Category: гадаад

Categories
гадаад мэдээ

Дахиад л сармагчны цэцэг өвчин DNN.mn

Дэлхийн эрүүл мэндийн байгууллага сармагчны цэцэг өвчний тархалттай холбогдуулан одоогоор олон улсын хэмжээнд онцгой байдал зарлахгүй байхаар шийдвэрлэжээ. Уг өвчний тохиолдлууд олон оронд бүртгэгдээд байгаа юм.

ДЭМБ-ын тэргүүн Тедрос Адханом Гебрейесус өнгөрсөн долоо хоногийн сүүлээр болсон олон улсын шинжээчдийн хорооны хуралдааны дүгнэлтэд үндэслэн дээрх шийдвэрийг гаргажээ. Тухайлбал, 16 шинжээч халдварын өнөөгийн нөхцөл байдал олон улсын хэмжээнд онцгой байдал зарлах хэмжээнд хүрээгүй гэсэн дүгнэлтэд хүрчээ. Гэсэн хэдий ч халдварын тархалт “дэлхийн аюул заналхийлэл” болж магадгүй байгааг тэрбээр онцолсон байна. ДЭМБ-ын мэдээллээр, сармагчны цэцэг өвчин нь Африкийн орнуудад голчлон тархдаг, аминд халгүй өвчин юм. Харин Европ, АНУ-д энэ оны тавдугаар сараас уг халдварын тохиолдлууд нэмэгдэх болсон бөгөөд өнгөрсөн долоо хоногт Азид анхны тохиолдлууд илэрсэн нь Сингапур, БНСУ, Тайваньд бүртгэгджээ. ДЭМБ-д тавдугаар сарын эхэн үеэс хойш уг өвчний 3000 гаруй тохиолдол 47 улсад илэрсэн мэдээлэл ирсэн байна. Халдварын далд үе 5-21 хоног үргэлжилдэг бөгөөд халдвар авсан тохиолдолд халуурах, арьсан дээр тууралт гарах, арьс салст гэмтэх зэрэг шинж тэмдэг илэрдэг байна. Сармагчны цэцэг өвчин нь аминд халгүй учир уг өвчний эсрэг салхин цэцгийн вакцин сайн үр дүнтэй байгааг ДЭМБ анхааруулсан байна.

ТОВЧХОН

Оросын зэвсэгт хүчин Украины нутаг дэвсгэрт халдсаны дараахан хэсэг эмэгтэйчүүд армидаа санхүүжилт олохын тулд нүцгэн зургаа зарах онлайн платформ ажиллуулж эхэлжээ. “TerOnlyFans” сайт өнгөрсөн гурван сарын хугацаанд 700.000 ам.долларыг цуглуулж, ихэнхийг нь Украины армид хандивлажээ. Бас багахан хэсгийг нь Украины дүрвэгчдэд туслах санд хандивласан байна.



Г.АМАРСАНАА

Categories
гадаад мэдээ

Япон улс Оросын эсрэг тавьсан хоригоо өргөтгөв DNN.mn

Японы засгийн газар Украины эргэн тойронд үүссэн нөхцөл байдалтай холбогдуулан Оросын хувь хүн, байгууллагуудын эсрэг авах хориг арга хэмжээгээ өргөжүүлэхээр болжээ. Японы Ерөнхий сайд Фумио Кишида Германд болж буй “Их долоо”-гийн бүлгийн дээд хэмжээний уулзалтын үеэр энэ талаар мэдэгдсэнийг Даваа гаригт NHK телевиз уламжилсан байна.

Токио “Япон улс ОХУ-ын 70 иргэн, хуулийн этгээдийн хөрөнгийг царцаах, мөн Оросын батлан хамгаалах салбартай холбоотой 90 гаруй байгууллагад экспортын нэмэлт хориг арга хэмжээ авахаар төлөвлөж байна” гэж мэдэгджээ.

Нэмж дурдахад, шинэ багц хоригт ОХУ-д нягтлан бодох бүртгэл, итгэлцлийн үйлчилгээ үзүүлэх, Оросын алтыг импортлохыг хориглох тухай багтжээ.

