Category: гадаад

АНУ-ын Ерөнхийлөгч асан Доналд Трамп Хьюстон хотод болж буй Үндэсний том бууны холбоо /National Rifle Association NRA/-ны ээлжит хуралд хэлсэн үгдээ улс нь Украинд гэхээсээ илүү сургуулиудын аюулгүй байдлыг сайжруулахад мөнгө зарах ёстой гэж онцолжээ. Америкчууд эхлээд хүүхдүүдийнхээ аюулгүй байдлыг хангаж байж дараа нь гаднын улсад санхүүжилт өгөх ёстой гэсэн санааг тэрээр илэрхийлсэн байна. Хьюстоны хурал нь Техасын Увальд хотын дунд сургуульд гарсан халдлагаас хэдхэн хоногийн дараа болж байгаа гэдгээрээ олон нийтийн анхаарлын төвд байгаа юм. Д.Трампыг “Афганистан, Иракт их наядаар хэмжигдэх их мөнгө зарцуулсан ч юу ч өөрчилж чадаагүй” гэж хэлэхэд танхимд цугласан хүмүүс нэгэн зэрэг алга ташин баяр хүргэсэн байна.

Өмнөд Солонгосын “BTS” хамтлаг ирэх Мягмар гаригт АНУ-ын ерөнхийлөгч Жо Байдентай уулзахаар төлөвлөж байна гэж Цагаан ордон мэдэгдлээ. Энэхүү айлчлал нь Азийн оролцоо, төлөөллийг хэлэлцэх болон азиудыг үзэн ядах гэмт хэрэг, ташаа мэдээлэлтэй тэмцэх зорилготой.

Грэммийн шагналд нэр дэвшсэн “BTS”-ийн залуусаас өмнө Жо Байден Ази тивд анхны айлчлалаа хийсэн. Айлчлалын хүрээнд Байден Сөүлд гурав хоног саатаж, Өмнөд Солонгосын шинэ ерөнхийлөгч Юн Сук Ёлтой уулзжээ.

АНУ-д өнгөрсөн жил ази хүнийг ялгаварлан гадуурхсан гэмт хэрэг хэд хэд гарсан. Тэгвэл “BTS”-ийн залуус ч гадуурхалтыг мэдэрч байсан удаатай бөгөөд энэ туршлагаасаа хуваалцжээ. “Бид ямар ч шалтгаангүйгээр доромжлолыг тэвчиж, гадаад төрхөөрөө гадуурхагдаж байсан. Ази хүмүүс яагаад англиар ярьдаг юм бэ гэж хүртэл биднээс асууж байсан” гэж хамтлагийнхан жиргэжээ. Энэ жиргээг нь нэг сая хүн цааш түгээсэн байна.

Азийн эсрэг дайсагнах хандлага цар тахлын үеэр улам гаарсан гэхэд болно. Тухайлбал, 2020 оны гуравдугаар сараас 2021 оныг дуустал ази хүмүүсийн эсрэг дайсагнасан 10 мянга гаруй хэрэг бүртгэгдсэн байна. Жо Байден 2021 оны тавдугаар сард Азийн эсрэг үзэн ядалтын гэмт хэргийг бууруулахад чиглэсэн хуулийн төсөлд гарын үсэг зуржээ.

“BTS” хамтлаг нь “Butter”, “Dynamite” зэрэг дуугаараа олон улсад амжилтанд хүрсэн бөгөөд өөрсдийгөө “Арми” гэж нэрлэдэг асар олон шүтэн бишрэгчтэй.

Умард Солонгосын эсрэг хориг арга хэмжээг чангатгах асуудлаар НҮБ-ын Аюулгүйн зөвлөлд АНУ тогтоолын төсөлд оруулсанд ОХУ болон БНХАУ хориг тавьжээ.

НҮБ-ын Аюулгүйн зөвлөлийн гишүүн бусад 13 улс энэ баримт бичгийг батлахыг дэмжсэн санал хураалгасан тухай олон улсын хэвлэлүүд дамжуулж байна.

Энэ сарын 24-нд Умард Солонгос улс тив алгасагч баллистик пуужин харвасныг, мөн өнөөдрийг хүртэлх бусад пуужингийн туршилтууд үйлдсэнийг Аюулгүйн зөвлөл хамгийн эрс шийдмэг байдлаар зэмлэн буруушааж байгааг энэ тогтоолд цохон заажээ.

