Олимпийн хошой аварга хөнгөн атлетикч Елена Исинбаева албан ёсоор спортод эргэн ирж маргаашнаас бэлтгэлдээ орох тухай Оросын Армийн спортын төв клуб ЦСКА-аас хэвлэлийн хурал зарлажээ. Исинбаева хамгийн сүүлд 2013 онд Москва хотноо Дэлхийн цомын тэмцээнд ялалт байгуулсан ба энэ удаа Рио-де-Жанейрогийн Олимпийн наадамд амжилттай оролцох зорилготой байна. Спортоос түр хөндийрсөн тэрбээр 2014 оны зургадугаар сард охин төрүүлжээ. Хэвлэлийн бага хуралд Исинбаева мэдэгдэл хийх ба олон улсын хэвлэлийн «Россия сегодня» төв дээр зохион байгуулах аж.
Category: гадаад
Хятадын уул уурхайн магнат Лиу Ханыг мафийн бүлэглэл үүсгэж, олон хүний аминд хүрсэн хэмээн буруутгаж, цаазалсан тухай “Ройтерс” агентлаг мэдээллээ. Түүнийг Үндэсний аюулгүй байдлын дарга асан, авилгын хэргээр шалгагдаж буй Жоу Юкантай холбоотой хэмээжээ.
Ханыг Сичуань мужийн Гуанхан хотод мөрийтэй тоглоомыг цэцэглүүлж, нутгийн иргэдийг дарангуйлж, авлига авсан хэмээж өнгөрсөн оны долоодугаар сард баривчилсан юм. Цагдаагийнхан түүний Сичуань болон Бээжинд байрлах 11 үл хөдлөх хөрөнгийг битүүмжилж улсын орлого болгосон байна. Түүний тэргүүлдэг уул уурхайн компаниудын үйл ажиллагааг зогсоожээ. Ханаас гадна түүний ах Лю Вэй болон Тан Сяньбин, Чан Дунхуа, Тянь Сяньвэйюг цаазалсан тухай “Синьхуа” агентлаг мэдээлэв. Дээрх хэрэгтэй нийтдээ 36 хүн холбогдсоноос тав нь цаазын ял сонссон байна. Мөн таван хүнд цаазын ял оноож, таван жилийн дараа гүйцэтгэхээр болжээ. Түүнчлэн дөрвөн хүнд бүх насаар нь хорих ялаар шийтгэсэн байна.
БНХАУ-ын шүүхийн шийдвэрээр тэрбумтан Лю Ханыг цаазаар авсан. Шүүхээс түүнийг 1993 оноос эхлэн Сычуань мужид гэмт хэргийн шинжтэй ажлууд хийх болсон, улмаар түүний бүлэглэл мужийнхаа эдийн засгийн хэд хэдэн салбарт хууль бус хяналт тогтоож, үүгээрээ нийгэм, эдийн засгийн эмх журмыг зөрчиж асар их орлого хуримтлуулсан гэж үзжээ.
БНХАУ-ын Хубэй мужийн Ардын дээд шүүх Лю Ханы дөрвөн хамсаатныг мөн цаазаар авах шийдвэр гаргав. Лю Ханьтай холбоотой хэргээр нийтдээ 36 хүнийг шүүж, тэднээс таван хүнийг шүүхийн шийдвэрийн дараа цаазалж, өөр таван хүнийг хоёр жилийн дараа цаазлахаар болжээ. Мөн дөрвөн хүнийг бүх насаар нь хорьж, үлдсэн хүмүүсийг зохих хугацаагаар хорих ялаар шийтгэв. Лю Ханьтай хамт түүний ах Лю Вэй, хамсаатан Тан Сяньбину, Чжан Дунхуа, Тянь Сяньвэй нарыг цаазаар авч, ялыг гүйцэтгэхийн өмнө гэр бүлийнхэнтэй нь уулзуулжээ.
Лю Хан нь тус улсын “Sichuan Hanlong Group”-ын тэргүүн байсан бөгөөд түүний нийт хөрөнгө 6.4 тэрбум ам.доллараар тоологддог аж. “Sichuan Hanlong Group” нь харилцаа холбоо нарны эрчим хүч, химийн бодис, уул уурхай, ашигт малтмалын хайгуул, үл хөдлөх хөрөнгө, үнэт цаас зэрэг олон салбар чиглэлээр үйл ажиллагаа өргөжүүлсэн тэлсэн байжээ. Нийт 70 гаруй компанитай бөгөөд уул уурхайн “Sichuan Hongda” охин компани нь 2011 онд Танзанийн нүүрс төмрийн уурхайд гурван тэрбум ам.долларын хөрөнгө оруулалт хийж, энэ нь Зүүн Азид хийсэн томоохон хөрөнгө оруулалт байсан гэнэ. Хэвлэлүүдэд мэдээлж байгаагаар Лю Хан нь “Rolls Royces”, “Bentleys”, “Ferrari” зэрэг 100 гаруй тансаг зэрэглэлийн машинтай байсан аж. 
