажил хэрэгч санал дэвшүүлж байна. Энэ удаагийн Гадаад хэргийн сайд нарын уулзалтаар мөн Хятадын тал гол асуудлыг шийдвэрлэх шинэ арга замыг дэвшүүлж, талууд үнэлж дэмжиж итгэж байгаа нь хэлэлцээрийн сүүлийн шатанд чухал үүрэг гүйцэтгэх юм.
Сүүлийн шатны хэлэлцээрийн үеэр Хятадын тал талуудад Ираны цөмийн асуудлыг улс төрийн шийдвэрээр хандахдаа тэвчээртэй байхыг уриалж байна” гэв. Мөн олон улсын цөмийн зэвсэг үл дэлгэрүүлэх системийг сахихын сацуу Ираны энх тайван, цөмийн эрчим хүч ашиглах эрх ашгийг хамгаалан, алхмаар урагшлах зарчмыг мөрдөн, тохирох хугацааны хүрээнд багц төсөл гарган, алхмаар хэрэгжүүлэх тодорхойлон, уян хатан байр суурийг баримтлан, нэгэн чиглэлд идэвх чармайлт гаргах хэрэгтэй юм гэв.
Ван И хэлэлцээр урагштай байна хэмээн талууд үнэлж буйг онцлон, бүх талын эрх ашгийг хангасан тохиролцоо хийх сайн суурь бүрдлээ гэж үзэж байгаагаа илэрхийллээ.
Талууд Ираны цөмийн хэлэлцээрийн хугацааг сунгах талаар зөвшөөрч, ирэх саруудад үлдсэн асуудлыг шийдвэрлэх, Ираны цөмийн хөтөлбөрийн талаар тохиролцоонд хүрэх ажээ.
Испанийн Эрүүл мэндийн сайд Ана Матог хууль бусаар мөнгө санхүүжүүлсэн хэргээр шүүх буруутгаж, албан тушаалаас нь огцруулжээ. Түүний экс нөхөр Иисус Сепульведа Ардын намынхны оролцсон авилгын томоохон хэрэгт холбоотой болох нь тогтоогдоод буй. Мато сайдыг авилгын хэргийн албан ёсны сэжигтэн гэж зарлаагүй ч шүүхийн сонсголд дуудсан гэж Испанийн хэвлэлд мэдээлэв. Харин сайд өөрөө “Би энэ хэрэгт холбоогүй ч гэсэн Засгийн газрын сайн сайхны төлөө суудлаа тавьж өгч байна” гэж хэлжээ. Шүүгчид “Гьюртел сүлжээ” гэж нэрлэгддэг намд хууль бусаар мөнгө хандивласан хэргийг мөрдөн шалгаж байна. Энэ нь Испанийн Ардын намын албан тушаалтнууд оролцсон түүхэн дэхь хамгийн том авилгалын хэрэг юм.
Хүүгээ бусдын гарт амиа алдахыг харсан Реза Гул гэх хижээл насны эмэгтэй зэвсэг барин босч талибуудаас өшөөгөө авчээ. Түүний хүү Афганистаны Фара мужийн нэгэн тосгонд цагдаагийн алба хаадаг бөгөөд амиа алдах үедээ шалган нэвтрүүлэх цэг дээр ажиллаж байсан аж. Реа Гул нь талибуудын дайралт эхлэх үеэр нөхөр, охин, бага хүү, бэрийнхээ хамт зэвсэглэн талибуудын эсрэг гал нээн 25 босогчийг цааш харуулжээ. Тэдэнд зэвсэг барьж хариу үзүүлэхээс өөр арга байгаагүй бөгөөд гэр бүлээрээ Талибын босогчдын эсрэг дайн эхлүүлж буйгаа зарласан байна. Орон нутгийн ТОЛО ньюсийн дамжуулснаар талибуудын дайралт бүхэл бүтэн долоон цагийн турш үргэлжилж, хүнд болон хөнгөн зэвсгээр гал нээж, суман бороо орж байгаа юм шиг л байжээ. Афганистаны Фара муж нь тус улсын Засгийн газрыг эсэргүүцэгч хүчин үүрлэсэн хамгийн онц аюултай хэсэг юм.
