Category: эдийн-засаг

Олон нийтийн дунд цахим хуудас ашиглан өөрийн фэйсбүүк хуудсаар дамжуулан “үхсэн малын махыг өнгө оруулж байна” гэсэн тайлбар бүхий хэзээ хаана хийгдсэн нь тодорхой бус бичлэгийг байршуулан нөөцийн мах бэлтгэлтэй холбох зорилго бүхий мэдээлэл байршуулж, олон нийтийг төөрөгдүүлсэн худал мэдээллийг түгээсэн байна.

Энэхүү худал мэдээлэл нь өндөржүүлсэн бэлэн байдал зарласан энэ хариуцлагатай үед олон нийтийг бухимдуулж, төөрөгдүүлсэн, айдас түгшүүр төрүүлэх нөхцөл байдал үүсгэсэн байна. Худал мэдээлэл түгээсэн иргэнийг олж тогтоон, холбогдох хуулийн хариуцлага хүлээлгэхийг Хүнс, хөдөө аж ахуй, хөнгөн үйлдвэрийн яам, Мал эмнэлгийн ерөнхий газар Баянзүрх дүүргийн цагдаагийн хэлтэс, Эрүүгийн цагдаагийн албаны Эдийн засгийн гэмт хэрэгтэй тэмцэх газар хамтран ажиллаж байна.

Нийслэлийн хүн амын 2020 оны хаврын улирлын махны нийлүүлэлтийг нэмэгдүүлэх, үнийг тогтвортой хадгалах зорилгоор Нийслэлийн Засаг даргын 2019 оны А/899 дүгээр захирамжаар мал, мах бэлтгэх нөөцлөх, худалдан борлуулах, хяналт тавих үүрэг бүхий Ажлын хэсгийг Улаанбаатар хотын Ерөнхий менежер бөгөөд Захирагчийн ажлын албаны даргаар ахлуулан байгуулсан.

Тухайн ажлын хэсэгт Хүнс, хөдөө аж ахуй, хөнгөн үйлдвэрийн яам, Мэргэжлийн хяналтын ерөнхий газар, Мал эмнэлгийн ерөнхий газар, дүүргүүдийн Засаг дарга нар, Нийслэлийн хүнс, хөдөө аж ахуйн газар, дүүргүүдийн үйлдвэр, худалдаа, үйлчилгээний хэлтэс, төрийн бус байгууллагын төлөөллийг оролцуулж байгуулсан.

Чанар, аюулгүй байдлын шаардлага хангасан мах нийлүүлж, худалдаалахын тулд Мэргэжлийн хяналтын байгууллага нь Төрийн хяналт шалгалтын тухай, Хүнсний тухай, Хүнсний бүтээгдэхүүний аюулгүй байдлын тухай, Мал эмнэлгийн байгууллага нь Малын эрүүл мэндийн тухай болон бусад хууль тогтоомжийн дагуу махны үйлдвэр бүхий аж ахуйн нэгжүүдийн махны нөөц бүрдүүлэлт, хадгалалт, тээвэрлэлт, худалдаалалт, чанар, аюулгүй байдалд хяналт шалгалтыг тогтмол хийж байна.

Өндөржүүлсэн бэлэн байдал зарласан энэ хариуцлагатай үед энэхүү худал мэдээлэл нь олон нийтийг бухимдуулж, төөрөгдүүлсэн нөхцөл байдал үүсгэж байгааг албан ёсоор мэдэгдэж байна. Дотоодын махны хангамжийг тогтворжуулах зорилтын хүрээнд Нийслэлийн хүн амын хаврын улирлын хүнсний хэрэгцээнд зориулан Засгийн газрын 2019 оны 285, 329 дүгээр тогтоолын дагуу арилжааны банкны эх үүсвэрээр болон экспортлосон махны 10 хувьтай тэнцэх тоо хэмжээний махыг нийлүүлэх бодлогын гэрээ байгуулсан, Монгол Улсад албан ёсны бүртгэлтэй 40 орчим аж ахуйн нэгжийн, нийт 12.6 мянган тн махыг дотоодын зах зээлд нийлүүлэхээр бэлтгэсэн.

