Category: гадаад

Кремльд Кремлийн Гэгээн Эндрюгийн танхимд “хүн, иргэний эрх, эрх чөлөөг хамгаална” гэж тангараг өргөсөн ёслол өндөрлөж Владимир Путин ОХУ-ын Ерөнхийлөгчийн албан тушаалыг тав дахь удаагаа хашихаар болов. Уг ёслолд Их Британи, Герман, Польшийн Гадаад хэргийн яамд болон Европын холбооны ихэнх орнууд ёслолд элчин сайд нараа оролцуулахгүй гэж мэдэгдсэн бол Бельги улс эцсийн мөчид уг арга хэмжээнд оролцохоос татгалзав. Европын Холбооны төлөөлөгч мөн ОХУ-д суугаа манай элчин сайд уг ёслолд оролцохгүй гэж мэдэгдсэн билээ. Ерөнхийлөгчийн Хэвлэлийн нарийн бичгийн дарга Дмитрий Песков хэлэхдээ, тэдний шийдвэр Москвагаас ямар нэгэн хариу арга хэмжээ авах шалтгаан болохгүй гэж мэдэгдэв.Харин Францын Элчин сайд Пьер Леви болон Унгар, Словак, Грек, Мальта, Кипр зэрэг орны төлөөлөгчид уг арга хэмжээнд оролцов. Мөн АНУ “Путин шударга бус хуурамч сонгуулиар томилогдож буй ч тус улсын ерөнхийлөгч мөн” гэж мэдэгдэв. Энэхүү үйлдлийг зарим олон улсын судлаачид “Оросыг ялагдан бууж өгөхдөө гэрээнд гарын үсэг зурах албаны хүнтэй байлгах гэсэн дипломат арга” гэж тайлбарлав. Учир нь АНУ-ын Төрийн Департаментын хэвлэлийн төлөөлөгч Мэттью Миллер хэвлэлийн бага хурлын үеэр Путины тангараг өргөх ёслолд АНУ-ын төлөөлөгч оролцохгүй гэж мэдэгдсэн бөгөөд “Энэ нь АНУ Путиныг хууль ёсны ерөнхийлөгч гэж үзэхгүй байна гэсэн үг үү?” гэсэн сэтгүүлчийн асуултад Төрийн Департаментын хэвлэлийн төлөөлөгч “Бид мэдээж энэ сонгуулийг чөлөөт, шударга болсон гэж үзэхгүй байна, гэхдээ Путин ОХУ-ын ерөнхийлөгч хэвээр байх болно” гэж хариулжээ.

Германы засгийн газрын албан ёсны төлөөлөгчийн орлогч Кристиане Хоффманн “Германы засгийн газар Путиныг хууль бус ерөнхийлөгч гэж үзсэн. Түүнд албан ёсоор “ерөнхийлөгч” гэж хандах уу, үгүй юу” гэсэн сэтгүүлчийн асуултад “Одоогоор бид Владимир Путинтэй ямар нэг яриа хэлэлцээ хийхгүй байгаа тул энэ асуудал үнэ цэнэтэй чухал зүйл биш” гэжээ. Харин “Deutsche Welle” хэвлэл мэдээллийн компани “Германы засгийн газрын төлөөлөгчид Путиныг ерөнхийлөгч гэхгүй, зөвхөн нэрийг нь хэрэглэх бодолтой байна” гэж мэдээлсэн байна.Учир нь Германы засгийн газрын албан ёсны төлөөлөгчийн орлогч Кристиане Хоффман “Бидний дүгнэснээр Оросын сонгууль ардчилсан биш байсан. Өрсөлдөгчдийг оруулахгүй, баривчилгаа хийж айлган сүрдүүлэх уур амьсгал ноёрхож байсан. Сонгуулийн үр дүн урьдаас тодорхой байсан. Иймээс Канцлер Олаф Шольц ч, Ерөнхийлөгч Франк-Вальтер Штайнмайер ч Путинд Оросын төрийн тэргүүний албан тушаалаа хэвээр үлдээж байгаад баяр хүргэх бодолгүй байна” гэж мэдэгдсэн бол Германы ГХЯ-ны хэвлэлийн төлөөлөгч Себастьян Фишер “Германы Гадаад хэргийн яам шударга бус сонгуулиар гарч ирсэн Путины өмнө нь ямар нэгэн тодотгол хийхгүйгээр зөвхөн нэрийг нь дурдаж байх болно” гэжээ.Үүний зэрэгцээ Берлин мөн Украины Орост эзлэгдсэн хэсэгт “сонгууль” зохион байгуулж байгааг буруушааж, зөвхөн Украин эдгээр нутаг дэвсгэрт сонгууль явуулах эрхтэй гэж мэдэгдсэн байна. Тэгвэл Их Британи өчигдөр Оросын цэргийн атташег хөөж, зарим үл хөдлөх хөрөнгийнх нь дипломат эрхийг хүчингүй болгоно гэж мэдэгдэв. Тус улсын Дотоод хэргийн сайд Жеймс Клеверли “Энэ арга хэмжээ нь Украинд хийж буй Оросын түрэмгийлэл, мөн Их Британи, Европ дахь кибер халдлага, тагнуул зэрэг бидний эсрэг хийж буй Москвагийн хорлонт үйл ажиллагааны хариу арга хэмжээ юм” гэж мэдэгдэв. Клеверли Их Британийн парламентын Нийтийн танхимд үг хэлэхдээ, “Өнөөдөр би Гадаад хэргийн сайдтай хамт ийм байдлыг тэвчихгүй гэдгээ Орост ойлгуулахын тулд багц арга хэмжээг хэрэгжүүлж байна. Орос руу илгээж буй бидний бодлого тодорхой. Энэ нь хууль бус дайныг зогсоо! Цэргээ Украинаас гарга! Бидний эсрэг явуулж буй хор хөнөөлтэй үйл ажиллагаагаа зогсоо! гэж байгаа юм. Бид Оросын цэргийн тагнуулын ажилтан болох цэргийн атташег Британиас хөөж байгаа бөгөөд тагнуулын зорилгоор ашиглагдаж байсан Их Британи дахь Сассекс дахь Оросын эзэмшилд байдаг Сиакокс Хит болон Лондонгийн Хайгейт дүүрэгт байрлаж буй Худалдаа, Батлан хамгаалахын алба гэх мэт Оросын хэд хэдэн үл хөдлөх өмчийн дипломат эрхийг цуцална. Мөн Оросын дипломатчдад виз олгоход хязгаарлалт хийх бөгөөд ялангуяа тэдний Их Британид байх хугацааг хязгаарлах болно”гэж онцлон дурдсан байна. Сайд Жеймс Клеверли мөн “Москва Лондонгийн эдгээр үйлдлүүдийн хариуд “руссофоби” гэдгээ давтан биднийг буруутгах болно. Харин бид ОХУ ямар хариу үйлдэл хийж, нөхцөл байдлыг хурцатгах эсэхийг анхааралтай ажиглаж байх болно” гэж мэдэгджээ. Үнэхээр ч ГХЯ-ны албан ёсны төлөөлөгч Мария Захарова “Лондонгийн манай цэргийн атташег хөөсөн шийдвэрт Москва зохих хариуг нь өгөх болно” гэж мэдэгджээ.

