Category: гадаад

Энэтхэг улс долоо хоногийн өмнө улаан буудайн экспортыг хориглосон бөгөөд үүний дараа элсэн чихрийн экспортыг хязгаарлахаар болжээ.

Унгарын Ерөнхий сайд өнгөрсөн Мягмар гаригт Орос, Украины дайнаас үүдэн тус улсын аюулгүй байдал, эдийн засагт аюул заналхийлж буйтай холбогдуулан улс орон даяар онц байдал зарлав. Ерөнхий сайд Виктор Орбан өөрийн фэйсбүүк хуудсаараа дамжуулан мэдэгдэл хийхдээ “Украины дайн хэзээ дуусахыг урьдчилан таамаглах боломжгүй тул шинэ засгийн газар асуудлыг шийдвэрлэх арга хэмжээ авсан” гэжээ.

Мөн тэрбээр “Онц байдлын талаарх дэлгэрэнгүй мэдээллийг Лхагва гаригт зарлана” гэж нэмж мэдэгдсэн байна.

Энэхүү онц байдал нь тус улсын Үндсэн хуульд нийцэж байгаа бөгөөд Лхагва гаригийн эхээр хүчин төгөлдөр болно гэж Ерөнхий сайд мэдэгджээ. Тэрбээр “Дайнаас үүдэлтэй аюул заналхийллийн эсрэг улс орныг ямарваа нөхцөл байдалд бэлэн байлгах яаралтай арга хэмжээ авах нь амин чухал” гэж онцолсон байна. Орбан мөн дайны хямрал эдийн засгийн аюулгүй байдалд заналхийлж байгаа ба Унгар улс дайнд оролцохгүй байх ёстой гэжээ.

Тус улс өмнө нь тогтмол бус шилжилт хөдөлгөөн болон Covid-19-тэй тэмцэх хүрээнд онц байдал зарлаж байв.

“Дэлхий нийт эдийн засгийн хямралын ирмэг дээр байна. Унгар улс энэ дайнд оролцохгүй байж, гэр бүлийнхээ санхүүгийн аюулгүй байдлыг хамгаалах ёстой. Үүнд маневр хийх орон зай, яаралтай арга хэмжээ авах шаардлагатай байна. Засгийн газар Үндсэн хуульд заасан эрхээ эдэлж, шөнө дундаас дайны улмаас онц байдал зарлаж байна” гэж үндсэрхэг үзэлтэй удирдагч Facebook хуудастаа нийтэлжээ.

Эх сурвалж: BLOOMBERG

Швейцарийн Женев хот дахь НҮБ-ын салбар зөвлөлд эх орноо төлөөлөн ажилладаг байнгын төлөөлөгчийн газрын дипломат ажилтан Борис Бондарев “Би эх орныхоо өмнөөс хэзээ ч ингэж ичиж байгаагүй” гэж мэдэгдэн албан тушаалаасаа огцорч байгаагаа зарлав.

Тэрбээр Украин, Оросын олон мянган иргэний цус урсгасан утга учиргүй дайныг эсэргүүцэж, дипломатчийн 20 жилийн ажил хөдөлмөрийн замналаа өндөрлүүлж байгаагаа сошиал хуудсандаа бичжээ. “Энэ дайныг эхлүүлсэн хүмүүс засгийн эрхэнд үүрд үлдэх ганцхан зорилготой. Энэ зорилгодоо хүрэхийн тулд тэд хичнээн ч хамаагүй хүний амь насыг золиослоход бэлэн байна. Зөвхөн ийм шалтгаанаар Орос, Украины олон мянган иргэн амиа алдлаа” гэж Бондарев бичжээ.

