Category: гадаад

Унгарын шүүх хуралд оролцож буй гартаа гавтай, хөлөө холбуулж, гинжээр нохой шиг хөтлүүлсэн 39 настай Илариа Салис бүсгүйн гэрэл зураг Италийн гол сонинуудын нүүр хуудаст нийтлэгдэв.

Миланы ойролцоох Монза хотын оршин суугч, багш мэргэжилтэй тэрбээр өнгөрсөн оны хоёрдугаар сард Будапешт хотод неонацистуудын жагсаалын эсрэг жагсаалд оролцоод баривчлагджээ.

Унгарын шүүх түүнийг зүүний экстремист хөдөлгөөнд оролцсон, бусдын биед халдсан зэрэг хэрэгт буруутгаж шүүхээр оруулж байгаа юм. Хэрвээ буруутай нь тогтоогдвол Салис 11 хүртэл жилийн хорих ял сонсох гэнэ.

Иргэнийг нь гинжилсэн байгааг Италийн гадаад хэргийн сайд Антонио Таяани “Энэ удаа тэд арай хэтрүүлсэн гэж би бодож байна” гэж мэдэгдэн Унгарын Гадаад хэргийн сайдтай болсон явдлын талаар утсаар ярьсан байна. Мөн Италийн тал Ром дахь Унгарын элчин сайдад эсэргүүцэл илэрхийлж, гаргасан үйлдэлдээ тайлбар хийхийг шаардсан бол Будапешт дахь Итали улсын элчин сайд Унгарын хууль зүйн яаманд очиж, иргэнийхээ асуудлаар уулзжээ. Харин Салисын өмгөөлөгч Евгенио Лоско хэвлэлд “Түүнийг нохой шиг хөтөлж явааг хараад үнэхээр цочирдсон. Энэ бол солиорол. Итали улс энэ асуудлыг зогсоох ёстой” гэж ярьсан байна.

Г.АМАРСАНАА

АНУ-ын ерөнхийлөгч Жо Байден Йорданд Америкийн гурван цэрэг амиа алдсан дроны цохилтод АНУ хариу өгөх болно гэж мэдэгдсэн ч Ойрхи Дорнодод том дайн хийх шаардлагагүй гэж онцлов. Жо Байден энэхүү цохилтыг Ираны дэмжлэгтэй зэвсэгт бүлэглэл хийсэн гэж Ираныг буруутган “Цагаан ордон ноцтой хариу арга хэмжээ авна” гэж амласанч АНУ яг ямар арга хэмжээ авах гэж байгаа талаар тодорхой зүйл хэлсэнгүй. Мөн тэрбээр сэтгүүлчдэд “Ойрхи Дорнодод бүрэн хэмжээний дайн явуулах шаардлага бидэнд байхгүй гэж би бодож байна. Надад ингэх сонирхол алга” гэж хэлжээ.

АНУ-ын ерөнхийлөгчийн энэхүү мэдэгдэл ХАМАС-тай дайн эхэлснээс хойш тус бүс нутагт Америкийн цэргүүд амь үрэгдсэн ч тус улсын өнөөгийн эрх баригчид Ойрхи Дорнод дахь мөргөлдөөнийг хурцатгахгүй бодлого барьж байгааг тодорхой болгов.

Мөн Ираны удирдлага ч өөрийн дэмждэг зэвсэгт бүлгүүдэд цохилт өгч буй АНУ, Их Британийг буруутгасан мэдэгдэл хийхгүй байгаа юм. Ираны ГХЯ-ны хэвлэлийн төлөөлөгч Нассер Канаани Жо Байдены энэ мэдэгдлийг “Бүс нутгийн бодит байдлыг хурцатгахгүй байх улс төрийн тодорхой зорилготойгоор хийгдсэн” гэжээ. Өөрөөр хэлбэл, Ираны өнөөгийн төр, засгийн дарлалд зовж бас тэмцэж байгаа 84 сая хүн амыг бүрдүүлж буй иран буюу перс( 60%), азарбайжан(20 %), араб, курд, лур, туркмен, белуж, армян, еврей үндэстнүүдийн хувь заяа АНУ-ын өнөөгийн төр, засгийн санааг огт зовоохгүй байгаа аж. Уг нь дэлхийн II дайн бидэнд улстөрчид нэгэнт тулсан дайнаас зайлах гэж оролдох, дайн хийж буй дайсантайгаа хэлэлцээр хийх аваас ямар их хохирол амсдагийг хангалттай харуулсан. Гэтэл өнөөдөр АНУ-ын ерөнхийлөгч Жо Байден, ерөнхийлөгч асан Дональд Трамп нар Их Британийн ерөнхий сайд асан Артур Чемберлений алдааг давтах гэж хичээсээр байна. Хүн төрөлхтөн “Түүх давтагддаг. Эхний удаа эмгэнэлт явдал, хоёр дахь удаагаа инээдэм болдог” гэдгийг харж байна. Иймээс бид хэн гэдэг Америк “Уинстон Черчилль” гарч ирж эдгээр “Хос Чемберлен”-ий халааг авахыг л харах үлдэв.

