Европын Холбооны /ЕХ/ Зөвлөл ОХУ-ын эсрэг долоо дахь багц арга хэмжээг баталсан тухай Европын Комиссын /ЕК/ дарга Урсула фон дер Ляйен твиттер хуудсандаа мэдээлжээ.

“Гишүүн орнууд Кремлийн эсрэг бидний чангатсан, урт хугацааны хориг арга хэмжээг баталсан. Би үүнийг сайшааж байна” гэж тэрбээр бичсэн байна.

ЕК-ын даргын хэлснээр, шинэ багц хориг арга хэмжээ нь ЕХ “хэдий чинээ шаардагдана төдий чинээгээр хүчтэй шахалт” үргэлжлүүлэн үзүүлэхэд бэлэн байгаа тухай “хүчтэй дохиог” Москвад өгнө.

Хориг арга хэмжээ ЕХ-ны Албан ёсны сэтгүүлд нийтлэгдсэний дараа хүчин төгөлдөр болно.

Оросын эсрэг долоо дахь багц хориг арга хэмжээг ЕХ-ны гишүүн орнуудын байнгын төлөөлөгчид долоодугаар сарын 20-нд баталжээ.

Хоригийн жагсаалтад улстөрчид, цэргийн албан хаагч нар зэрэг 50 гаруй хувь хүн, хуулийн этгээд багтсан байна.

Үүнээс гадна Оросын алт, үнэт эдлэлийг худалдан авах, импортлохыг хоригложээ.

АНУ-ын Ерөнхийлөгч Жо Байден коронавирусний халдвар авсан тухай Цагаан ордноос мэдээллээ. Түүнд пүрэв гарагт хийсэн коронавирусийн шинжилгээний хариу “эерэг” гарчээ.

Цагаан ордны хэвлэлийн нарийн бичгийн дарга Карин Жан-Пьерийн мэдээлснээр, өдгөө 79 настай Ерөнхийлөгч вакцинд бүрэн хамрагдсан тул “маш хөнгөн” шинж тэмдэг илэрч байгаа бөгөөд үүргээ үргэлжлүүлэн гүйцэтгэнэ.

Төрийн тэргүүн “Paxlovid” эмийг хэрэглэж байгаа гэж мэдээлж байна. Энэ нь “Pfizer” компанийн үйлдвэрлэсэн эм бөгөөд дархлааны систем халдвартай тэмцэж байх үед “Covid-19”-ийн вирусийн үржлийг дарангуйлж, бие дэх коронавирусний түвшинг бага байлгадаг байна.

Цагаан ордны коронавирусний асуудлыг зохицуулагч доктор Ашиш Жа мэдэээлэл өгөхдөө, Ж.Байден халуураагүй ч хамраас нь нус гоожиж, хуурай ханиалгаж, сульдаж байна гэжээ.

Ж.Байден биеийнх нь байдал сайн байгааг твиттер хуудсандаа бичжээ. “Би маш сайн байна, хүмүүсээ. Санаа тавьсанд баярлалаа. Дөнгөж сая сенатч Кэйси, Конгрессын гишүүн Картрайт, хотын дарга Когнетти (мөн Скрантон дахь үеэл дүү нар) нар руу утасдаж, өнөөдрийн арга хэмжээг өнгөрөөсөндөө харамсаж байгаагаа илэрхийлэв” гэж тэрбээр бичсэн байна.

АНУ-ын тэргүүн хатагтай Жилл Байдены Делавэрт өгсөн шинжилгээний хариу “сөрөг” гарчээ. Дэд ерөнхийлөгч Камала Харрис пүрэв гарагт Хойд Каролинад үр хөндүүлэх эрхийн асуудлаарх арга хэмжээнд оролцсон байна. Дөрөвдүгээр сард ковидоос эдгэрсэн түүний сүүлийн шинжилгээ “сөрөг” гарсан болохыг Цагаан ордон баталжээ.

Карине Жан-Пьерийн хэлснээр, Цагаан ордны протоколын дагуу Ж.Байден шинжилгээнийх нь хариу сөрөг гарах хүртэл тусгаарлалтын дэглэмд ажиллана. Энэ бүх хугацаанд тэрбээр утсаар болон “Zoom”-ээр уулзалтад оролцох аж.

Африкийн Гана улсад Эбола вирустэй овог нэг, үхлийн аюултай Марбург вируст халдварын анхны тохиолдол илэрчээ. Халдвар авсан эхний хоёр өвчтөн тус улсын Ашанти мужийн эмнэлэгт нас барсан байна.

