Category: гадаад

Донецкийн бүгд найрамдах улсын дээд шүүх Украины зүүн нутагт Оросыг дэмжигч хүчнийхэнд олзлогдсон Британийн хоёр иргэн, Мароккийн нэг иргэнд цаазаар авах ял оноожээ.

Тэднийг Украины Засгийн газрын нэрийн өмнөөс хөлсний цэргийн хувиар хууль бусаар тулалдсан буруутай гэж шүүх үзсэн байна.

Оросын “Интерфакс” агентлагийн мэдээлснээр Их Британийн хоёр иргэн дөрөвдүгээр сарын дундуур Донецк мужийн Мариуполь хотод Оросыг дэмжигч хүчнийхэнд олзлогджээ. Мароккийн иргэн мөн гуравдугаар сард Донецк хотод баригджээ.

Шүүхийн шийдвэрийг гаргасан Донецкийн шүүхийг Украин болон өрнөдийн орнуудын Засгийн газар буруутгаж байна.

Их Британийн Гадаад хэргийн нарийн бичгийн дарга “твиттер” хуудсаараа уг шийдвэрийг “хууль ёсны үндэслэлгүй” хуурамч шүүлт гэж нэрлэжээ.

Дайны олзлогдогсдыг “Улс төрийн зорилгоор ашиглах ёсгүй” гэж тэрбээр мэдэгдээд, Женевийн конвенцид заасан дайны цагийн хуулиудыг дурджээ.

Яллагдсан гурван иргэн давж заалдах хүсэлтэй байгааг тэдний өмгөөлөгч мэдэгдсэнийг “ТАСС” мэдээллээ.

Нэгдсэн үндэстний байгууллагын /НҮБ/ хориг тавьж, цэрэг хөдөлгөх эрхтэй хүчирхэг институт болох Аюулгүйн зөвлөлийн гишүүнээр Япон улс сонгогдлоо. Аюулгүйн зөвлөлийн байнгын бус таван гишүүний нэгээр сонгогдсон Япон улс нь 2023-2024 онд хоёр жилийн хугацаатай ажиллана. Японоос гадна Швейцарь, Мозамбек, Малта, Эквадор зэрэг таван орны бүрэн эрхийн хугацаа ирэх оны нэгдүгээр сарын 1-нээс эхэлнэ. Тэднийг НҮБ-ын Ерөнхий ассамблейн нууц санал хураалтаар сонгосон аж. Ерөнхий ассамблейн 193 гишүүн орны 184 нь Японы талд саналаа өгчээ. Япон улс Аюулгүйн зөвлөлд сонгогдож, олон орны саналыг авсан нь Хятадын улс төр, цэргийн хүчирхэгжилттэй холбоотой гэж ажиглагчид дүгнэж байна. Японы гадаад хэргийн дэд сайд Одавара Киёши хэлэхдээ, Токио нь аюулгүйн байдал, эрчим хүч, хүнсний асуудалд гол анхаарлаа хандуулж ажиллана гэв.

Харин Энэтхэг, Норвеги, Кени, Мексик, Ирланд улсын Аюулгүйн зөвлөлд ажиллах хугацаа дуусч байна.

Аюулгүйн зөвлөл нь 15 гишүүнтэй бөгөөд үүний тав нь байнгын гишүүн. Аюулгүйн зөвлөлөөр хэлэлцэх аливаа асуудал, тогтоолын төсөлд хориг тавих эрхтэй байнгын таван гишүүн нь АНУ, ОХУ, Хятад, Франц, Их Британи юм. Харин бусад 10 орон нь тав, таваараа хоёр жилийн хугацаатай сонгогдон ээлжилдэг.

ЭХ СУРВАЛЖ: AGENCE FRANCE-PRESSE

Украины Дэлхийн банкнаас авах ээлжит зээл 1.49 тэрбум доллараар батлагдсан тухай Reuters агентлаг мэдээллээ. Батлагааг нь Латви, Литва, Их Британи, Нидерланд болон Итали улсууд гаргажээ.
Гэтэл Латви, Литва улсууд нь өөрсдөө зээлийн асуудалтай. Тухайлбал, Литвагийн өр ДНБ-нийх нь 45 хувь, Латвийнх нь 48 хувьтай тэнцэж буй.
Дээр дурдагдсан мөнгөөр Украины төрийн албан хаагчид, төсвийн байгууллагын ажилтнуудын цалинг тавина.
Энэхүү зээл нь $4 тэрбум долларын тусламжийн багцын хэсэг юм. Ер нь 2014 оноос эхлэн Украин Дэлхийн банкнаас 11 тэрбум долларын зээл авчээ. Мөн хугацаанд ОУВС Украинд $16.58 тэрбум доллар, Европын банк 3 тэрбумыг өгсөн. Урсула фон дер Ляйены хэлснээр, Европын холбоо 2014 оноос хойш 20 тэрбум доллараар Украинд туслажээ.