Бразилийн Рио-де-Жанейро хотноо 2016 онд болох зуны олимпийн наадмын албан ёсны хоёр бэлгэдлийг өнгөрөгч даваа гаригт танилцуулсан байна. Тэдгээр нь тус улсын амьтны болон ургамлын ертөнцийг бүхэлд нь илэрхийлжээ. Олимпийн наадмыг зохион байгуулах хорооноос энэхүү бэлгэдлийг гаргаж ирснээр залуучуудыг хүн төрөлхтний энэхүү наадамд идэвхтэй оролцоно гэж найдаж байгаа аж. Харин Бразилийн иргэд энэ хоёр бэлгэдлийн нэрийг интернэтээр сонгох юм байна. Мөн энэхүү танилцуулгын нээлтийн үеэр өмнөх наадмуудын бэлгэдлийг олон нийтэд танилцуулжээ.
Рио-де-Жанейро нь Испанийн Мадрид, Японы Токио, АНУ-ын Чикаго хотуудтай өрсөлдөн зуны олимп зохион байгуулах эрхийг олж авсан юм. XXXИ дэх зуны олимпийн наадам 2016 оны наймдугаар сарын 2-21-ны өдрүүдэд болох юм.
Өнгөрсөн зун АНУ-ын Миссури мужийн Фергюсон хотноо 18 настай афроамерик Майкл Браун хүүг буудан хөнөөсөн цагаан арьст цагдаа Даррен Уильсоны хэргийг шийдвэрлэсэн шүүхийн тогтоолыг эсэргүүцсэн жагсаал АНУ-д үргэлжилсээр байна.
Фергюсоны дагуул хот болох Сент-Луист эсэргүүцлийн жагсаалд оролцогчид замын хөдөлгөөнийг хэдэн цагаар саатуулжээ. Уг хотыг Иллинойс мужтай холбодог Миссисипи гол дээрх гүүрийг хаасан тул цагдаагийнхан нулимс асгаруулагч хий хэрэглэж, жагсаалд оролцогчдоос баривчилжээ.
Нью-Йоркын Таймс-сквер талбай болон түүний ойр орчмын гудамжуудад хэдэн мянган жагсагч цугла, “Бүү бууд!” гэсэн бичиг бүхий зурагт хуудсыг гараа дээш өргөн барьцгаажээ. Энэхүү үйлдэл нь тохиолдлын бус бөгөөд цагдаа Уильсоныг буудах үеэд өнгөт арьст хүү Браун гараа дээш өргөн зогсож байжээ.
Вашингтон, Чикаго, Филадельфи, Атланта, Лос-Анжелес, Сан-Франциско болон бусад олон хотуудад жагсаал болсон аж. Тус улсын хэвлэлүүдэд мэдээлснээр, АНУ-ын 50 мужийн 37-д нь энэхүү эсэргүүцлийн жагсаал болжээ.
Японы барилгачид усан дор хотхон барих ажлыг гүйцэтгэхээр төлөвлөж байна. Shimizu компанийн уран бүтээлчид усан доорх эко-хотын зураг төслийг танилцуулсан байна. Сууринд 5000 хүн амьдрах гэнэ.
Төслийг 2030 он гэхэд уг компани хэрэгжүүлж дуусах ажээ.
Төслийн өртөг нь 25 тэрбум ам.доллар болох аж. Гурван хэсэгт хуваагдсан усан доорх хотод орон сууц, буудлууд, үйлдвэр байх ажээ.
