Category: гадаад

Форбс сэтгүүл уламжлал ёсоор дэлхийн хамгийн баян хүмүүсийн жагсаалтыг гаргасан байна. Энэ жил жил “Microsoft”-ийн үүсгэн байгуулагч Билл Гейтс дахин жагсаалтыг тэргүүлж, тэрбумтнуудыг эгнээг хошуучилжээ. Тэрээр нийтдээ 79 тэрбум ам.долларын хөрөнгөтэй юм байна. Гейтс сүүлийн 21 жилийн 16-аад нь энэхүү жагсаалтыг тэргүүлээд байгаа гэнэ.

Үүнээс гадна Форбс сэтгүүлийн жагсаалтад нийтдээ 1826 тэрбумтан багтсан бөгөөд өнгөрсөн жилийн үзүүлэлтээс хойш 181 хүн шинээр тэрбумтнуудын жагсаалтад багтжээ. Ингээд топ 10-т багтсан чинээлэг хүмүүсийг танилцуулъя.

АНУ-ын Төрийн нарийн бичгийн дарга асан Хиллари Клинтон Ерөнхийлөгчийн сонгуульд өрсөлдөхөөр болсон байна. Тэрээр сурталчилгааныхаа ажлыг ирэх дөрөвдүгээр сараас эхлүүлэх гэж байгаа хэмээн “The Wall Street Journal” сэтгүүлд бичжээ. Урьдчилсан дүнгээр Америкийн экс тэргүүн хатагтайг америкчуудын 54 хувь нь дэмжинэ гэсэн судалгаа гарсан байна.Х.Клинтон болон түүний зөвлөгчид ирэх дөрөвдүгээр сараас хандив цуглуулах ажлаа эхлүүлэх юм байна. Энэ удаагийн АНУ-ын төрийн тэргүүний сонгуульд Бүгд Найрамдах намаас өрсөлдөх хамгийн өндөр магадлалтай ньЖеб Буш, Миттом Ромни нар юм.

Ю.ДЭЛГЭРМАА

Оросын Төрийн думын гишүүн, сөрөг хүчний удирдагч Борис Немцовыг Моксва хотын Кремлийн хажууханд дөрвөн удаа буудан хөнөөсөн хэрэг өнгөрөгч амралтын өдөр гарсан билээ. Харин Оросын “Коммерсант” сонинд мэдээлснээр Борис Немцовыг буудан хөнөөсөн газар буюу гүүрийн яг тэр хэсгийн хяналтын камеруудыг “засварлана” гэх шалтгаанаар түр унтраасан байсан аж.

Түүнчлэн гүүрээс нэлээд зайтай орших хяналтын камерт хэрэгтний дүрс бичигдсэн ч тодорхой дүрс байхгүй учир нарийвчлан тогтооход төвөгтэй байгаа гэнэ. Хяналтын камерын бичлэгээс харвал алуурчин Немцовыг буудан хөнөөснийхөө дараагаар зам хөндлөн гүйн гарч, өөрийг нь авахаар ирж буй машинд суун зугтан одсон байна.

Хэрэг гарах газрын камеруудыг засварлах нэрийдлээр унтраасан байсан нь анхаарлыг улам ч татаж эхэлжээ. Алуурчид ойр камерын хяналтгүй газрыг урьдаас мэдэж байсан сэжиг таамаг эндээс гарч эхэлсэн байна.

Их Британийн хаан ширээг залгамжлах хунтайж Уильям БНХАУ-д айлчилж байна. Тэрээр өчигдөр Бээжин хотноо хүрэлцэн очжээ. Хунтайжийн айлчлал гурван хоног үргэлжлэх бөгөөд тэрээр Хятадад байх хугацаандаа Шанхай хот, Юнань мужид очихоор төлөвлөсөн юм. Тэрээр Шанхай хотноо болж байгаа наадмын нээлтэд оролцоно. Ийнхүү Их Британийн хатан хааны гэр бүлийн гишүүн сүүлийн 30 жилд анх удаа Хятадад айлчиллаа.

