Өмнөд Солонгост 2023 оноос эхлэн өөрчлөгдөх хууль, дүрэм журмыг танилцуулж байна.
- БНСУ-ын иргэд ирэх оноос нэг нас залуужина. Тодруулбал, арванхоёрдугаар сарын 8-нд батлагдсан шинэ хуулийн дагуу хий насыг тоолохгүй. 2023 оны зургадугаар сараас эхлэн бүх албан ёсны баримт бичигт “олон улсын нас” гэсэн стандартыг ашиглана. Өөрөөр хэлбэл, эхийн хэвлийд байсан хугацааг тооцохгүй, бусад улсын жишгээр төрснөөс хойших насыг тоолох юм.
- Онлайн төлбөр тооцоог арваннэгдүгээр сарын 30-аас эхлэн “Apple Pay”-ээр хийж болох болсон. Харин энэ сарын сүүлээр офлайн төлбөр хийх боломжтой болно. Энэ үйлчилгээг “Starbucks”, “Costco” зэрэг хэд хэдэн сүлжээ дэлгүүрт ашиглахаар “Hyundai Card”-тай гэрээлжээ.
- Өмнөд Солонгос бол технологийн өндөр хөгжилтэй орнуудын нэг. Тус улсад “Internet Explorer” вэб хөтөч олон жилийн турш тэргүүн байр эзэлж байжээ. Энэ оны есдүгээр сараас хэд хэдэн төрийн байгууллага, институци “Internet Explorer”-оос татгалзаж эхэлсэн бол 2023 оноос эхлэн улс даяар хэрэглээнээс бүр мөсөн халж байна.
- Бүтээгдэхүүний хэрэглэх хугацааны шошгоны системийг өөрчлөнө. Тодруулбал, өнөөг хүртэл тус улсад “sell-by date” шошгыг ашигладаг байсан нь “use-by date” болж өөрчлөгдөж байна. Энэ нь Европын холбоо зэрэг олон улсын стандартын дагуу тухайн бүтээгдэхүүн дээр борлуулж дуусах огноог биш хэрэглэж дуусах огноог бичнэ гэсэн үг.
- Мотоциклыг “Хариуцлагын даатгал”-д заавал хамруулах ёстой болов. 2017 онд л гэхэд тус улсад 2.166 сая мотоцикл бүртгэгдсэн байснаас ердөө таван хувь нь даатгалд хамрагдсан байсан.
- БНСУ-ын жолооны үнэмлэх 1, 2 гэсэн зэрэглэлтэй байдаг. Тэгвэл ирэх оноос хоёрдугаар ангиллын үнэмлэхтэй жолооч 7 жил осол гаргаагүй бол нэгдүгээр ангиллаар үнэмлэхээ шинэчлэх боломжтой болно.
- “Байнгын аяллын тасалбар”-ыг 2023 оноос нэвтрүүлнэ. Ингэснээр автобус болон метро дамжин зорчиход 38 хүртэлх хувийн хөнгөлөлт эдлэх боломжтой болно.
Зарим төсвийн өөрчлөлт:
- Цагийн хөдөлмөрийн хөлсний доод хэмжээ 9620 вон буюу таван хувиар нэмэгдэнэ. Үүнийг сарын цалинд хөрвүүлбэл 2.02 сая вон болно. Энэ тушаал зургадугаар сард гарсан ба ирэх сарын 1-нээс эхлэн хэрэгжих юм.
- 65 ба түүнээс дээш насны ахмадуудад олгодог суурь тэтгэвэр 321950 вон болж нэмэгдэнэ. Өмнө нь 307500 вон байсан.
- Сөүл хотын захиргаа подвол, дээврийн өрөө зэрэгт амьдардаг эмзэг бүлгийнхэн, хөгжлийн бэрхшээлтэй иргэд, бие дааж амьдрахаар бэлтгэж буй залуучуудад 400 мянган вонын дэмжлэг үзүүлэх болжээ.
- Улсын түрээсийн байраас нүүвэл хувийн түрээсийн байр руу нүүвэл 50 сая воноор дэмжинэ.
Эх сурвалж: NEWS SARANGBANG