УДБЭТ-ын 60 дахь улирлын нээлтийн тоглолтууд дэлхийн сор болсон сонгодог бүтээлүүдээр үргэлжилж байна.
Тус театр дэлхийн гранд дуурь Ж.Вердийн “Аида” дууриар энэ сарын 1, 2-нд тоглолтын хөшгөө нээсэн бол өнгөрсөн долоо хоногт Б.Дамдинсүрэнгийн “Учиртай гурван толгой” дуурийг тоглосон юм. Харин энэ долоо хоногийн амралтын өдрүүдэд Л.Минкусын “Дон Кихот” балетыг үзэгчдэд толилуулна.
УДБЭТ-ын уран бүтээлчдийн 11 дүгээр сард тоглох тоглолтын хөтөлбөрийг танилцуулж байна.
Их Британийн жүжигчин Робби Колтрейн Шотландын эмнэлэгт 72 насандаа таалал төгссөн тухай түүний агент Белинда Райт мэдээлжээ. Түүнийг “Харри Поттер” киноны Рубеус Хагридын дүрд тоглосноор нь үзэгчид илүүтэй мэднэ.
Харри Поттероос гадна Колтрейн “Крекерийн арга барил” хэмээх цувралд сэтгэл зүйч, Жэймс Бондын тухай “Алтан нүд”, “Бүтэн ертөнц ч хангалтгүй” зэрэг кинонуудаад Оросын мафийн толгойлогчийн дүрд тоглосон.
Колтрейнийг нас барсан тухай Райтын мэдэгдэлд “Хагридын дүр дэлхийн өнцөг булан бүрийн хүүхэд багачууд төдийгүй насанд хүрэгчдэд баяр баясгалан бэлэглэсэн онцгой авьяастан” хэмээжээ.
“Харри Поттер” киноны дараа Колтрейн олон төсөлд жүжигчин, дуу оруулагчаар оролцсон байна.
Реппер, найруулагч, продюсер Rokit Bay буюу О.Баярсайхан уран бүтээлээсээ хэсэг хугацаанд завсарлаад байгаа билээ. Саяхан “The Broken Souls” дуугаа цацсан тэрбээр энэ уран бүтээлээрээ нэрлэсэн тоглолтоо ирэх сарын 4-нд хийхээр болжээ. Түүний тоглолт “UG place”-т болно.
Тоглолтын тасалбарын үндсэн үнэ нь 129.000 төгрөг. Урьдчилсан захиалгын үнэ нь 99.000. Тасалбарын тоо хязгаартай, үзэгчдийн насны хязгаарыг 18-аас дээш байхаар заажээ.
Нобелийн шагналын долоо хоног жил бүрийн 10 дугаар сарын эхээр эхэлдэг уламжлалтай. Энэхүү долоо хоногт шинжлэх ухаан, уран зохиол, эдийн засаг, хүний эрхийн салбарын шилдгүүдийг тодруулдаг билээ.
Нобелийн долоо хоног даваа гаргаас анагаах ухааны салбарын шагналтныг тодруулснаар эхлэх бөгөөд мягмар гарагт физик, лхагва гарагт хими, пүрэв гарагт уран зохиолын салбарын шагналтныг тодруулна. Ийнхүү Энх тайвны Нобелийн шагналтан баасан гарагт, эдийн засгийн салбарын шагналын эзэн энэ сарын 10-нд тус тус тодрох юм.
Анагаах ухаан, физик, хими, уран зохиол, энх тайвны салбарын шагналыг Шведийн эрдэмтэн Альфред Нобелийн гэрээслэлийн дагуу олгож эхэлсэн түүхтэй. Анхны шагналуудыг 1901 онд буюу А.Нобелийг таалал төгссөнөөс таван жилийн дараагаас гардуулж эхэлсэн байна.
Шагнал тус бүрийг 10 сая крон /ойролцоогоор 900 мянган ам.доллар/ дагалддаг бөгөөд хүндэт диплом болон алтан медалийг 12 дугаар сарын 10-ны өдөр буюу А.Нобелийн 1896 онд таалал төгссөн өдөр гардуулдаг.
Харин Альфред Нобелийн дурсгалд зориулсан Шведийн Төв банкны шагнал гэж албан ёсоор нэрлэдэг эдийн засгийн салбарын шагналыг тус банк 1968 оноос санаачлан олгож эхэлжээ. 1901-2021 оны хооронд Нобелийн шагнал болон эдийн засгийн шагналыг 609 удаа олгосон байна.
