Умард Солонгосын удирдагч Ким Жөн Уны урилгаар БНХАУ-ын дарга Си Жиньпин ирэх сард Пхеньянд айлчилна гэж Сингапурын “Straits Times” сонин мэдээллээ.
Умард Солонгосыг үүсгэн байгуулсны 70 жилийн ойг тэмдэглэх арга хэмжээ ирэх сард болох бөгөөд үүнд оролцох урилгыг БНХАУ-ын төрийн тэргүүнд Ким Жөн Ун илгээжээ.
Си Жиньпин 2012 онд БНХАУ-ын даргаар сонгогдсоноос хойш анх удаа улсынхаа төрийн тэргүүний хувиар Умард Солонгост айлчлах гэж байгаа нь энэ юм.
Си Жиньпин Умард Солонгост айлчилна гэсэн мэдээллийг хаанаас авснаа “Straits Times” сонин мэдээлэлдээ дурдаагүй бөгөөд БНХАУ-ын Гадаад хэргийн яам ч мөн адил энэ талаар хараахан тайлбар өгөөгүй байна.