Category: гадаад

Жүжигчин Мэрилин Монрогийн 1962 оны долоодугаар сарын 12-ны өдөр авахуулсан гурван цуврал фото зургийг дуудлага худалдаагаар зарсан тухай “www.dailymail.co.uk” мэдээллээ. Зургийг таван мянгаас эхэлж дуудсан бөгөөд 36 мянган ам.доллароор зарагдсан гэж зохион байгуулагчид мэдэгджээ. Эдгээр зургийг жүжигчний дотны найз, гэрэл зурагчин Жорж Баррис авсан байна. Тэрбээр цуврал зургийг ач хүүдээ өгчээ. Жорж Баррис өдгөө хүнд өвчнөөр шаналж буй тул ач хүү Хэн Баррис уг зургуудыг дуудлага худалдаагаар зарж, өвөөгийнхөө эмчилгээний төлбөрт хандивлахаар болжээ.

Монрогийн зургийг фото зураг цуглуулагч Берт Стэрин авсан байна. Стэринд жүжигчний 1000 гаруй зураг болон эд зүйл нь байдаг гэнэ. Тэрбээр Монрогийн зураг болон эд зүйлсийг нь авахад 100 сая гаруй доллар зарцуулсан байна.

Оросын улстөрч Борис Немцовын үхэлтэй холбоотой гурван хүнийг цагдаагийнхан саатуулсан тухай “www.dailymail.co.uk” мэдээллээ. Хяналтын камерт эдгээр хүмүүс аллага гарах үед хэргийн газраас холгүй байсан нь тогтоогдсон байна. Цагдаагийнхан “Баривчлагдсан хүмүүс Немцовын аминд хүрсэн эсэхийг нь тодруулахаас өмнө тэдний хувийн мэдээллийг нийтэд цацах боломжгүй” гэж мэдэгджээ. Немцовын аллагатай Ерөнхийлөгч В.Путин ямар ч хамааралгүй хэмээн нам, эвслийн удирдлагууд мэдэгджээ. Путин “Энэхүү хэргийн цаана Оросын тусгаар тогтнол, аюулгүй байдал яригдаж байгаа. Тиймээс хэрэгтнүүдийг заавал барьж, ямар шалтгаанаар Немцовын аминд хүрснийг нь тогтоох хэрэгтэй” гэж хэлжээ.

Хэрэг гарах үед Немцовтой хамт байсан Украины загвар өмсөгч Анна Дурицкая мягмар гаригт Киев руу буцсан билээ. Тэрбээр мэдүүлгийнхээ үеэр Немцовын аминд хүрсэн гэмт хэрэгтнүүдийг хараагүй хэмээн ярьжээ. Немцовын дэмжигчид түүнийг энэхүү хэрэгтэй их, бага хэмжээгээр холбоотой хэмээн мэдэгдэж, гэмт хэрэгтнүүд баригдаагүй байхад, ямар шалтгаанаар түүнийг сулласан бас нутаг буцаасныг нь тогтоохыг Путинээс хүсчээ. Украины Гадаад хэргийн яам иргэнтэй нь холбоотой сөрөг мэдээллийг буруутгаж, ёс зүйтэй байхыг сануулсан байна.

Өмнөд Солонгост суух АНУ-ын элчин сайд Марк Липперт өнөөдөр халдлагад өртсөн байна. Элчин сайд нүүр, гарандаа гэмтэл авч эмнэлэгт хүргэгджээ. Түүнийг сахлын хутгаар зүсч гэмтээсэн 55 настай эрэгтэйг баривчилсан аж. Элчин сайд Марк Липперт өглөөний цайны уулзалтанд оролцох үеэр энэ хэрэг гарчээ. Халдлага үйлдсэн эрэгтэй Вашингтон, Сөүлийн хамтарсан цэргийн сургуулилтыг эсэргүүцэж ийм үйлдэл гаргасан гэнэ. Тэрээр “Өмнөд, Хойд Солонгос улс нэгдэх ёстой” гэж хашгирч байжээ.

