УИХ-ын 2020 оны ээлжит сонгуульд бие даан нэр дэвшигчид өнөөдрөөс тойргийнхоо сонгогч, дэмжигчдээс гарын үсэг цугуулж эхэллээ. Өнөө жил бие даан нэр дэвшихээр 208 хүн Үндэсний аудитын газар мөрийн хөтөлбөрөө хүргүүлсэн нь урд өмнө байгаагүй үнэмлэхгүй их тоо байв. Харин өнөөдрийн байдлаар тэдгээр 208 хүний нэлээд хэсэг нь намаасаа нэр дэвшихээр болсон байна.
Бие даан нэр дэвшигчдийн дотор олны танил хүмүүс цөөнгүй байгаагийн нэр нь УИХ-ын гишүүн асан Н.Номтойбаяр. Тэрбээр энэ жил Хан-Уул дүүргээс нэр дэвшихээ зарлаад байгаа бөгөөд тойргийнхоо дэмжигч сонгогчдоосоо гарын үсэг цуглуулах аяныг эхлүүлснээ өөрийн цахим хуудсандаа бичжээ.
“Эрч хүч илэрхийлсэн морин цагийн мэнд ээ! Өнөөдөр УИХ-ын сонгуульд ХАН-УУЛ дүүргээс бие даан нэр дэвшигч Нямтайширын Номтойбаяр миний бие хуульд зааснаар дэмжигч сонгогчдын гарын үсэг цуглуулах аяныг эхлүүллээ. Хүүгээ дэмжиж ХАН-УУЛ дүүргийн 11-р хорооны сонгогч, ээж маань эхний дэмжигч болж гарын үсгээ зурлаа. Монгол төр болон эрхэм ээждээ хүндэтгэл үзүүлж монгол цэргийн хувцсаа өмслөө. Хүмүүн бид эхийнхээ ач тусын талаарх сэтгэгдэл, мэдрэмжийг илэрхийлэх үг, шүлэг, дуу, ном зохиол ихээр бичдэг. Тэгсэн хэдий ч бидний хэрэглээний эрхэм дээд тансаг үгс сэтгэл, дотоод мэдрэмжээ илэрхийлэхэд хангалтгүй, дутаад байгаа мэт санагддаг” гэж анхы постоо оруулсны дараа түүнийг дэмжинэ гэдгээ олон хүн илэрхийлжээ. Өнөөдөр Н.Номтойбаяр үндэсний үйлдвэрлэгч “Евровүүд”, болон“Ариун” брэндийн үйлдвэрээр орж өөрийг нь дэмжих хүмүүсийн гарын үсгийг авсан тухайгаа мөн мэдээлжээ.
Сонгуулийн тухай хуулинд зааснаар “Бие даагчид нийт 801-ээс дээш дэмжсэн хүний гарын үсэг цуглуулах ёстой” бөгөөд дэмжигчдийнхээ гарын үсгийг өгсөн дарааллаараа нэрс нь эрэмбэлэгдэх юм байна.
Мөн дуучин Нара, Тордойн Ганболд зэрэг олны танил хүмүүс дэмжигчдийнхээ гарын үсгийг хэрхэн цугуулж байгаа талаараа өөрийн цахим хуудсаараа мэдээлсээр байна.