Тэрбээр Сычуань мужийн депутатаар гурван удаа сонгогдсон бөгөөд 20 гаруй хүндэт цолтой байсан гэнэ. Нэгэн үе Хятадын Нийгмийн аюулгүй байдлын сайд асан Чжоу Юнканы ууган хүүгийн туслахаар ажиллаж байсан байна. Чжоу Юнкан бол Хятадын түүхэн дэх хамгийн том авлигын хэрэгт холбогдсон төрийн өндөр албан тушаалтан юм. 
Ц.БУЛГАН
Өчигдөр АНУ-ын Ерөнхийлөгч Б.Обама, ХБНГУ-ын канцлер А.Меркель нар Цагаан ордон уулзаж Украины асуудлыг хэлэлцсэн байна. Тэд Донбассын асуудлыг зөвхөн энхийн аргаар шийдэх нь зүйтэй хэмээн үзжээ. Түүнээс гадна ОХУ-д шахалт үзүүлэх зорилгоор тавьсан хоригийг сулруулах болоогүй гэдэг дээр ч санал нийлсэн гэнэ. Уулзалтын дараа хоёр улын төрийн тэргүүнүүд хэвлэлийн бага хурал хийлгэхдээ ОХУ үүргээ биелүүлэх хүртэл хоригийг цуцлахгүй гэв.
Ю.Дэлгэр
-Украинд цэргийн тусламж илгээх асуудал нь Барууныхныг үзэл бодлоор хуваагдахад хүргэв-
Украины зүүн хязгаарын хямрал Мюнхений аюулгүй байдлын уулзалтын гол сэдэв байлаа. Германы Мюнхен хотноо өнгөрсөн амралтын өдрүүдэд /II.6-8/ олон улсын аюулгүй байдлын бодлогын асуудлыг хэлэлцдэг бага хурал болж өндөрлөсөн юм. 51 дэх удаагийн уулзалтанд Германы канцлер Ангела Меркель, АНУ-ын дэд ерөнхийлөгч Жо Байден, сенатор Жон МакКлэйн, НАТО-гийн ерөнхий нарийн бичгийн дарга Йенс Столтенберг, Германы батлан хамгаалахын сайд Урсула фон дер Лайен, ОХУ-ын гадаад хэргийн сайд Сергей Лавров, Украины ерөнхийлөгч Пётр Порошенко тэргүүтэй 20 орны төр засгийн тэргүүн, 60 орчим гадаад хэргийн сайд, дипломатууд хуран чуулав. Хоёр өдрийн уулзалтанд хэлэлцэх гол сэдвийн хүрээнд Европын холбоо дотроо хуваагдсан болохыг албаныхны байр суурь нотлон харууллаа.
Бага хурлын үеэр АНУ тэргүүтэй Оросын эсрэг “суртал ухуулагчид” Украиныг цэргийн зэвсэг, техникээр хангахыг үгүйсгэсэнгүй. НАТО-гийн цэргийн командлагч генерал Филип Бридлов “Украин руу цэрэг илгээхгүй боловч Киевийг цэргийн зэвсэг, техникээр хангаж болно” хэмээн мэдэгджээ. Укрианы хямралд ОХУ-ыг буруутгасан байр суурийг НАТО-гийн ерөнхий нарийн бичгийн дарга Йенс Столтенберг, Британийн гадаад хэргийн сайд асан Малком Рифкинд, АНУ-ын сенатор Линдсей Грэхем нар хүчтэй илэрхийлсэн юм.
Укрианы ерөнхийлөгч Пётр Порошенко бага хурлын үеэр ОХУ-ын хэд хэдэн паспортыг үзүүлж, Донбассын зөрчилд Оросын цэргүүд оролцож буй гэдгийг нотлохын хичээв. Үүний хариуд ОХУ-ын албаныхан хар зах дээрээс хичнээн л бол хичнээн ийм хуурамч паспорт олж авч болохыг дурьдаад Укрианы талаас албан ёсны хувилбарыг өгөхийг хүссэн байна.