Бэлтгэж, нөөцөлсөн махыг хөнгөлөлттэй үнээр худалдан борлуулах ажлыг 2020 оны 3 дугаар сарын 11-ний өдрөөс эхлүүлсэн. Нөөцийн махыг Нийслэлийн 9 дүүргийн 169 хорооны хүнсний 413 дэлгүүрээр дамжуулан хонины ястай мах 6700 төг/кг, үхрийн ястай мах 7700 төг/кг, ямааны мах 6200 төг/кг үнээр худалдаалж байгаа нь зах зээл дэх үнээс 19.7-33.7 хувиар хямд байна.

Нөөцийн махны худалдаагаар 2020 оны 4 дүгээр сарын 20-ны өдрийн байдлаар нийт 1904.8 тн махыг нийлүүлээд байна. Үүнээс: үхрийн ястай мах 806.2 тн, хонины ястай мах 921.3 тн, ямааны ястай мах 177.3 тн. байна

Нөөцийн махны худалдааг 2020 оны 7 дугаар сарын 01-ний өдөр хүртэл үргэлжлүүлнэ.

Үнэт Цаасны Төвлөрсөн Хадгаламжийн төв /ҮЦТХТ/-өөс мэдээлэл хийлээ. Тус төвөөс ТҮЦ машинаар дамжуулан үнэт цаасны мэдээлэл авах үйлчилгээг өнөөдрөөс эхлэн нэвтрүүлж байгаа аж. ТҮЦ машинд хурууны хээгээ уншуулаад, таны нэр дээр ногдол ашиг хуваарилсан эсэхийг мэдэх боломжтой болсон ба V сарын 1-нээс олгож эхлэх 1072 хувьцааны ногдол ашгийг Үнэт цаасны төвлөрсөн хадгаламжийн төвөөр дамжуулан олгох аж. Тус төвд нийт 330 ХХК-ийн 33,3 тэрбум ширхэг хувьцаа хадгалагдаж байгаа ба 52 брокер диллерийн компанитай хамтран ажилладаг ажээ. 2.511 сая хүн “Эрдэнэс Тавантолгой” компанийн хувьцааны данстай байна.

Мөн аль өөрт ойрхон ТҮЦ машинд очин хувьцаа гэх цонхыг сонгон, иргэний үнэмлэх, хурууны хээгээрээ дамжуулан ямар үнэт цаасны компанид бүртгэлтэй, ямар компанийн хувьцааг эзэмшиж байна, ногдол ашиг нь мөнгөн дүнгээрээ гарч ирэх аж. Улс орон даяар нийт 110 ТҮЦ машин байдгаас 77 нь нийслэл хотод 33 нь хөдөө орон нутагт байрладаг. Харин иргэн дансаа нээлгээгүй бол нээлгэх шаардлагатай ба хоёр данстай хүмүүсийн асуудлаар удахгүй тодорхой мэдээлэл хүргэх юм байна.