Украины Аюулгүй байдлын албаны ажилтнууд Ерөнхийлөгч Владимир Зеленский болон тус улсын бусад дээд удирдагчдыг хөнөөх Кремлийн төлөвлөгөөг илрүүлсэн гэж мэдэгдлээ. Украины тусгай алба Оросын эрх баригчдыг энэхүү аллагыг бэлтгэсэн гэж буруутгасан байна. Тэд Зеленский, мөн Украины Батлан хамгаалах яамны Тагнуулын ерөнхий газрын дарга Кирилл Буданов, Улсын аюулгүй байдлын албаны дарга Иван Малюк нарыг устгахаар төлөвлөж байжээ. Уг ажиллагааны хүрээнд ерөнхийлөгчийн аюулгүй байдлыг хариуцдаг Украины Улсын аюулгүй байдлын албаны хоёр хурандааг саатуулсан байна.

Оросын ФСБ буюу Холбооны аюулгүй байдлын албаны үүрэг нь ерөнхийлөгчийн аюулгүй байдалд ойр байсан цэргийнхний дунд төрийн тэргүүнийг барьцаалж, дараа нь түүнийг хөнөөх үүрэг гүйцэтгэгчдийг хайж олох явдал байсан” гэж Украины Улсын аюулгүй байдлын алба Telegram сувагтаа бичсэн байна.

Украины тал “Энэ аллага Путины тав дахь удаагаа тангараг өргөх ёслолын “бэлэг” болох ёстой байсан ч Оросын тагнуулын албаны бүтэлгүйтэл болж Путины нэр хүндийг шороотой хутгасан явдал болсон. Гэхдээ бид дайсан зальтай, туршлагатай гэдгийг мартаж, тэднийг дутуу үнэлж болохгүй. Урвагчдад зохих шүүхийн шийтгэл оноохын тулд бид идэвхтэй ажиллах болно” гэж мэдэгдэн уг террорист халдлагыг зохион байгуулж байсан хүмүүсийг нэрлэжээ. Тагнуулын албаны мэдээлснээр эдгээр хүмүүс нь Максим Мишустин, Дмитрий Перлин, Алексей Корнев нар юм байна. Тэднийг “ФСБ-ын есдүгээр газрын ажилтнууд” гэж нэрлэдэг бөгөөд тэд уг аллагын зохион байгуулалтад хяналт тавьж байсан ажээ.

ВВС ОХУ-д “гадаадын агент” гэж хүлээн зөвшөөрөгдсөн “Mediazona” сайн дурынхны багтай хамтран нээлттэй эх сурвалжид үндэслэн Украины дайнд амь үрэгдсэн хүмүүсийн нэрийг тогтоож байгаа бөгөөд сүүлийн хоёр долоо хоногт л гэхэд нэмж 1059 орос хүн нас барсныг баталсан байна. Сайн дурын ангиуд 2022 оны дөрөвдүгээр сараас хойш Оросын Украиныг довтлоход чухал үүрэг гүйцэтгэсэн.

Гэсэн хэдий ч 2023 оны 10 дугаар сараас хойш бид Оросын цэргийн хүчний хохирлын энэ ангилалд огцом, мэдэгдэхүйц өсөлтийг бүртгэж байна. 2023 оны 10 дугаар сараас хойш долоо хоногт сайн дурын ажилтнуудын алдагдал долоо хоногт 75 хүнээс доош буугаагүй бөгөөд ихэвчлэн долоо хоногт 100 хүнээс давж байна “Арми бол мөнгө олох бараг боломжгүй газруудад чухал ажил олгогч юм” гэж ВВС-ийн мэргэжилтэн өмнө нь тайлбарлав.

Оросын бүс нутгийн нийгэм, эдийн засгийн хөгжлийн салбар, профессор Наталья Зубаревич Өнгөрсөн жил хагасын хугацаанд-2022 оны дөрөвдүгээр сараас 2023 оны есдүгээр сар хүртэл “сайн дурын ажилтнууд” -ын батлагдсан алдагдал тогтвортой хэвээр байсан бөгөөд долоо хоногт 40-55 хүн байжээ. Энэ бол зөвхөн нээлттэй эх сурвалжаас баталгаажуулж чадсан өгөгдөл юм. Иймээс амиа алдсан хүмүүсийн бодит тоо үүнээс хэд дахин өндөр байх магадлалтай байна.

Bloomberg “ОХУ- ын Украины дайныг санхүүжүүлэхэд чухал үүрэг гүйцэтгэдэг Оросын газрын тос, байгалийн хийн салбар ажиллах хүчний хомсдолд ороод байна” гэж мэдээлэв. Москвад төвтэй “Deloitte” судалгааны төв Оросын газрын тос, байгалийн хийн салбарт энэ жил 40,000 ажилтан дутагдалтай байгааг тооцон гаргажээ.

Нефть, байгалийн хийн салбар эрчим хүчний компаниуд, зэвсгийн үйлдвэрүүдийн ажилд зуучлагчид болон Оросын армийн хооронд ажиллах хүчний төлөө өрсөлдөх шаардлагатай болоод байгааг энэ оны эхний хоёр саын ОХУ-ын статистикийн албаны мэдээллээс иш татан Bloomberg онцолжээ. Газрын тос, байгалийн хийн салбарын нэрлэсэн цалин дунджаар 125,200 рубль байсан нь саяхан болтол Оросын хамгийн өндөр цалинтай цалингийн нэг болж байв. Гэсэн хэдий ч энэ цалин нь Оросын армийн гэрээт цэргүүдэд санал болгож буй цалинтай өрсөлдөх боломжгүй болсон гэж тус агентлаг тэмдэглэсэн байна.