Учир нь ирж яваа цаг үүнийг шаардаж байгаа юм. Тэгээд ч Сиритэй хиллэдэг Йордан дахь АНУ-ын “Tower 22” агаарын баазад дроноор цохилт өгсний улмаас АНУ-ын гурван мянга орчим цэргийн албан хаагчийн гурав нь амиа алдан 34 нь шархадсан явдал зүгээр өнгөрөхгүй нь тодорхой.

Г.АМАРСАНАА

Газын зурваст дайн эхэлснээс хойш тус бүс нутагт анх удаа америк цэргүүд амь үрэгдэв. Иордан дахь АНУ-ын баазад дроноор цохилт өгсний улмаас гурван америк цэрэг амиа алдаж, олон арван цэрэг шархдсан нь тус бүс нутагт АНУ-ын зэвсэгт хүчин болон Ерөнхийлөгч Жо Байденыг хүнд байдалд оруулаад байна. Учир нь АНУ-ын Ардчилсан нам ялангуяа энэ намын гишүүн, дэмжигчид болох их, дээд сургуулийн багш, оюутнууд “АНУ-ыг түрэмгийлэгч улс” хэмээн үзэж аливаа дайн байлдаан хийхийг эрс эсэргүүцдэг юм. Иймээс өнөөдрийг хүртэл Жо Байдены засаг захиргаа дайныг өргөжүүлэхгүй хэмээн Москва, Тегераны эсрэг зоригтой арга хэмжээ авахгүй байсаар байна. Харин энэ бодлого нь Украин, Израиль, Тайваны тусламжийг хойшлуулан Кремлийн удирдлагыг давруулж, Украины цэрэг, энгийн иргэд, хот суурин устгагдаж байгаа учир эрүүлээр сэтгэдэг болгоны дургүйг хүргэж байгаа билээ. Мөн АНУ болон барууны улсуудын төрөл бүрийн зэвсгээс гадна эм тариа, эмнэлгийн хэрэгсэл, хоол хүнс, хувцас хэрэгсэл бүр гар чийдэн, хүрз гэх мэт дайны бараа үйлдвэрлэх жинхэнэ эзэд болох эдгээр үйлдвэрийн дийлэнх хувьцааг эзэмшигч “том”-чуудын дургүйг бүр ч илүүтэй хүргэж байгаа юм. Учир нь байлдааны бараа үйлдвэрлэснээр эдгээр“том”-чууд баяжиж, иргэдийн хувьд өндөр цалинтай олон сая ажлын байр шинээр бий болж, ажилгүйдэл эрс багасаж, улсын эдийн засаг сэргэх явдалд нь том саад учирч байгаа юм.

