“Бүх нийтээр мод тарих өдөр” эдгээр өдрүүдэд үргэлжилж байна. Энэ өдөр бүх нийтээр байгаль эхээ дээдлэх үзлийг түгээн дэлгэрүүлж, мод тарих, ногоожуулах хөдөлгөөнийг олон нийтийн үйлс болгон өрнүүлдэг уламжлалтай.
Монгол Улсын Ерөнхийлөгч У.Хүрэлсүхийн санаачилгаар “Тэрбум мод” үнэсний хөдөлгөөнийг өрнүүлснээс хойш улсын хэмжээнд нийт 7.2 сая мод тарьж, ургуулаад зогсохгүй иргэдийн экологийн боловсрол сайжирч мод бут болгоныг тарихаас илүүтэй олон талаас нь судалж, тухайн орчиндоо зохицох ургамлыг шилж сонгон тарьдаг болсон.
“Тэрбум мод” үндэсний хөдөлгөөний хүрээнд энэ жилийн намрын мод тарилтыг өнгөрсөн амралтын өдрүүдээр Байгаль орчны сайд нарын төгөл байгуулах санаачилгаар эхлүүлж, өнөөдөр Богд уулын Баруун Залаатын аманд 80 мянган мод тарих арга хэмжээгээр үргэлжлүүлж байна. Богд уулын Баруун Залаатын аманд 2022 оны 9,10 дугаар сард 35 мянган мод, 2023 оны 3,5 дугаар сард 45 мянган мод нийт 80 мянган мод тарьж, ургуулах ажлыг шат дараатай хийхээр төлөвлөөд буй.
Амралтын өдрийн энэхүү мод тарих үйлсэд БОАЖЯамны нийт ажилтан, албан хаагч болон Монгол Улсын их сургууль, ШУТИС-ийн оюутан залуус нэгдэн 10 мянган мод тарьж, байгаль эх дэлхийнхээ ногоон хөгжилд гар бие оролцлоо. Түүнээс гадна Төрийн соёрхолт дуучин Д.Болд, түүний “B продакш”-ны залуу артистууд мод тарих санаачилгад нэгдсэн юм.
Намрын улиралд тарьсан мод хаврынхаас илүү сайн ургадаг гэдэг. Богд уулын Баруун Залаатын аманд мод тарих арга хэмжээнд хүрэлцэн ирсэн та бүхэнд талархал илэрхийлье.