Ю.ДЭЛГЭРМАА

Их Британийн Засгийн газар өнгөрсөн долоо хоногт Сири улс руу явж, улмаар хэт даврагч болсон өсвөр насны гурван охиныг эрэн сурвалжилж эхэлжээ. 15 настай Кадиза Султана, 16 настай Амира Абасе, 15 настай Ветхамел гэх гурван охин Лондонд болох найзынхаа хуриманд оролцохоор гэрээсээ гарч яваад сураггүй алга болжээ. Мөрдлөгийн явцад тэд Турк улсаар дамжиж Сири, Иракт эрхээ тогтоогоод буй “Халифын вант улс” бүлэглэлийн дайчидтай уулзсан нь тогтоогджээ. Тэд амьд, үхсэн эсэх мэдээлэл нь тодорхойгүй байгаа юм. Охидын гэр бүлийнхэн “Тэд хэт даврагч болбол сайхан амьдарч болох болов уу” хэмээн асууж байсан гэж мэдүүлжээ. Мөн Амира Абасе фэйсбүүктээ “Ажил хийхийг хүсэхгүй байна. Британид ажил хийсэн ч Британи хүмүүс шиг цалин авахгүй. Би бол цагаач. Британийн иргэншилтэй ч британичууд намайг цагаач гэж нэрлэдэг” гэж бичжээ.

Ерөнхий сайд Дэвид Камерон “Аюулгүй байдлын үүднээс охидын байршилыг тогтоох хэрэгтэй. Бидний өсвөр үе буруу зам руу хазайж байна. Мөн нислэгийн компаниуд өсвөр насны хүүхдүүд болон гэмт хэрэгт холбогдож байсан этгээдүүдэд Ойрхи Дорнодын орнуудад зорчих виз олгохгүй байх. Хэрвээ шаардлагатай гэж үзвэл урьдчилж, цагдаагийнханд мэдэгдэх хэрэгтэй” гэж хэлжээ.

Украины Ерөнхийлөгч Петр Порошенко твиттер хуудсаараа дамжуулан Оросын улстөрч Борис Немцовын гэр бүлд эмгэнэл илэрхийлсэн тухай “Ройтерс” агентлаг мэдээллээ. Порошенко “Дэндүү харамсалтай байна. Таны аминд хүрсэн гэмт этгээдүүд хурдан баригдаж, шүүхийн өмнө зогсоосой. Немцовын гэр бүлд эмгэнэл илэрхийлье. Эмгэнэлийг минь хүлээн авна уу” гэж жиргэжээ.

Немцовын дэмжигчид, гэр бүлийнхэн нь өнөөдөр хэрэг болсон газраас холгүй тайван жагсаал зохион байгуулсан байна. Төрийн Думын хашааны гадаа тэд цэцэг өргөжээ. Маргааш Думын гишүүд нэг минут чимээгүй зогсч талийгаачид хүндэтгэл үзүүлэхээр болсон байна.

В.ПУТИН: ЗАХИАЛГАТ, ӨДӨӨН ХАТГАЖ ТУРХИРСАН АЛЛАГА БОЛЛОО

Өнгөрсөн сарын 27-ноос 28-нд шилжих шөнө Москвад Оросын сөрөг хүчний удирдагч Борис Немцов буудуулж амиа алдсан хэрэг гарсан. Түүний амийг хэн хороосон байж болох талаарх элдэв таамгийг дэлхийн улсууд дэвшүүлж байна. Зарим нь лалын хэт даврагчид түүнийг буудсан гэж үзэж буй бол зарим нь ОХУ-ын Ерөнхийлөгч Владимир Путиныг улсын тэргүүнээс буулгахыг хүсэгчид ийн өдөөн хатгалга үйлдэж байна хэмээн харж буй бололтой.

