Испани улсын засгийн газар өчигдөр хоол хүнсний хаягдлыг бууруулах зорилготой шинэ хуулийн төслийг парламентдаа өргөн барих шийдвэр гаргажээ.

Ингэснээр тус улсад үйл ажиллагаа явуулдаг ресторан, зоогийн газрууд үйлчлүүлэгчдэдээ илүү гарсан хоолоо хийж авч явах савыг үнэгүй олгох үүрэг хүлээх юм байна.

Хэрвээ ийм боломжоор хангаагүй бол тухайн бизнесийн байгууллагыг торгож шийтгэхээр хуулийн төсөлд тусгажээ.

Үүнээс гадна супермаркет, дэлгүүрүүд хадгалах хугацаа нь дуусах дөхөж буй барааны үнийг бууруулах, ийм хүнсийг буяны үйлсэд хандивлах хууль эрх зүйн орчныг бүрдүүлсэн байна.

Хэрвээ хадгалах хугацаа нь нэгэнт өнгөрсөн бол тухайн хүнсийг мал амьтны тэжээл болгох, бордоо, био түлшний түүхий эд болгох журмыг бас хуульд тусгасан байна.

Испани улсад жил бүр 1,400 тонн хоол хүнс хаягдал болдог ба үүнд олон нийтийн анхаарлыг хандуулж, хэмжээг нь бууруулахад шинэ хууль чиглэж байгааг тус улсын Хүнс, Хөдөө Аж Ахуйн сайд Луйз Планас ярьжээ.

Энэ нь Испанийн хүн амтай харьцуулахад нэг хүн жилд 31 кг хоол хүнс хаяж, 250 еврогийн алдагдал хүлээдэг гэсэн үг юм байна.

Франц, Итали улсууд 2016 онд дараалан үүнтэй ижил төстэй хуулийг баталж байжээ. Хэрвээ шинэ хуулийн төслийг Испанийн парламент баталбал 2023 оны нэгдүгээр сарын 1-нээс хүчин төгөлдөр болох юм байна.

НҮБ-ын хөдөө аж ахуйн байгууллагын гаргасан тооцоогоор дэлхий даяар жил бүр хоол хүнсний гуравны нэг нь хаягддаг ба Европ тивд сүүлийн нэг жилд ийм хаягдлын хэмжээ 40 хувиар өсжээ.

Өчигдөр Европын Холбооны эрх баригчид бага болон дунд оврын зөөврийн төхөөрөмжүүдийн цэнэглэгчийг нэг стандарттай болгох төлөвлөгөөг хэлэлцэж, дэмжжээ.

Тодруулбал тус холбооны гишүүн орнуудын зах зээлд худалдаалагдах бүх гар утас, таблет, зөөврийн компьютерууд 2024 оноос эхлэн зөвхөн USB Type-C стандартын цэнэглэгчтэй болох юм.

Үүний улмаас Apple компани Европын Холбооны зах зээлд гаргах бүтээгдэхүүнийхээ цэнэглэгчийн стандартыг өөрчлөх шаардлагатай болж байна.

Гэхдээ энэ нь 2024 оноос хойш үйлдвэрлэгдэх төхөөрөмжүүдэд үйлчлэх ба өмнө нь үйлдвэрлэгдсэн бүтээгдэхүүнүүдэд нөлөөлөхгүй юм.

Нэгдсэн стандартыг Европын парламентаар эцэслэн батлуулах ажил энэ зун хэрэгжих гэнэ.

Apple компани өмнө нь цэнэглэгчийн нэгдсэн стандарттай болох санааг эсэргүүцэж байжээ. 2021 оны есдүгээр сард анх энэ санаа яригдаж эхлэхэд Apple компаниас “Зөвхөн нэг төрлийн цэнэглэгчийг хүчээр тулгах нь инновацыг дэмжихээсээ илүү боомилсон хэрэг болно. Үр дүнд нь Европын болон дэлхий дахины хэрэглэгчид хохирох эрсдэлтэй” гэж мэдэгдэж байв.

Одоо тус компанийн гар утас, таблет бүтээгдэхүүнүүд өөрийнх нь зохион бүтээсэн Lightning төрлийн цэнэглэгчтэй үйлдвэрлэгддэг.

Европын Холбооны шийдвэрийн дагуу гар утас, таблет, чихэвч, видео тоглоомын консоль, зөөврийн чанга яригч зэрэг бага болон дунд оврын төхөөрөмжүүд хэн үйлдвэрлэснээсээ үл хамааран USB Type-C стандартын цэнэглэгчтэй болох юм.

Цаашдаа зөөврийн компьютерт бас энэ шийдвэр үйлчлэх гэнэ.

Мөн Европын хэрэглэгчид шинэ төхөөрөмж худалдаж авахдаа цэнэглэгч кабелыг хамт авах эсэхээ шийддэг болох юм байна.