Украины эсрэг дайнд оролцох гэрээнд гарын үсэг зурсны төлбөр нь зарим бүс нутагт нэг сая рубльд хүрч байгаа нь газрын тос, байгалийн хийн салбарт ажилладаг ажилчдын жилийн дундаж цалинтай бараг тэнцэж байна гэж Bloomberg бичжээ.

Их Британийн Батлан хамгаалах яамны тооцоолсноор Оросын 450,000 гаруй цэрэг алагдаж, шархадаад байгаа учир Украинд байлдахыг хүсэхгүй байгаа хэсэг нь харин зэвсгийн үйлдвэрт ажиллах боломжтой болсон байна. Тухайлбал, өнгөрсөн онд Оросын төрийн корпорац болох “Ростек” ажилчдынхаа цалинг дунджаар 17.2 хувиар нэмсэн бөгөөд гүйцэтгэх захирал Сергей Чемезов нь ОХУ-ын ерөнхийлөгч Владимир Путинд үйлдвэрлэл амралтын өдрүүд, баяр ёслол, шөнийн цагаар ч үргэлжилдэг гэж мэдэгдэж байсныг Bloomberg дурдсан байна.

Орос ажиллах хүчний хомсдолд орсонд сүүлийн 20 жилд төрөлт эрчимтэй буурч, олон чадвартай иргэд гадаадад цагаачлан гарч буй явдал мөн нөлөөлсөн байна. Өнгөрсөн оны сүүлчээр ОХУ-ын ШУА-ийн Эдийн засгийн хүрээлэнгийн шинжээчид энэ онд Орост таван сая шахам ажлын байрны хомсдол бий болж, нийт ажиллах хүч 74 сая хүрэхгүй болно тооцоолж байсан нь биелэгдэж тус улсын эдийн засгийн өсөлтөд хэдийнэ саад болж эхэлсэн байна.

Бүгд найрамдах намаас дахин нэр дэвшиж буй АНУ-ын ерөнхийлөгч асан Дональд Трампыг порно киноны од Сторми Даниэлст хууль бусаар мөнгө төлсөн хэрэгт буруутгаж буй шүүх хурал үргэлжилж байна.Шүүх хурлын үеэр шүүгч Хуан Мерчан Трампыг олон нийтэд зарлахыг хориглосон заалтыг зөрчсөнийх нь төлөө есөн мянган ам.доллараар торгож, шүүхийн шаардлагыг биелүүлэхгүй бол түүнд шоронд хорих ял оноож болзошгүйг анхааруулсан байна. Шүүх Трампыг гэрч, тангарагтны шүүгчид, шүүхийн ажилтнууд болон тэдний төрөл төрөгсөд рүү олон нийтийн сүлжээгээр халдлага хийхийг хориглосон зарлигийг зөрчсөн гэж ийнхүү торгожээ. Түүний тараасан есөн мэдээлэл тус бүрд мянган долларын торгууль ногдуулж, экс ерөнхийлөгчид өөрийн нийгмийн сүлжээн дэх Truth Social-аас долоон “доромжлолын шинжтэй бичлэг” болон сонгуулийн сурталчилгааны вэбсайтаас хоёр мессежийг устгахыг тушаасан байна.

Шүүгч Хуан Мерчан “Шүүх хууль ёсны захирамжаа санаатайгаар зөрчихийг цаашид үл тэвчихийг шүүгдэгчид анхааруулж байна. Хэрэв шаардлагатай болсон нөхцөлд шүүх түүнд хорих ял оногдуулна” гэж мэдэгджээ. Харин Доналд Трамп “Энэ хориг нь миний үг хэлэх эрх чөлөөтэй байх Үндсэн хуулиар олгогдсон эрхийг минь хасч байна” гэж мэдэгдэв.

Шүүх хурал Трамп, Даниэлз нарын хэлэлцээрийг зохион байгуулахад тусалсан өмгөөлөгч Кейт Дэвидсоны мэдүүлгийг авч хэлэлцэн прокурорууд Трампыг 34 баримт бичиг хуурамчаар үйлдсэн гэж буруутгасан байна. Тэдний үзэж байгаагаар порно кино од Сторми Даниэлсийн төлбөрийг нуун дарагдуулж, тухайн үедээ анх удаа ерөнхийлөгчийн сонгуульд нэр дэвшиж байсан улстөрч, бизнесмэнтэй бэлгийн харьцаанд орсон тухайгаа ил болгохгүй байхын тулд санхүүгийн бичиг баримтыг хуурамчаар үйлдсэн гэж Трампыг буруутгаж байна. Харин Трамп ямар ч хэрэгт буруутай гэдгээ хүлээн зөвшөөрөхгүй байгаа бөгөөд Даниэлстэй бэлгийн харьцаанд орсон гэдгээ ч үгүйсгэсэн байна.

Шүүх хуралдааны явцад 2016 оны 10 дугаар сард “Access Hollywood” телевизийн мэдээ, ялангуяа зугаа цэнгэлийн нэвтрүүлгийн хөтлөгчтэй Трампын ярилцсан бичлэг олон нийтэд ил болсноос хойш уг хэлэлцээр идэвхтэй өрнөж байсан нь тодорхой болжээ. Трамп “Access Hollywood” телевизийн хөтлөгчид эмэгтэйчүүдийн эмзэг хэсгээс атгаад авдаг тухайгаа онгирч, “Та од болсон бол энэ бүхэн танд зөвшөөрөгддөг. Та хүссэн бүхнээ хийж чадна. Тэднийг бариад ав… Хүссэн бүхнээ хий” гэж хэлж байжээ. Прокурорууд Трамп Дэниэлсийн түүхийг ил гаргахгүй байхыг эрмэлзэж байсан учир нь дуулиан шуугиантай бичлэг олон нийтэд дэлгэгдэн түүний сонгогдох боломжийг ноцтойгоор сүйтгэж болзошгүй гэж үзсэн” гэж мэдэгдэв. Энэ тохиолдолд бид сонгуулийн үйл явцад хөндлөнгөөс оролцсон тухай ярьж байна гэж прокурор мэдэгджээ.

