Уругвайн Ерөнхийлөгч асан Хосе Мухика болон тус улсын одоогийн төрийн тэргүүн Табаре Васкес
Уругвайн Ерөнхийлөгчийн сонгуулийн хоёрдугаар шат өчигдөр буюу арваннэгдүгээр сарын 30-нд болж өнгөрлөө. Сонгуулийн дүнгээр Уругвайн Ерөнхийлөгчөөр 74 настай Табаре Васкес сонгогджээ. Тэрбээр өмнө нь Уругвайн Ерөнхийлөгчөөр 2005-2010 оны хооронд ажилсан байсан бөгөөд ийнхүү таван жилийн Төрийн эрхэнд эргэн ирлээ.
Тус улсын сонгуулийн Ерөнхий хорооноос мэдэгдэж буйгаар саналын хуудсын 97.6 хувийг тоолсны дараа Зүүн жигүүрээс нэр дэвшигч Васкес 53.4 хувийн санал авч тэргүүлсэн байна.
Сонирхуулахад, Уругвайн өмнөх ерөнхийлөгч Хосе Мухика нь эгэл жирийн амьдралаараа дэлхийн хамгийн ядуу улс төрч гэж алдаршсан юм. Тэрээр CNN агентлагад өгсөн ярилцлагадаа “Улс төрөөс баяжуудыг тусгаарлах ёстой. Мөнгөнд хэт сонирхолтой хүмүүс улс төрд аюултай. Тийм хүмүүс хөрөнгөө арвижуулах, арилжаа наймаа, үйлдвэрлэл эрхлэхэд өөрийгөө зориулдаг. Харин улс төр бол бүх нийтийн аз жаргалын төлөө тэмцэл юм шүү дээ” гэж ярьжээ.
Хосе Мухика нь цалингийнхаа 90 хувийг буяны байгууллагад хандивладаг учир түүнийг дэлхийн хамгийн ядуу ерөнхийлөгч гэж хэвлэлүүд нэрлэдэг. Тэрээр Конгрессын гишүүдийнх нь дундаж орлого 1 сая доллараас давсан АНУ-ыг шүүмжилдэг байна. Хосе дэлхийн ертөнцийг зоосны нүхээр хардаг хүмүүст туйлын дургүй гэнэ.
Америкийн Бүгд Найрамдах намынхан Ерөнхийлөгч Б.Обамагийн охидыг шүүмжилсэн байна. Талархарлын баярыг тохиолдуулан Ерөнхийлөгч баярын мэндчилгээ дэвшүүлэхэд түүний охид болох Саша, Мали нар байлцсан. Тэднийг хааш яаш хувцасласан байснаас гадна биеэ зохисгүй авч явсан хэмээн сөрөг хүчнийхэн шүүмжилсэн байна. Бүгд Найрамдах намаас Конгрессын гишүүнээр сонгогдсон Стивен Финчер Элизабет Лаутен энэ талаар Facebook-т бичсэн нь нэлээд шуугиан тарьсан байна.Төрийн тэргүүний охид богино банзал өмссөн байсан нь таалагдаагүй аж. Харин дараа нь Конгрессын гишүүн зохисгүй шүүмжлэл хийсэн хэмээн Саша, Мали хоёроос хүлцэл өчсөн байна. 
Хөлбөмбөгийн од Дэвид Бэкхем өчигдөр өглөө хүү Бруклиний хамт автомашины осолджээ. Бэкхем Английн “Arsenal” багийн тоглолтоос 15 настай хүүгээ аваад явж байхдаа осолд орсон байна. Бэкхем, Бруклин хоёр хүнд бэртэл аваагүй гэнэ. Гэхдээ ослыг нүдээр харсан гэрчүүд Бэкхем мөрөндөө гэмтэл авсан байж магадгүй гэж жиргэцгээж байна. Түүнчлэн Бэкхемийн “Audi” автомашины жолоочийн тал нэлээд эвдэрчээ. Одоогоор ослын шалтгаан тодорхойгүй байгаа гэнэ. Бэкхемийн хүү өнгөрсөн арваннэгдүгээр сард “Arsenal” хөлбөмбөгийн багтай гэрээ байгуулсан аж.
Хойд Солонгосын удирдагч Ким Чен Уны авга эгч Ким Гён Хиг таалал төгссөн талаар олон улсын хэвлэлүүд мэдээлж байсан билээ. Ингэхдээ түүнийг Ким Чен Ун хөнөөсөн эсвэл өвчнөөр таалал төгссөн гэж мэдээлж байсан. Гэтэл Ким Гён Хи нөхрийг нь цаазаар авсан хэргээр Ким Чен Унтай утсаар маргалдаж байгаад цус харваж нас барсан гэнэ. 68 настай Ким Гён Хиг эмнэлэгт хүргэсэн боловч нас барсан аж. Энэ тухай Хойд Солонгосын экс Ерөнхий сайд Кан Сун Саны хүргэн байсан Кан Мён Ду мэдээлсэн байна.