БНХАУ энэ жил батлан хамгаалахын салбарын төсвөө 10 хувиар нэмнэ хэмээн эх сурвалж мэдээллээ. Хятад улсын эдийн засаг өнгөрсөн жил 7.4 хувиар унасан бөгөөд 2015 онд ч мөн энэ бууралт үргэлжилнэ хэмээн таамаглагдаж байна. Гэсэн хэдий ч үүнийг үл харгалзан батлан хамгаалахын төсвөө урьд өмнө байгаагүй хэмжээгээр нэмэгдүүлэхээр шийдвэрлэсэн байна.
Ингэснээр урд хөрш энэ онд батлан хамгаалах салбартаа 145 тэрбум ам.доллар зарцуулах аж. Бээжин сүүлийн таван жилийн турш уг салбарын төсвийг нэмсэн ч хэзээ ч арван хувиар өсгөж байсангүй.
Харин Пентагон Бээжинг төсвөө 10 биш 40-50 хувиар нэмэгдүүлж байгаа гэх таамагтай байна. Учир нь энэхүү төсвийн өсөлтөд өндөр технологийн зэвсэг импортлох зардал, тагнуулын судалгаа болон бусад цэргийн бие даасан хөтөлбөрийн зардал багтаагүй болохыг онцолж байгаа юм.
Уг салбарт их хэмжээний мөнгө зарцуулна гэдэг нь БНХАУ бүс нутаг болон олон улсад хүч чадалтайгаа нотлон харулуах гэсэн оролдлого хэмээн барууныхан бичжээ.
Дашрамд дурдахад Япон улс 2015 онд батлан хамгаалах салбартаа 42 тэрбум ам.доллар зарцуулах бол АНУ Хятадаас гурав дахин их буюу 534 тэрбум ам.доллар төсөвлөжээ.

АНУ-ын ерөнхийлөгч Барак Обама Украины хямралтай холбоотойгоор Орост тавьсан хориг арга хэмжээнийхээ үйл ажиллагааны ажиллагааны хугацааг дахин нэг жилээр сунгалаа гэж Цагаан ордны хэвлэлийн албанаас мягмар гаригт мэдээлжээ.

Хэвлэлийн мэдээнд АНУ-ын засгийн газар өнгөрсөн онд авсан янз бүрийн салбарт хамаатай хориг арга хэмжээ авсан жилийн хугацаа нь дуусч байгаа учраас дахин түүнийг нэг жилээр сунгаж байгаа гэж тодруулжээ.

Дэлхийн зэрлэг байгалийг хамгаалах өдөр тохиож буйтай холбогдуулан Кенийн Засгийн газар зааны 15 тонн соёо шатаажээ. Энэхүү санаачлагыг тус улсын Ерөнхийлөгч гаргасан бөгөөд зааны соёог худалдаж их мөнгө олохын тулд тэднийг олноор хөнөөж буй хулгайчидтай тэмцэж буй хэрэг хэмээн үзэж байна.
Хулгайн анчдаас хурааж авсан 15 сая тонн соёог шатаах арга хэмжээ нийслэл Найробийн үндэсний паркт болсон аж. Тус улсад 25 жилийн өмнө зааны соёо худалдахыг хориглосон боловч зах зээлийн тансаг эрэлт Африкын заан, хирснүүдийг устгах аюулд хүргэж буй юм.
Ерөнхийлөгч Ухуру Кенияатта “Энд шатаасан соёо бүхний тоогоор заанууд гэмт хэрэгтнүүдийн гарт мөхөж байна. Бид кени, африкчуудыг энэ балмад хэрэгтэй тэмцэж бүх дэлхийд онгон байгалийн гоо үзэсгэлэнг харуулахыг хүсч байна. Хулгайн анчид болон тэдний барааг авдаг хүмүүс удахгүй эцсийн үгээ хэлэх цаг ирнэ” хэмээн хэлжээ.
2010-2012 оны хооронд Африк тивд 100 мянган заан хулгайн анчны гарт үрэгджээ. Өнгөрсөн жил Кенид 164 заан, 35 хирсийг хулгайгаар агнасан хэрэг бүртгэгдсэн нь өмнөх оныхоос хоёр дахин багассан үзүүлэлт бөгөөд үүнийг гэмт хэрэгтэй тэмцсэний үр дүн хэмээн харж байгаа юм.

НҮБ-ын хүний эрх хариуцсан Ерөнхий комиссарын удирдах газраас гаргасан мэдээнд Украйны зүүн нутагт болж байгаа зэвсэгт мөргөлдөөний улмаас өнгөрсөн оны дөрөвдүгээр сараас хойш 6000 гаруй хүн амь үрэгдэж, 14 700 хүн шархадсан байна. Сүүлийн хэдэн долоо хоногийн турш Донецкийн нисэх буудал, Дебальцевогийн орчим байлдаан төвлөж онцгой ширүүн явагдсаны улмаас цэргийнхэн төдийгүй олон зуун энгийн иргэд алагджээ.
НҮБ-ын хүний эрх хариуцсан Ерөнхий комиссар Зейд Раад Зейд аль Хуссейний гаргасан тайланд аюулгүй байдал ба хүний эрхийн асуудал нэгдүгээр сарын турш ба хоёрдугаар сарын эхээр эрс муудсан гэжээ. Тухайлбал, Авдеевка, Дебальцево, Попасная гэсэн тосгонуудын орчим эмх замбараагүй буудлага болсоны улмаас олон хүн амиа алдаж, шархадсан байна. Мөн энгийн иргэдийг харгисаар хөнөөж, дэд бүтэц сүйрсний улмаас зэвсэгт мөргөлдөөний бүс дэх хүний эрхтэй холбоотой нөхцөл байдал аймшигтай байдалд байгааг Ерөнхий комиссар онцолжээ. Тэрээр “Минскийн тохиролцоонд заагдсан бүх зүйлсийг талууд гүйцэтгэх шаардлагатай байгаагаас гадна энгийн иргэдийн хувьд аймшигтай нөхцөл бий болгосон байлдааны бүх л ажиллагаа, эмх замбараагүй буудалцааныг зогсоох хэрэгтэй байна” гэжээ.