Өнгөрсөн бямба гаригт ОХУ-ын мөрдөн байцаагч, улс төрчид төрийн телевизээр сөрөг хүчний удирдагч Немцов Москвад юуны учир буудуулж амиа алдсан байж болох шалтгааныг хайж ярилцжээ. Немцов ОХУ-ын ерөнхийлөгчийн эсрэг байр суурьтай байсан нь үхлийн ганц шалтгаан болж буй бололтой хэмээн АР мэдээлсэн байна. Харин ВВС агентлаг “Уг аллагыг Немцовын улс төрийн үйл ажиллагаатай холбоотой, эсвэл өмнөх бизнестэй нь холбоотойгоор түүнд өстэй этгээдүүд үйлдсэн” гэж таамаглажээ.

Дээрх аллага, Немцов ОХУ-ын эдийн засгийн хямрал, Украины эсрэг дайн болон галзуу түрэмгий үхлийн аюултай бодлого барьж буй Путины эсрэг тэмцэж, ням гаригт жагсахыг Москвагийн оршин суугчдад уриалсан радио ярилцлага өгснөөс хэдхэн цагийн дараа болсон байна.

Түүнийг олонтаа буудуулж амиа алдсаны дараа ням гаригт болох эсэргүүцлийн жагсаалыг цуцалжээ. Оронд нь гашуудлын жагсаал хийхийг уриалж, улмаар Москва хотын захиргаанаас сөрөг хүчнийхэнд зөвшөөрлийг нь даруй өгсөн мэдээлэл байна.

Хэдийгээр ОХУ-д эдийн засгийн хямрал нүүрлэж, инфляци өссөн ч сүүлийн саруудад Путиныг дэмжих ард түмний дэмжлэг 80 хувиас буухгүй байгаа юм.

ОХУ-ын Ерөнхийлөгч Владимир Путин энэ хэргийг захиалгат бөгөөд өдөөн хатган турхирсан аллага боллоо гэж үзэж буйгаа илэрхийлжээ. Тэрээр Немцовыг буудаж хөнөөсөн аллагын мөрдөн шалгах ажиллагааг өөрийн биеэр удирдахыг хууль сахиулах байгууллагын дарга нартаа тушаажээ.

Путины өгсөн үүргийн дагуу байгуулсан мөрдөн шалгах комиссын бүрэлдэхүүнд хууль сахиулах байгууллагуудын хамгийн шилдэг ажилтнуудыг оруулсан байна. Түүнийг хөнөөсөн хэргийг мөрдөн шалгах ажиллагааг Оросын Дотоод хэргийн сайд Владимир Колокольцев хяналтдаа авчээ.

-БОРИС НЕМЦОВТОЙ ЭНЭ САРЫН 3-НД САЛАХ ЁС ГҮЙЦЭТГЭНЭ-

ОХУ-ын төрийн тэргүүн, Немцовын 86 настай ээжид эмгэнэлийн цахилгаан утас илгээж, түүндээ “Бузар, эрээ цээргүй аллага зохион байгуулагчид болон гэмт этгээдүүдийг олж илрүүлж, зохих шийтгэлийг нь хүлээлгэх болно” гэснийг Кремль мэдээлсэн байна. Путины хэвлэлийн төлөөлөгч Дмитрий Песков “Ерөнхийлөгч Владимир Путин энэхүү аллага нь туйлын өдөөн хатгасан үйлдэл боллоо гэж мэдэгдсэн гэжээ.

Оросын сөрөг хүчний удирдагчийн аминд халдсан ноцтой хэргийн дараа олон мянган хүн түүнд хүндэтгэл үзүүлсний дотор АНУ болон Европын улс орнуудын элчин сайд нар байсан аж.

Оросын сөрөг хүчнийг 20 жил удирдсан, “Солидарность” хөдөлгөөнийг үүсгэн байгуулагч, удирдагчдын нэг, 55 настай Борис Немцовыг өнгөрсөн баасан гаригийн шөнө дунд Москвагаас холгүй орших Большой Москворецкийн гүүрэн дээр найз бүсгүйтэйгээ хамт явах үед нь цагаан өнгийн машинтай үл таних этгээдүүд араас нь буудсан. Түүн рүү зургаан удаа буудсанаас дөрвөн сум нуруун тус газар нь онож, тэрээр газар дээрээ нас барсан талаар Оросын хэвлэлүүдэд бичсэн байна. Тэрээр “РПР-ПАРНАС” улс төрийн намыг хамтран даргалагч, Оросын сөрөг хүчний зохицуулах зөвлөлийн гишүүн байв.