Францын “Coperni” брэнд Парисын загварын долоо хоногийн шоун дээр дэвшилтэт технологийг ашигласан гайхалтай үзүүлбэрийг толилуулаа.
Тайзан дээр хагас нүцгэн гарч ирсэн Америкийн алдарт загвар өмсөгч Белла Хадидад үзэгчдийн нүдэн дээр шүршдэг хөвөн утсаар гоёмсог дааашинз урлаж өгчээ.
Хувцас загварын ертөнцийг технологийн дэвшилттэй хослуулсан энэ үзүүлбэрийг Испанийн загвар зохион бүтээгч Манел Торрес санаачилжээ.
Түүний удирдсан баг баллоноор шүршдэг хөвөн утасны шингэн найрлагыг зохион бүтээсэн юм. 25 настай загвар өмсөгч Хадидын бие рүү үүнийгээ шүршиж биеийн галбирыг нь тодотгосон минимал загвартай цагаан даашинзыг урлалаа.
Бие дээр шүршсэний дараа хоорондоо барьцалдаж хөвөн даавуу болж хувирах энэ шүршигчийг ямар ч өнгөөр хийж болох аж.
Шүршдэг даавуугаар хийсэн хувцсаа дараа нь энгийн хувцас шиг тайлж, өмсөж, угааж болдог гэнэ.
Дэлхийн хамгийн баян хүн гэгддэг Илон Маск өчигдөр болсон “Tesla AI Day” хиймэл оюуны технологийн өдөрлөгийн үеэр өөрийн компанийн бүтээж буй хүн дүрст роботын туршилтын загварыг үзүүлжээ.
Optimus нэртэй энэхүү робот одоо Тесла компанийн цахилгаан автомашины үйлдвэрт туршигдаж байгаа ба ойрын хэдэн жилийн дотор бөөнөөр үйлдвэрлэгдэж, зах зээлд гаргах гэнэ.
Маск арга хэмжээнд оролцогчдод цэцэг услах, хайрцаг зөөх, металл эд анги өргөх зэрэг энгийн үйлдэл гүйцэтгэж буй Оптимусын дүрс бичлэгийг үзүүлсэн байна.
Гурваас таван жилийн дотор зах зээлд гарахдаа Оптимус нь $20,000 хүрэхгүй үнэтэй байх гэнэ.
“Бидний мэдэх соёл иргэншил үндсээрээ өөрчлөгдөх цаг үе ойртож байна” гэж Илон Маск танилцуулгын үеэр хэлжээ.
Гэвч хөрөнгө оруулагчид, зах зээл судлаачид Тесла компани цахилгаан хөдөлгүүрт автомашин үйлдвэрлэх үндсэн бизнестээ төвлөрөхийн оронд хүн дүрст робот зохион бүтээж байгаад гайхаж, санаа зовж байгаагаа илэрхийлцгээжээ.
Харин Маск энэ төслөө хиймэл оюуны салбарын хамгийн чухал асуудлуудын нэг болох хүнийг машинаар бүрэн орлуулах чиглэлд хийгдэж буй ажил гэж тайлбарласан байна.
“Бид роботыг Терминаторын замаар явуулахгүй байхад үргэлж анхаарал тавьж, болгоомжтой хандах ёстой” гэж тэр ярьжээ.
Маск бас робот нь эрсдэлтэй тохиолдолд “зогсоох” товчтой байх ба Тесла компани нийгмийн хариуцлагынхаа хүрээнд энэ чиглэлд хувь нэмрээ оруулах шаардлагатай болсныг хүмүүст тайлбарласан байна.
Эх сурвалж: BBC
БНСУ-ын “BLACKPINK” хамтлаг Америкийн “Billboard”-ын шилдэг цомгуудын жагсаалтыг тэргүүлсэн “K-pop” урсгалаар уран бүтээлээ туурвидаг анхны охидын хамтлаг болжээ.
“Billboard”-ын цахим хуудсанд мэдээлснээр, тус хамтлагийн есдүгээр сарын 16-нд худалдаанд гаргасан бүрэн хэмжээний хоёр дахь цомог болох “Born Pink” нь “Billboard 200” жагсаалтын нэгдүгээрт бичигдсэн байна.
Ингэснээр 2008 оноос хойш энэхүү жагсаалтыг тэргүүлсэн анхны охидын хамтлаг болжээ.