Японы эрх баригчид өмнө нь Украины эргэн тойронд үүссэн нөхцөл байдлын улмаас ОХУ-ын эсрэг хэд хэдэн хориг арга хэмжээ авсан. Орос, Беларусь, Донецк болон Луганск Ард улсын нийт 700 гаруй иргэн, мөн Орос, Беларусийн 200 гаруй аж ахуйн нэгж, байгууллага, хувь хүнийг хориг арга хэмжээнд хамруулсан билээ. Үүнээс гадна Япон улс Открытие банк, Новикомбанк, Совкомбанк, ВТБ, Россия банк, Промсвязбанк, ВЭБ.РФ, Сбербанк, Альфа-банк болон Оросын 40 орчим байгууллага, компанийн хөрөнгийг битүүмжилжээ.

Эх сурвалж: TASS, EADAILY

Categories
гадаад мэдээ

Алжирын баруун хойд хэсэгт газар хөдлөлт болжээ DNN.mn

Алжирын баруун хойд хэсгийн Оран мужид ням гарагт 5.1 магнитудын хүчтэй газарт хөдлөлт болсон байна. Газар хөдлөлтийн голомт нь Гдель дүүргээс хойд зүгт 12 километрийн зайд байжээ.

Газар хөдлөлтийн улмаас хүний амь эрсдээгүй гэж тус мужийн иргэний хамгаалалтын албаны мэдэгдлийг иш татан орон нутгийн “Эннахар” телевиз мэдээлэв.

Categories
гадаад мэдээ цаг-үе

​БНХАУ: Афганистанд 50 сая юанийн хүмүүнлэгийн тусламж үзүүлнэ DNN.mn

БНХАУ-ын Засгийн газраас Афганистанд болсон газар хөдлөлтийн гамшигт өртсөн иргэдэд 50 сая юань буюу 7.46 сая ам.долларын хүмүүнлэгийн яаралтай тусламж үзүүлэхээр шийдвэрлэсэн тухай Хятадын ГХЯ-аас бямба гарагт мэдээлэв.

Афганистанд болсон газар хөдлөлт нь тус улсад сүүлийн 20 гаруй жилд тохиолдсон хамгийн ноцтой газар хөдлөлт болсон байна. Одоогоор 1500 хүн нас барж, 2 мянга гаруй хүн гэмтэж бэртэж, 3 мянга гаруй байшин нурсан бөгөөд амиа алдсан хүмүүсийн тоо нэмэгдсээр байна гэж Хятадын ГХЯ-ны хэвлэлийн төлөөлөгч Ван тэмдэглэжээ.

Тэрбээр мөн “хятадаас үзүүлж буй хүмүүнлэгийн тусламжид Афганистаны иргэдэд нэн шаардлагатай байгаа майхан, алчуур, эвхдэг ор болон бусад бараа материал багтсан бөгөөд тусламжийн эхний ээлжийг 6 дугаар сарын 27-нд тусгай нислэгээр тээвэрлэхээр төлөвлөөд байна” хэмээн мэдээлсэн байна.

Categories
гадаад мэдээ

Газрын тосны үнэ 0.1 хувиар буурчээ DNN.mn

Газрын тосны нийлүүлэлтийн тодорхойгүй байдалтай холбоотойгоор АНУ-ын эрэлт буурах болгоомжлол зах зээлд үүсээд байна.

Үүнтэй холбоотойгоор газрын тосны үнэ сүүлийн хоёр долоо хоногт “Улаан бүс”-д хаагдлаа. Баасан гарагийн арилжаагаар брент төрлийн газрын тосны үнэ 0.1 хувиар буурч, баррель нь 110 ам.долларт хэлбэлзэж байна.

“Газрын тосны үнийн савлагаа өндөр байгаа нь БНХАУ болон БНЭУ ОХУ-аас их хэмжээний газрын тос худалдан авч байгаатай холбоотой” гэж Цагаан ордны Эдийн засгийн зөвлөлийн тэргүүн Сесилиа Роуз “Bloomberg”-төгсөн ярилцлагадаа онцолж байна.