Борис Немцовыг гуравдугаар сарын 3-нд Москва хотын Троекуровск оршуулгын газарт оршуулахаар болсныг “РПР-ПАРНАС” намын Холбооны улс төрийн зөвлөлийн товчооны гишүүн Константин Мерзликин мэдээлжээ.

Түүнтэй Москвагийн цагаар 10:00-14:00 цагийн хооронд Сахаровын төвд салах ёс гүйцэтгэсний дараа оршуулах ёслол Троекуровскт болох юм байна.

Э.ЭНХ-ЭРДЭНЭ

Ярослав мужийн Думын гишүүн, улстөрч Борис Немцов халдлагад өртөж амиа алдсан тухай “Ройтерс” агентлаг мэдээллээ. Түүнийг өнгөрсөн сарын 28-ны оройн 23.30 цагийн үед Москвагийн төвд машинтайгаа явж байхад нь нүүрээ халхалсан найман этгээд халдсан байна. Немцов дөрвөн суманд оногдож амиа алджээ. Хэргийн газраас бууны долоон ширхэг хонгио олдсон гэж цагдаагийнхан мэдээлжээ.

Халдлагын дараа тус улсын Ерөнхийлөгч В.Путин цагдаагийн газрын удирдлагуудыг хүлээн авч уулзжээ. Путин хэвлэлийнхэнд “Немцовын аллагыг захиалсан байх магадлалтай. Хэрэгтнийг нэн даруй барьж, шийтгэхийг албаны хүмүүст даалгаж байна. Мөн харамсалтайгаар амиа алдсан Борис Немцовийн гэр бүлд эмгэнэл илэрхийлье. Немцовын хурц, дайчин үгнээс олон хүн эмээдэг байсан” гэж хэлжээ. Мөн хэргийн газар ажиллаж буй мөрдөгчийн хэлснээр “Немцовын аллагыг захиалсан” гэж Путиний мэдэгдлийг баталсан байна.

“Аллагатай холбоотой хүмүүсийн эрэн сурвалжилж, Немцовын гэр болон ажлын өрөөг нь битүүмжилж, холбоотой байсан хүмүүсээс мэдүүлэг авч эхэлсэн” гэж Путиний хэвлэлийн төлөөлөгч Чуркин мэдэгдэв.

Аргентины Ерөнхийлөгч Кристина Де Киршнерийн хэргийг шүүх хурлаар хүчингүй болгох шийдвэр гаргасан тухай “Ройтерс” агентлаг мэдээллээ.

Ерөнхийлөгчийг 1994 онд Буэнос Айрес хотын Еврей сүмд гарсан террорист халдлагад холбоотой хэмээн буруутгаж байсан юм. Холбооны шүүгч Даниэл Рафекас гэмт хэрэгт холбогдох үндэслэл болон баримт хангалтгүй байгаа учир дээрх хэрэгт Ерөнхийлөгчийг яллах үндэслэл байхгүй гэж мэдэгджээ.

Халдлагын үеэр 85 хүн амиа алдсан юм. Энэхүү хэргийг амиа алдсан прокурор Алберто Нисман мөрдөж байсан бөгөөд энэ хэрэгт Ираны Засгийн газар холбогдож, Аргентины эрх баригчид нуун дарагдуулсан гэх баримтыг бүрдүүлсэн байжээ. Мөн Нисман өөрийн шалгаж байсан хэрэгтэй холбоотойгоор Ерөнхийлөгч Кристина Фернандес де Киршнерийг баривчлах төлөвлөгөөтэй байсан юм. Тэрээр тайлангаа өгөхөөс хэдхэн цагийн өмнө амиа алдсан билээ.