Харин “K-pop” урсгалаар уран бүтээлээ туурвидаг хамтлагуудын дундаас энэхүү жагсаалтыг тэргүүлсэн дөрөв дэх хамтлаг болсон бөгөөд урьд нь “BTS”, “SuperM”, “Stray Kids” хамтлагууд ийм амжилт үзүүлж байсан юм.
2016 онд “Whistle” дуугаараа уран бүтээлийн гараагаа эхлүүлж байсан “BLACKPINK” одоо “As If It’s Your Last”, “Kill This Love”, “Ddu-du Ddu-du”, “Love Sick Girls” зэрэг хит дуунууд бүхий дэлхийн хамгийн алдартай охидын хамтлаг болжээ.
“The Hu” хамтлаг Лондон хотноо зохион байгуулагдах “AIM Awards-2022”-т нэр дэвшжээ. Дэлхийн нэр хүнд бүхий эл хөгжмийн наадам есдүгээр сарын 28-нд болно. Сүүлийн үед хүч түрэн гарч ирж буй уран бүтээлчдийг “Aim Awards” шалгаруулж, цаашид амжилттай туурвихад нь том боломж олгодог.
Этник рок урсгалын “The Hu” хамтлаг өдгөө АНУ-д аялан тоглолт хийж байгаа бөгөөд энэ сард “Rumble of Thunder” нэртэй шинэ цомгоо худалдаанд гаргасан билээ. Аравдугаар сарын 4-нд эл аялан тоглолт дууссаны дараа 26-наас Европыг зорих аж.
“Цайны зам” өв соёлын III наадам энэ сарын 25-28-ны өдөр Ховд аймагт болно.
Соёлын биет болон биет бус өв, язгуур урлаг, цайны соёлын өвийг түгээн дэлгэрүүлэх, өвлүүлэн үлдээх, сурталчлах, орон нутгийн аялал жуулчлалыг хөгжүүлэх зорилтын хүрээнд энэхүү наадмыг БОАЖЯ-ны дэмжлэгтэйгээр Ховд аймгийн ЗДТГ, БОАЖГ, СУГ, ХХААГ зэрэг мэргэжлийн байгууллага, холбоод хамтран хийж байна.
Наадам энэ сарын 25-ны өдөр Манхан сум дахь Гурван Сэнхэрийн агуйтай танилцах аяллаар эхлэх бөгөөд тэмээн жингийн цуваа Манхан сумаас Ховд аймгийн төв рүү хөдөлнө.
Монгол нүүдэл, адуучин тэмцээн, бэсрэг наадам, тууль, цуур, уран нугаралтын наадам болон угсаатны цай чанах ёслол, язгуур урлагийн тоглолт, тэмээн жинг угтах зэрэг үйл ажиллагаа тусгай хөтөлбөр, төлөвлөгөөний дагуу өрнөнө.
Ховд аймгийн 17 суманд алтайн урианхай, дөрвөд, захчин, мянгад, өөлд, торгууд, халх, хошууд, казах, тува зэрэг 10 гаруй угсаатан аж төрж байна. Эдгээр угсаатны онцлогийг “Цайны зам” өв соёлын наадмаар дамжуулан ийнхүү гурав дахь удаагаа сурталчлах гэж байгаа аж.
Цайны соёл Европ, Орост нэвтэрснээр цайны хэрэглээ өсөж, дөт замаар цай авах боломж нь Монгол орноор дамжуулан авах байжээ.
Цайны зам бол худалдааны орлогын хувьд “Торгоны зам”-ын дараа орох хоёрдугаар чухал зам байсан. Энэхүү маршрут нь Хөх хот-Улиастай-Ховд-Цагаануур-Бийск гэсэн баруун хязгаарыг чиглэсэн зам ажээ.
Хувьсал продакшны “Ноён эмэгтэй” УСК-ны зохиолыг зохиолч С.Жаргалсайханы “Би эр хүнийг хүснэ” жүжгээс сэдэвлэн бичсэн билээ.