Тэдгээрийн шинжилгээг Сенегал дахь лабораторид шинжлүүлэхээр энэ сарын эхэнд өгсөн бөгөөд Марбург болох нь өнөөдөр батлагджээ. Одоогоор ойрын хавьтал болсон 98 хүнийг тусгаарласан байна.

Марбург өвчнийг эмчлэх тодорхой эмчилгээ байхгүй ч ус их уух нь амьд үлдэх боломжийг нэмнэ гэж эмч нар зөвлөдөг.

Тус вирус жимсний сарьсан багваахайгаас хүнд халдварладаг бөгөөд хүнээс хүнд шингэн зүйлээр дамжин халдварладаг байна. Толгой өвдөх, халуурах, булчингаар өвдөх, цусаар бөөлжих нь өвчний гол шинж тэмдэг аж.

Гана улсын албаныхан иргэдийг агуйд ойртохгүй, мах идэхдээ гүйцэд болгохыг сануулж байна.

Өмнө нь Африкийн Кени, Ардчилсан Конго, Өмнөд Африк, Уганда улсуудад Марбургийн хэд хэдэн халдвар дэгдэж байсан ба анхны тохиолдол нь 1967 онд Германд бүртгэгдэж байв.

Хамгийн сүүлд 2005 онд Ангол улсад халдвар дэгдэхэд 200 хүн амь үрэгдэж байсан.

Япон улсын ерөнхий сайд асан Абэ Шинзо өнгөрсөн долоо хоногт зэвсэгт этгээдийн халдлагад өртөж, амь насаа алдсан билээ.

Аллагын сэжигтэн болох 41 настай Тэцуяа Ямагами эхлээд ээжээс нь их хэмжээний мөнгө хандивт авч, гэр бүлийг нь дампууруулсан шашны байгууллагын тэргүүний аминд халдах төлөвлөгөөтэй байсан гэдэг.

Гэвч тэр сүүлд уг байгууллагыг дэмждэг гэсэн үндэслэлээр экс ерөнхий сайдын амийг бүрэлгэжээ. Сэжигтний авга ах өчигдөр Японы хэвлэлд ярихдаа Ямагамигийн ээж нийтдээ 100 сая иенийг ($721,000 орчим) Эв Нэгдлийн сүмд хандивласан болохыг баталсан байна.

Эв Нэгдлийн сүм нь 1954 онд Өмнөд Солонгост байгуулагдсан шашны байгууллага бөгөөд хүмүүсийн дунд Мүүний шашин гэж нэрлэгддэг. Тус байгууллага Японд 600,000 орчим гишүүнтэй томоохон салбартай юм байна. Гэр бүл нь 2002 онд санхүүгийн хувьд дампуурсан ч сэжигтний ээж бага хэмжээний мөнгийг сүмдээ цувуулан хандивласаар байсан гэнэ.

“Тэр сүмийнхээ маш идэвхтэй гишүүн болсон байсан. Түүний ухаан санаа бусдын хяналтад орсон байсан гэдэгт би итгэлтэй байна” гэж сэжигтний авга ах ярьжээ. 1984 онд эцэг нь амиа хорлосны дараа сэтгэл санааны хямралд орсон эмэгтэй 1991 оноос эхлэн Эв Нэгдлийн сүмд явах болсон гэнэ.

Ямагами эцгийнхээ адил толгой сайтай нэгэн байсан ч санхүүгийн боломжгүй учраас их сургуульд элсэж чадаагүйг авга нь ярьжээ. Тэрбээр 2005 онд амь насны даатгалын мөнгөө гэр бүлдээ өгүүлэхийн тулд амиа хорлохыг хүртэл завдаж байсан гэнэ. “Ерөнхий сайд агсан Нобусуке Киши сүмийн салбарыг Японд байгуулагдахад тусалж байсан. Тиймээс би түүний ач хүүг (Абэ) алсан юм” гэж Ямагами мэдүүлсэн тухай мөрдөн байцаалтын эх сурвалж мэдээлжээ.

Эх орноосоо зугтан гарсан Шри Ланкийн Ерөнхийлөгч Готбая Ражапакса Сингапурт очсоныхоо дараа албан тушаалаасаа албан ёсоор огцорсон талаар олон улсын хэвлэлүүд мэдээлж байна.