УИХ-ын Эдийн засгийн байнгын хорооны 2020 оны дөрөвдүгээр сарын 22-ны хуралдаанаар Үндэсний Статистикийн хорооны 2019 оны үйл ажиллагааны тайланг хэлэлцлээ. Үндэсний Статистикийн хорооны дарга А.Ариунзаяа тус хорооны үйл ажиллагааны талаарх дэлгэрэнгүй тайланг гишүүдэд урьдчилж хүргүүлсэн учир 2019 онд хийж хэрэгжүүлсэн ажлаасаа онцолж товчхон танилцуулсан юм. Тэрээр танилцуулгадаа, Үндэсний статистикийн хороо нь 2019 онд мэдээллийн технологийг ашиглан төрийн байгууллагуудын статистикийн мэдээллийн сангуудыг уялдуулах, сангуудын мэдээллийг тулгах ажлыг хийсэн. Үүний үр дүнд мэдээллийн зөрүүтэй байдал арилж, албан ёсны статистикийн мэдээллийн чанар, шуурхай байдал сайжирсан. Түүнчлэн статистикийн мэдээлэл цуглуулах шат дамжлага цөөрч, давхардалгүй болж, мэдээлэл боловсруулах хугацаа богиносож, хэрэглээ ашиглалт нэмэгдэж байна. Тооллого, судалгаа мэдээлэл цуглуулах үйл ажиллагаанд зориулж 17 программ шинээр бичиж, 22 программд нэмэлт засвар, өөрчлөлт хийсэн. Статистикийн байгууллагын дэд бүтэц болох “Хүн ам, өрхийн мэдээллийн сан” болон “Бизнес регистрийн мэдээллийн сан”-г төрийн бусад мэдээллийн сангуудтай тулган шалгаж, зөрүүг арилгаж шинэчиллээ.

Байнга өөрчлөгдөж буй мэдээллийн хэрэгцээг бүрэн хангах, олон улсын жишигт нийцсэн, чанартай статистикийг хөгжүүлэхэд анхаарч, олон улсад нийтлэг мөрдөгдөж буй статистикийн арга зүйг судалж, үндэсний онцлогт тохируулан боловсруулж байна.

Мэдээлэл тархаалтын систем буюу статистикийн мэдээллийн нэгдсэн сан, статистикийн аргачлал арга зүйн мэдээллийн сан, тооллого, судалгааны каталог, тооллогын мэдээллийн сан, хүн ам зүйн үндэсний атлас зэрэг системүүдийг ашиглан тархаалтын бүтээгдэхүүнийг бэлтгэн гаргаж, хэрэглэгчдэд сурталчлан таниулах үйл ажиллагааг хэрэгжүүлсэн. Статистикийн мэдээллийн нэгдсэн сан www.1212.mn, байгууллагын цахим хуудас www.nso.mn, 1900-1212 лавлах утас зэрэг харилцааны хэрэгслээр хэрэглэгчдэд үйлчилж байна. Түүнчлэн 2019 онд хоёр талт болон олон талт гадаад харилцаа, хамтын ажиллагааны үр өгөөжийг нэмэгдүүлэх, төсөл хөтөлбөрийг зохицуулах зэргээр гадаад харилцаагаа хөгжүүллээ. Мөн донор болон хөгжлийн байгууллагуудын дэмжлэг, туслалцааг статистикийн салбарын хүний нөөцийн чадавхийг бэхжүүлэхэд чиглүүлэн ажиллав. Статистикийн чиглэлээр гадаад, дотоодод зохион байгуулсан 113 сургалт, семинарт төв, орон нутгийн болон төрийн бусад байгууллагуудын давхардсан тоогоор 956 ажилтныг хандивлагч байгууллагуудын санхүүжилтээр хамруулж, мэдлэг, ур чадварыг нь дээшлүүлснийг онцоллоо.

Танилцуулгатай холбогдуулж УИХ-ын гишүүн Б.Баттөмөр, Д.Тэрбишдагва, М.Оюунчимэг, Б.Ундармаа, Б.Жавхлан, Ж.Ганбаатар нар асуулт асууж, хариулт авлаа. Гишүүдийн асуултад Үндэсний статистикийн хорооны дарга А.Ариунзаяа болон холбогдох албан тушаалтнууд хариулт өгөв.

Асуулт асууж, байр сууриа илэрхийлсэн гишүүд Үндэсний статистикийн хороог боломжийн түвшинд, сайн ажиллаж байгаа талаар тэмдэглэн хэллээ.