Дараа нь тэр BBC сувгийн сэтгүүлчид “Миний шийдвэр том өөрчлөлт авчрахгүй байх. Гэхдээ ирээдүйд босох том хананы нэг тоосго болох байх гэж найдаж байна. Миний жишгийг дагах хүн олон гарахгүй гэж бодож байна. Би хэдэн жилийн өмнөөс Оросын төрийн тогтолцооны талаар бодож эхэлсэн ч энэ удаагийн хямрал намайг нэгмөсөн шийдвэр гаргахад хүргэлээ” гэсэн байна. Мөн тэрээр Украины дайны асуудлаар дээд удирдлагуудтайгаа удаа дараа санал зөрөлдөж байсан ч “амаа хамхих” даалгавар авч байснаа ярьсан юм.

Хамт ажиллагсад нь Украинд цэрэглэн халдсан явдлыг “Орос улс зарим радикал алхам хийх нь зөв” хэмээн талархан хүлээж авсныг Бондарев бас ярьжээ. “Одоо тэд олон асуудалтай, ялангуяа эдийн засгийн асуудалтай тулгарсан тул сэтгэл хангалуун бус байгаа. Гэхдээ тэдний олонх нь үзэл бодлоо өөрчилнө гэж би бодохгүй байна. Магадгүй радикал хандлага нь арай багасах ч энхийг хүсэх хэмжээнд өөрчлөгдөхгүй байх” гэж тэр хамт ажиллаж байгаа Оросын дипломатчдын талаар ярьжээ.

Мөн тэрээр “Өнөөдрийн ОХУ-ын ГХЯ-нд ямар ч дипломат ажиллагаа байхгүй болсон. Гамшиг дагуулсан дайнд турхирсан зөвхөн худал, хуурмагийг түгээн сурталчилдаг байгууллага болсон. Сайд нь хэлсэн ярьснаа тэр дор нь үгүйсгэн, зөрчилдөөнтэй, ямар ч эх захгүй зүйл ярьж энэ бузар булай явдлын тэргүүн шугаманд явж байна. Энэ яам маш бага хүрээний хэдхэн хүний эрх ашигт үйлчилж улс эх орноо дэлхийд ганцаардуулан доройтуулж байна. Оросуудад өнөөдөр холбоотон улс гэж байхгүй болсон. Би ГХЯ-нд 20 жил ажиллаж энэ яам миний гэр, бүр гэр бүл минь болсон.

Гэхдээ би цаашид цус урсгасан, тэнэг, ямар ч утга учиргүй энэ шившигт явдалтай хутгалдмааргүй байна гэж мэдэгджээ.

Г.АМАРСАНАА

Өнгөрсөн гуравдугаар сард болсон БНСУ-ын ерөнхийлөгчийн сонгуульд “Ард түмний хүч” консерватив намаас нэр дэвшигч Юн Сук Ёл эрх баригч Ардчилсан намын Ли Жэ Мёноос урьд өмнө байгаагүй бага, ердөө 250 мянган сонгогч буюу 0.8 хувийн саналын зөрүүгээр ялалт байгуулсан билээ. Юн Сук Ёл энэ сарын 10-нд тангараг өргөснөөр тус улсын 13 дахь ерөнхийлөгч болсон юм.

Эдийн засгийн хэмжээгээрээ дэлхийд аравт эрэмбэлэгддэг БНСУ-ыг ойрын таван жилд удирдах тэрээр “Ерөнхийлөгчдийг яллагч” гэдгээрээ хамгийн ихээр алдаршсан нэгэн. Тэрээр Ерөнхий прокуророор ажиллаж байхдаа тус улсын ерөнхийлөгч асан И Мён-Бак, Пак Гын Хэ нараас гадна Тагнуулын газрын гурван дарга, нэг Ерөнхий шүүгч, 100 гаруй төрийн өндөр албан тушаалтан, “Samsung” болон “Hyundai” корпорацийн удирдлагуудыг авлигын болон эрх мэдлээ урвуулан ашигласан хэрэгт яллаж байжээ. Иймээс ч ерөнхийлөгчөөр сонгогдоод улс орноо бохир улс төрөөс цэвэрлэнэ гэж мэдэгдсэнд гайхах зүйлгүй биз ээ.