Ингэхдээ БНАСАУ-ыг шинээр цөмийн туршилт эс бөгөөс тив хоорондын тусгалтай цэнэг тээх хүчин чадалтай баллистик пуужин хөөргөх, мөн ийм пуужин боловсруулах туршилт хийсэн тохиолдолд Аюулгүйн зөвлөл энэ улсад нефть нийлүүлэхийг хязгаарлах арга хэмжээ авна гэж заасан 2017 оны 2397 тоот тогтоолыг иш үндэс болгосон байна.

Тухайлбал, сая эцэслэн батлагдаж чадаагүй тогтоолын төслийг боловсруулагчид Пехньянд нийлүүлэх түүхий нефтийн хэмжээг бууруулах санал дэвшүүлсэн байжээ. Энэ хүрээнд Умард Солонгост жилийн туршид 4 сая баррель буюу 525 мянган тонн түүхий нефть нийлүүлэхийг зөвшөөрсөн хэмжээгээ Аюулгүйн зөвлөл 393 750 тонн болгож бууруулах санал оруулсан байна.

Энэ жишгээр дизель түлш, керосин зэрэг нефть бүтээгдэхүүн, эрдэс түлш, эдгээртэй холбоотой бараа, түүхий эд, тоног төхөөрөмж гаднаас авах боломжийг хаахаар тусгасан байжээ.

Эцэст нь, АНУ, Япон, Өмнөд Солонгос улсууд Умард Солонгосыг дэлхий дахиныг айлган сүрдүүлэхийн оронд дипломат харилцаа хамтын ажиллагаанд уриалсан байна.

Гурван улсын энэ хамтарсан мэдэгдлийг НҮБ дэх АНУ-ын Vуурин төлөөлөгч Линда Томас Гринфильд уншиж сонордуулжээ.

Цар тахлын улмаас хоёр жил орчим хугацаанд гадаадын жуулчдад хаалттай байсан Япон улс агаарын хилээ зургаадугаар сарын 10-ны өдрөөс эхлэн нээхээр болжээ.

“Улс хооронд хүмүүс идэвхтэй зорчих нь нийгэм, эдийн засгийн суурь болдог билээ. Ирэх сарын 10-наас бид бүлэг жуулчдыг хүлээн авч эхэлнэ” гэж Япон улсын ерөнхий сайд Фүмио Кишида өчигдөр Токиод болсон “Future of Asia” чуулганд үг хэлэхдээ мэдэгдсэн байна.

Ингэхдээ зөвхөн Хоккайдо арлын Шинэ Читосе, Окинава арлын Наха олон улсын нисэх буудлуудад гадаадын бүлэг жуулчдыг хүлээж авахаар бэлдэж буйг дуулгажээ.

Эхэн үедээ өдөрт ирэх жуулчдын тоонд хязгаар тавих юм байна.

Тухайлбал ирэх сараас эхлэн нэг өдөрт хилээр нэвтрэх жуулчны тоог 20,000 болгож, одоогийнхоос хоёр дахин өсгөх юм.

Японы бизнесийн салбарынхан хилээ түргэн нээхийг засгийн газраасаа шаардаж байгаа. Гэхдээ Японы олон нийт уг асуудалд нэлээд эргэлзсэн байр сууринаас хандаж байна. Өнгөрсөн долоо хоногийн сүүлээр Маиничи сониноос явуулсан санал асуулгад оролцогсдын 43 хувь нь хилээ нээхийг дэмжсэн бол 41 хувь нь эсэргүүцжээ.

Японы засгийн газар гадаад улс орнуудыг цар тахлын нөхцөл байдлаас нь хамааруулан гурван ангилалд хувааж, ангилал тус бүрийн жуулчдад ялгаатай шаардлага тавихаар төлөвлөсөн байна.

Жишээ нь хөх жагсаалтад багтсан орны жуулчид нислэгийн өмнө өгсөн PCR шинжилгээний хариу нь сөрөг бол тусгаарлагдахгүй. Шар жагсаалтад багтсан орны жуулчид нэмээд вакцины гэрчилгээгээ шалгуулсны үндсэн дээр тусгаарлагдах эсэхээ шийдүүлнэ.

