“Индонезийн “Air Asia” компанийн “QZ8501″ дугаартай онгоцыг алан хядагчид барьцаалсан байж магадгүй” гэж Австралийн талаас мэдээллээ. Тус онгоцонд суусан зорчигчдын дунд хоёр лалын шашинтан байсан гэж Индонезийн талаас мэдэгдсэн байна.
Онгоцыг хайх ажиллагаанд Австралийн тал туслалцаа үзүүлэхээр болж, “Air Asia” компанийн удирдлагуудтай онлайнаар холбогдсон гэж “www.dailymail.co.uk” мэдээлэв. Индонезийн Тээврийн яамнаас “Тэднийг хэт даврагч эсвэл ямар нэгэн бүлэглэлийн гишүүн эсэхийг нь тодруулаагүй байна” гэжээ.
“Air Asia” компанийн захирал Тони Фернандест твиттертээ “QZ8501″ онгоцноос холбоо тасраад найман цаг боллоо” гэж жиргэжээ.
Хойд Солонгос АНУ-ын Ерөнхийлөгч Барак Обамаг “сармагчин” гэж нэрлэв. Хойд Солонгосын аюулаас хамгаалах хорооны төлөөлөгч “KCNA” агентлагт хийсэн мэдэгдэлдээ “Обама ойн сармагчин шиг үргэлж бодлогогүй үг, үйлдэл гаргадаг” хэмээсэн байна. Түүнчлэн Хойд Солонгост интернэт тасарсан нь Вашингтоны хийсэн хэрэг хэмээн Пхеньян мэдээлжээ. Хойд Солонгост өнгөрсөн долоо хоногийн эхээр /XII.22, 23/ хоёр удаа интернэт тасарч, “3G” гар утасны сүлжээнд доголдол гарсан юм. Хойд Солонгост интернэт тасарсан нь “Sony” компанийг хакердсан хэрэгт Пхеньянийг сэжиглэсэн Вашингтоны явуулга хэмээн Пхеньян мэдээлжээ. Түүнчлэн Хойд Солонгосын удирдагч Ким Чен Уныг хөнөөх хуйвалдааныг өгүүлсэн “Ярилцлага” /The Interview/ киног гаргах “Sony” компанийн шийдвэрт АНУ-ын Ерөнхийлөгч Барак Обама нөлөөлсөн гэж Пхеньян буруутгажээ. “Sony” компани хакеруудын сүрдүүлгээс болж “Ярилцлага” киног гаргахыг цуцлаад байсан ч өнгөрсөн Зул сарын баяраар Америкт нээлтээ хийсэн юм.
Дээрхийн гэгээн Далай лам Холливудын алдарт жүжигчин Ричард Гирийг хүлээн авч уулзжээ. Эдүгээ 65 настай Ричард Гир анх 1978 онд Непалаар аялж яваад буддизмыг сонирхох болсон аж. Тэрээр нэг бус удаа Далай ламын ачаар амьдралд итгэх итгэл нь бэхжсэн гэж мэдэгдэж байсан билээ. 
Нигерийн удирдлагууд хэт даврагч “Боко Харам” бүлэглэлийн явуулж буй алан хядах ажиллагаанаас болж нийслэл болон хэд хэдэн том хотын гол замыг хааж, бүх төрлийн тээврийн хэрэгсэл явахыг хориглосон тухай “Ройтерс” агентлаг мэдээллээ. “Боко Харам” бүлэглэл он солигдох үеэр алан хядах ажиллагаа явуулж, “Нигерийг цусанд живүүлнэ” хэмээн мэдэгдээд буй. Энэхүү мэдэгдлийн дараа Засгийн газар хуралдаж, дээрх шийдвэрийг гаргасан байна. 
БНХАУ-д Энэ сарын 16-ны өдөр шувууны томуугийн А хүрээний (H7N9) вируст халдварын 11 шинэ тохиолдол бүртгэгдэж, таван хүн нас баржээ.
Канадын нэр нь нууц нэгэн иргэн Зул сарын баярын «49-6» нэртэй сугалаагаар нэг сая канад доллар хожсон байна. Тэр нь 860 мянган ам.доллартай тэнцэх мөнгө юм. Энэ тухай Atlantic Lottery холбооны төлөөлөгч мэдээлжээ. Азтаны нэр нууц байгаа ч тэрээр хонжвороо Шинэ Шотланд мужийн Кэйп-Брентон тойрогт худалдаж авсан нь тодорхой мэдээлэл аж.
Нэрт жүжигчин Жаки Чаны хүү Жейси Чан мансууруулах бодис хууль бусаар наймаалагчдад орон сууцаа хэрэглүүлсэн хэрэгт буруутгагдаад байгаа билээ. Түүнд гурван жилийн ял оноож магадгүй байгаа. Үүнтэй холбогдуулан нэрт жүжигчин мэдэгдэл хийхдээ “Жейси эрх чөлөөтэй болохоороо өөрийнхөө гунигтай туршлагын талаар залуучуудад ярьж өгөх байх” гэв. 
Зул сарын баярыг тэмдэглэж байгаа энэ өдрүүдэд Хонконгт хэдэн сая хонконг доллар алдагджээ. Мөнгөн дэвсгэрт тээвэрлэж явсан машин тус хотын төвд орших Ванчай дүүрэгт осолдсон байна. Мөнгө зам дээр унахад түүгээр явж байсан хүмүүс бөөн баяр болон авчээ. Гэрчүүдийн ярьснаар жолооч нар машинаа замын голд зогсоон газарт унасан мөнгөнүүдийг авч байсан гэнэ. Сум нэвтэрдэггүй тусгай машин 525 сая хонконг доллар мөн ойролцоогоор 68 сая ам.доллар бэлнээр авч явжээ. Нийтдээ 35 сая хонконг доллар зам дээр унаснаас 20 саяыг нь цагдаа нар цуглуулан авч амжсан бол 15 саяыг алджээ. Хонконгийн Цагдаагийн газраас оршин суугчдад хандан зам дээрээс авсан мөнгөө эргүүлэн өгөхийг анхаарууулав. Хэрвээ авсан мөнгөө эргүүлэн өгөхгүй бол ноцтой гэмт хэрэгт тооцогдох бөгөөд хуулийн хариуцлага хүлээлгэх гэнэ. “South China Morning Post” сонинд бичсэнээр үл таних эмэгтэй гэхэд арваад боодол 500 хонконг доллар авсан ажээ. 
Дэлхий даяар олон мянган сүлжээ дэлгүүртэй, жил бүр 400 сая каталог гаргаж, тэрбум тэрбумын орлого олдог “Victoria’s Secret” үзэгчдийн тэсэн ядан хүлээдэг алдарт шоугаа ихэвчлэн Нью-Йорк хотноо зохион байгуулдаг ч энэ жилийн шоу анх удаагаа Лондон хотноо зохион байгуулагдсан юм. Харин загварын шоуг зохион байгуулагчид ирэх оны шоундаа Пуэрто Риког нүдэлжээ. Ингэснээр сахиусан тэнгэрүүд “Victoria’s secret”-н усны хувцасны загварын шоунд оролцохоор арлын орныг зорих болох нь.