Автобусанд 75 настай ахмад настан ач зээ шигээ охинтой “Суудал тавьж өгсөнгүй” гэдэг шалтгаанаар хэрэлдэж, хэл амаар доромжилж буй бичлэг сошиалаар тарсан. Хүмүүсийн хувьд ахмад настанд суудал тавьж өгөөгүй охиныг буруутгахаасаа илүүтэй, зүй бус үгээр хүнийг хэл амаар доромжилсон ахмад настныг илүүтэй буруутай гэж үзэж байна. Харин энэ талаар Сэтгэл судлалын үндэсний төвийн гүйцэтгэх захирал, сэтгэл судлаач Б.Ууганцэцэг дараах тайлбарыг хийлээ. “Энэ бол “Алдагдсан үеийнхэн” ба автобусны суудалтай холбоотой асуудал. Манайхан ахмадуудтайгаа хэрэлдэж уралдахаа түр азная. Одооны 50-60 настангууд маань ид сайхан залуу үе нь 1990 оноос эхэлсэн бөгөөд залуу насаа ч мэдрэх сөхөөгүй өнгөрсөн алдагдсан үеийнхэн. Юуг хийх, хэрхэн хийх, ер нь цаашид яах тал дээр байнга тулгамдаж, сэтгэлзүйн асар их хямралтай үеийг даван туулж ирсэн байх гэж би боддог. Үүнийг ойлгож ядаад байх зүйлгүй. Эргэн тойрны энэ насныхныг хараарай. Таны ээж, аав, хамаатан садан, бүр тантай зөрөн өнгөрч буй энэ насныхан. Тиймээс энэ насныхныг хайрла. Тэд бусдаар хүндлүүлэх хэрэгцээгээ хангаж чадаагүй байх, тэд өөрийгөө ойлгуулахдаа ойлгомжгүй байгаа байх, тэд өөрийгөө ямар үлгэр дуурайлал үзүүлдгээ ойлгоогүй байх,
тэд залуу насаа хэцүү цагт гээж алдаж орхижээ. Тиймээс заавал ахмад настангуудтайгаа бүү барьцаач ээ. Юм өөр болж, залуус ухаантай болсон гэх хандлага, үйлдлээ үзүүлээч ээ гэж хүсмээр байна” гэлээ.