СЗХ-ны 2020 оны ээлжит VIII хуралдааныг цахим хэлбэрээр зохион байгуулж, нийт 33 асуудлыг хэлэлцэн шийдвэрлэлээ. Хуралдаанаар үнэт цаас, даатгал, банк бус санхүүгийн байгууллага, хадгаламж, зээлийн хоршоотой холбоотой тусгай зөвшөөрөл олгох, сунгах, түдгэлзүүлэх, хүчингүй болгох, оноосон нэр өөрчлөх, хувь нийлүүлсэн хөрөнгийн хэмжээ, хувьцаа эзэмшигчдийн бүтэц, бүрэлдэхүүнд өөрчлөлт оруулах асуудлуудыг хэлэлцэж шийдвэрлэлээ.

Энэ хуралдаанаар үл хөдлөх хөрөнгө зуучлалын үйл ажиллагаа эрхлэгчид тусгай зөвшөөрөл олгох ажлыг эхлүүлж, шаардлага хангасан байгууллагуудад үйл ажиллагаа эрхлэх зөвшөөрөл олголоо.

Монгол Улсын Их Хурлын 2020 оны 1 дүгээр сарын 17-ны өдөр Санхүүгийн зохицуулах хорооны эрх зүйн байдлын тухай хууль болон Аж ахуйн үйл ажиллагааны тусгай зөвшөөрлийн тухай хуульд оруулсан нэмэлтээр үл хөдлөх хөрөнгө зуучлал, мөн үнэт металл, үнэт чулууны арилжааг тусгай зөвшөөрөлтэй үйл ажиллагаанд хамааруулж, зохицуулах, хяналт тавих үүргийг Санхүүгийн зохицуулах хороо хэрэгжүүлэхээр хуульчилсан юм.

Мөнгө угаах болон терроризмыг санхүүжүүлэхтэй тэмцэх тухай хуульд нэмэлт, өөрчлөлт оруулсантай холбогдуулан дээрх хуулиудад нэмж тодорхойлсон чиг үүргийн хүрээнд Санхүүгийн зохицуулах хорооны 2020 оны 3 дугаар сарын 11-ний өдрийн 120 дугаар тогтоолоор “Үл хөдлөх эд хөрөнгө зуучлалын байгууллагын үйл ажиллагаа эрхлэх тусгай зөвшөөрөл, зөвшөөрөл, эрх олголт, бүртгэлийн журам”-ыг, 2020 оны 3 дугаар сарын 25-ны өдрийн 150 дугаар тогтоолоор “Үнэт металл, үнэт чулууны, эсхүл тэдгээрээр хийсэн эдлэлийн арилжаа эрхлэгчийн үйл ажиллагаанд тусгай зөвшөөрөл, зөвшөөрөл олголт, бүртгэлийн журам”-ыг тус тус баталснаар энэ төрлийн үйл ажиллагаа эрхэлэгчдийг бүртгэж, хүсэлтээ ирүүлсэн байгууллага, иргэдийн материалыг хүлээн авч, тусгай зөвшөөрөл олгож эхлээд байна.

Монгол Улсын Засгийн газрын 2020 оны 113 дугаар тогтоолоор батлагдсан “Жижиг дунд үйлдвэрийг хөгжүүлэх сангаас хөнгөлөлттэй зээл олгох, сонгон шалгаруулах, дамжуулан зээлдүүлэх, эргэн төлүүлэх, хяналт тавих журам”-ын дагуу төсөл хүлээн авах үйл ажиллагааг орон даяар нэгэн зэрэг эхлүүллээ. Жижиг, дунд үйлдвэрийг хөгжүүлэх сангаас 2020 онд олгох зээлийг “Covid-19” халдварын улмаас үүсээд буй нөхцөл байдалтай уялдуулан хүн амын хүнсний хангамжийн тогтвортой байдал, стратегийн хүнсний хэрэгцээг хангах, эрүүл мэндийг хамгаалах, халдваргүйтгэл ариутгалын нөөцийг нэмэгдүүлэх чиглэлийн бүтээгдэхүүн үйлдвэрлэлийг дэмжинэ.