Ираны дэмжлэгтэй бүлэглэлүүд өнгөрсөн аравдугаар сарын дунд үеэс Ирак, Сири дэх АНУ-ын цэргийн объектуудад тасралтгүй цохилт өгч байна. Үүний үр дүнд Америкийн олон цэрэг шархдсан. Ирак, Сирийн Ираны талын зэвсэгт бүлэглэлд АНУ хоёрын хооронд хариу цохилт өгсөөр эцэст нь америк цэргүүд амиа алдав. Иймээс Цагаан ордон үүний хариу болгон шийдвэртэй арга хэмжээ авахаас өөр аргагүй. Учир нь ерөнхийлөгч Байденыг шүүмжлэгчид түүнийг Иранд хэтэрхий зөөлөн хандсан гэж дахин буруутгаж эхлэх болно. Байден ерөнхийлөгч АНУ-ын алс холын дайнд оролцох оролцоог “улаан шугам”-аар хааж, америкчуудыг хэт их зардалтай мөргөлдөөнд оруулахгүй байхыг хичээсээр ирсэн. Иймээс эртний дайсан Вашингтон ч, Тегеран ч хоёулаа шууд сөргөлдөөнөөс болгоомжтой зайлсхийсээр байгаа билээ. Ираны удирдлага ч дотоод улс төрийн дарамт шахалтыг үл харгалзан Исламын хувьсгалт гвардийн корпусын дээд командлагчдыг устгасны хариуд Америкийн объектуудад цохилт өгөхөөс татгалзаж зөвхөн Израилийг буруутгасаар байгаа билээ. Мөн Их Британи болон бусад орны дэмжлэгтэйгээр АНУ Йемений хутичуудын эсрэг хоёрын хооронд цэргийн кампанит ажиллагаа явуулж, энэ нь Улаан тэнгис дэх хамгийн чухал худалдааны замын аюулгүй байдлыг хангаж чадахгүй байна. Гэтэл цэргүүд нь амь үрэгдсэн учир ерөнхийлөгч Жо Байденд цаг үеэ дагаж Ираны дэмжлэгтэй зэвсэгт бүлэглэлүүд төдийгүй Тегеран бүр Москвагийн эсрэг шийдвэртэй арга хэмжээ авах шаардлага үүсээд байна.

Г.АМАРСАНАА

Спортын Арбитрын Шүүх (CAS) -ээс ОХУ-ын уран гулгагч Камила Валиеваг допинг хэрэглэсэн гэж үзлээ.

Энэ жил 17 настай К.Валиевагаас Бээжингийн олимпийн өмнөхөн авсан шинжилгээгээр зүрхний үйл ажиллагааг дэмжигч допингийн хориотой бэлдмэлийн жагсаалтад багтдаг триметазидин гэгч бодис илэрсэн билээ.

Шүүхээс тамирчны тэмцээнд оролцох эрхийг дөрвөн жилээр хассан. Үүгээр ч зогсохгүй 2021 оны арванхоёрдугаар сарын 25-наас хойш үзүүлсэн амжилтыг нь хүчингүйд тооцлоо. Дээрх хугацаанд тэр Европын тивийн аварга болж олимпын багийн төрөлд алтан медаль хүртэж байв.

Зохиолч, сэтгүүлч Жан Кэрролл “Нью-Йоркийн их дэлгүүрт 1996 онд Трамптай таарсан. Трамп өөр эмэгтэйд бэлэглэх гэж сонгосон дотуур хувцсаа өмсөж үзэхийг надаас хүсэхэд би зөвшөөрсөн бөгөөд Трамп хувцас солих өрөөнд шууд над руу дайрч хүчиндэх гэж оролдсон” гэж шүүхэд өгч, 2023 оны тавдугаар сард тангарагтны шүүх Трампыг Жан Кэрролыг хүчиндэхийг завдсан хэрэгт буруутай гэж үзэн шүүхээс зохиолч эмэгтэйн хохирлыг барагдуулах таван сая долларыг Трампаас гаргуулах шийдвэр гаргасан билээ.

Экс ерөнхийлөгч энэ түүхийг бүхэлд нь худал зүйл, шүүхийн шийдвэрийг “гутамшиг”, “хамгийн аугаа шулмын ан” гэж нэрлэж шүүхийн шийдвэрийг хүчингүй болгоно гэсэн юм. Харин Кэррол түүнийг гүтгэсэн хэргээр дахин Трампын нэр дээр шүүхэд гомдол гаргаж, сэтгэл санааны хохиролд 24 сая доллар нэхэмжилсэн. Тэгвэл өнгөрсөн долоо хоногийн даваагаас баасан гаригт эл хэргийг Нью-Йоркийн тангарагтны шүүх хэлэлцэж, АНУ-ын ерөнхийлөгч асан Дональд Трампыг зохиолч Жан Кэрролын нэр төрд нь халдсан хэмээн үзэж Трампаар 83.3 сая ам.доллар төлүүлэх шийдвэр гаргав. Энэ мөнгөний 18.3 сая ам.долларыг зохиолч эмэгтэйн нэр хүнд, сэтгэл санааны хохирлыг нөхөн төлүүлэх, харин 65 сая ам.доллар нь худал мэдүүлэг өгсөн хэмээн улсад төлөх торгууль юм. Талуудын маргааны үеэр Жан Кэрролын өмгөөлөгч үг хэлж эхлэхэд Дональд Трамп шүүхийн танхимыг орхин гарсан нь нийтийн сүлжээнд шуугиан тариад байна.