Цагаан ордны Эдийн засгийн зөвлөлийн тэргүүн Сесилиа Роуз
“Газрын тосны зах зээл нэлээд тогтворгүй, савлагаатай байгааг бид харж байна. Үүний нэг шалтгаан нь БНХАУ болон БНЭУ ОХУ-аас их хэмжээний газрын тос худалдан авч байгаатай холбоотой гэж бодож байна. Мөн зах зээлд нийлүүлэлт давамгай байгаа. Энэ нь газрын тосны үнэ огцом савлагаатай байхад нөлөөлж байна. Мөн газрын тосны үнийн уналтыг эергээр хүлээн авах хэрэгтэй, энэ уналт хэрэглэгчдэд хүрнэ гэж найдаж байна. Гэхдээ ОХУ Украины дайн маргааш дуусахгүй гэдгийг бид ойлгох хэрэгтэй. Мөн АНУ-ын Ерөнхийлөгч газрын тосны өндөр үнэ айл, өрхүүдэд сорилт болж байгааг ойлгож байна. Тэрбээр энэ асуудалд Конгресстой хамтран ажиллахаар зорьж байна. Нийлүүлэлтээ нэмэгдүүлэх гурван сарын хугацаатай арга хэмжээ авч хэрэгжүүлж байгаа. Тэгэхээр инфляцыг бууруулах, дайныг эцэслэх зэрэг олон сорилт тулгарсан энэ үед нийлүүлэлтээ тогтвортой байлгах нь гол асуудал болж байна. Ингэснээр эдийн засгийн аюулгүй, тогтвортой байдлын суурь тавигдах боломжтой гэж үзэж байна” гэж мэдэгдлээ.

О.Цэнгэг

Categories
гадаад мэдээ

Зеленский эрх чөлөөг уриалан дуудав DNN.mn

Зеленский эрх чөлөөг уриалан дуудав

Украины Ерөнхийлөгч өнгөрсөн Баасан гаригт Гластонберигийн наадамд оролцон, видео хэлбэрээр үг хэлжээ. Зеленский тус хөгжмийн наадмыг урлагийн эрх чөлөөний тод илрэл гэж ярьсан байна. Тэрбээр видео бичлэгт “Хөгжмийн фестиваль хоёр жилийн хугацаанд түр завсарлаад байсан ч дахин шинээр эхэлж байгаад баяртай байна. Цар тахлаас болж хүмүүс хөгжим сонсох эрхээ алдаагүйд талархууштай. Украйнчууд мөн адил эрх чөлөөтэй байх хүсэлтэй ч Орос энх тайвныг үгүй хийсэн. Тиймээс та бүхнийг бидэнтэй нэгдэж, эрх чөлөөний төлөө тэмцэхийг уриалж байна. Эрх чөлөөгөө алдсан хүн болгонд туслахыг хүсч байна”гэв.

Зелинский мөн Африк, Америк , Ойрх дорнодын улсуудын амьдралд Орос улс түрэмгийлэхээс урьдчилан сэргийлэх хэрэгтэй гэлээ.

“Цаг хугацааг үнэлж баршгүй хүний амиар хэмжиж байна. Бидэнтэй нэгдэж дайны эсрэг эрх чөлөөний төлөө тэмцэхийг хүн болгонд уриалж байна. Олон хүн нэгдэх тусам Орос улс дайныг зогсоож, бид энх тайван цагийг дахин авчрах болно” гэж нэмж онцлов. Зеленскийг үг хэлж дууссаны дараа олон алдартнууд үзүүлбэрээ үзүүлэн, “Слава Украини” гэж хэлж байжээ.

Categories
гадаад мэдээ

Азийн хамгийн баян хүн 7.7 тэрбумыг нийгмийн сайн сайхны төлөө хандивлав DNN.mn

Ази тивийн хамгийн баян эрхэмд тооцогддог Энэтхэгийн бизнесмэн Гаутам Адани 60 насныхаа төрсөн өдөр 600 тэрбум рупийг (7.7 тэрбум) нийгмийн сайн сайхны төлөө хандивлажээ.