Мөн шүүх хурлын үеэр Трампын өмгөөлөгч асан Дэвидсон “порно од” Даниэлстэй анх 2011 онд танилцсан бөгөөд 2016 оны сонгуулийн кампанит ажлын үеэр Трамптай холбоотой сексийн талаар чимээгүй байх төлбөрийн нөхцлийн талаар ярилцаж эхэлсэн гэж хэлжээ. Дэвидсон “Na­tional Enquirer” сэтгүүлийн редактор Ховардаас өгсөн зөвлөгөөний дагуу Сторми Даниэлсийн ашиг сонирхлыг төлөөлж эхэлсэн гээд “насанд хүрэгчдийн киноны” жүжигчинтэй Трамптай харилцаатай байсан түүхийн онцгой эрхийг худалдаж авах талаар хэсэг хугацаанд ярилцаж байсан боловч хэлэлцээр хийгдээгүй гэж мэдэгдсэн байна. Редактор болон Даниэлсийн хоорондох зуучлагч нь Жина Родригес хэмээх эмэгтэй байсан бөгөөд тэрээр уг ажлаа Дэвидсонд шилжүүлэхдээ түүнд “Амьдралд тохиолдох хамгийн хялбар гэрээ байх болно” гэж амлаж байжээ.

Прокурорууд Дэвидсоны Трампын хувийн өмгөөлөгч Майкл Коэнд илгээсэн цахим шууданг мөн шүүхэд үзүүлсэн байна. Үүнд тэрээр “гүйлгээний дүн 130 мянган доллар” гэж бичсэн байжээ. Талуудын хооронд байгуулсан албан ёсны гэрээний текстийг цахим шууданд хавсаргасан байсан бөгөөд шүүх хурлын үеэр Дэвидсон Коэнийг амласан мөнгөө тийм ч амар төлөөгүй бөгөөд тэр бүр гэрээнээс гарна гэж сүрдүүлж байсан, гэсэн ч 2016 оны 10 дугаар сард мөнгийг шилжүүлсэн гээд тангарагтны шүүгчдэд үүнийг нотлох төлбөрийн баримт бичгийг үзүүлжээ. Шүүхэд ил болсон баримт бичгүүдээс харахад Дэвидсон нь Трамптай бэлгийн харьцаатай гэж мэдэгдсэн өөр нэгэн эмэгтэй болох Playboy-ийн загвар өмсөгч Карен МакДугалын төлбөрийг зохицуулах ажилд мөн оролцож байжээ. Тэрээр энэхүү түүхийн онцгой эрхийг “National Enquirer” шар хэвлэлд худалдахаар тохиролцсон бөгөөд энэ түүхийг нийтлэхгүйн тулд хэвлэлийн редактор уг эрхийг худалдан авч Трампын нэр хүндэд сэв суулгахаас сэргийлж чадсан юм байна. Шүүх хурлын үеэр National Enquirer сэтгүүлийн нийтлэгч Дэвид Пекер мөн гэрчийн мэдүүлэг өгчээ. Тэрээр 2016 оны сонгуулийн үеэр Дэниэлс, МакДугал нарын ерөнхийлөгчийн сонгуульд нэр дэвшигчийг хохироох түүхийг “чимээгүй болгоно” гэж Трамп, Коэн нартай тохиролцсон гэдгээ хүлээн зөвшөөрсөн байна. Мөн өнгөрсөн пүрэв гаригт тангарагтны шүүгчид тухайн үеийн өөрийн өмгөөлөгч болон хувийн туслахтайгаа Дональд Трамп “Плэйбой”-ын загвар өмсөгч бүсгүйг яаж дуугүй байлгахыг хэрхэн худалдаж авах тухай ярилцаж буй бичлэгийг сонсож эхлэхэд Трамп ширээний ард бөгтийж, харин тангарагтны шүүгчид сэтгэл хөдөлсөн байдалтай харагдаж байв. Хэдийгээр энэ бичлэг олон жилийн өмнөх явдал байсан ч Манхэттэн дэх эрүүгийн хэргийн тангарагтны шүүхийн гишүүдэд үзүүлсэн Трампыг буруутгах хамгийн гайхалтай нотлох баримт болж магадгүй болов. Мөн энэхүү шүүхэд насанд хүрэгчдийн кино жүжигчин Дэниэлс 2006 оноос Трамптай бэлгийн харьцаанд орсон, Трампын өмгөөлөгч асан Майкл Коэн намайг дуугүй байлгахын тулд 130 мянган ам.доллар төлсөн гэж мэдүүлэв. Тэрээр Луизиана мужид амьдардаг байсан бөгөөд малын эмч болохыг хүсч байсан ч дараа нь “өдөрт найман цаг бууц цэвэрлэхээс илүү орлого олох боломжтой” бүжигчнээр ажиллаж эхэлсэн гэж хэлэв. Даниэлс 21 настайгаасаа нүцгэн жүжиглэж эхэлсэн бөгөөд дараа нь насанд хүрэгчдийн киноны салбарт ажиллаж, шилдэг дэлгэцийн бүтээлийн шагнал авсан байна. Дэниэлс 2006 онд гольфын тэмцээн дээр Трамптай танилцсан, дараа нь түүнтэй уулздаг болж бэлгийн харьцаанд ордог болсон гэжээ. Экс ерөнхийлөгч Дэниэлсээс Трампын сексийн талаар “маш товч” хариулахыг хүсэхэд тэрээр хэтэрхий дэлгэрэнгүй ярьж эхэлсэн тул Трампын өмгөөлөгчид эсэргүүцэж, шүүгч Хуан Мерчан тэдний хүсэлтийг хүлээн авав. Даниэлсийн мэдүүлгийг тангарагтны шүүгчид маш анхааралтай сонсож байсныг сэтгүүлчид онцлов. Даниэлстэй ямар ч холбоо, харилцаа байхгүй гэж мэдэгдэж байсан Трамп шүүх хуралдааны өглөөний завсарлагааны үеэр сэтгүүлчдийн асуултад огт хариулт өгөлгүй өнгөрсөн байна.

Шүүх хурал дээр болсон энэ бүх үйл явдлаас 2016 оны Ерөнхийлөгчийн сонгуулийн шөнийн гурван цагийн орчимд Трампын ялалтыг дэлхий нийтээр мэдэж эхлэхэд Дэвидсон шар сонины найздаа “Бид юу хийчихэв?” гэж бичсэн мессежийг BBC-ийн сэтгүүлч Кайла Эпштейн онцолжээ. Харин судлаачид шинэ гэрч Манхэттэны шүүх хуралд мэдүүлэг өгөх болгонд Дональд Трампыг дэмжигчдийн тоо эрс цөөрч байгааг онцолсон байна.

Өчигдөр ОХУ-ын шинээр сонгогдсон ерөнхийлөгч Владимир Путины тангараг өргөх ёслолын дараа ОХУ-ын Үндсэн хууль болон Оросын Холбооны улсын Үндсэн хуулийн дагуу Оросын Засгийн газар огцров.