БНСУ-ын өмнөх ерөнхийлөгч Мун Жэ Ин АНУ-аас бага зэрэг хөндийрч, БНАСАУ-тай аядуу харьцан хөрш зэргэлдээ БНХАУ, ОХУ-тай илүү ойртохыг эрмэлзэж байсан бол консерватив намаас нэр дэвшсэний хувьд Юн Сук Ёл үүнээс тэс өөр гадаад бодлого баримтлах нь тодорхой. Үүнийг БНСУ-ын ерөнхийлөгч болсноос хойш тус улсад айлчилсан гадаад орны анхны төрийн тэргүүн нь АНУ-ын ерөнхийлөгч Жо Байден байсан илэрхийлэв үү гэлтэй.

Тэрээр БНСУ нь олон улсын тавцанд АНУ-ын итгэлтэй түнш байна гэдгийг баталсан бөгөөд БНАСАУ-тай илүү хатуу байр сууринаас харьцан БНСУ-АНУ-ын хамтарсан хээрийн сургуулийг сэргээж, улс орондоо АНУ-ын пуужингийн довтолгооноос хамгаалах системийг улсдаа байрлуулах төлөвлөгөөтэй байна. Хэдий тийм ч Юн Сук Ёл “Ковид-19”-ийн цар тахалд ихэд нэрвэгдэх болсон хойд хөршдөө вакцин, эмнэлгийн тоног төхөөрөмж зэрэг ихээхэн хэмжээний хүмүүнлэгийн тусламж үзүүлэхэд бэлэн гэж мэдэгдсэн юм.

Юн Сук Ёл түүнчлэн БНСУ ОХУ-ын Украин руу түрэмгийлэн халдсаныг буруушааж, дэлхийн хамтын нийгэмлэгийн ОХУ-ын эсрэг бүхий л хориг арга хэмжээг тууштай дагана гэдгийг мөн илэрхийлсэн билээ. Үүнээс гадна дэвшилтэт технологийг АНУ-тай хамтран хөгжүүлэхдээ БНХАУ-д алдахгүй байх аюулгүй байдлын тогтолцоог бүрдүүлэх юм байна. Үүнээс гадна Өмнөд Хятадын тэнгист хөлөг онгоцуудыг чөлөөтэй зорчуулах, Тайванийн буланг энх тайван, тогтвортой байдлын бүс байлгахыг дэмжин Бээжин эвгүйхэн “чимхээд” авчих шиг болов.

Харин дотоод бодлогодоо эдийн засгийн өсөлтийг өдөөж, ажлын байрыг нэмэгдүүлэн орон сууцны үнийн өсөлтийг хазаарлах чиглэлд илүүтэй анхаарч ажиллах юм байна. Үүний тулд үл хөдлөх хөрөнгийн татварыг бууруулж, 20-30 насныханд зориулсан хямд төсөр өртөгтэй 2.5 сая шинэ байшин барих зорилт тавьжээ. Мөн хөдөлмөрийн хөлсний доод хэмжээг цуцлан криптовалютын орлогоос авах татварын босгыг намсгаж, цар тахалд нэрвэгдсэн хувиараа хөдөлмөр эрхлэгчдэд туслахын тулд 50 их наяд вон (40 тэрбум доллар)-ын санхүүжилт гаргах ойрын бодолтой.

Тэрээр мөн Хөх ордон гэдэг ерөнхийлөгчийн өргөөнд ажиллаж амьдрахаас татгалзаж, оронд нь Сөүл хотын төвд байрлах Батлан хамгаалах яамны хуучин барилга доторх оффисыг сонгосон тус улсын анхны удирдагч болсон билээ. Өөрийгөө “ардын ерөнхийлөгч” хэмээн өргөмжилсөн Юн Сук Ёл илүү нээлттэй, ардчилсан ерөнхийлөгчийн засаглалыг хэрэгжүүлэх амлалтынхаа дагуу Хөх ордныг олон нийтэд нээлттэй болгохоор төлөвлөжээ.