Эболагийн тархалт дэлхий нийтийг түгшээж байна. Тэгвэл энэ вирусийн халдвар авсан хүнийг тээвэрлэх онгоцыг БНХГУ анх удаа үйлдвэрлэлээ. Энэхүү нисэх онгоцыг Германы агаарын тээврийн “Lufthansa” компани тоноглосон аж. Гал тогоо, тээшний тасалгаа болон зорчигчийн ихэнх суудлыг авч, оронд нь өвчтөнийг тээвэрлэж байхдаа нарийн эмчилгээ хийх боломжтой эрүүл мэндийн тоног төхөөрөмжүүдээр тохижуулжээ. Вирус тархахаас урьдчилан сэргийлэх үүднээс агаарын даралтыг бага байлгах хоёр давхар хаалт суулгасан байна. 
Баруун Африкт дэгдсэн Эбола вирусын халдвараар нас барагсдын тоо 6928 болсныг Дэлхийн эрүүл мэндийн байгууллагаас мэдээллээ. Эболагаар нас барагсдын тоо хамгийн сүүлд мэдээлснээс 1000 гаруйгаар нэмэгджээ. Халдварын тархалт Либери улсад буурч, Гвинейд тогтворжиж эхэлсэн боловч Сьерра-Леонед өндөр хэвээр байна. Түүнчлэн Эбола вирусын халдвараар өвчний голомт Гвиней, Сьерра-Леоне, Либери улсад 16 мянга гаруй хүн өвчлөөд байгаа аж. Харин Нигери, Сенегал улсууд үхлийн аюулт өвчнөөс бүрэн ангижирч, дахин халдварын тохиолдол бүртгэгдээгүй байна. Үүний зэрэгцээ ядуу буурай Мали улсад Эбола вирусын халдвар тархсанаар долоон хүн нас барж, 10 хүн өвчилжээ.
АНУ-д жил бүр Зул сарын баярын өмнө “Хар баасан гариг” болдог. Дэлгүүр, худалдааны төвүүд бараагаа онцгой хямдруулдаг өдрийг ингэж тодотгодог юм. Тодруулж хэлбэл онцгой хямдралын өдөр нь Талархлын баярын өдөр тохиодог билээ. АНУ даяар өчигдөр “Хар баасан гариг” эхэлж иргэд хүссэн бараагаа онцгой хямд үнээр худалдаж авч байгаа аж. Томоохон худалдааны төвүүд бараагаа бараг л үйлдвэрийнх нь үнээр худалдаалснаар тэдний мөнгө хурдан эргэлдэж, хуучин бараанууд нь борлогдож дуусдаг. Өнгөрсөн онд тохиосон Талархлын баярын долоо хоногт нийт 52.5 тэрбум ам.долларын худалдан авалт хийгдсэн юм. 
Хятадын нийслэл Бээжин хотноо олон нийтийн газар тамхи татахыг хориглосон хууль хэрэгжиж эхэллээ. Нийтийн тээвэр, сонин, сэтгүүлийн нүүр хуудаснаа тамхи татахыг хориглосон сурталчилгааг байршуулах болжээ. 300 сая тамхичинтай Хятад улс өмнө нь дээрх хоригийг тавьж байсан ч бүрэн хэрэгжиж чадаагүй аж. Гэхдээ энэ удаа автобус, ажлын байр, сургууль, эмнэлгийн ойролцоо тамхи татахыг хориглосон байна. Монголд байдаг энэ хуулийг хэрэгжүүлэхийн тулд зочид буудал, ресторан зэрэг газруудад тамхи татахыг зөвшөөрсөн олон нийтийн газруудыг байгуулжээ. Хятадад тамхитай хамааралтай архаг өвчнүүдийн улмаас жилд олон сая хүн хорвоог орхидог гэсэн судалгаа байдаг байна.
Европын холбооноос бямба гаригт Украины 13 салан тусгаарлагч болон тус улсын хуулийн таван байгууллагад хориг тавьжээ. Өөрсдийгөө тусгаар улс хэмээн тунхагласан Луганск, Донецкийн ардын бүгд найрамдах улсын удирдлагууд үүнд багтаж байгаа аж. Тэднийг Украины нутаг дэвсгэрийн бүрэн бүтэн байдлын эсрэг үйл ажиллагаа явуулсан гэж үзэж, ЕХ-ны гишүүн орнууд руу нэвтрэхийг хоригложээ. Мөн Европын орнуудад дахь тэдний нэрэн дээрх дансыг нь хаажээ. Мөн ЕХ-ны зүгээс энэ сарын сүүлч гэхэд дээрх хоёр улсын удирдагчдыг “хар жагсаалт”-даа оруулахаар бэлтгэж байна. Улмаар Европын холбоо нь Оросын болон Украины нийт 132 иргэнийг хар дансандаа оруулах гэнэ. Үүнд ОХУ-ын хүчний байгууллагын төлөөлөл, зарим парламентын гишүүд, бизнесмэнүүд, Крымын орон нутгийн удирдлагын төлөөлөл ч бас багтаж байгаа юм байна.