“Ноён Эмэгтэй” нь 1990-ээд оны эмэгтэйчүүдийн хорих ангид хүч нөлөөний төлөөх өшөө авалт, урвалт, тэмцэл, уучлалттай өдөр хоногуудыг өнгөрөөж буй эмэгтэй ялтнуудын тухай эмгэнэлт драм кино юм. “Би эр хүнд хайртай” гэсэн хэдий ч уг кинонд эр хүнийг гэх хайр байсангүй. Эрхээ хязгаарлуулсан эмэгтэйчүүд эр хүн хүсэж байгаа хэсэг текст, үйл явдлаас бусад бүх цаг үед эр хүнийг буруутгасан, үгүйсгэсэн, харлуулсан өнгө аяс. Кино эхлэхдээ сонирхол татсан ч дундуураа үзэгчдийг уйдааж энгийн л нэг монгол кино шигээ төгсөв. Төдийлөн хүн бүрийн хөндөөд байдаггүй сэдэв ч гэлээ буйрнаасаа холдож чадаагүй нь биднийг гадны кино сонирхдоггүй, шүүмжлэлт, шинийг эрэлхийлэх нүдээр хардаггүй, судалдаггүйг илтгэж байлаа.
Сэдэв: Бүтэн шорон гардаг цөөн киноны нэг. Амьдралын нэг л алдаа ямар их хор уршигтай, эмэгтэйчүүдийн шаналал гээд хүмүүсийн мэддэг л сэдэв. Яг нэг зүйлийг онилж зоригтойгоор дуугарч чадсангүй.
Зохиол: Энэ киногоор яг юу гаргах гээд байгаа нь мэдэгдэхгүй. Тухайн үе болох 1990-ээд оны шоронгийн амьдралыг бодитоор харуулж болох байсан. Манай монголчуудын зан гэмээр ч юм уу уйлуулчих гээд л. Үзэгчдийг залхтал 20 орчим удаа уйлуулсан. Утга агуулгагүй уянгалалтад галзуу л биш бол юу гэж матарын нулимс унагах вэ дээ. Энэ киног доош татсан бас нэг зүйл бол хөгжмийн сонголт.
Амьдралдаа анх удаа шоронгийн хаалга татаж төмөр тор руу алхаж яваа хоёр эмэгтэйн ард дайны фронтод байлдаж яваа баатарлаг, зоригт эрсийн ая явна. Яг үнэндээ хэзээ төгсөх нь үл мэдэгдэх зовлон, шаналалд унаж яваа хүмүүс шүү дээ.
Зураг авалт, өнгө: “Ноён эмэгтэй” УСК-ны зураг авалт, зураач, зураглаачийн ажиллагаа маш сайн. Тулааны хэсгүүдийн өнцгүүд маш тохиромжтой.
Дүрүүд: Киноны нэр, гол дүр ноён эмэгтэй бол Монгол Улсын гавьяат жүжигчин У.Уранчимэг. Түүний харц, алхаа гишгээ, зодолдож байгаа байдал ярих юмгүй. Харин жүжигчин О.Дөлгөөн өөрчлөлтгүй, нэг л дүрээрээ олон кинонд яваад байдаг. Энэ киноны дүрдээ тохироогүй санагдлаа. Дүрийн өөрчлөлт шинэчлэлт, хувьсал байхгүй.
Бусад: Амьдралаа авч яваа ганц бие ээж болохоор мундаг, гайхалтай гэнэ. Ийм амьдрал бүтээхгүй байх сонголт байсан. Хорих анги дотор угаалга хийнгээ хошигнох бүсгүйчүүдийн хэсэг хөөрхөн сцень байсан. Гэтэл тэнд хариу үзүүлэх дүрүүдээс дүртэйгээ ажиллаж чадаагүй найруулагч харагдана. Хөдөө тайгаас ирсэн аавын жаахан охин эр бэлэг эрхтэн хараад хөөрч баясах уу. Ичингүйрч улайна биз дээ.
“Ноён эмэгтэй”-н талаар дурдахыг хүссэн сүүлийн зүйл нь киноны цаг үетэйгээ огтхон ч авцалдаагүй сэтгэлгээний онцлог байв. Жүжигчид, тэр дундаа туслах дүрийн жүжигчид бүхий л эрч хүчээ дайчлан ажиллаж буй нь илт боловч тэд “дүр”-ийнхээ хувьд эмэгтэй царайтай л болохоос хулгайч, худалч, зусар, шалиг, дээрэлхүү, “нөгөө” л дүрийн характертай.
Өөрөөр хэлбэл, эмэгтэй шорон, эмэгтэй дүрүүд байгаад тэднээс үүдэж болох хандлага сэтгэхүйн нарийн ялгаагүй нь алдагдсан боломж мэт санагдлаа. Нэгдсэн агуулгагүй, хуучинсаг үзэл нь үзэх сонирхол унтрааж байв.