Шинэ Засгийн газар байгуулах журмаар эхлээд ерөнхийлөгчийн зарилагаар Засгийн газрын тэргүүн томилогдож дараа Төрийн Дум нэр дэвшигчдийг батлан Засгийн газрын бүрэлдэхүүн бүрдэх ёстой юм.

Засгийн газрын нэр дэвшигчдийг баталсны дараа энэ тухай зарлигт ерөнхийлөгч гарын үсэг зурдаг. Засгийн газрын тэргүүн томилогдсоноосоо хойш долоо хоногийн дотор холбооны гүйцэтгэх байгууллагуудын бүтцийн талаарх саналаа ерөнхийлөгчид танилцуулах бөгөөд энэ хугацаанд сайд, дэд сайд асан нар үүрэг гүйцэтгэгчээр ажиллах юм байна.

ХБНГУ-ын Холбооны Канцлер Олаф Шольц Латви, Литва, Эстонийн Ерөнхий сайд нартай хийсэн уулзалтын үеэр “Оросууд Украины эсрэг дайнаар Европыг хагалан бутаргаж, НАТО-г сулруулахын оронд харин тэдний эв нэгдлийг бэхжүүлсэн” гэж мэдэгдээд цаашид ч энэхүү эв нэгдлийг дэмжихийг уриалав. Шольц Ригад Балтийн орнуудын удирдагчидтай уулзах үеэрээ “Энэ дайнд цөмийн зэвсгийг ашиглах боломжгүй гэдгийг чанга дуугаар тунхаглах нь маш чухал зүйл” гээд энэ нь ирэх зургадугаар сард Швейцарьт болох энхийн бага хурлаас гарах тодорхой шийдвэрийн нэг байх ёстой гэж хэлжээ. Үүний зэрэгцээ Канцлер Украины эсрэг цэргийн түрэмгийлэл хийх Оросын тооцоо биелээгүй гэдгийг онцлон тэмдэглэв. Энэ дайн Европыг хувааж, НАТО-г сулруулахын оронд Украины түншүүдийн эв нэгдлийг бэхжүүлсэн гэж Германы гол улстөрч дахин онцолжээ. Мөн Шольц битүүмжилсэн Оросын хөрөнгөний зөвхөн орлогыг бус энэ хөрөнгийг дэлхий даяар Украинд зориулсан зэвсэг худалдан авахад ашиглах боломжийг авч хэлэлцэхийг уриалав.

Эдгээр хөрөнгийн 90 орчим хувийг Украины батлан хамгаалахын хэрэгцээнд зарцуулахаар тохиролцсон ч “Европ ямар үүрэг гүйцэтгэхийг энд огт заагаагүй” гээд “Учир нь бодит байдал дээр одоо хамгийн чухал зүйл бол шинэ үйлдвэр барих асуудал биш, харин Украинд бэлэн байгаа зэвсгийг аль болох хурдан хүргэх явдал” гэж хэлжээ. Харин Латвийн Ерөнхий сайд Эвика Силина болон Эстони, Литвийн түүний хамтран зүтгэгчид болох Кажа Каллас, Ингрида Симоните нар “Бид энэ хувилбарыг тохиролцож байгаа” гээд Балтийн орнуудын агаарын орон зайд НАТО-гийн хүчин хяналт тавихад Германы оруулсан хувь нэмрийг дурдаж, Литвад Бундесверийн бригадыг байршуулсан явдалд Германд талархал илэрхийлсэн байна. Силина, Каллас, Симоните нар мөн Европын Холбоо болон НАТО-гийн түншүүддээ хандан Украинд үргэлжилж буй дайны үед батлан хамгаалах зардлаа нэмэгдүүлэхийг уриалав. Литвийн Ерөнхий сайд “Балтийн орнууд Польштой хамтран батлан хамгаалах салбарт хөрөнгө оруулалт хийж, ДНБ-ийхээ хоёр хувиас илүүг зарцуулж байгаа нь бусдадаа сайн жишээ болж байна” гэжээ.

Ригад болсон уулзалтад оролцогчид Европт зэвсгийн үйлдвэрлэлийг эрчимтэй өргөжүүлэхийг мөн уриалав. Зэвсэг, агаарын довтолгооноос хамгаалах системийн үйлдвэрлэлд нэмэлт хүчин чадлыг бий болгож эхэлснийг мөн тэмдэглэв. Симонит Германы батлан хамгаалахын “Rhei­nmetall” концерн Литвад үйлдвэр барих болсныг сайшаажээ.

Үүний зэрэгцээ Эвика Силина Европын түнш улсууд зэвсгийн нөөцөө нөхөхөд Балтийн орнуудад дэмжлэг үзүүлэх шаардлагатай байгааг тэмдэглээд Эстони, Латви, Литва улсууд Украинд маш их зэвсгээ шилжүүлсэн тул өөрсдийн нөөцөө сэргээх шаардлагатай байна гэж тайлбарлажээ. Силина мөн Латви, Герман, Эстони, Литва улсууд “ашиг сонирхол, үнэт зүйл, үйл ажиллагаандаа нэгдсэн” гэдгийг онцлон тэмдэглэсэн байна. Рига дахь засгийн газрын цахим хуудсанд мэдээлснээр, Шольцын айлчлалын үеэр НАТО-гийн дээд хэмжээний уулзалтын бэлтгэл болон Украинд үзүүлэх дэмжлэг, эрчим хүч, тээврийн салбарын бүс нутгийн төслүүдийн талаар хэлэлцсэн байна.

Энэ уулзалтын өмнө ОХУ-ын Батлан хамгаалах яам Владимир Путины даалгаврын дагуу “Стратегийн бус цөмийн хүчний байлдааны даалгавар гүйцэтгэх бэлэн байдлыг нэмэгдүүлэх” зорилгоор Орос улс удахгүй Украины хилийн ойролцоо цөмийн тактикийн сургуулилт хийнэ гэж мэдэгдсэнтэй холбогдуулан эдгээр улсын тэргүүн нар уулзаж байгаа бөгөөд тэд Оросын цөмийн сургуулилтийг “өдөөн хатгасан мэдэгдэл, Оросын төрийн бүрэн эрхт байдал, бусдаас эзлэн авсан нутаг дэвсгэрийнхээ бүрэн бүтэн байдлыг ямар ч болзолгүйгээр баталгаажуулах” зорилгоор “стратегийн бус тактикийн цөмийн зэвсгээр биднийг айлгах гэсэн явуургүй оролдлого” гэж мэдэгджээ.