Ён Сук Ёл тангараг өргөхдөө, “Өнөө цагт улс орны аюулгүй байдлыг хангагч гол хүчин зүйл нь эдийн засаг болж байна” гэж хэлсэн нь эдийн засгийн хөгжилд түлхүү анхаарал хандуулна гэдгийг тодотгосон гэлтэй.

Монголын маш чухал гуравдагч хөрш БНСУ-ын шинэ ерөнхийлөгчийн явуулж эхэлсэн гадаад, дотоод бодлогыг цухас дурдахад ийм байна.

Юн Сук Ёл нь 1960 оны арванхоёрдугаар сарын 18-нд Сөүл хотод төрсөн бөгөөд эцэг эх нь хоёул өндөр боловсролтой хүмүүс байжээ. Ээж нь Ихуа Эмэгтэйчүүдийн их сургуульд багшаар ажилладаг байсан бол аав нь Солонгосын Статистикийн нийгэмлэгийг үүсгэн байгуулсан аж.

Юн Сук Ёл Сөүлийн үндэсний их сургуулийг хуульч мэргэжлээр төгссөн. Гэвч төгсөлтийн шалгалтдаа есөн жил дараалан унаж байжээ. Учир нь үндэсний1980 оны Кванжу хот дахь ардчиллын төлөөх оюутны бослогыг дэмжин их сургуулийнхаа хэсэг оюутны хамт шүүх хурлын театрчилсан тоглолт үзүүлэхдээ тухайн үеийн ерөнхийлөгч Чо Ду Хваныг цаазлахыг шаарддаг прокурорын дүрд тогложээ. Үүний дараа Канвондо муж руу зугтан хэсэг зуур бүгсэн аж.

Юн Сок Ёл нь 1982 онд анизометропи гэх хоёр нүдний хугарлын тэгш бус байдлаас болж үүсдэг өвчнөөс улбаалан цэргийн албанаас чөлөөлөгдсөн бөгөөд өнөөг хүртэл жолооны үнэмлэх аваагүй ажээ. Тэрээр 1994 онд Тэгүгийн Прокурорын газарт ажлын карьераа эхэлсэн байна. Тэр цагаас хойш Юн Сок Ёл улс төрийн дарамт шахалтад автдаггүй цэгц шударга прокурор хэмээн алдаршсаар ирсэн ба 2017 онд шинээр сонгогдсон ерөнхийлөгч Мүн Жэ Ин түүнийг Сөүл хотын прокурорын газрын даргаар, 2019 онд БНСУ-ын Ерөнхий прокуророор томилсон билээ.

Энд тэмдэглэхэд, авлигын хэргээр 22 жилийн ял сонсоод дөрвөн жил, есөн сар хоригдсоны эцэст өнгөрсөн оны арванхоёрдугаар сард тусгай өршөөлөөр суллагдсан Пак Гын Хэ ерөнхийлөгч болсон Юн Сок Ёлын талаар юу гэж хэлэх нь олны анхаарлыг ихэд татаж байгаа юм. Гэвч Пак Гын Хэ энэ талаар өнөөг хүртэл ямар нэгэн мэдэгдэл хийсэнгүй.

“Live journal”-ын https://storm100.livejournal.com сайтад хэвлэгдсэн нэрт математикч эрдэмтэн, улс төр судлаач, нийтлэлч Андрей Пионтковскийн “Китайские патологоанатомы” буюу “Хятадын эмгэг судлаачид” нийтлэлийг орчуулан хүргэж байна.

Аливаа дайны явцад эсрэг талуудын байлдааны ажиллагааны үнэлгээг авч хэрэглэхэд алдаа гарах гээд байдаг. Иймээс бид хөндлөнгийн ажиглагчийн тусдаа, бие даасан үзэл бодлыг сонирхох нь зүйд нийцнэ. Англо-Саксончуудын оросфоб бус, уламжлалт нөхөрлөлд тулгуурласан, бүх талаар хязгааргүй хамтрах боломжтой холбоотон гэгдэх, Молотов-Риббентропын хорлонт гэрээ байгуулагчийн “нэрд гарсан” ач хүүгийн байнга давтах дуртай “Оростой ар нуруугаа нийлүүлэн зогсож байгаа” БНХАУ-ын дээд удирдлагад олон жилийн турш зөвлөгөө өгч буй Хятадын тэргүүний мэргэжилтнүүдийн нууцын зэрэглэлтэй тайланг унших боломж уншигч танд олдож байна. Энэ бол уг эх тайлангийн товч юм. Гэхдээ яг энэхүү товч тайлан Си даргын ширээн дээр очсон гэдэгт би хувьдаа бүрэн итгэлтэй байна.