Ерөөс экс ерөнхийлөгчийн нэр дээр шүүхэд очоод буй Капитолын ордныг дайрсан хэрэг, Татварын буцаан олголттой холбоотой хэрэг, “Трамп ТББ”-ын татвараас бултсан хэрэг, Нууц бичиг баримт хууль бусаар хадгалсан хэрэг, Сторм Даниэлс гэх “порно од” эмэгтэйд хахууль өгсөн хэрэг гэх мэт бүх хэрийнх нь дээд ялыг нэгтгэвэл Дональд Трамп 700 жил шоронд хоригдох ёстой болчихоод байгааг BBC мэдээлсэн.

Харин анхны хэрэг нь ийнхүү торгуулиар өндөрлөв. Гэхдээ шүүхийн энэ шийдвэр түүний ерөнхийлөгчид нэр дэвших хүсэлд далдуур маш том цохилт болж байгаа билээ. Яагаад гэвэл ерөнхийлөгчид нэр дэвшихэд мөнгө чухал үүрэгтэй. Трампын хувьд 83.3 сая ам.доллар алдана гэдэг том хохирол.

Хамгийн гол нь шүүхийн энэхүү шийдвэр төрөл бүрийн зэвсгээс гадна эм тариа, эмнэлгийн хэрэгсэл, хоол хүнс, хувцас хэрэгсэл гэх мэт дайны бараа үйлдвэрлэх жинхэнэ эзэд болох үйлдвэрийн дийлэнх хувьцааг эзэмшигч “том”-чууд түүний өрсөлдөгч Никки Хэйлийг дэмжих санд их хэмжээний мөнгө хандивлах боломж нээгээд өгчихөж байгаа юм. Эдгээр “том”-чууд нь АНУ-ын ерөнхийлөгчид хэн нэр дэвшихийг шийдэх ирэх сарын 8-нд эхлэх Дээд шүүхийн хэлэлцүүлэг бас долдугаар сард болох Бүгд найрамдах намын их хурлын шийдвэрт хуулийн дагуу ихээхэн нөлөө үзүүлж чадах хүмүүс.

Г.АМАРСАНАА

Ням гаригт уур амьсгалын өөрчлөлттэй тэмцэгч хоёр бүсгүй Франц дахь “Мона Лиза” бүтээл рүү хулууны шөл цацжээ.

Зургийг шилэн хаалтаар хамгаалсан байсан тул ямар нэг гэмтэл үүсээгүй гэв.

Шөл цацсан эмэгтэйчүүд “Аль нь илүү чухал вэ? Урлагийн бүтээл үү эсвэл эрүүл, байгальд ээлтэй хоол хүнс идэх эрх үү?” гэсэн нь бичлэгт үлджээ.

Музейн хамгаалалтын албаныхан тэр даруй зургийг хар хавтангаар хааж, шөл цацсан иргэдийг өрөөнөөс гаргасан байна. Хэрэг үйлдсэн эмэгтэйчүүд “Riposte Alimentaire” хэмээх бүлгийн гишүүд бөгөөд тус бүлэг нь иргэдэд сар бүр хоол хүнсэнд ашиглах 150 евро өгөхийг шаардаж байгаа аж.

Өмнөд Солонгосын Хүнс, Эмийн аюулгүй байдлын яам энэ долоо хоногийн Лхагва гарагт шүдний чигчлүүр идэхгүй байхыг иргэддээ анхааруулжээ.

“Энэ бол хүнсний бүтээгдэхүүн биш. Хүнсэнд хэрэглэхэд аюулгүй гэсэн баталгаа байхгүй” гэж тус яамны сошиал хуудсанд мэдээлсэн юм.

Сүүлийн үед хүмүүс шарсан шүдний чигчлүүрийг хоол хүнсэндээ хэрэглэж буйг харуулсан дүрс бичлэгийг олноор нийтлэх болсон байна.

Тухайлбал Мукбанг гэгддэг Өмнөд Солонгосын хоолны инфлүнсерүүд үүнийг үзүүлэх явдал нэмэгджээ. Тус улсад шүдний чигчлүүрийг модоор биш, амтат төмс, эрдэнэ шишийн цардуулаар үйлдвэрлэдэг. Хүнсний будгаар үйлдвэрлэлийн явцад ногоон өнгө оруулдаг байна.