Ийм шийдвэр гаргаснаар электроникийн хог хаягдал багасах, үүнийг дагаад байгаль орчны бохирдол буурах, хүмүүсийн хэрэглээг хялбарчлах ач холбогдолтойг Европын Холбоо тайлбарлажээ.

Тус холбооны гишүүн орнуудын хэрэглэгчид жил бүр 250 саяын үнэтэй цэнэглэгчийг шаардлагагүй мөртлөө худалдаж авдаг, үүний улмаас жил бүр 11,000 тонн хаягдал үүсдэг гэнэ.

Тэрбээр хууль тогтоогчдыг оролцуулсан нийт 10 хүний бүрэлдэхүүнтэйгээр өнгөрсөн Баасан гаригт Украин руу хөдөлжээ. Айлчлалын зорилго нь дайнд нэрвэгдсэн украинчуудтай уулзаж, хамтран ажиллах тухай ярилцан, тэднийг дэмжихэд оршино.

Төлөөлөгчид Бямба гаригт Польшоос Украин руу нэвтэрсэн бөгөөд Буча, Ирпин, Киев хотуудад айлчилжээ. Тэдний аюулгүй байдлын үүднээс айлчлалын тухай мэдээллийг ийн оройтож мэдээлсэн гэв. Гэхдээ Киев хотын дарга цахим хуудсаараа дамжуулан тэдний айлчлалыг зарлачихсан байсан. Эх орондоо буцаж ирэхээсээ өмнө тэд Зеленскийтэй уулзах төлөвлөгөөтэй байна.

Айлчлалын хоёр дахь өдөр төлөөлөгчид Украины албаны хүмүүстэй уулзаж, хэрхэн дэмжлэг үзүүлэх арга замыг хэлэлцжээ. Түүнчлэн Ли Украин дахь солонгосчуудтай уулзсан байна.

“Бид Украинд юу хийж өгч чадахаар байна гэдгээ харах гэж ирсэн. Ерөнхийлөгч Юн Сук Ёлын засгийн газрын олон улсын өмнө илүү их үүрэг хариуцлага хүлээж ажиллана гэсэн амлалтын дагуу энэ даалгаврыг биелүүлж байна” гэж Ли Жүн Сок хэллээ.

Өчигдөр буюу Мягмар гарагт АНУ, Өмнөд Солонгосын армийн 20 сөнөөгч онгоц Умард Солонгосын хилийн ойролцоо сургуулийн нислэг үйлдсэн байна.

Энэ үйлдэл нь Пёньяны дэглэмийн өдөөн хатгалгад эрс шийдэмгий хариу арга хэмжээ авах чадвартайгаа харуулах зорилготойг хоёр улсын хамтарсан зэвсэгт хүчний штаб мэдээлжээ.

Ажиллагаанд Өмнөд Солонгосын армийн 16 ширхэг сөнөөгч онгоц, түүний дотор F-35A радарт илэрдэггүй онгоцнууд, АНУ-ын армийн дөрвөн ширхэг F-16 сөнөөгч онгоц оролцсон байна.

Ням гарагт Умард Солонгосын тал Зүүн тэнгисийн ус руу найман ширхэг пуужин харваж, туршсан бол маргааш нь Өмнөд Солонгос, АНУ-ын талаас мөн ижил тооны газар-газар ангиллын пуужинг тэнгисийн ус руу харваж, өдөөн хатгалгыг зүгээр өнгөрөөхгүйгээ илэрхийлсэн юм.

Пёньяны дэглэм удахгүй цөмийн зэвсгийн туршилт гүйцэтгэж магадгүй болоод байгаа. Дээрх ажиллагаанууд нь үүнээс сэргийлэх зорилготой Өмнөд Солонгос, АНУ-ын талаас авсан хариу арга хэмжээнүүд юм.

АНУ-ын төрийн нарийн бичгийн даргын орлогч Вэнди Шерман одоо Умард Солонгосын цөмийн аюулын эсрэг хамтран ажиллах асуудлыг хэлэлцэхээр Сөүлд ирээд байгаа.

Умард Солонгос цөмийн зэвсэг туршвал “хатуу бөгөөд шуурхай” хариу арга хэмжээ авахыг тэр айлчлалынхаа үеэр анхааруулсан юм.

“Цөмийн зэвсгийн ямар ч туршилт НҮБ-ын аюулгүй байдлын зөвлөлийн тогтоолыг ноцтой зөрчсөн хэрэг болно. Энэ тохиолдолд бид хатуу бөгөөд шуурхай хариу арга хэмжээ авна. Өдөөн хатгалга явуулж, тогтворгүй байдал үүсгэхээ зогсоож, дипломат арга замыг сонгох хүртэл нь бид Пёньяныг үргэлжлүүлэн шахах болно” гэж тэр Өмнөд Солонгосын гадаад хэргийн дэд сайд Чо Хюн Донтой уулзсаныхаа дараа мэдэгджээ.

Өнөөдөр тэд Японы гадаад хэргийн дэд сайд Мори Такеотой хамт Умард Солонгосын цөмийн зэвсгийн асуудлаар гуравласан уулзалт хийх юм.

