Category: гадаад

Байгалийн хий нийлүүлэхээ зогсоож буйг Оросын тал мэдэгдсэн тухай Финланд улсын эрчим хүчний Gasum компани өчигдөр мэдээлжээ.

ОХУ-ын эрх баригчид Украины хямралтай холбогдуулан өөрийнх нь эсрэг эдийн засгийн хориг арга хэмжээ авсан орнуудыг “найрсаг бус харилцаатай” хэмээн ангилж, байгалийн хийн төлбөрийг тэднээс зөвхөн рублиэр авах шийдвэр гаргасан юм.

Финланд улс нь рублийн төлбөр тооцоог хүлээн зөвшөөрөөгүйгээс гадна Оросын аюулаас сэргийлэх зорилгоор саяхан НАТО-д гишүүнээр элсэх өргөдлөө гаргасан.

Gasum компани Оросын талын шийдвэрийг харамсан хүлээж авч байгаа ч хэрэглэгчдэд нь ямар нэг тасалдал үүсэхгүйг амласан байна.

Финланд байгалийн хийн хэрэгцээнийхээ ихэнх хэсгийг ОХУ-аас импортолдог. Гэхдээ тус улсын эрчим хүчний нийт хэрэглээний 10 хүрэхгүй хувь байгалийн хийгээр хангагддаг байна.

“Байгалийн хий нийлүүлэх гэрээгээ цуцалж байгаад бид ихээхэн харамсаж байна. Гэхдээ бид ийм нөхцөл байдалд бэлтгэлтэй байсан тул бүх хэрэглэгчдээ ойрын саруудад байгалийн хийгээр тасалдуулахгүй хангах боломжтой байгаа” гэж Gasum компанийн гүйцэтгэх захирал Мика Вилянен ярьжээ.

Шийдвэрийнх нь талаар Кремлийн хэвлэлийн албанаас тодруулахад “хэн ч хэнд ч үнэ төлбөргүй үйлчлэхгүй нь ойлгомжтой шүү дээ” гэсэн хариу өгсөн байна.

ОХУ-ын парламентын гишүүд цэргийн насны хязгаарыг нэмэгдүүлэх хуулийн төсөл боловсруулжээ.

Эрх баригч Нэгдсэн Орос намын хоёр хууль тогтоогч ийм хуулийн төслийг хэлэлцүүлэхээр парламентдаа өргөн барьсан байна.

Одоогоор ОХУ-д 18-40 насны эрчүүд, 18-30 насны гадаадын иргэдийг гэрээт цэргийн албанд элсүүлэхийг зөвшөөрсөн хуультай байдаг.

“Өндөр нарийвчлалтай зэвсэг техникийг ашиглахад тусгай мэргэжлийн хүмүүс хэрэгтэй байдаг. Туршлагаас харахад 40-45 насныхан энэ шаардлагыг хамгийн сайн хангаж байна” гэж хуулийн төсөл санаачлагчид мэдээлжээ.

Үүнээс гадна шинэ хууль батлагдсанаар эрүүл мэнд, инженер техник, харилцаа холбооны салбарын туршлагатай мэргэжилтнүүдийг цэрэгт дайчлахад хялбар болно гэж тэд тайлбарласан байна.

Өрнөдийн ажиглагчид үүнийг ОХУ-ын арми Украины фронтод хүн хүчний дутагдалд орсны илрэл гэж дүгнэжээ.

Хоёрдугаар сарын сүүлээр Украинд халдан довтлохдоо ОХУ хуурай замын цэргийн хүчнийхээ 80 орчим хувийг дайчилсан гэж өрнөдийн албаныхан тооцоолсон нь бий.

Бараг гурван сарын дараа үүнийхээ гуравны нэгийг алдсан байх өндөр магадлалтайг Их Британийн цэргийн тагнуулын алба саяхан мэдээлж байв.

Үүнээс гадна Оросын цэргүүд сэтгэл зүйн асуудалтай тулгарч, янз бүрийн аргаар байлдахаас татгалзаж буй тухай баримтууд ил болсоор байна.