Иймээс Шольц Германы засгийн газрын тэргүүний хувиар Латви улсад анхны айлчлалаа хийж Германы НАТО-гийн түнш болох Балтийн бусад улсын тэргүүнүүдтэй биечлэн уулзаж байгаа ажээ. Мөн тэрээр Литва дахь Бундесверийн ирээдүйн бригадын бүрэлдэхүүнд багтах Германы цэргийн баазад зочилсон байна. Шольц Литвийн Пабраде дахь цэргийн бэлтгэлийн талбайд үг хэлэхдээ “Герман улс Балтийн орнуудын талд бат бөх зогсож байна” гэж тэмдэглэн хэлжээ. Мөн Литвийн Ерөнхийлөгч Гитанас Науседад бараалхах үеэрээ Канцлер Олаф Шольц “Бид бие биенээ хамгаалж буй нь НАТО газар нутгийнхаа нэг сантиметр бүрийг хамгаалж чадна гэсэн үг” гэж хэлсэн байна.

Хятадын удирдагч Си Жиньпин 2019 онд Италид төрийн айлчлал хийхээр хүрэлцэн ирэхэд түүнийг тансаг угтан авч, Ромын дурсгалт газруудаар аялуулж, дуурийн дуучин Андреа Бочелли дуугаа өргөсөн оройн зоог барьж, Хятадын “Бүс ба зам” хөтөлбөрт Итали улс нэгдэн орж байв.

Харин таван жилийн дараа Хятадын удирдагч Европ тэс өөр уур амьсгалтай болсон нөхцөлд дахин айлчилж байгаа билээ. Тухайлбал, өнгөрсөн гуравдугаар сард Итали улс Хятадын “Бүс ба зам”-аас албан ёсоор гарч, “G7”-ын гишүүн цорын ганц улс Хятадын хөтөлбөрөөс гарсан нь Хятад болон түүний удирдагчдад хүнд цохилт болсон. Энэхүү үйл явдлын ард Европын Холбоог Хятадтай хийх томоохон худалдааны сөргөлдөөнд бэлдэж буй дургүйцэл, мөн Хятад улс Украины эсрэг дайн хийж байгаа Оростой харилцаагаа гүнзгийрүүлж байгаагаас үүдэлтэй Бээжингийн дэлхийн амбиц, нөлөөний талаарх хардлага нуугдаж байсан билээ.

Си Жиньпин Францад хүрэлцэн ирж түүний Европт хийх зургаан өдрийн айлчлал сүр жавхлан, ёслол төгөлдөр үргэлжилж магадгүй байгаа ч түүний энэ айлчлал тус тив даяар Хятадыг үзэх үзэл эрс өөрчлөгдсөн нөхцөлд болж байна. Зөвхөн сүүлийн хэдэн долоо хоногт гэхэд л Европын Холбоо Хятадын салхин цахилгаан үүсгүүр, эмнэлгийн тоног төхөөрөмж худалдан авсантай холбоотой худалдааны мөрдөн байцаалтын ажиллагаа явуулж, тагнуулын ажиллагаатай холбоотой мөрдөн байцаалтын хүрээнд Хятадын хамгаалалтын тоног төхөөрөмж үйлдвэрлэгч “Nuctech” компанийн оффис руу хүчээр дайран орж нэгжлэг хийгээд байгаа юм. Герман, Их Британи мөн сүүлийн өдрүүдэд Хятадтай холбоотой тагнуулын гэмт хэргийн хэргээр дор хаяж зургаан хүнийг баривчилж, яллагдагчаар татаад байна.

Берлинд төвтэй АНУ-ын Германы Маршаллын сангийн ахлах ажилтан Ноа Баркин “Европын олон нийслэлд Хятад улсыг олон талын аюул заналхийлэл гэж үзэх нь улам бүр нэмэгдсээр байна. Гэвч Европын Хятадтай холбоотой сорилтуудыг эдийн засаг, аюулгүй байдлын үүднээс хэр хурдан, шийдвэрлэх талаар санал зөрөлдөөн их байна” гэж хэлжээ. Си Жиньпиний айлчлал Франц, Серби, Унгарт болж буй нь түүнийг шүүмжлэгчдийн бай болгож байгаа ч Европын зарим хэсэгт Хятадыг илэн далангүй хүлээн авсаар байгааг харуулах нэгэн боломж болж байгаа билээ.

Бээжин эдийн засаг нь гацсан таагүй энэ цаг үед худалдааны гажуудлаа шийдвэрлэхийн тулд Европын түлхэх хүчийг сулруулахыг эрмэлзэж байна. Мөн Бээжин удахгүй болох АНУ-ын сонгуулийн үр дүн тодорхойгүй байгаа энэ үед Европыг АНУ-тай ойртуулахгүй байхыг хүсч байгаа нь ойлгомжтой. Гэхдээ Си Жиньпин гэнэтийн буулт хийхгүй л бол Хятадыг хатуу шүүмжлэгчидтэй амжилттай тохиролцоонд хүрэхэд хэцүү байх болно. Иймээс түүний энэ аялал зөвхөн Европ, Хятадын хооронд төдийгүй Европ дахь дотоод хуваагдлыг ил болгож энэ нь Хятадын талд ашигтайгаар эргэж болзошгүй гэж шинжээчид үзэж байна.

Си Жиньпиний айлчлал түүний хамгийн хатуу шүүмжлэгчийн нэг болох Европын Комиссын дарга Урсула фон дер Лейентэй хийх уулзалтаар үргэлжлэх болно. Фон дер Лейен Европын Холбооны технологийн аюулгүй байдалд Бээжингээс ирж буй нөлөөлөлд санаа зовнисон “Хятадын эрсдлээс ангижруулах” хөтөлбөрийг удирдаж, Хятадын цахилгаан автомашины урсгалын эсрэг өндөр эрсдэл бүхий мөрдөн байцаалт явуулах ажлын удирдлагад орж байгаа билээ.

“Financial Times” сонин“Европын тагнуулын алба Орос улсаас Европ тив даяар зохион байгуулах гэж буй хорлон сүйтгэх ажиллагаа, террорист халдлагын аюулын талаар засгийн газрууддаа анхааруулаад байна” гэж мэдээлэв. Москва энгийн иргэдийн амь насыг үл тоомсорлож, дэлбэрэлт, галдан шатаах замаар Европын дэд бүтцэд хохирол учруулахаар идэвхтэй ажиллаж эхэлсэн гэж уг сонин онцлов. Оросын цэргийн түрэмгийллийг эсэргүүцэн Украинд үзүүлж буй тусламжийг зогсоохын тулд Орос улс барууны орнуудад байнгын айдас төрүүлэхээр зэхэж байна гэж уг сонин анхааруулжээ.