Япон улсад зорчих виз мэдүүлэхэд журамд өөрчлөлт орсон талаар Япон улсаас Монгол Улсад суугаа Элчин сайдын яамнаас мэдээллээ.
Японы талаас урилга, батлан даалтын бичиг заавал шаардахгүй бөгөөд хэрэв виз мэдүүлэгч нь санхүүгийн хувьд Япон улсад зорчих боломжгүй тохиолдолд л урилга, батлан даалтын бичиг шаардлагатай аж. Виз мэдүүлэгч нь гэр бүлийн аль нэг гишүүний зардлаар зорчих бол тухайн зардал гаргах хүний санхүүгийн баримтыг өгөхөд л болох гэнэ. Мөн зорчих зорилгын дагуу бүрдүүлэх бичиг баримтуудын зарим хэсэгт өөрчлөлт оруулж, виз мэдүүлгийн хуудаснаас гадна шинээр асуулгын хуудсыг бөглөх ажээ.
Үүний зэрэгцээ визний материалыг шалган шийдвэрлэх хугацааг богиносгон, визний мэдүүлэг хүлээн авсан өдрөөс эхлэн ажлын гурав хоногт шийдвэрлэх бөгөөд материал бүрэн биш тохиолдолд хүлээн авахгүй ажээ. Тус журам энэ сарын 3-ны өдөр буюу өчигдрөөс эхлэн мөрдөгдөж эхлэв.

Өнгөрсөн мягмар гаригт буюу өчигдөр Москвагийн Сахаровскийн төвд Борис Немцовтой салах ёс гүйцэтгэх ёслол болов. Энэхүү ёслолд оролцохоор жагсаал цуглаанд оролцож буй мэт хэдэн мянган хүн цугларчээ. Тэдний дунд талийгаачийн гэр бүл, төрөл төрөгсөд, “РПР-Парнас” намыг хамтран удирдагч Михаил Касьянов, “Ардчилсан сонголт” намын дарга, “Солидарность” хөдөлгөөний идэвхтэн Владимир Милов, ОХУ-д суугаа АНУ-ын элчин сайд зэрэг хүмүүс байжээ. Мөн Немцовыг харж байгаагүй ч түүний үзэл бодлыг хүндэтгэдэг олон мянган хүн ирсэн аж. Түүнээс гадна холбооны болон бүс нутгийн гүйцэтгэх эрх бүхий байгууллага, парламентын гишүүд, нийгмийн идэвхтнүүд, хүний эрхийн идэвхтнүүд, “Зөв хүчний холбоо” нам, дипломат корпусын төлөөлөл, дэмжигчид ирж Немцовтой салах ёс гүйцэтгэсэн байна. Салах ёс гүйцэтгэсний дараа Немцовыг Троекуровскийн оршуулгын газарт үнэн алдартны ёс жаягийн дагуу оршуулжээ.

Хөрөнгийн хэмжээ нь нэг тэрбумын босгыг давснаар Майкл Жордан Форбс сэтгүүлийн тэрбумтнуудын жагсаалтанд багтлаа.

Одоо тэр АНУ-ын 513 дахь баян болжээ.

Ингэхэд хүргэсэн гол шалтгаан бол үнэлгээ нь огцом нэмэгдсэн Шарлотт Хорнетс баг. Майкл Жорданы эзэмшдэг энэ багийн өнгөрсөн оны үнэлгээ $410 сая байсан бол энэ жил $725 сая болж өсчээ. Лос Анжелес Клипперсийг Стив Балмер $2 тэрбумаар худалдаж авсан явдал нь үнэлгээнд ийнхүү сайнаар нөлөөлсөн байна.

Жорданы эзэмшдэг хувь $500 саяын үнэд хүрсэн гэж Форбсд дурджээ.

2010 онд Жордан энэ багийг $275 саяар авч байв.

Харин Жорданы үлдсэн орлогын эх үүсвэр нь Nike компанитай хийдэг спорт гутлын бизнес. Уг бизнесээс Жордан 2013 онд $90 саяыг олж байсан юм.