Дунд сургуулийн нэгэн сурагч мэдээлэл зүйн танхимд сууж байсан ангийнхаа охин болон багшийг хутгаар гэмтээсэн хэрэг гарчээ. Энэ хэрэг ОХУ-ын Бүгд найрамдах Башкир улсын Стерлитамак хотын 1 дүгээр дунд сургуульд болсон байна. Гэмт этгээд багш болон сурагч руу халдсаны дараа танхимд шатамхай бодис асган, гал тавьжээ. Дараа нь тэрбээр амиа хорлох гэж оролдсон байна.
Бэртэл гэмтэл авсан 2 сурагч эмнэлэгт хүргэгдсэн бөгөөд 1 багш сэхээн амьдруулах тасагт хэвтэж байгаа аж.
Халдлага үйлдсэн этгээд нь тус сургуулийн 17 настай сурагч байсан бөгөөд тэрбээр нийгмийн сүлжээний “ВКонтакте” хуудастаа аллага, үзэн ядалтын талаархи зураг болон дүрс бичлэгүүдийг оруулдаг байжээ. Халдлага үйлдэхээсээ өмнө тэрбээр АНУ-ын “Колумбайн” хэмээх дунд сургуульд болсон халдлагын талаархи дүрс бичлэгийг “ВКонтакте” хуудастаа нийтэлсэн байна. ОХУ-ын мөрдөн байцаах газар халдлага үйлдсэн сурагчид эрүүгийн хэрэг үүсгэжээ.