Category: эдийн-засаг

Инфляцын 38.9 хувь нь импортын барааны үнийн өсөлтөөс шалтгаалжээ

Хэрэглээний бараа, үйлчилгээний үнэ тавдугаар сард улсын хэмжээнд өмнөх сараас 1.3 хувиар, харин өмнөх оны мөн үеэс 11.3 хувиар өссөнийг Үндэсний статистикийн хороо мэдээллээ. Үүний 5.2 нэгж хувь буюу 46.0 хувь нь хүнсний бараа, ундаа, усны бүлгийн үнийн өсөлтөөс шалтгаалсан байна.

Хүнсний бараа, ундаа, усны бүлгийн үнэ дүнгээрээ 18.4 хувиар, хувцас, бөс бараа, гутлын бүлгийн үнэ 12.5 хувиар, эм тариа, эмнэлгийн үйлчилгээний бүлгийн үнэ дүнгээрээ 6.6 хувиар, харин тээврийн бүлгийн үнэ дүнгээрээ 3.0 хувиар өссөн нь голлон нөлөөлжээ.

Хэрэглээний үнийн индексэд 38.9 хувь нь импортын барааны үнийн өсөлтөөс шалтгаалсан байгааг статистик мэдээлэлд дурдсан байна.

2022 оны тавдугаар сард инфляц 16.2 хувьтай гарсантай харьцуулбал өсөлтийн хурдац өмнөх оны мөн үеэс 4.9 нэгж хувиар буурлаа. Хүнсний барааны бүлгийн үнэ өмнөх оны мөн үед 18.3 хувиар өсөж байсантай харьцуулбал өсөлтийн хурдац 0.3 нэгж хувиар саарсныг онцолж болохоор байгаа юм.

Монгол Улсын инфляцын дундаж түвшин 2023 оны туршид 12 орчим хувьд хадгалагдаж, 2024 оноос есөн хувьд тогтворжино гэж “Fitch Ratings” таамаглаж байгаагаа мэдээлж байв. БНХАУ-тай хийх худалдаа бүрэн тогтворжиж, дэлхийн зах зээлд түүхий эдүүдийн үнэ буурах нь инфляц саарахад нөлөөлнө гэж үзжээ. Хэдий тийм боловч ОХУ-д тавьж буй хоригууд зарим импортын бараануудын үнэ урт хугацаанд өндөр байхад нөлөөлнө гэж мэдээлсэн юм.

Эх сурвалж: BloombergTV

Монгол Улсын Засгийн газрын 2022 оны 466 дугаар тогтоолоор “Экспортод гаргах нүүрсний нээлттэй цахим арилжааны журам”-ыг баталсны дагуу Эрдэнэс Тавантолгой ХК, Монголын хөрөнгийн бирж хамтран анхны цахим арилжааг 2023 оны 02 дугаар сарын 09-ний өдөр зохион байгуулсан байдаг.

Монголын хөрөнгийн бирж 2023 оны эхний 5 сарын байдлаар хугацаанд нийт 1,542,400 тонн нүүрс борлуулсан бөгөөд “Эрдэнэс Тавантолгой” ХК хамгийн олон буюу 1,024 мянган тонныг биржээр арилжив. Энэ онд нийт нүүрсний экспортын 30 хувийг Хөрөнгийн биржээр дамжуулан арилжих Засгийн газрын бодлогын хүрээнд цахим нээлттэй арилжааг тогтмол зохион байгуулах болжээ.

Мөн Эрдэнэс Тавантолгой ХК-д онцгой дэглэм тогтоосноос хойшхи хугацаанд нийт 11,084,924 тонн нүүрс экспортолжээ.

Нийгмийн даатгалын сангийн орлого энэ оны эхний 4 сард 1.2 их наяд төгрөг болж, өмнөх оны мөн үеийнхээс 199.2 (19.5 хувь) тэрбум, зарлага 1.2 их наяд төгрөг болж, 155.2 (14.9 хувь) тэрбум төгрөгөөр өсжээ.

Эрүүл мэндийн даатгалын сангийн орлого дээрх хугацаанд 500 тэрбум төгрөг болж, өмнөх оны мөн үеийнхээс 122.5 (32.4 хувь) тэрбум төгрөгөөр өсөж, зарлага 554.5 тэрбум төгрөг болж, 166.5 (23.1 хувь) тэрбум төгрөгөөр буурав. Нийт зарлага буурахад Засгийн газрын урсгал шилжүүлгийн зардал өмнөх оны мөн үеийнхээс 153.4 (22.3 хувь) тэрбум төгрөгөөр буурсан нь нөлөөлснийг Үндэсний статистикийн хорооноос гаргадаг нийгэм эдийн засгийн мэдээлэлд тэмдэглэжээ.

УИХ дахь МАН-ын бүлэг өнөөдөр /2023.05.30/ ээлжит хуралдаанаа хийлээ. Хуралдаанаар хүүхэд бүрт хүүхдийн мөнгийг олгох саналыг хэлэлцэж, гишүүдийн олонх дэмжжээ. Улмаар маргаашийн Засгийн газрын ээлжит хуралдаанаар оруулж, батлуулахаар болсон байна.

Тэгвэл бүлгийн хуралдаанаар Монгол Улсын төсөвт тодотгол хийхийг мөн дэмжжээ. Өөрөөр хэлбэл, ирэх долдугаар сарын 1-ний өдрөөс эхэлж цалин, тэтгэврийг нэмэх шаардлагатай хэмжээн үзэж, төсөвт тодотгол хийхийг бүлгийн гишүүд дэмжсэн байна.

Засгийн газрын хуралдаанаас гарсан мэдээлэл, шийдвэрүүдийг танилцуулж байна.

Эдийн засаг, хөгжлийн сайд Ч.Хүрэлбаатар “Монгол Улсын 2023 оны эдийн засгийн байдал 7,6 хувиар өссөн гэсэн мэдээллийг хүргэж байсан бол ҮСХ-ноос мэдээлснээр 7,9 хувиар өссөн үзүүлэлттэй байна.

Гадаад валютын нөөц 3,8 тэрбум доллар буюу тогтвортой, өсөлттэй дүнтэй байна. Эдийн засаг өсөж цар тахлын өмнөх үеийн нөхцөл байдалд гурван салбараас бусад нь хүрээд байна.

Тодруулбал уул уурхай, тээвэр, барилгын салбарт хараахан хүрээгүй байна. Эдийн засаг 7,9 өсөлттэй байгаа ч өвөлжилт амаргүй, малын зүй бус хорогдол их, шинэ төлийн тоо бага байгаагаас шалтгаалж Хөдөө аж ахуйн салбар уналттай байна” гэлээ.

Манай улсын парламентын танхимд эмэгтэйчүүдийн эзлэх хувь 17.1 хувьтай байна гэж Үндэсний Статистикийн Хорооноос мэдээллээ.

Энэ нь дэлхийн 187 орны дундажтай харьцуулахад 9.4 нэгж хувиар доогуур түвшин юм. Тогтвортой хөгжлийн зорилт 5.5-т Улс төр, эдийн засаг, нийгмийн амьдралын хүрээнд шийдвэр гаргах бүх үе шатанд бүрэн дүүрэн, үр дүнтэй оролцох, манлайлан ажиллах тэгш боломжоор эмэгтэйчүүдийг хангах гэж заажээ.