Харин ОХУ-ын гадаад хэргийн сайд Сергей Лавров Украины тогтвортой байдлыг алдагдуулахад АНУ, Европын холбооны бодлого илүүтэй үүрэг гүйцэтгэсэн хэмээн буруутгажээ. Сергей Лавров АНУ, Европын холбоо ардчилсан замаар сонгогдсон Киевийн Засгийн газрыг түлхэн унагаахад тусалсан хэрнээ үүний дараа төрийн эргэлтээр гарч ирсэн шинэ Засгийг зүүн хэсгийн ард түмнийхээ эсрэг их бууны ам чиглүүлэхийг хориглоогүй хэмээн хурцаар шүүмжлэв. Түүнчлэн Сергей Лавров АНУ-ын төрийн нарийн бичгийн дарга Жон Керрид хандан Киевийн Засгийн газрыг цэргийн зэвсэг, техникээр хангах нь урьдчилан хэлэх аргагүй үр дагаврыг авчирч, Украины зүүн хэсгийн хямралыг шийдвэрлэхийн төлөөх хүчин чармайлтыг үгүй хийхийг хатуу анхааруулжээ.
Үүний зэрэгцээ бага хурлын үеэр ОХУ-ын эсрэг байр сууриа зөөллөх орнуудын тоо нэмэгдсэн нь ажиглагдав. Москва хотноо Укрианы зүүн хязгаарын энхийн шинэ гэрээг хэлэлцсэний дараа Францын ерөнхийлөгч Франсуа Олланд Оросыг буруутгасан байр сууриа эрс зөөлрүүлсэн байна. Францын экс ерөнхийлөгч Николя Саркози “Парис шинэ хүйтэн дайныг хүсэхгүй байна. ОХУ, Франц нь удаан хугацааны турш нийтлэг ашиг сонирхолтой явж ирсэн. Украинаас салж, ОХУ-д нэгдсэн Крымын сонголтыг буруутгаж болохгүй” хэмээн ярьжээ. Өмнө нь Чехийн экс ерөнхийлөгч Вацлав Клаус Крым үргэлж ОХУ-ын нэг хэсэг байсаар ирсэн хэмээн мэдэгдэж байв.
Хэдийгээр Европын лидерүүд Киевийн Засгийн газрыг дэмжихэд санал нэгдсэн ч АНУ-аас цэргийн зэвсэг, техникээр тусламж үзүүлэхийг цөөн хэд нь л дэмжиж байгаа аж. Тухайлбал, Германы канцлер Укрианы хямралыг цэргийн хүчээр шийдвэрлэх гэж хичээн зэр зэвсэг илгээх нь зөрчлийг хурцатгахаас хэтрэхгүй гэж үзэж буйгаа илэрхийлжээ. Ийнхүү Украинд цэргийн тусламж илгээх асуудал нь Барууныхныг үзэл бодлоор хуваагдахад хүргэв.
Европын холбоо ОХУ-ын эсрэг тавьсан эдийн засгийн хоригтоо ороогдож, мухардалд орж эхлээд буй. Гэвч энэ нь АНУ-д ямар ч нөлөөгүй. Мөн зөрчил Америк биш Европ тивд өрнөж буйг авч үзэх хэрэгтэй хэмээн ЕХ-ны зарим орнууд Вашингтоны санааг дэмжихгүй байна. Энэ талаар Европын аюулгүй байдал, хамтын ажиллагааны зөвлөх асан Лоде Ваноост тайлбарлажээ. Лоде Ваноост “Юун түрүүнд, Украины хямрал даамжирвал Европын холбоо шууд оролцоно. Энэ бол АНУ-ын шууд оролцох асуудал биш. Хоёрт, Киевийн Засгийн газар маш тогтворгүй, бүр өөрийн армийн бүхий л нэгжид бүрэн хяналт тавих чадваргүй гэдгийг Европын холбоо бодитоор үнэлж мэднэ” хэмээсэн байна.
Олон улсын аюулгүй байдлын бодлого тодорхойлох анхны бага хурал нь 1963 онд Мюнхенд болжээ. Уламжлалт бага хурлаар 1990 он хүртэл АНУ, Баруун Европын орнуудын асуудлыг хэлэлцэж байв.