БНӨСУ-д НҮБ-ын энхийг сахиулах ажиллагаанд үүрэг гүйцэтгэж буй 11 дүгээр ээлжийн мотобуудлагын батальоны захирагчийн тушаалаар батлагдсан хөтөлбөр, төлөвлөгөөний дагуу энэ сарын 18-ны өдөр “Бентью” суурингийн дүрвэгсдийн хуаранд байрлах хоёр сургуулийн удирдлага, сурагчдын дунд иргэн-цэргийн харилцааг бэхжүүлэх ажлыг зохион байгуулав.

Энэ ажлын хүрээнд Бентью суурингийн дүрвэгсдийн хуарангийн найман сургуулиас хоёр сургуулийг сонгосноор тэдгээр сургуулийн сурагчдад сурч боловсроход нь дэмжлэг үзүүлж, 1,000 гаруй амны хаалт, гар ариутгагч шингэн болон тус бүр 200 ширхэг дэвтэр, бал, харандааг Эден Праймери сургуулийн захирал ноён Жон Гатчай, Аппер Найль сургуулийн хичээлийн эрхлэгч ноён Жон Нхал нарт хүлээлгэн өглөө.

Мөн энэ үеэр тус сургуулиудын удирдлага, сурагчдын зүгээс мотобуудлагын батальоны цэргийн алба хаагчдыг найрсгаар хүлээн авч, дуулж, бүжиглэн, талархал илэрхийллээ.

Энэхүү иргэн-цэргийн харилцааг бэхжүүлсэн ажлыг “Олон улсын энхийг сахиулагчдын баяр” болон Монгол Улсын Зэвсэгт хүчин энхийг дэмжих ажиллагаанд оролцож эхэлсний 20 жилийн ойг угтаж, явуулснаараа онцлог байлаа.

Москва хотод болж буй Иван Поддубныйгийн нэрэмжит чөлөөт бөхийн мэргэжлийн лигийн тэмцээнд Монголын бөхчүүд Буриадын багийн нэрийн өмнөөс оролцож байгаа билээ.

Пүрэв гарагт болсон 125 кг-ын жингийн шөвгийн наймын барилдаанд ОУХМ М.Лхагвагэрэл өрсөлдөгч бөхдөө цохиулсан хэрэг гарсан тухай бид өмнө нь мэдээлсэн.

Дэвжээн дээр дүрмийн бус үйлдэл гаргасан бөх нь ОХУ-ын Умард Оссетийн бөх Ацамаз Теблоев байсан юм.

Өчигдөр спортын Match TV сувагт өгсөн ярилцлагадаа ОХУ-ын чөлөөт бөхийн холбооны ерөнхийлөгч Михаил Мамиашвили дүрмийн бус үйлдэл гаргасан бөхдөө хатуу хариуцлага тооцохоо амлажээ.

“Би энэ явдлын талаар сайн мэдэж байгаа. Үнэхээр ичмээр хэрэг. Бид иймэрхүү явдлыг арилгахын төлөө хатуу аргаар тэмцэхийг хичээж байна. Тамирчин болон түүний төлөөлж буй орон нутгийн холбоонд хамгийн хатуу арга хэмжээ авах болно. Би өнөөдөр Монголын Чөлөөт бөхийн Холбооны ерөнхийлөгчтэй уулзсан. Бид Монголын төлөөлөгчдөд маш их талархаж байгаа. Тэд бүх саад бэрхшээл, хязгаарлалтыг давж, хангалттай олуулаа оролцож, шигшээ барилдаанд хүртэл шалгарлаа. Гэтэл ийм таагүй уур амьсгал үүссэн нь харамсалтай” гэж Мамиашвили ярьсан байна.

Тэрбээр Лхагвагэрэлийн биеийн байдал хэвийн, дараагийн шатны барилдаанд оролцох боломжтойг энэ үеэр хэлжээ.

Сүүлд авсан мэдээллээр манай бөх 125 кг-ын жингийн дэд байрыг эзэлж, мөнгөн медаль зүүсэн байна.