Category: шинжлэх-ухаан-технологи

Японы баруун хэсэгт байрлах Киотогийн их сургууль болон барилгын “Kajima” корпорац хамтран ирээдүйд Ангараг гараг болон Саран дээр хүн амьдрахад тохиромжтой байгууламж барихаар төлөвлөж байна гэж “NHK” телевиз мэдээлэв.

Тус телевизээр мэдээлснээр, судлаачдын гол зорьж байгаа зүйл бол хүмүүс урт хугацаагаар амьдрахад зайлшгүй шаардлагатай нөхцөл болох дэлхийн таталцлын хүчний хувилбарыг барилгын дотор бий болгох аж. Энэ асуудлын шийдэхийн тулд сууцыг тэнхлэгээ тойрон эргэдэг болгохыг санал болгож байгаа бөгөөд энэ нь ийм замаар үүссэн төвөөс зугтах хүчний ачаар таталцлыг бий болгох гэнэ.

Байгууламжийн өндөр нь 200-400 м, диаметр нь 200 м-ийн хооронд байж магадгүй байна. Үүний зэрэгцээ, байгууламжийг барихдаа зөвхөн дэлхийгээс нийлүүлсэн материалыг ашиглахаас гадна, Ангараг, Сарны гадаргуугийн нөөцийг ашиглахаар төлөвлөж байгаа ажээ.

“Одоогоор эдгээр төлөвлөгөө хэрэгжих шатандаа ороогүй байгаа боловч Япон улс ололт амжилтаа эрт харуулж, улмаар ирээдүйд давуу талыг бий болгох нь маш чухал юм. Тиймээс бид энэ чиглэлээр үргэлжлүүлэн судалгаа хийхээр төлөвлөж байна” гэж Киотогийн их сургуулийн төлөөлөгч Йосүкэ Ямашита сэтгүүлчдэд ярьжээ.

Буд, Сугар, Ангараг, Бархасбадь, Санчир, Дэлхийван, Далайван гаригийн жагсаал гэх үзэгдэл харагдах хамгийн тохиромжтой өдөр нь 2022 оны зургадугаар сарын 24-ний нар мандахаас 1 цагийн өмнө тохиох юм байна.

UFO (Unidentified Flying Object) буюу үл мэдэгдэх нисдэг биетүүдийг ангуучлах үйл хэрэгт албан ёсоор нэгдэж байгаагаа АНУ-ын сансар судлалын байгууллага NASA өчигдөр зарлажээ.

Тус байгууллага UFO-г судлах шинэ төсөлдөө эрдэмтэн судлаачдыг ажилд авах зарыг өчигдөр нийтэлсэн байна.

Төсөл нь энэ оны намар эхлэх ба есөн сарын хугацаанд хэрэгжих гэнэ. Үр дүнгээс нь хамаараад дараагийн ажлаа төлөвлөх юм.

UFO-гийн талаар олдсон баримтуудыг цуглуулах, нэгтгэх, шинжлэх, цаашдаа ийм мэдээллийн санг хэрхэн баяжуулах аргыг тодорхойлох зэрэг ажлуудыг энэ хугацаанд гүйцэтгэх юм байна.

“Олон арван жилийн турш NASA хамгийн ээдрээтэй нууцуудыг тайлах ажилд оролцож байсан түүхтэй. Энэ удаа ч ялгаагүй оролцох гэж байна” гэж уг төслийг хариуцаж буй судлаач Даниэл Эванс сэтгүүлчдэд ярьжээ.

Нарны системийн гараг эрхсүүдийг судалж, харь гараг дээр амьдралын ул мөрийг хайдаг NASA анх удаа эх дэлхий дээрээ ажиглагддаг нууцлаг үзэгдлийг судлах гэж байгаа нь энэ юм.

Олон жилийн турш UFO хүмүүсийн анхаарлыг төвд байсан ч сүүлийн жилүүдэд эрх баригчид үүнд илүү нухацтай ханддаг болоод байгаа.

Өнгөрсөн сард АНУ-ын конгресс анх удаа UFO-гийн талаар сонсгол зохион байгуулж, тагнуулын албадынхаа цуглуулсан баримт материалуудтай танилцсан. UFO тэнгэр ажиглагдсан нийт 144 тохиолдлын талаар энэ үеэр хууль тогтоогчдод мэдээлсэн юм.

