Ийм нэг бичлэгийг цахим ертөнцөөр олон хүн үзсээр байна. Өөр өөр орны 7-8 настай хөвгүүдэд Мартина гэх охиныг танилцуулна. Хөвгүүд Мартинагийн нүд, гар, үс нь гоё байна гэж өөрсдийнхөө бодлыг хэлж үс, биенд нь гараа хүргэж, хацрыг нь илээд зарим нь “Мартинагийн найз хөвгүүн болмоор байна” гээд ичингүйрнэ. Яг энэ агшинд бичлэгийг хийж буй хүн хөвгүүдэд хандан “Одоо Мартинаг алгад, чанга алгад” гэв. Хөвгүүд нүд нь орой дээрээ гартлаа гайхаж түрүүхэн инээмсэглэн ичингүйрч байсан харц нь хормын төдийд айдсаар солигдож “Яаж тэгж болох юм. Охидыг зодож болохгүй”, “Тэр хөөрхөн учраас би гар хүрч чадахгүй, тэглээ ч тэр чинь охин шүү дээ”, “Би хүчирхийлэлд дургүй”, “Цохих чинь муу шүү дээ. Яагаад гэж үү, би чинь эр хүн шүү дээ” гэсэн хариултыг эрсхэн хэлж байв. Тэдэн дундаас найман настай хүүгийн “Охидыг цохиж болохгүй, цэцгийн баглаагаар ч тэр…” гэсэн нь олон зүйлийг бодогдуулна.
Үүн шиг үнэн үг байхгүй. Энд тэнд муухай гэмт хэрэг мэр сэр гараад байгаагаас монгол аав, эрчүүлийг бүхэлдээ тийм болчихсон мэтээр хүлээж авах хүмүүс олширч байна. Гэтэл бодит амьдрал дээр өөр байдаг. Аавууд “Энэ турьхан амьтны чинь хаана нь гар хүрэх юм бэ. Ширүүхэн харах төдийд л усан нүдэлж бүлтэгнээд өрөвдөлтэй байдаг юм” гэж үглээд л өнгөрдөг шүү дээ. Найман настай хүүгийн хэлсэн “Бүсгүй хүнийг цэцгийн баглаагаар ч зоддоггүй юм” гэх үг бол энэ дэлхийн бүх эрчүүлийн хэлэх үг гэж итгэнэм.
Д.ГАНСАРУУЛ