Ийм хүнсний хэрэглээ олны анхаарлыг татаж, зарим хүмүүс шүдний чигчлүүрийг хэрхэн зөв шарах, амтлах талаар видео зөвлөгөөг тараадаг болжээ. Өмнөд Солонгосын эрх баригчид этгээд сонин зүйлийг хоол хүнсэнд хэрэглэх үзэгдлийн эсрэг анхааруулгыг өмнө нь бас гаргаж байв.

Тухайлбал 2018 онд хурц тод өнгөтэй угаалгын бодисыг зажилж, хөөсөрсөн шүлсээ нулимж хаядаг “Tide pod challenge” нэртэй үзэгдэл газар авч, хүний амь насанд хүрсэн тохиолдол ч бий.

Тус улсын засгийн газар болон угаалгын бодис үйлдвэрлэгч Procter & Gamble компани үүний эсрэг анхааруулга гаргаж байжээ.

Оросын Белгород мужид Ил-76 онгоц сүйрсэнтэй холбогдуулан Украиныг буруутгаж, НҮБ-ын Аюулгүйн Зөвлөлийг энэ сарын 24-ний лхагва гаригт яаралтай хуралдуулахыг Орос улс шаардсан юм. Харин Аюулгүйн зөвлөлийг тэргүүлж буй Францын шийдвэрээр уг хурлыг нэгдүгээр сарын 25-нд хийхээр товлосон байна. Иймээс Оросын тал Францыг яаралтай хурал хийхээс татгалзсан гэж буруутган НҮБ-д суугаа ОХУ-ын Байнгын төлөөлөгчийн орлогч Дмитрий Полянский “Telegram”сувагтаа “цаг хугацаа хожих” зорилгоор Украины талд “юу болсон талаар үнэмшилтэй тайлбар гаргах” боломжийг олгосон гэж бичсэн байна.

Энэ өдрийн үдээс өмнө болсон Аюулгүйн Зөвлөлийн хуралдаан дээр ОХУ-ын Гадаад хэргийн сайд Сергей Лавров Украины тал Ил-76 онгоцны сүйрлийн талаар тайлбар өгөх ёстой гээд “Оросын онгоц Украины хоригдлуудыг солилцохоор тээвэрлэж явсан бөгөөд энэ нь Украины санаатай гэмт үйлдэл” гэж мэдэгдсэн юм.

Хариуд нь Украины Зэвсэгт хүчний жанжин штаб Ил-76 онгоцны ослын дараа мэдэгдэл гаргаж “Украины арми Белгород-Харьковын чиглэлийг оролцуулаад террористуудын аюулыг зайлуулахын тулд агаарын орон зайд хяналт тавьж дайсны нисэх бүрэлдэхүүнийг үргэлжлүүлэн устгана” гэж мэдэгдсэн. Харин үүний өмнө Украины Зэвсэгт хүчний жанжин штабын Тагнуулын ерөнхий газар өөрийн “Tele­gram” сувгаар яаралтай мэдэгдэл нийтэлж, Энэ сарын 24-нд хоригдлуудыг солилцохоор төлөвлөж буйг батлан “Украин улс солилцооны бэлтгэлийг зохих ёсоор хангахын тулд бүх нөхцөлөө биелүүлж Оросын олзлогдсон цэргийн албан хаагчдыг цаг тухайд нь солилцохоор тохиролцсон газарт аюулгүй хүргэсэн. Гэрээний дагуу Оросын тал манай эх орноо хамгаалагчдын аюулгүй байдлыг хангах ёстой. Гэтэл фронтын шугамаас 30 км зайтай байлдааны бүсэд тээврийн нисэх онгоц буух нь ямар ч тохиолдолд аюулгүй байдлыг хангаж чадахгүй учир хоёр тал хэлэлцэх ёстой байсан. Эс тэгвээс энэ нь солилцооны бүх үйл явцад аюул учруулна. Үүн дээр үндэслэн бид үүнийг Оросын талаас урьдаас төлөвлөсөн, зориудаар хийсэн үйл ажиллагаа гэж үзэх болно. Учир нь энэ үйлдэл бол Украины нэр хүндийг унагаж, манай улсад үзүүлэх олон улсын дэмжлэгийг сулруулах зорилготой Оросын холбооны улсын санаатай үйл ажиллагаа” гэж мэдэгдсэн байна.