“Орос-Украины дайн 2001 оны есдүгээр сарын 11-ний “хоёр өндрийг нураасан” үйл явдлын ач холбогдлоос ч давж, дэлхийн олон улсын тогтолцоонд маш олон талаас нь нөлөө үзүүлж эхлээд байна. Энэ дайныг дэлхийн түүхэнд нөлөөлөх чухал үйл явдал гэж бид дүгнэж байна.

Оросууд ялагдаж сүйрэх нь хэтэрхий гэмээр тодорхой байна. Орос улс Путины удирдлагын ачаар дахин сэргэж амь орж байна гэсэн суртал ухуулга бол зүгээр л хоосон зүйл. Яагаад гэвэл ийм зүйл ерөөс огт байхгүй. Харин ч Оросын доройтолт уналт нь эдийн засаг, улс төр, батлан хамгаалах, технологи, нийгмийн салбаруудыг бүхэлд нь хамарч Оросын арми, түүний байлдааны хүчин чадалд ноцтой сөрөг нөлөө үзүүлж байна.

Оросын блицкриг амжилтгүй болж, хурдан ялалт байгуулж чадаагүй нь Оросын ялагдлын эхлэл болсон. Цэргийн аж үйлдвэрийн цогцолборын бүтээгдэхүүний хэмжээ, армийн санхүүжилт нь Орос өөрийгөө цэргийн их гүрэн гэж тодорхойлдог статустай огт тохирохгүй байгаа бөгөөд үнэндээ тэд өдөрт хэдэн зуун сая долларын өртөгтэй өндөр технологийн дайн хийх чадваргүй юм. Армийнхаа энэхүү ядмаг байдлаас үүдэн тулалдааны талбарт тэд илүү их гарз хохирол хүлээж байна. Энэ нь дайн үргэлжилж буй оросуудын хувьд хүнд ачаа болж байна гэсэн үг. ОХУ, АНУ (НАТО) хоёрын зэвсэг техник, технологийн болон цэргийн үзэл баримтлал, байлдааны арга барилын хуримтлагдсан ялгаа нь эсрэг талын давуу байдал, Оросын талын сул талыг улам бүр тодруулан харуулсаар байна.

Орос дайн эхлүүлж чадсан ч энэ дайныг хэзээ, хэрхэн зогсоохоо шийдэж чадахгүй байдалд өнөөдөр орчихоод байна.Тэд эзэлж авсан газар нутагтайгаа үлдэж эхлүүлсэн энэ дайнаа аль болох хурдан дуусгахыг хичээж байна. Гэхдээ Оросын Холбооны Улс энэ дайны стратегийн манлайлал, санаачилгаа нэгэнт алдсан тул тэд ямар нэг амжилтанд хүрч чадахгүй гэдэг нь тодорхой болоод байна. Бас нэг чухал хүчин зүйл нь энэ дайнд АНУ, Их Британийн шууд оролцоо гүнзгийрч, улам өргөжиж буй явдал юм. Энэ бүхэн Орос ялагдаж, хууль ёсны шийтгэлээ хүртэх болтол дайн үргэлжлэх болно гэсэн үг болж таарч байна.