Кремлийн агентууд ийм ажиллагаа явуулж ирсэн урт түүхтэй ч энэ удаа илүү түрэмгий, нэгдсэн хүч төлөлвлөж буйг нотлох баримт улам бүр нэмэгдсээр байна гэж Financial Times Европын хэд хэдэн орны шинжээчдийн дүгнэлтэд үндэслэн бичжээ. Мөн уг сонин Кремлийн сүүлийн үед Европын орнуудад үйлдэгдээд буй хорлон сүйтгэх ажиллагааны хэд хэдэн жишээг дурджээ. Тухайлбал, өнгөрсөн сарын сүүлээр Их Британид хоёр хүн Украинд өгөх тусламжийн барааны агуулахад гал тавьсан бөгөөд Английн прокурорууд тэднийг Оросын засгийн газрын даалгаврыг биелүүлсэн гэж буруутгасан байна. Мөн Шведийн Аюулгүй байдлын алба сүүлийн үед гарсан хэд хэдэн галт тэрэгний ослыг шалгаж байгаа бөгөөд Оросын дэмжлэгтэй хорлон сүйтгэх ажиллагаа байж магадгүй гэж үзэж байна. Кремлийн агентууд мөн Чехийн төмөр замын дохиоллын системийг устгахыг оролдсон гэж Чехийн Тээврийн сайдын хэлснийг уг сонин эш татжээ.

Мөн Эстонид өнгөрсөн хоёрдугаар сард Дотоод хэргийн сайдын машинд болон сэтгүүлчид рүү халдсан халдлагыг Оросын тагнуулын ажилтнууд үйлдсэн гэж тус улсын аюулгүй байдлын алба мэдэгджээ. Францын Батлан хамгаалах яам тус улсын цэргийн объектуудад Орос хорлон сүйтгэх ажиллагаа явуулж болзошгүйг анхааруулаад байна.

Германы “Chatham House” судалгааны төвийн ахлах ажилтан Кейр Гилс “Оросын үйл ажиллагаа үнэхээр нэмэгдсэн гэсэн тодорхой дүгнэлт гарсан” гэж мэдэгджээ. Мөн ХБНГУ-ын Үндсэн хуулийг хамгаалах холбооны алба буюу Германы тагнуулын албаны дарга Томас Халденванг “Орос Германы эрх ашгийг хохироосон тагнуул, хорлон сүйтгэх ажиллагааг “байнга” явуулж байна. Хамгийн харгис хэрцгий арга хэрэгслээр дайн хийхэд бэлэн улс орон хорлон сүйтгэхээс зайлсхийдэггүй” гэж DW агентлагийн сурвалжлагчид ярилцлагадаа дурджээ. Халденванг “Оросын Холбооны Улс ийм төрлийн үйл ажиллагааг жуулчид бизнесмэн, сэтгүүлч, эрдэмтдийн дүрээр нууцаар ажиллаж, үнэн хэрэгтээ тагнуул, хорлон сүйтгэх үйл ажиллагаа явуулж байдаг өөрийн мэргэжлийн хүмүүсээр хийлгэдэг” гэж онцолжээ.

ХАМАС-ын төлөөлөгчид Каир хотод хүрэлцэн ирж, Газад гал зогсоох, Израилийн барьцаалагдсан хүмүүсийг суллах тухай хэлэлцээг дахин эхлүүлэв. Уг хэлэлцээ хэдэн сарын завсарлагатай үргэлжилж байгаа ч энэ удаа талууд гал зогсооход үнэхээр ойрхон болжээ. Тухайлбал, “Reu­ters” Египетийн хэлэлцээнд оролцож буй эх сурвалж “Энэ удаа үр дүн өөр байх болно. Бид олон зүйл дээр тохиролцоонд хүрсэн. ХАМАС-ын төлөөлөгчид Египет, Катарын зуучилсан уг хэлэлцээрийн үр дүнд “эерэг” сэтгэлтэй байна. Бид Палестинчуудын шаардлагад нийцсэн тохиролцоонд хүрсэн” гэж мэдэгдсэн болохыг мэдээлжээ. Уг хэлэлцээний талаар Палестины албаны хүн “Reuters” агентлагт өгсөн тайлбартаа өөдрөг үзэлтэй байгаагаа илэрхийлж, нэрээ нууцлахыг хүссэн уг албан тушаалтан “Энэ удаад бүх зүйл илүү дээр байна.Гэхдээ тохиролцоонд хүрэх эсэх нь Израилийн амлалтаа хэрэгжүүлэх хангалттай санал тавих эсэхээс хамаарна” гэж хэлжээ.