Оросын Ил-76 цэргийн тээврийн онгоц энэ сарын 24-нд Белгород мужийн Корочанский дүүргийн нутаг дэвсгэрт Яблоново тосгоны ойролцоо “Х” талбайд осолдож онгоцонд байсан бүх хүн нас барсан гэж тус мужийн захирагч Вячеслав Гладков мэдэгдсэн. Харин Оросын Батлан хамгаалах яамИл-76 онгоцонд солилцох зорилгоор тээвэрлэгдэж байсан Украины олзлогдсон 65 цэргийн албан хаагч, нисэх багийн зургаан гишүүн, бас дагалдан яваа гурван хүн байсан гэж тодруулаад уг ослыг “террорист халдлага” гэж нэрлэн, Киевийг үүнийг үйлдсэн хэмээн буруутгасан юм.

Харин НҮБ-ын Аюулгүйн Зөвлөлийн 15 гишүүн улсын дийлэнх олонх “ОХУ НҮБ ялангуяа Аюулгүйн Зөвлөлийн гишүүнээс “террорист улс” гэгдэн хасагдаж, ерөнхийлөгч В.Путин төдийгүй төр, засгийнхан нь бүгд дайны гэмт хэрэгтэн болж, гадаадад айлчилсан албан тушаалтнууд нь олон улсын хууль, журмын дагуу баривчлагдах болоод байгаа учир Кремль худалдааны захыг өөрсдөө буудаж 27 хүний аминд хүрч, хоригдол бүхий онгоцыг хэргээр устгуулан үүндээ Украиныг буруутгах арга ядсан арга хэрэглэж байна” гэж үзэж байгаа юм.

Иймээс Украины ерөнхийлөгч Владимир Зеленский “Оросын Белгород мужид осолдсон Ил-76 цэргийн тээврийн нисэх онгоцны ослын нөхцөл байдлын талаар олон улсын мөрдөн байцаалт явуулахыг Украин улс шаардаж байна” гэж мэдэгдсэн бол АНУ-ын Үндэсний стратегийн харилцааны зохицуулагч Жон Кирби “АНУ-ын засаг захиргаа энэ асуудлын талаар илүү тодорхой, илүү мэдээлэл авахын тулд боломжтой бүхнийг хийж байна” гэж Цагаан ордонд хийсэн хэвлэлийн бага хурал дээр мэдэгдсэн байна. Харин олон нийтийн сүлжээгээр “Оросын сөнөсөн Ил-76 онгоцны зургаас харахад Украины олзны цэргүүдийн шарил огт харагдахгүй байгаа учир Оросын ээлжит худал мэдээлэл” гэсэн мэдээ явж байна.

Г.АМАРСАНАА

Оросын нийслэл Москвагаас гадна Санкт-Петербург, Екатеринбург, Уфа зэрэг хотуудад олон мянган хүн ирэх Ерөнхийлөгчийн сонгуульд сөрөг хүчнээс нэр дэвших Борис Надеждиний төлөө гарын үсгээ зурахаар урт дараалалд зогсож эхэлжээ. Надеждин нь Украины дайныг зогсоох мөрийн хөтөлбөртэй нэр дэвшиж байгаа юм. “Иргэдийн санаачилга” намаас нэр дэвшиж буй 60 настай улстөрч энэ сард багтаан 100.000 хүний гарын үсэг цуглуулж чадвал ирэх гуравдугаар сарын сонгуульд өрсөлдөх боломжтой болно. Борис Борисович Надеждин 1963 онд Узбекистанд төрсөн, Оросын улс төрч, багш, физик-математикийн шинжлэх ухааны доктор, 1999-2003 онд Төрийн Думын депутат байсан. Одоо Москва мужийн Долгопрудный хотын дүүргийн депутатуудын зөвлөлийн орлогч даргаар ажиллаж байгаа бөгөөд ОХУ-ын Ерөнхийлөгчийн сонгуульд “Дайныг зогсооно” уриатай оролцох юм. Улстөрч Борис Надеждин Оросын “РИА Новости” агентлагт “Миний сонгуулийн төв штабынхан надад ОХУ-ын Ерөнхийлөгчийн сонгуульд нэр дэвшигчийн статус авахын тулд иргэдээс гарын үсэг цуглуулсаар байгаа бөгөөд энэ сарын 31 гэхэд Сонгуулийн төв хороонд өргөн барихаар төлөвлөж байна. Бид төв байрандаа 100 гаруй мянган хүний гарын үсэг цуглуулаад байгаа ч 150 мянган хүний гарын үсэг цуглуулна гэсэн зорилт тавиад байна. Манай штаб одоо Сонгуулийн төв хороонд өргөн барих баримт бичиг боловсруулах ажилд шилжээд байна” гэж мэдээлжээ. Хэрэв Борис Надеждин Оросын Ерөнхийлөгчийн сонгуульд оролцож чадвал мэдээж маш бага хувийн “санал авах” нь тодорхой. Харин энэ нь сонгуулийн дүнг эсэргүүцсэн иргэдийн жагсаал болон хувирах магадлалтай юм.