ОХУ нь хуучин ЗХУ-ын бүрэлдэхүүнд байсан бүгд найрамдах улсуудын тусгаар тогтнолыг хэзээ ч ном ёсоор нь хүлээн зөвшөөрч байгаагүй бөгөөд тэднийхээ нутаг дэвсгэрийн бүрэн бүтэн байдал, бүрэн эрхт байдлыг байнга зөрчиж ирсэн. Украины эсрэг явуулж буй Оросын цэргийн кампанит ажил нь тусдаа бие даасан ажиллагаа бус, харин Оросын эзэнт гүрнийг дахин сэргээх зорилгын стратегийн чухал нэгэн хэсэг болох эхний том, шийдвэрлэх шат байсан юм. Иймээс ЗХУ-ын дараахь орон зайд байгаа улсууд, тэр дундаа Оростой нэг эвсэлд байгаа гишүүн орнууд, Беларусийг эс тооцвол бүгд Оросыг дэмжихээс татгалзаад буй нь гайхах зүйл биш. ОХУ-ын ялагдал нь хуучин эзэнт гүрнийг сэргээх итгэл найдварыг нь үүрд үгүй хийнэ. Энэ нь Орос улсыг мэдэгдэхүйц эрс сулруулж, ганцаардуулан тусгаарлаж бас шийтгэх болно гэсэн үг юм.

Украин Оросын нөлөөллийн хүрээ(хэрэв өнөөдөр Орост ямар нэгэн нөлөөллийн хүрээ гэж үлдсэн бол шүү дээ)-нээс гарч Европын том гэр бүл, өөрөөр хэлбэл Европын холбооны гишүүн улс болно. Мөн ОХУ-ын сүйрлийн дараа, энэ гүрний нөлөөлөлд байсан улс орнууд оросжилтоос бүрмөсөн ангижран салах шинэчлэлийг янз бүрийн хэмжээгээр хийх нь гарцаагүй.

Гао Юшэн,

Фэн Южүн нар.

Оросын төрийн сувгийн нэвтрүүлэгч Скабеев, Соловьев нарын ярьдаг зүйлээс өөр мэдээлэлгүй, улсынхаа алс гүнд, тосгонд амьдардаг “телевизийн хүмүүс”-ийг бодохоос ч аймаар, үнэхээр цочирдмоор зүйл. Харин Кремлийн “аугаа геополитикчид” ч ирж буй сүйрлийн цар хүрээг аль хэдийнэ мэдэрч эхэлсэн гэж би бодож байна. Дайны дараа Орос хэрхэн шийтгүүлэх тухай сэдвийг төрийн сувгийн нэвтрүүлэгчид хөндөж эхэлсэн нь гэнэтийн гэмээр зүйл болж байна. Тэд дайн дэгдээгчдийг шийтгэх нь зөв гэсэн талд орох эсэх нь мэдээж сонирхолтой үйл явц?

Ер нь 2000 оны 1 дүгээр сард “Шинээр төрсөн Путинизм” гэж миний тавьсан онош үнэн гэдгийг зууны дөрөвний нэг жил өнгөрсний дараа Хятадын өндөр мэргэжлийн “эмгэг судлаач” Гао Юшэн, Фэн Южүн нар батлан гэрчилжээ. Би: Путинизм бол Оросын гангстер дээрэмчид, бүдүүлэг капитализмын хамгийн дээд бөгөөд эцсийн шат мөн. Путинизм бол дайн, энэ бол аль нэг үндэстнийг үзэн ядуулах үндсэн дээр өөрийн иргэдийг “нэгтгэх”, иргэдийнхээ үг хэлэх эрх чөлөөг хасаж, мэдээллийн зомби болгон гадаад ертөнцөөс тусгаарлах, цаашлаад эдийн засгийн доройтол, мөхөлд хөтлөх зам юм. Ерөнхийлөгчийн үүрэг гүйцэтгэж буй Си даргын хэлэх дуртай үг болох Путин нь Оросын толгойд тусах хяналтын буудлага гэсэн үг гэж бичсэн билээ.