Хандивын мөнгийг түүний Adani Foundation сан эрүүл мэнд, боловсрол, мэргэжлийн ур чадварын салбаруудад зарцуулах ажлыг хариуцах юм байна.

Их сургуулиа хаяж, өөрийн хүчээр тэрбумтан болсон Гаутам Адани өчигдөр буюу Баасан гарагт 60 нас хүрсэн юм.

Аданигийн амласан хандивын хэмжээ Билл Гэйтс, Мелинда Фрэнч Гэйтс нарын 2021 онд өөрсдийн “Bill & Melinda Gates Foundation” санд хандивласан мөнгөний бараг талтай тэнцэж байна.

Блүүмбэргийн тооцоолсноор $92 тэрбумын хөрөнгөтэй Адани зөвхөн энэ онд 15 тэрбумаар хөрөнгөө арвижуулсан юм.

“Ойрын үед бид экспертүүдийн гурван багийг урьж, хандивын мөнгийг хэрхэн дээрх гурван салбарт зохистой хуваарилах стратегийг боловсруулна” гэж Адани өчигдөр мэдэгджээ.

1988 онд Adani нэртэй жижигхэн худалдааны компани байгуулагдсан нь өнөөдөр нүүрсний арилжаа, уул уурхай, ачаа тээвэр, эрчим хүч үйлдвэрлэл, түгээлтийн томоохон групп болж өргөжжээ.

Сүүлийн жилүүдэд тус компани ногоон эрчим хүч, нисэх буудал, дата төв, цементийн бизнест анхаарал хандуулж байгаа.

Адани 2030 он хүртэл сэргээгдэх эрчим хүчний салбарт нийт $70 тэрбумын хөрөнгө оруулж, энэ салбарын дэлхийн хамгийн том үйлдвэрлэгч болох зорилтоо зарласан юм.

Categories
гадаад мэдээ

Эквадорын сөрөг хүчин ерөнхийлөгчөө огцрохыг шаардав DNN.mn

Эквадорын сөрөг хүчний хэсэг хууль тогтоогчид консерватив Ерөнхийлөгч Гильермо Лассог огцрохыг шаардаж байна. Тус улсын иргэд түлш, хүнсний үнийг бууруулахыг шаардан хоёр долоо хоног үргэлжилж буйэсэргүүцлийн жагсаалын дараа бусад хууль тогтоогчид түүнийг огцруулахыг дэмжихгүй гэж мэдэгджээ.

Жагсаал зургаадугаар сарын 13-нд эхэлсэн ба дор хаяж зургаан иргэний аминд хүрч, аюулгүй байдлын хүчнийхэн рүү олон удаа хүмүүс халдлага үйлдсэн байна. Зүүний Ерөнхийлөгч асан Рафаэль Корреад үнэнч сөрөг хүчний “UNES” хөдөлгөөний хууль тогтоогчид 2025 он хүртэл товлогдоогүй сонгуулийг урагшлуулахыг Твиттерт уриалав. Учир нь тус улсын Үндсэн хуульд хууль тогтоогчид улс төрийн хямрал, үймээн самуунтай үед ерөнхийлөгчөө огцруулж, сонгууль зарлахыг зөвшөөрдөг байна. Лассог огцруулахын тулд чуулганы 137 хууль тогтоогчийн 92 нь дэмжсэн байхшаардлагатай.Лассо мөн хууль тогтоох байгууллагыг тарааж, сонгууль зарлаж болно. Засгийн газар “UNES”-ын энэхүү алхмыг шүүмжилж,асуудлыг хэлэлцэхэд бэлэн байна гэж мэдэгдэв.Лассо зэрэг өөр гурван намын хууль тогтоогчид түүнийг огцруулах алхамаас татгалзаж, засгийн газар болон уугуул иргэдийн хоорондын яриа хэлэлцээг дэмжиж байгаагаа мэдэгдэв.