Г.АМАРСАНАА

Эстони, Латви, Литва улсууд хэлэлцээр хийн Оросын холбооны улс, Беларусь улсын бүх хилийн шугам дагуу цэргийн аюул заналхийллээс хамгаалах, таслан зогсоох зорилгоор төрөл бүрийн давхар хамгаалалтын байгууламж барихаар шийдвэрлэв.

Өмнө нь Балтийн орнууд “НАТО-гийн гишүүн нэг улс руу довтлох нь бүхэл бүтэн эвсэлд халдсан явдал болно” гэж үздэг байсан бөгөөд үүнийгээ “өргөст тор” тактик гэж нэрлэдэг байв. Иймээс эдгээр улсын цэрэг, армийн үүрэг нь НАТО-гийн үндсэн хүч ирэх хүртэл дайсныг барих ёстой байсан юм. Харин Украины дайн тэднийг энэ үзлээ өөрчлөхөөс өөр аргагүй болгосон байна. Ийнхүү Балтийн улсууд хилийн давхар шугам бүхий бэхлэлт барьснаар НАТО-гийн орнууд Оросын армийг дорнод хил дээр зогсоож улмаар дарах хүч чадал, чадавхтай болно гэдэгт итгэлтэй болж байгаа аж. Балтийн орнуудын энэхүү батлан хамгаалах төлөвлөгөөг Вильнюс хотод болсон НАТО-гийн хамгийн сүүлийн дээд хэмжээний уулзалтаар хэлэлцэж, баталжээ. Бэхлэлт барих нь энэ төлөвлөгөөний нэг л хэсэг юм. Үүнд Балтийн орнуудад байх НАТО-гийн цэргийг тоо болон чанарын хувьд бэхжүүлэх явдал багтаж байна.

Энэ хавар Герман, Польш болон Балтийн орнууд “Stalwart Defender” буюу “Хүчирхэг хамгаалалт” нэртэй томоохон цэргийн хээрийн сургуулилалт хийж 50 гаруй байлдааны онгоцоор 500-700 агаарын байлдааны ажиллагаа явуулж, 40 мянга гаруй цэргийн албан хаагчид оролцож Оросын түрэмгийллийг няцаах дадлага хийнэ.

Ийм хээрийн сургуулийг жилд хоёр удаа хийхээр төлөвлөж байна. Мөн Украины ерөнхийлөгч “ОХУ-тай тавин жилийн хугацаанд бүх харилцаа, холбоогоо таслах тухай” зарлигт гарын үсэг зурав. Энэ нь хил дагуу ОХУ-тай холбоотой бүх төмөр зам, авто зам, гүүрийг таслан бэхлэлт хийнэ гэсэн үг юм. Ингэснээр оросууд Европ тивээс бүрэн тусгаарлагдах нөхцөл бүрдэв.

Учир нь эдгээр улсууд руу ОХУ пуужин, дроноор л харвана уу гэхээс цэргийн хүчээр довтлох магадлал маш бага байгаа юм. Гэхдээ өнөөдөр ОХУ үндэстэн, ястнаараа хуваагдан тусгаар улсууд болох нь тодорхой болоод байна. Иймээс оросууд байгалийн баялгаа булаалдан хоорондоо байлдах үед хилийн эдгээр давхар хамгаалалт нь Оросын зүгээс ганц ч цагаач иргэн оруулахгүй, зэвсэгт бүлэглэлүүдийг нь нутагтаа нэвтрүүлэхггүй байх зориулалттай юм.

Г.АМАРСАНАА