Яргуй идсэн бор гөрөөсний цус уух нь эрүүл мэндэд тустай хэмээн яг өдийд ан авд гарах нь бий. Гэтэл гөрөөсний цус ууснаар аюулт халдварт өвчинөөр өвдөх магадлал өндөр гэнэ. Тиймээс хууль бус ан хийж, өөрсдийн эрүүл мэндийг эрсдэлд оруулахгүй байхыг Дэлхийн байгаль хамгаалах сангийн Монгол дахь хөтөлбөрийн газрынхан анхааруулжээ.
Бор гөрөөсний цусанд аюулт халдварт өвчин үүсгэдэг babesia venatorum гэх нэг эст шимэгч амьдардаг байна. Энэ нь хачгаар дамжин гөрөөсний цусанд орж, халдварладаг нь тогтоогджээ. Манай эрдэмтэд япончуудтай хамтран судалгаа хийгээд Монгол оронд тархсан хачигнаас дээр дурдсан шимэгчийг илрүүлсэн байна. Гөрөөсний цус ууж, нэг эст уг шимэгчээр халдварласан тохиолдолд цус багадах эмгэг үүсдэг, мөн дэлүү, чөмгөнд бүрэлдэх улаан эсийн тоо буурдаг гэнэ.
Гөрөөсний экологи, эдийн засгийн үнэлгээ 230.000-400.000 төгрөг бөгөөд хууль бусаар агнавал үүнийг хоёр дахин нэмэгдүүлж төлдөг.
О.ӨНӨР