Categories
гадаад мэдээ

Орос Калининградын тээврийн хоригт АНУ-ыг буруутгаж байна DNN.mn

Орос Калининградын тээврийн хоригт АНУ-ыг буруутгаж байна

Москвагийн Гадаад хэргийн яам Литвийн хоригт хамаарах бараа бүтээгдэхүүн Оросын эх газраасКалининград руу нэвтрүүлэхийг хориглосонд АНУ-ыг буруутгав. Энэ нь Москва болон барууны харилцаандхурцадмал байдлыг улам нэмэгдүүлсэн байна.

Европын холбооны гишүүн Литва өнгөрсөн Бямба гаригтшинэ хязгаарлалт хүчин төгөлдөр болсны дараа ЕХ-ны хоригт хамрагдсан Оросын барааг дамжин өнгөрөхийг хааж эхэлсэн. Москва энэ алхмыг шүүмжилж, “бүслэлт” гэж нэрлээд, хатуу хариу арга хэмжээ авахаа амлалаа.Орос Литвийг бүс нутгийн эрчим хүчний сүлжээнээс салгахадбэлэн байна гэж мэдэгдэв.

Оросын албаны хүмүүс энэхүү хориг нь ачаа тээврийн 30 хувиас50 хувийг зогсооно гэж янз бүрээр тооцоолж байна. Гэсэн хэдийч бараа бүтээгдэхүүнийг Балтийн тэнгис дэххөлөг онгоцууд руу шилжүүлэх боломжтой гэж мэдэгджээ.

Categories
гадаад мэдээ

Украины эрх баригчид Северодонецк хотыг орхин гарах тушаалыг цэргүүддээ өгчээ DNN.mn

Олон хоногийн турш Донбассын фронтын хамгийн халуун цэг болж байсан Северодонецк хотоос ухрах тушаалыг Киевийн засаг захиргаа цэргүүддээ өгчээ.

Луганск мужийн аж үйлдвэрийн төв болсон уг хотыг эзлэхийн төлөө тулаанд Оросын тал асар их хүч хаяж байгаа

Хэрвээ Северодонецк хотыг Украины цэргүүд орхин гарвал Луганск муж бараг бүхэлдээ Оросын цэргийн хяналтад шилжих юм.

Одоо Северодонецкийн дагуул хот Лисичанск л зөвхөн Украины мэдэлд үлдэж байна.

Луганск бол орос хэлтэн хүн ам олонх болдог, Донбассын бүс нутгийн бүрэлдэхүүнд багтдаг хоёр мужийн нэг юм.

Северодонецк хот олон хоногийн турш Оросын их бууны цохилтын бай болж байсан тул дэд бүтэц нь бүхэлдээ устаж, байшин барилгын 80 гаруй хувь балгас болжээ.

“Хэдэн сарын турш тасралтгүй бөмбөгдүүлсэн байрлалыг хамгаалах нь одоо утгагүй болсон. Украины цэргүүд шинэ байрлалд шилжиж, тулаанаа тэндээс үргэлжлүүлэх тушаал авлаа” гэж Луганск мужийн захирагч Сергей Хайдай телевизээр мэдээлсэн байна.

Дайны өмнө Северодонецк хот 100,000 оршин суугчтай байсан юм. Одоо хэдэн зуун энгийн иргэн тус хотод үлдсэн гэсэн баримжаа тоо байна.

Өчигдөр ирсэн өөр нэг мэдээллээр Украины өмнөд хязгаарын Херсон хотын захирагчаар Оросын талаас томилогдсон хүн автомашинд тавьсан бөмбөг дэлбэрэхэд амиа алджээ.

Эзлэгдсэн Херсон мужид Кремлиэс томилсон хэд хэдэн албан тушаалтан сүүлийн өдрүүдэд халдлагын бай болоод байна. Үүнийг орон нутгийн партизанууд үйлдсэн хэмээн сэжиглэж байгаа.

Херсон муж нь 2014 онд ОХУ-д эзлэгдсэн Крымийн хойгийг Оросын газар нутагтай хуурай газраар холбоход чухал ач холбогдолтой бүс нутаг юм.