Израиль ХАМАС-тай эвлэрэх шинэ нөхцөл санал болгосон нь тодорхой болоод байгаа бөгөөд үүнийг АНУ “маш өгөөмөр” санал гэж нэрлэсэн байна. Одоо Палестины бүлэг тэдэнд хариугаа өгөх л үлдээд байгаа ажээ.Каир хотод хүрэлцэн ирсэн АНУ-ын Тагнуулын төв газрын дарга Уильям Бернс зэрэг зуучлагчид Израилийн тал ХАМАС бүлэглэлийн гарт байгаа нийт 133 (дор хаяж 30 нь нас барсан гэж таамаглаж байгаа) барьцаалагдсан иргэдийг сулласан тохиолдолд Газын зурвас дахь байлдааны ажиллагааг түр зогсоох тохиролцоонд хүрэхийг хичээж байна гээд гал зогсоох хэлэлцээр байнгынх уу, түр зуурынх уу гэдэг нь гол асуулт хэвээр байна гэжээ.Одоо 40 хоногийн гал зогсоох завсарлага авахаар тохиролцож байгаа бөгөөд энэ хугацаанд Израилийн барьцааны хүмүүс болон шоронд хоригдож буй палестин хоригдлуудыг суллах юм байна. ХАМАС-ын тал энэ хэлэлцээрт дайныг бүрэн зогсоох Израилийн амлалтыг багтаасан байх ёстой гэж үзэж байгаа ч Израилийн албаныхан Газын зурвас дахь террорист бүлэглэлийн эсрэг тэмцсээр байх болно гэж мэдэгджээ. Израилийн нэрээ нууцалсан нэгэн албан тушаалтан өнгөрсөн бямба гаригт “Haaretz” сонинд өөрийн засгийн газрын байр суурь өөрчлөгдөөгүй гэдгийг тодорхой илэрхийлсэн бөгөөд “Ямар ч тохиолдолд Израиль манай барьцаалагдсан хүмүүсийг суллах явдал дээр дөрөөлөн дайныг зогсоох гэж оролдохыг бид зөвшөөрөхгүй” гэж мэдэгджээ. Харин Израилийн хамгийн том дипломат албаны хүн болон цэргийн гол холбоотон АНУ энгийн иргэдийг илүү ихээр хохироож болзошгүй Израилийн шинэ давшилтыг дэмжихгүй байгаа юм. Энэ талаар Израилийн шинэ төлөвлөгөө нь өмнөх төлөвлөгөөнөөсөө эрс ялгаатай гэж хэлэлцээрт ойр байгаа “ВВС”-ийн эх сурвалж мэдэгджээ. Харин ХАМАС-ын зүгээс барьцаалагдсан хүмүүсийг суллаж, хойд Газын оршин суугчдыг гэртээ буцаж ирэх боломжийг олгохын тулд 40 хоногийн хугацаатай гал зогсоох нөхцөл энэ хэлэлцээрт багтсан гэж мэдээлсэн байна. Энэ тухай “Axios” агентлаг “Израилийн албаны хүмүүс Газын зурвасын зүүн болон баруун хэсгийг тусгаарлаж, иргэдийн хөдөлгөөнд саад учруулж буй коридороос цэргээ гаргахыг зөвшөөрөхөд бэлэн байна” гэж мэдээлжээ. Ийнхүү Израиль Газад энх тайван сэргээх гэрээ хийхэд бэлэн байгаа бөгөөд энэ нь ХАМАС-ын гэрээ байгуулах шаардлагыг хангаж байгаа юм байна. Ялангуяа “Axios” “Израилийн эрх баригчид хэлэлцээрийн хоёр дахь үе шат байж болох байнгын эвлэрлийн асуудлыг хэлэлцэхийг зөвшөөрсөн байна” гэж онцлон мэдээлжээ. Мөн нэрээ нууцалсан Израилийн албаны хүмүүс болон дипломат төлөөлөгчид “New York Times” болон “Financial Times” сонинд “Эхний шатанд 40 бус харин 33 манай барьцаалагчийг суллана гэсэн ХАМАС-ын саналыг бид хүлээн авсан” гэж мэдээлсэн. Гэтэл Каир хотноо эхэлсэн Израил болон ХАМАС бүлэглэлийн төлөөлөгчдийн хооронд хийсэн шууд бус хэлэлцээ зогсоод байна. Энэ тухай Америкийн телевизийн “CBS News” суваг исламист ХАМАС бүлэглэлийн эх сурвалжаас эш татан мэдээлэв. Уг телевизийн мэдээлснээр, Израиль 40 израиль иргэнийг суллахын тулд Газын зурваст зургаан долоо хоногийн хугацаатай гал зогсоох саналд ХАМАС саналаа ирүүлэхээс нааш хэлэлцээрийг үргэлжлүүлэх боломжгүй гэж Израилийн тал мэдэгджээ. Мөн Египетийн телевизийн “AlQahera News” компани ХАМАС бүлэглэл Израилийн Батлан хамгаалах хүчний (IDF) Газын зурвас дахь цэргийн ажиллагааг бүрэн зогсоож, Израилийн цэргийг бүс нутгаасаа гаргах тухай тохиролцоонд хүрэхийг шаардсан байна гэж мэдээлэв. Харин Америкийн “The Wall Street Journal” сонин“ Хэрвээ лалын ХАМАС бүлэглэлтэй долоо хоногийн дотор гал зогсоох тохиролцоонд хүрэхгүй бол Израилийн цэрэг Рафахад цэргийн ажиллагаагаа эхлүүлнэ гэж Израиль ХАМАС бүлэглэлд ультиматум тавьсан” гэж мэдээлсэн байна. Газын зурвасын өмнөд хэсэгт орших Рафах хот нь ХАМАС бүлэглэлийн сүүлчийн түшиц газар болоод байгаа юм. Гэвч Израиль олон улсын шахалтаас үүдэн хоёрдугаар сараас Рафахад цэргээ оруулахаа хойшлуулсаар байгаа билээ. Израилийн цэргийн хүчний ажиллагааны улмаас Газын зурвасын хойд хэсгээс аргагүйн эрхэнд нүүж ирсэн 1.3 сая орчим палестинчууд тус хотод хоргодож байгаа юм. Иймээс олон улсын хамтын нийгэмлэг болон Израилийн хэд хэдэн гол холбоотон Рафах руу цэргээ илгээх Израилийн санааг шүүмжилж байгаа бөгөөд энэ нь Палестины энгийн иргэдийн байдлыг улам дордуулна гэж үзэж байгаа юм. Харин хэлэлцээрт ахиц гарахгүй байгаа энэ үед Израилийн ерөнхий сайд Бенжамин Нетаньяху гал зогсоох тохиролцоонд хүрэх эсэхээс үл хамааран Израиль Рафахад цэргийн ажиллагаа явуулж, ХАМАС-тай хийх дайныг үргэлжлүүлэх ёстой гэж шаардаж байгаа бөгөөд гол нь террорист бүлэглэлийг бүрэн устгаж “зорилгодоо хүрэх” явдал гэж мэдэгдэж байгаа билээ.

ХАМАС 10 дугаар сарын 7-нд Израилийн өмнөд хэсэгт халдан, Израилийн тоо баримтаар 1200 хүний аминд хүрч, 253 хүнийг нь барьцаалан авч явсны дараа Израиль Газын зурваст довтолж эхэлсэн. Түүнээс хойш Газын зурвас дахь ХАМАС бүлэглэлийн хяналтад байдаг Эрүүл мэндийн яамны мэдээлснээр, 34 мянга гаруй палестин хүн амиа алдаж, тус зурвас газрын ихэнх хүн ам орон гэрээ орхин дүрвэхээс өөр аргагүйд хүрээд байгаа билээ. ХАМАС бүлэглэл “Израилийг газрын хөрснөөс арчина” гэсэн уриатай сонгуульд орж, засгийн эрхэнд гарсан бөгөөд үүнийгээ биелүүлэх гэж оролдсон. Харин Израилийн төр, засаг хариу арга хэмжээ авч байна. Хэний зөв болохыг өнөөдрийн бид бус хожмын түүхчид тогтоох болно.

Бэлтгэсэн Г.ЗОЛБОО