Польш улс Украинд хоёр тэрбум ам.долларын зэвсэг нийлүүлсэн талаар тус улсын Ерөнхийлөгч Анжей Дуда мэдэгдлээ.

Зургаадугаар сарын 7-нд Анжей Дуда Украины Ерөнхийлөгч Володимир Зеленскийтэй утсаар холбогдсон. В.Зеленский Варшаваас зэвсгийн тусламж хүссэний хариуд Польш улс Украинд 240 гаруй танк, 100 шахам хуягт техник, зэр зэвсэг илгээсэн гэлээ.

Анжей Дуда: “Энэ бол асар их хэмжээний зардал. Гэсэн ч, бид ингэх шаардлагатай. Хэн нэгэнд их буу нийлүүлэх боломж байгаа бол түүнийгээ ашиглахыг бид зөвлөж байна. Тэдгээр зэр зэвсэг нь Оросын түрэмгийллийг зогсооход хэрэгтэй”.

Польшийн хувьд Украин руу цэргийн тусламж үзүүлж буй цорын ганц улс биш. Хамгийн сүүлийн нэг жишээг дурдахад, тавдугаар сарын 21-нд АНУ-ын Ерөнхийлөгч Жо Байден Украинд 40 тэрбум ам.долларын цэргийн тусламж олгох тухай хуулийн төсөлд эцсийн байдлаар гарын үсэг зурж, баталгаажуулсан.

Европын Холбооны удирдагчид Украинд есөн тэрбум еврогийн тусламж үзүүлэхэд бэлэн байгаагаа мөн илэрхийлсэн.

Хоёрдугаар сарын сүүлчээс хойш дөрвөн тэрбум гаруй еврог Украины эдийн засгийг дэмжих, төрийн аппаратын үйл ажиллагааг нь хангах, хүмүүнлэгийн тусламжид зориулан хуваарилсан хэмээн Европын Хороо мэдэгдлээ.

Эх сурвалж: Tass

Алжир улсын Ерөнхийлөгчийн ордоны лхагва гарагт гаргасан мэдэгдэлд дурдсанаар, Испани улстай хоёр орны харилцааг хөгжүүлэх хүрээнд байгуулсан “Сайн хөршийн харилцаа, хамтын ажиллагааны гэрээ”-г түлгэлзүүлэхээр шийдвэрлэсэн гэжээ.

Энэ оны эхээр Испани улс Баруун Сахарын бүс нутагт төвийг сахисан байр сууриа өөрчилж, олон нийтэд нээлттэйгээр Марокког дэмжсэн хэмээн мэдэгдэлд дурдсан байна.

Испанийн Засгийн газрын энэхүү алхам нь хууль, эрх зүй, ёс суртахуун, улс төрийн үүргээ зөрчиж, Баруун Сахарын бүс нутаг болон бүс нутгийн нөхцөл байдлыг муудахад хүргэсэн гэж үзжээ.

Улмаар Алжирын Засгийн газар 2002 онд Испани улстай байгуулсан “Сайн хөршийн харилцаа, хамтын ажиллагааны гэрээ”-г түдгэлзүүлэх шийдвэр гаргасан байна.

Испанийн Гадаад харилцааны сайд Хосе Мануэл Албарез хэвлэлд өгсөн ярилцлагадаа “Алжир улстай сайн харилцаатай байх хүсэлтэй байгаагаа илэрхийлж, байгалийн хийн хангамжийн асуудалд санаа зовохгүй байна. Алжир хүлээсэн үүргээ биелүүлэх болно” хэмээн хэлжээ.

Өнгөрсөн 2020 оны 12 дугаар сард АНУ-ын Цагаан ордон мэдэгдэл хийхдээ “Баруун Сахарын асуудлыг шийдвэрлэх Мароккогийн саналыг АНУ дэмжиж, Баруун Сахарын нутаг дэвсгэр дэх Мараккогийн бүрэн эрхийг хүлээн зөвшөөрч байна” гэж байв.

Энэ оны 3 дугаар сард Испани улс Баруун Сахарын өөртөө засан тогтнох Мароккогийн төлөвлөгөөг дэмжиж байгаагаа мэдэгдсэн ба үүний дараа Алжир улс Испанид суугаа Элчин сайдаа эргүүлэн татсан юм.

Баруун хойд Африк дахь Баруун сахар нь Испани улсын колони байсан бөгөөд тусгаар тогтнолын маргаантай бүс нутаг. Марокко улс өмнө нь Алжирын дэмжлэгтэй Баруун Сахарыг чөлөөлөх армитай арав гаруй жил тулалдаж, 1991 онд НҮБ-ын зуучлалаар гал зогсоох хэлэлцээр байгуулсан.

Одоогоор Баруун Сахарын ихэнх хэсэг Мароккогийн хяналтад байгаа юм.