2011 онд Умард Солонгосын засгийн эрхэнд гарснаасаа хойш Ким Жон Ун зэвсэглэлээр хөөцөлдөх явдлыг эрчимжүүлээд байгаа.

Өмнөд Солонгосын өмнөх ерөнхийлөгч Мүүн Жэ Ин, АНУ-ын өмнөх ерөнхийлөгч Дональд Трампын үед талуудын харилцаанд түр зуур эерэг уур амьсгал бий болж байсан ч сүүлдээ буцаж хурцадсан юм.

Сарын өмнө тангараг өргөсөн Өмнөд Солонгосын шинэ ерөнхийлөгч Юн Сүк Ёлын засаг захиргаа Умард Солонгосын дэглэмтэй харилцах харилцаандаа хатуу бодлого баримтлах төлөвтэй байна.

Оросын батлан хамгаалах яам өчигдөр Украины Донбассын бүс нутагт багтдаг хоёр мужийн нэг болох Луганскийн газар нутгийн 97 хувийг хяналтдаа оруулсныг зарлажээ.

Нөгөө нэг муж болох Донецкийн газар нутгийн тал орчим хувь Оросын цэргийн хяналтад байгааг Украины тал өмнө нь мэдээлж байв.

Оросын зэвсэгт хүчин хоёр сар орчмын өмнө Украины нийслэл Киев хотыг эзлэх төлөвлөгөөнөөсөө ухарч, зөвхөн Донбассыг бүрэн хяналтдаа оруулах зорилт тавьсан юм.

Украины зэвсэгт хүчин 2014 оноос хойш Донбасст салан тусгаарлагчидтай тулалдаж байгаа. Дайны эхэн үед Оросын арми Украины өмнөд хязгаарын Херсон мужийг бүхэлд нь, Запорожье мужийн томоохон хэсгийг эзлэн авсан юм.

Одоо эдгээр мужуудын тусгаар тогтнолыг зарлах, эсвэл ОХУ-д нэгтгэх асуудал яригдаж эхлээд байгаа.

Хоёрдугаар сарын 24-нөөс өмнө Крымийн хойг, Донбассын зарим хэсгийг оролцуулаад Украины газар нутгийн 7 хувь ОХУ-ын болон түүний талыг баримтлагчдын мэдэлд байгааг Киевийн засгийн газар мэдээлж байжээ.

Өнгөрсөн долоо хоногт Украины ерөнхийлөгч Володимир Зеленский хэлсэн үгэндээ улс орных нь газар нутгийн 20 хувь Оросын зэвсэгт хүчний хяналтад байгааг баталсан юм.

Одоо Луганск мужийн Северодонецк, Лисичанск хотуудын төлөө ширүүн тулаан талуудын хооронд үргэлжилж байна.

Украины ерөнхийлөгчийн зөвлөх Михайло Подоляк дайны талбараас ирж буй таагүй мэдээлэлд хэт автаж, сэтгэлээр унахгүй байхыг ард түмэндээ уриалжээ.

“Бид ямар нэг зүйлээ алдсан тухай мэдээнээс айж цочирдох хэрэггүй. Тактикийн маневр үргэлжилж байна. Бид алдсанаа бас буцааж авч байгаа” гэж тэр өчигдөр хийсэн видео мэдэгдэлдээ өгүүлсэн байна.

Луганск мужийн захирагч Сергей Хайдай “Гудамжны ширүүн тулаан Северодонецк хотод янз бүрийн үр дүнтэй үргэлжилж байгаа. Нөхцөл байдал байнга өөрчлөгдөж байгаа ч Украинчууд довтолгоог няцаасаар байна” гэж ярьжээ.

Лисичанск хотыг Оросын арми тасралтгүй их буугаар галлаж байгааг тэр бас мэдээлсэн юм.

“Хотыг бүхэлд нь сүйрүүлж байна. Сүүлийн 24 цагийн хугацаанд Оросын гал нэлээд эрчимжсэн. Оросууд газрын хөрснөөс арчих тактик хэрэглэж байна” гэж Гайдай ярьжээ.

Өрнөдийн орнуудаас Украинд илгээсэн алсын тусгалын хүнд зэвсэг техникүүд Донбассын фронтын нөхцөл байдлыг өөрчилнө гэж мэргэжилтнүүд үзэж байгаа.

АНУ-ын засаг захиргаа Украинд илгээх HIMARS пуужингийн системийнхээ сургалтыг Герман болон Европын бусад хэсэгт эхлүүлжээ. 70 км хүртэл зайд олон пуужингийн өндөр нарийвчлалтай цохилт өгөх чадвартай уг зэвсгийг бүрэн эзэмшихэд гурван долоо хоногийн сургалт шаардагдах гэнэ.

АНУ-аас гадна Герман, Их Британи улсууд мөн хамгийн орчин үеийн пуужингийн системээ Украинд илгээх шийдвэрийг саяхан зарласан юм.