БСШУСЯ, НИТХ, Нийслэлийн боловсролын газар хамтран “Монгол хүн бэлтгэхэд ЕБС-ийн үүрэг оролцоо” сургалт зөвлөгөөн өнөөдөр зохион байгууллаа.
Зөвлөгөөнд 3000 гаруй багш оролцож байна. Манай улс дэлхийд хүлээн зөвшөөрөгдөх “PISA” шалгалтад хэрхэн бэлтгэх, олон улсын боловсролын шинэ ойлголт, Даалгаврын шинэ соёл нэвтрүүлэх талаар ХБНГУ-ын Потсдамийн их сургуулийн доктор, профессорууд илтгэл тавилаа. Мөн “Монгол хүүхдийн бүтээлч сэтгэлгээг хөгжүүлэх боломж”-ийн талаар илтгэл тавьж, хэлэлцүүлэг хийв.
Энэ үеэр НИТХ-ын дарга С.Амарсайхан, “Хүний хөгжлийн асуудалд цоо шинэ байр сууринаас хандах болсонтой холбогдож сургалтын талаарх үзэл баримтлал, техник технологи, итгэл үнэмшил соёлын үнэт зүйлс ч ихээхэн өөрчлөгдөж байгаа. Хөгжлийн шинэ нөхцөл байдал нь сургууль, багш нарын хөгжлийн чиг хандлага,сурагчдын сурах хэв маягт ч зайлшгүй өөрчлөлт шаардаж байна. Тиймээс Нийслэлийн Засаг даргын 2016-2020 оны үйл ажиллдагааны хөтөлбөрт “Хүн болох багаасаа” цогц хөтөлбөрийг тусгаж, олон ажлыг хэрэгжүүлж эхлээд байна” гэлээ.
Манай улс УИХ-аар батлагдсан 2024 он хүртэлх Төрөөс боловсролын талаар баримтлах бодлогын хүрээнд цөм хөтөлбөрөө батлуулж олон улсад магадлан итгэмжлүүлэх юм. Үүний дараа 2021 онд “PISA” буюу эдийн засаг хамтын ажиллагааны хөгжлийн байгууллагаас зохион байгуулдаг Олон улсын боловсролын чанарыг зэрэгжүүлэх шалгалтад орохоор болжээ. Энэ ажлын хүрээнд НИТХ-ын урилгаар ХБНГУ-ын Потсдамын их сургуулийн доктор, профессор Бернд Меиер хүрэлцэн ирсэн юм. Тэрээр өнөөдрийн зөвлөгөөнд “PISA-гийн дараах ОУ-ын боловсролын шинэ ойлголт сэдвээр илтгэл тавилаа.
“PISA” -д хамрагдснаар тухайн улсын боловсролын стандарт олон улсын стандарттай дүйж байгаа эсэхийг тодорхойлохоос гадна хамгийн сайн боловсрол эзэмшүүлж буй орнуудын боловсролын онцлог, сурагчдын сурах чадварыг харьцуулах боломжийг олгодог байна.