АНУ-ын Лос Анжелес хотын “Стаплес центр”-т 56 дахь удаагийн “Grammy Awards” албан ёсоор эхэллээ. Энэ жилийн наадамд холливуудын 100 гаруй уран бүтээлч 35 номинацийн төлөө өрсөлдөж буй юм. Энэ жилийн “Оны залуу уран бүтээлч” шагналыг дуучин Сэм Смит хүртэж, анхны шагналын эзэн болжээ. Дуучин Бейонси, Сэм Смит, Кейни Уэст нар зургаан номинацид нэр дэвшсэнээр хамгийн олон номинацид нэр дэвшсэн уран бүтээлчээр тодорчээ. Бейонси “Шилдэг эмэгтэй дуучин” номинацид хэдийнэ ялалт байгуулсан тухай “www.dailymail.co.uk” мэдээллээ.
Одоогоор “Шилдэг цомог”, “Шилдэг реппер”, “Шилдэг рок цомог” номинацийн эзэд тодорчоо. 2015 оны “Grammy Awards” наадмыг Америкийн шүтээн шоуны хөтлөгч Райн Сийкрэст хөтлөн явуулж буй юм.
Энэ амралтын өдрүүдэд Швейцарийн Базель хотод зохиогдсон дуудлага худалдаагаар Францын зураач Поль Гогены зураг ийм үнээр зарагдаж уран зургийн үнэлгээнд шинэ амжилт тогтоолоо. Гоген Таити арал дээр амьдарч байхдаа 1892 онд зурсан “Хурим хэзээ вэ?” гэдэг нэртэй уугуул нутгийн хоёр эмэгтэйг тод өнгөөр зурсан энэ зургийг Катар улсын Qatar Museums гэх улсын байгуулага 300 сая ам. доллар буюу багаар бодоход таван зуун сая төгрөгөөр худалдан авчээ.
Б.Хулан
Тайванийн агаарын тээврийн “Trans Aria” компанийн “ATR-72” онгоцны ослоор амиа алдагсдын тоо 35-д хүрсэн тухай “Ройтерс” агентлаг мэдээллээ. Одоогоор найман зорчигчийг олоогүй байгаа юм. Ирэх даваа гаригт Тайванийн Тээврийн яам онгоцны осолтой холбоотойгоо мэдээлэл хийх билээ. Тус онгоцонд Хятадын 31, Тайванийн 11, Индонезийн долоон зорчигч зорчиж явсан юм. Өнөөдрийг хүртэл амиа алдсан хүмүүс аль улсын иргэн нь тодорхойгүй байна.
58 зорчигч бүхий “ATR-72” онгоц энэ долоо хоногийн эхээр гүүр мөргөж, Кийлөнг мөрөнд осолдсон билээ. Аврагчид шуурхай ажилласны үр дүнд 15 зорчигчийг аварсан юм.
Алдарт хөлбөмбөгчин Криштиан Роналду болон түүний найз бүсгүй болох нэрт загвар өмсөгч Ирина Шейк нарын харилцаа таван жил үргэлжилсний дараагаар хосууд салах болсон тухайгаа албан ёсоор мэдэгдсэн билээ. Тэдний салсан шалтгааныг Роналду-гийн ээжтэй холбон тайлбарлаж байсан ч албан ёсны хэвлэлийн төлөөлөгч нь энэ байдал ээжтэй нь ямар ч хамааралгүй болохыг хэлсэн юм.
Харин сүүлийн өдрүүдэд бас нэгэн шуугиан дэгдээд байгаа нь алдарт загвар өмсөгч бүсгүй маань шинэхэн дурлалтайгаа учирсан бөгөөд үүнийгээ олон нийтээс нуухгүй байгаа гэнэ шүү.
Topshop компанийнхан дуучин Рианнагийн зургийг өөрийн бүтээгдэхүүн дээр хэвлэснийхээ төлөө шүүхэд дуудагдаад байсан билээ. 2013 онд дуучин бүсгүйн зургийг зөвшөөрөлгүйгээр ханцуйгүй цамцан дээр хэвлэн худалдаанд гаргаснаас хойш хоёр жилийн турш үргэлжилсэн хуулийн маргааныг шүүх байгууллага эцэслэн шийдвэрлэж, Рианнад 3.3 сая фунт стерлинг төлүүлэхээр болжээ.
Topshop болон түүний толгой компани Arcadia нь шүүхээс тогтоосон төлбөрийн хэмжээг бууруулан, нэг сая доллар болгохоор заргалдаж байсан билээ. Гэсэн ч шүүхээс энэ бүхнийг хүлээн зөвшөөрөөгүй аж. Уг цамцыг дэлгүүрт худалдахыг хориглосон шийдвэр гарснаас хойш хэдэн долоо хоногийн дараа ийнхүү шүүхийн тогтоол гарсан байна.