Харин улаан жагсаалтын орнуудын жуулчид заавал тусгаарлагдах юм байна. Япон улс нь коронавирусийн цар тахлыг харьцангуй бага хохиролтой туулаад байгаа.

Тухайлбал тус улсад өнгөрсөн хугацаанд 30,000 гаруй хүн Covid-19 өвчний улмаас нас барсан. Харьцуулбал Японоос бараг хоёр дахин бага хүн амтай Их Британид уг өвчнөөр 179,000 хүн нас барсан юм.

Эх сурвалж: Bloomberg

Амьтны эсээс мах ургуулан гаргаж авдаг дэлхийн хамгийн том үйлдвэрийг байгуулах ажил АНУ-д эхэлжээ.

Тус улсын Good Meat компанийн байгуулах биореактор жилд 13,000 тонн тахиа болон үхрийн мах үйлдвэрлэх чадалтай байх гэнэ.

Ингэхдээ мал амьтныг заазлах шаардлагагүй, тухайн амьтны эсийн банк, эсвэл өндөгнөөс авсан эсийг ургуулах замаар мах үйлдвэрлэх юм байна.

Өнөөдөр дэлхий даяар 170 орчим компани энэ салбарт ажилладаг ч Good Meat нь бүтээгдэхүүнээ өргөн хүрээнд үйлдвэрлэх эрх авсан цорын ганц компани юм.

Тус компани 2020 оны арванхоёрдугаар сараас үйлдвэрлэсэн тахианы махаа Сингапурын зах зээлд нийлүүлж эхэлжээ.

Мах үйлдвэрлэлийн зорилгоор мал өсгөх нь байгаль орчныг их хэмжээгээр сүйтгэдэг.

Уур амьсгалын өөрчлөлтийг хязгаарлахын тулд өндөр хөгжилтэй улс орнууд уламжлалт аргаар мах үйлдвэрлэхээ багасгах зайлшгүй шаардлагатай тулгараад байгаа.

Лабораторид ургуулсан мах нь ердийн махтай ижил амт, шинж чанартай ч байгаль орчинд үзүүлэх сөрөг нөлөө нь үлэмж бага юм.

Good Meat компани одоо 10 биореактор байгуулахаар ажиллаж байгаа гэнэ. Тэдгээрийн нэг бүр нь 250,000 литрийн багтаамжтай буюу дөрвөн давхар байшинтай тэнцэх юм байна.

АНУ-д байгуулагдаж буй биореактор нь 2024 оны сүүлээр ашиглалтад орж, 2026 онд жил бүр 11,800 тонн, 2030 онд 13,700 тонн мах үйлдвэрлэх хүчин чадалтай болох ажээ.

“Бидний үр ач нар 2022 онд хүмүүс яагаад нядалсан малын мах иддэг байсныг гайхан асуух цаг ирнэ” гэж Good Meat компанийн толгой компани Eat Just-ийн гүйцэтгэх захирал Жош Тетрик ярьж байна.

Тэрбээр цааш нь ярихдаа “Ой модыг устгалгүй, амьтан нядлалгүй, өвчин тахал дэгдээдэг антибиотик хэрэглэлгүй, ер нь ямар ч хортой зүйл хийлгүйгээр махыг хүнсэндээ хэрэглэх боломжийг ургуулсан мах олгох юм” гэжээ.

АНУ-ын засгийн газрын Хүнс, Эмийн хэрэг эрхлэх газар одоогоор ургуулсан махыг нийтэд худалдаалахыг зөвшөөрөөгүй байгаа. Гэхдээ Good Meat компани анхны зөвшөөрлийг авахаар хүсэлтээ гаргаад байгаа ажээ.

Тус компанийн өрсөлдөгч Upside Foods компани өнгөрсөн дөрөвдүгээр сард үйлдвэрлэлээ өргөжүүлэхээр $400 саяын санхүүжилт босгосон юм.

Мөн SuperMeat, Mosa Meat, Future Meat Technologies компаниуд энэ салбарт идэвхтэй ажиллаж байна.

Эх сурвалж: The Guardian

Лхагва гаригт ОХУ-ын ерөнхийлөгч Владимир Путин өмнөд Украины Запорожье, Херсон мужуудын иргэдэд Оросын иргэний паспортыг хялбаржуулсан журмаар олгох зарлигт гарын үсэг зурсан байна.