Монголын Үндэсний Бөхийн Холбооноос албан ёсны хамгаалалтын алба хөлслөн өөрийн өмчөө бусдын хууль бус эзэмшлээс шаардах, албадан чөлөөлөхөөс өөр аргагүйд хүрсэн тул өнөөдөр албадан чөлөөлүүлнэ гэж мэдэгдсэн билээ. Энэ үйл явдал өрнөсний дараа Бөхийн өргөөний хаалгыг эвдэн орлоо. Танихгүй этгээд Бөхийн өргөөний гадна хаалгыг чулуугаар цохиж онгойлгов. Дотор хаалгыг өшигчин эвдэх гэж оролдсоор чадалгүй буцав. Сэтгүүлчдийг ҮБХ-нд хурал болж байгаа хэмээн дуудсан боловч ийнхүү хаалга эвдэх ажиллагаа болсон юм. Гадаа үүдэнд байсан ҮБХ-ны Ерөнхий нарийн бичгийн дарга Б.Цогтбаатараас Бөхийн өргөөнд хүн байгаа эсэхийг тодруулахад “Байхгүй” хэмээв. Хагархай цонхны завсраар дотор байсан ажилтнаас тодруулахад “Энд хүн байхгүй. Манай ажилчид амралтаа аваад явчихсан. Хүнгүй байгаа. Аварга А.Сүхбат яриа өгч зогсож байснаа гэнэт хаалга үүд эвүүлээд байна. Сангийн жижүүр бид хоёроос өөр хүн алга. Лацдаад хамгаалалтад авсан тэр хэвээрээ байна. А.Сүхбат аваргын даалгавараар шууд хаалга эвдээд ороод ирлээ. Цаана чинь зогсож байсан. Ямар ч хурал зөвөлгөөн болоогүй” гэсэн юм. Б.Бат-Эрдэнэ, Г.Өсөхбаяр тэргүүтэй бөхчүүд нэг талд “манайх” гээд, нөгөө талаас Х.Баянмөнх, А.Сүхбат аваргууд “манайх” гээд байдаг. Энэ асуудлын эцсийн шийдийг олохоор МҮОНРТ бөхчүүдийн дунд хэлэлцүүлэг зохиож урихаар болов. Хоёр тал хэлэлцүүлэгт ирэх байх хэмээн ихээхэн найдаж байна. Бөхийн өргөөний хамгаалалтын албаны дарга цагдаа дуудан авчирч мэдүүлэг өгөхдөө “А.Сүхбат аварга ирээд хүнээр цонх хагалуулан, хаалга эвдүүллээ. Буцаад хамгаалалтад авах боломж бий юу” гэв. Энэ талаар ҮБХ-ны Ерөнхий нарийн бичгийн дарга Б.Цогтбаатар “Хууль бус тамга тэмдэг авчихаад бид эзэн нь гээд дайраад байх юм. Улсын бүртгэлийн газраас гэрчилгээ давхардуулж олгосон. Уг нь бол манай тамга тэмдэг хүчинтэй. Бөхчүүд бол талцсан асуудал байхгүй. Х.Баянмөнх тэргүүтэй хэдхэн хүн байна. А.Сүхбат аварга хаалга эвдүүлчээд, одоо орж суух юмуу яах юм. Зүгээр байгаа юмыг эвдээд. Эв зүйгээр ярилцахгүй. Наадам болох гэж байхад. Энэ жил барилдаан цөөхөн болсон. Тиймээс бөхчүүд эрт галдаа гарч бэлтгэлээ хийж эхлэсэн” гэв. Бөхийн өргөөрүү орж үзэхэд бүх өрөө лацадсан, цоожтой байв. Ямар ч хурал зөвөлгөөн болоогүй байна.