Тэрбээр даваа гаргийн шөнө байлдааны онгоцоор Шри Ланкаас зугтаж, Мальдив улсад очоод байсан. Улмаар өчигдөр эхнэр, хоёр бие хамгаалагчийн хамт Сингапурт иржээ. Гэхдээ одоогоор албан ёсоор орогнол хүсээгүй бололтой. Сингапурын Гадаад харилцааны яамнаас гаргасан тайлбарт “Готабая Ражапакса одоогоор орогнол хүсээгүй. Манай улс ер нь улс төрийн орогнол өгдөггүй” хэмээн онцолсон байв.

Эх орноосоо оргон зугтсан түүний үйлдлийг шинжээчид “Ард иргэдийн эсэргүүцэл нэмэгдэж, түүнийг баривчлах юм уу, түүнээс ч хүнд шийтгэл ногдуулах эрсдэлтэй байсан учир албан тушаалаа өгөхөөсөө өмнө гэр бүлтэйгээ хамт зугтсан” хэмээн бичиж байна.

Ерөнхийлөгчөө огцорсон тухай мэдээг Шри Ланкийн ард иргэд баярлан хүлээж авсан талаар ВВС агентлагийн мэдээлэлд дурджээ.

Шри Ланкад түүний үүргийг Ерөнхий сайд Ранил Викремесингхе орлож үлдсэн ч тангараг өргөх хүртлээ түр Ерөнхийлөгч гэж тооцогдохгүй гэнэ. Тэгээд ч ард олон улс орны эдийн засгийн нөхцөл байдалд Ранилыг мөн адил буруутгаж, огцрохыг шаардаж буй тул тус улсад улс төрийн нөхцөл байдал цаашдаа хэрхэн өрнөхийг таамаглах боломж хомс байгаа юм.

Европт эрчим хүчний нийлүүлэлт тасалдаж, үнэ өссөнтэй холбогдуулан Унгар улс онц байдал зарлажээ. Тус улсын засгийн газар дотоодын эрчим хүчний үйлдвэрлэлийн хүчин чадлаа нэмэгдүүлнэ гэж мэдэгдээд байна.

Унгарын Ерөнхий сайдын тамгын газрын дарга Гергели Гуляс бүс нутгийн эрчим хүчний хямралд Украины дайн болон ОХУ-д тавьсан Европын холбооны хориг арга хэмжээг буруутгав. Тэрээр Будапештэд болсон хэвлэлийн бага хурал дээр “Европ тив намар, өвлийн халаалтын улиралд хангалттай хийгүй байх магадлалтай” гэжээ.

Унгар жилийн байгалийн хийн олборлолтоо 1.5 тэрбум шоо метрээс хоёр тэрбум шоо метр болгож нэмэгдүүлнэ гэж мэдэгдсэн. Энэ хүрээнд нүүрсний олборлолтыг нэмэгдүүлж, Матра дахь хүрэн нүүрсээр ажилладаг цахилгаан станцыг сэргээхээр төлөвлөж байна. Унгарын цорын ганц атомын цахилгаан станц үйлдвэрлэлээ нэмэгдүүлэхийн тулд ажиллах хугацаагаа уртасгах болов.Мөн иргэдэд хэрэглээгээ зохицуулж, илүү гарсаныг нь зах зээлийн үнээр төлөх үүрэг өгчээ.

Засгийн газар хуралдаж, Европын эрчим хүчний онцгой байдлыг хэлэлцсэний дараа дээрх мэдэгдлүүд гарчээ.

Унгар улс ОХУ-аас олборлосон түлшнээс ихээхэн хамааралтай. Тухайлбал өнгөрсөн онд Газпромтой байгалийн хий худалдан авах 15 жилийн гэрээ байгуулсан. Тус улс нь газрын тосны хэрэгцээнийхээ 65 орчим хувийг, байгалийн хийн хэрэгцээний 85 хувийг Оросоос авдаг.

Унгарын ерөнхий сайд Оросын нефтийн экспортод хориг арга хэмжээ авах тухай Европын холбооны саналын эсрэг байр суурьтай байсан. Ийм арга хэмжээ нь Унгарын эдийн засгийг сүйрүүлнэ гэж үзжээ.

Унгарын Гадаад хэргийн сайд Петер Сиярто ямар нэг өөр улсаас 700 сая шоо метр хий нэмж худалдаж авахаар төлөвлөж буйгаа мэдэгджээ.