15 км-ийн мушгиа суурин дээр орон сууц, буудлууд байрлах юм. Мушгиагийн доод хэсэг нь далайн ёроолын судалгааны төв байх бөгөөд далайн гүн рүү 3-4 км ухагдсан сууринд байрлах юм байна.
Байгууламжийн доод хэсэгт байрлах үйлдвэр нь нүүрс хүчлийн хийнээс метан гаргах болно. Мөн далайн дулааныг цахилгаан эрчим хүч болгох технологийг тэнд хэрэгжүүлэх гэнэ. Усан доорх хотууд нь газар хөдлөлт, цунамийн аюулд бараг өртөхгүй байх аж. Энэ төсөл олон компаниудын дэмжлэг авч байгаа гэнэ.
Непалд зорчих тээврийн автобус осолдсоноос болж 50 орчим хүний амь үрэгджээ. Осол Непалын уулархаг Жаяркоте бүс нутагт бүр өнгөрсөн пүрэв гарагт болсон аж. Жолооч хяналтаа алдсанаас болж автобус Бери голд унажээ. 10 зорчигч амьд гарч чадсан байна. Тухайн үед 24 хүн амиа алдсан талаар мэдээлж байсан ч ням гарагт автобусыг эрэг дээр гаргасны дараа нэмж олон хүн амиа алдсан нь тодорхой болсон юм. Непалийн газар нутгийн ихэнх хэсгийг Гималайн уул нурууд эзэлдэг бөгөөд Азийн хамгийн аюултай авто замын сүлжээтэй улсын нэг. Үүнээс болж олон тооны автын осол гардаг. Тухайлбал, энэ сарын 1-нд тус улсын Макванпур тойрогт хоёр автобус осолдож, 14 хүн амиа алдаж, 20 хүн шархадсан билээ.
БНСУ-ын Чежү хотноо боксын эмэгтэйчүүдийн дэлхийн аварга шалгаруулах найм дахь удаагийн тэмцээн болж өчигдөр өндөрлөлөө. ДАШТ-д 67 орны 280 гаруй эмэгтэй боксчин өрсөлдөж аваргуудаа тодруулжээ.
Монголоос найман тамирчин оролцсон ч, харамсалтай нь медаль авч чадсангүй. Ирландын нэрт боксчин, Лондоны олимпийн аварга Кэти Тейлор тав дахь удаагаа дэлхийн аварга болов. Багийн дүнгээр гурван алтан медаль хүртсэн хойд хөрш ОХУ-ын боксчид тэргүүлсэн байна.
ДАШТ-ний 48 кг-д Казахстаны Назым Кызайбай, 51 кг-д АНУ-ын Марлен Эспраза, 54 кг-д Болгарын Станимира Петрова, 57 кг-д ОХУ-ын Зинайда Добрынина, 60 кг-д Ирландын Кэти Тейлор, 64 кг-д ОХУ-ын Анастасия Белякова, 69 кг-д Панамын Атейна Билон, 75 кг-д АНУ-ын Клариса Шиельдс, 81 кг-д БНХАУ-ын Шиаоли Ян, +81 кг-д ОХУ-ын Зенфира Магомедалиева нар тэргүүлжээ.
АНУ-ын Кливленд хотод тоглоомын талбайд тоглоомон буу барин гарч ирсэн 12 настай хүүг цагдаа буудан, аминд нь хүрчээ. Хоёр цагдаа хэргийн газарт очин, гараа өргөх тушаалыг биелүүлээгүй хүүг цагдаагийн нэг албан хаагч хоёр удаа буудсан байна. “Нэг хүү буугаар хүмүүсийг айлгаж байсан. Гэхдээ жинхэнэ буу эсэхийг мэдээгүй” гэж хэргийн газарт байсан эх сурвалж мэдээлжээ. Хүү рүү буудсан хоёр цагдаагийн нэг нь тус хотод анхны жилээ ажиллаж байгаа бол, нөгөө нь 10 гаруй жил ажилласан албан хаагч гэнэ.