Эдгээрийн цаана харь гарагийнхан байх боломжийг үгүйсгэхгүй байгаа.

NASA-гийн төсөл Пентагоны одоо хэрэгжүүлж буй “Airborne Object Identification and Management Synchronisation Group” багийн төслөөс тусдаа юм байна.

Эх сурвалж: AFP

Антарктидад орсон шинэ цаснаас бичил хуванцар анх удаагаа илэрчээ. Шинэ Зеландын “Canterbury” их сургуулийн судлаачид Антарктидын 19 байршлаас сорьц цуглуулан шинжлэхэд ийм үр дүн гарсан байна.

Бичил хуванцар нь хуванцар эдлэлээс ялгардаг бөгөөд цагаан будааны үрээс жижигхэн, зарим нь нүдэнд ч үзэгдэхээргүй бичил хэмжээтэй байдаг.

Судлаачид хайлуулсан цасны литр тутамд дунджаар 29 хуванцар байгааг тогтоожээ. Түүнээс 13 төрлийн хуванцар илрүүлснээс ус, ундааны сав, хувцсанд түгээмэл хэрэглэдэг полиэтилен терефталат (PET) хамгийн их байжээ. Тодруулбал, сорьцуудын 79 хувиас нь илэрсэн байна.

Бичил хуванцар хаанаас гарав?

“Cryosphere” олон улсын шинжлэх ухааны сэтгүүлд судлаач Алекс Авесийн ярьснаар, бичил хуванцрын гол эх үүсвэр нь шинжлэх ухааны судалгааны станцууд байх магадлал өндөр байна. Гэхдээ загварчлалаас үзэхэд гарал үүсэл нь 6000 км хүртэлх хол зайд байж болох нь харагджээ.

Өмнөх судалгаануудаар Антарктидын далайн мөс, гадаргын уснаас бичил хуванцар илрүүлж байсан боловч шинэ цаснаас илэрсэн анхны тохиолдол нь энэ юм.

Өнгөрсөн онд “Proceedings of the National Academy of Sciences” сэтгүүлд нийтлэгдсэн томоохон судалгаагаар бичил хуванцрууд тоос шороо, салхи, далайн урсгалаар хаа сайгүй тарж байгааг тогтоосон билээ.

Тухайлбал, 2020 онд судлаачид Эверест уулын оргил орчмоос, мөн далайн гүнээс хүртэл бичил хуванцар илрүүлсэн юм.

Судлаачид яагаад санаа зовниж байна вэ?

Энэ төрлийн бохирдол нь өргөн хүрээг хамарсан нөлөө үзүүлэх эрсдэлтэй. “Canterbury” их сургуулийн дэд профессор Лора Ревеллийн тайлбарласнаар, бичил хуванцрын гадаргууд хүнд металл, замаг зэрэг хор хөнөөлтэй бодис наалдах боломжтой бөгөөд улмаар түүнийг алс хол хийгээд эмзэг бүсэд хүргэх эрсдэлтэй байна.

Судлаачид мөн хүмүүс агаар, ус, хоол хүнсээрээ дамжуулан бичил хуванцраар амьсгалж, залгиж байгааг тогтоогоод байгаа юм. Одоогоор хүний эрүүл мэндэд үзүүлэх нөлөөнийх нь талаар олон судалгаа хийгдээгүй байгаа ч өнгөрсөн онд Английн “Hull York” анагаах ухааны сургууль, “Hull” их сургуулийн нэгэн судалгаагаар бичил хуванцрыг их хэмжээгээр залгих нь эсийг үхүүлэх, харшлын хариу урвал үзүүлэх зэрэг сөрөг үр дагавар учруулж болзошгүй болохыг тогтоожээ.

Бичил хуванцар нь мөн дэлхийн дулаарлын нөлөөг ихэсгэж байж магадгүй байна. Дэлхий даяар цас мөсөн бүрхүүл, мөсөн голууд хэдийнээ хурдан хайлах болоод байгаа бөгөөд эдгээр газарт хуримтлагдсан бараан өнгийн бичил хуванцрууд нарны гэрлийг шингээж, халалтыг ихэсгэснээр нөхцөл байдлыг улам дордуулдаг байж гэж судлаачид үзэж байна.

ЭХ СУРВАЛЖ: Montsame