Журмын хүрээнд жижиг, дунд бизнес эрхлэгчдийг шинэ хуулийн дагуу ангилж, ангилал тус бүрт зээлийн багцыг хуваарилан олгох бөгөөд, орон нутгаас шалгарсан бичил ангилалд хамаарах аж ахуйн нэгжүүдийн зээлийг банкаар дамжуулахгүй Жижиг, дунд үйлдвэрийг хөгжүүлэх сангаас шууд санхүүжүүлэхээр, олгох зээлийн хэмжээг төсөл ирүүлэгчийн борлуулалтын орлоготой уялдуулснаараа онцлог юм.

Иймд сангийн хөнгөлөлттэй зээлд хамрагдахыг хүссэн жижиг, дунд үйлдвэр, үйлчилгээ эрхлэгчид “Жижиг, дунд үйлдвэр, үйлчилгээг дэмжих тухай” хуулинд заасны дагуу аль ангилалд хамаарах ЖДҮЭ болохоо тодорхойлуулж, гэрчилгээ авах шаардлагатай юм.

ЗЭЭЛИЙН ЕРӨНХИЙ НӨХЦӨЛ

ТӨСӨЛ ХҮЛЭЭН АВАХ ХУГАЦАА:

Эхлэх: 2020 оны 04 дүгээр сарын 20-ны өдрийн 08:30 цаг

Дуусах: 2020 оны 05 дугаар сарын 19-ны өдрийн 17:30 цаг

ТӨСӨЛ ХҮЛЭЭН АВАХ ХЭЛБЭР, БАЙРШИЛ

Улаанбаатар хотод:

• Төслийн материалыг цахим хэлбэрээр https://zeel.smefund.gov.mn/loan хаягаар хүлээн авна.

Хөдөө, орон нутагт:

• Тухайн аймгийн Хүнс, хөдөө аж ахуйн газрын байранд төслийн материалыг битүүмжлэн цаасан хэлбэрээр хүлээн авна. /Аж ахуйн нэгжийн нэр, регистрийн дугаар, хүссэн зээлийн дүн, утасны дугаарыг дугтуйны гадна талд бичсэн байх/

Дэлгэрэнгүй мэдээллийг:

• Веб сайт: www.smefund.gov.mn
• Фэйсбүүк пэйж хуудас: Жижиг дунд үйлдвэрийг хөгжүүлэх сан /SME Fund
  Утас: 77485555-1, 99897557
• Аймгуудын “Хүнс, хөдөө аж ахуйн газар”- аас лавлана уу.

ХҮНС, ХӨДӨӨ АЖ АХУЙ, ХӨНГӨН ҮЙЛДВЭРИЙН ЯАМ

ЖИЖИГ, ДУНД ҮЙЛДВЭРИЙГ ХӨГЖҮҮЛЭХ САН

НӨАТ-ын буцаан олголтыг өмнө нь жилд нэг удаа авдаг байсан бол энэ жилээс улирал тутамд олгох шийдвэр гарч хэрэгжиж байна. 2020 оны нэгдүгээр улирлын НӨАТ-ын буцаан олголтын урамшуулал иргэдийн дансанд шилжиж эхэлжээ. Нэгдүгээр улирлын буцаан олголтын урамшууллыг 870,143 иргэнд 35.6 тэрбум төгрөг олгох аж.

НӨАТ-ын урамшууллын сугалааны тохирол журмын дагуу өчигдөр явагдаж, гурван сая төгрөгийн 23, нэг сая төгрөгийн 268, 100 мянган төгрөгийн 2391, 30 мянган төгрөгийн 23742 баримт тохиролд таарч азтан болжээ. Харин супер азтан энэ удаагийн тохирлоор тодорсонгүй.