Андрей Пионтковский

2022- 05-19 (14:49

Оросын арми Украин руу довтолж эхэлснээс хойших дайны гэмт хэрэгт холбоотой анхны шүүх хурал болж энгийн иргэний аминд хүрсэн Оросын армийн дэслэгч Вадим Шишимаринд бүх насаар нь хорих ял оноолоо. Вадим Шишимарин хоёрдугаар сарын 28-нд зүүн хойд Чупахивка тосгонд 62 настай Александр Шелиповыг хөнөөсөн хэрэгт буруутгагдаж буй. Тэрээр Шелиповыг буудсан гэдгээ хүлээн зөвшөөрсөн ч тушаалын дагуу ажилласан хэмээн мэдүүлсэн юм. Мөн талийгаачийн эхнэрээс өршөөл гуйсан билээ.

Украинд дайны гэмт хэрэг үйлдсэн гэх өөр олон хэргийг шалгаж байна.

АНУ-ын Ерөнхийлөгч Жо Байден, Японы Ерөнхий сайд Кишида Фүмио нар аюулгүй байдлын асуудлаар нягт хамтран ажиллахаа илэрхийллээ гэж Цагаан ордон мэдээлсэн байна.

Ж.Байден Японд айлчилж буй бөгөөд хоёр улсын удирдагчид өнөөдөр хэлэлцээ хийсэн юм.

“АНУ, Японы удирдагчид “БНАСАУ-ын цөмийн болон баллистик пуужингийн хөтөлбөр, олон улсын хууль тогтоомжид харшилж буй Хятадын үйл ажиллагаа” зэрэг аюулгүй байдлын асуудлуудыг шийдвэрлэхэд нягт хамтран ажиллахаа илэрхийллээ” гэж хоёр орны удирдагчдын уулзалтын дараа гаргасан Цагаан ордны хэвлэлийн мэдээнд дурдсан байна.

Талууд мөн “шинэ технологи, нийлүүлэлтийн аюулгүй гинжин хэлхээ, цэвэр эрчим хүч” зэрэг салбарт хамтын ажиллагаагаа гүнзгийрүүлэхээр тохиролцжээ.

АНУ-ын Ерөнхийлөгчийн айлчлал нь Энэтхэг-Номхон далайн бүс нутгийн байдалд оролцоогоо бэхжүүлэх Вашингтоны эрмэлзлийг харуулж байна гэж Японы Ерөнхий сайд хамтарсан хэвлэлийн бага хурлын үеэр мэдэгдсэн байна.

“Ж.Байден АНУ-ын Ерөнхийлөгчийн хувиар анхны айлчлалаа Японд хийж буйд би баяртай байна. Америк улс бол эрх чөлөө, ардчилал, хүний эрх, хууль дээдлэх ёс зэрэг өөрчлөгдөшгүй үнэт зүйлсийг хуваалцдаг Японы цорын ганц холбоотон юм. АНУ-тай эвсэх нь манай аюулгүй байдлын бодлогын тулгын гурван чулууны нэг юм. Япон-АНУ-ын дээд хэмжээний уулзалт нь урьд өмнө хэзээ ч байгаагүй чухал хоёр утгатай” гэж К.Фүмио хэлжээ.

Түүний хэлснээр, “тэдгээрийн нэг нь бид Украины хямралтай тулгарсан явдал юм”. “Одоо манай хоёр улсын эв нэгдэл урьд өмнөхөөсөө илүү хэрэгтэй байна. Өөр нэг утга учир нь Энэтхэг-Номхон далайн бүс нутгийн энх тайван, хөгжил цэцэглэлтийг хангах явдал юм. Үүнд Япон, АНУ тэргүүлэх үүрэг гүйцэтгэх ёстой. Энэ утгаараа Ерөнхийлөгч Байдены айлчлал энэ бүс нутагт оролцоогоо үргэлжлүүлэн бэхжүүлэх АНУ-ын зорилгыг тодорхой харуулж байгааг би өндрөөр үнэлж байна” гэж Японы Ерөнхий сайд хэлсэн байна.

Ж.Байден ням гарагт Японд хүрэлцэн ирсэн боловч айлчлалын албан ёсны хэсэг даваа гарагт эхэлжээ. Өнөөдөр тэрбээр Японы эзэн хаанд бараалхсан юм.