Өнөөгийн нийгэмд инфлүүнсер хүмүүс нийгэм болоод хүүхэд, залуу үед ямар нөлөөлөл үзүүлж буй тухай Олон улсын Franklincovey Mongolia LLC боловсролын байгууллагын гүйцэтгэх захирал Сэтгэлзүйч, Манлайлал, хандлага, харилцааны трэйнер, бизнес коуч Б.Солонгоотой ярилцлаа.
-Инфлүүнсер гэж хэнийг хэлэх вэ. Олон улсын ойлголттой бидний ойлголт ижил байна уу?
-Инфлүүнсер гэдэг бол нийгэм, олон нийтэд маш товч тодорхой, цэгцтэй, оюунлагаар мэдээлэл болон нийгэмд болж байгаа, болохгүй байгаа асуудлуудыг цахим орчинд илэрхийлдэг, тодорхойлдог, хуваалцдаг хүмүүсийг хэлнэ. Influencer буюу Нөлөөлөгч хүн гэж хэлж болно. Олон улсын хэмжээнд бол яг Influencer-ын тодорхойлолт бол зөв системээрээ, оюунлаг мэдлэг мэдээллээ нийгэмд зөв зүйтэйгээр түгээх, өөрийгөө илэрхийлэх юм. Монголд яг энэ хэм хэмжээ нь байна, оюунлаг Influencer-үүд ч байна. Төдий хэмжээндээ Influencer хүмүүс мэдлэг мэдээллээ хуваалцаж байна. Гэхдээ яг одоо манай Монголын нөхцөлд инфлүүнсер гэдэг маань ард иргэд юу сонсохыг хүсч байна, ард иргэдэд юу хэрэгтэй байна, ард иргэд өөрсдөө хэнийг дагаж байна гэдгээс шалтгаалан цаг үеэ дагаад өөр өөрөөр тодорхойлогдож байна. Хүссэн хүн бүр Influencer нэр зүүж байгаа нь анхаарах ёстой зүйл.
-Инфлүүнсер хүмүүс нийгэмд ямар үүрэг, хариуцлага хүлээдэг вэ?
-Мэдээллийг шүүх, тунгаах чадвар нийгэмд маш их учир дутагдалтай байна. Нийгмийн учир дутагдалаа дагаад олон нийтийн үг хэлэх эрх хязгаарлагдаж байна. Нийтийн зориг мохож байгаа учраас, аливаа асуудлуудыг айдасгүйгээр, хошин наргианаар шүүлтүүргүйгээр хуваалцаж, дамжуулж байгаа. Нийгэм болон олон нийтийн өмнө бусдын оюун санаа, эрүүл мэнд, эрх ашиг, нэр хүндэд халдсан, эрсдэл дагуулсан буюу сөргөөр нөлөөлсөн аливаа зүйлийг хийж болохгүй.
-Инфлүүнсер хүн зөвхөн цахим орчноор дамжуулж нөлөөлөл үзүүлэх ёстой юу?
-Заавал олон нийтийн орчинд нөлөөлөх хүрээлэл тодорхойлогдохгүй. Ажлын байрны хүрээлэл, албан харилцаа гэх мэт. Мөн гэр бүлийн хүрээнд зөв нөлөөлөл, зөв үлгэрлэл, сайн сайхныг түгээдэг бол мөн инфльюнсер юм. Инфлүүнсер хүн бүх хүнд танигдах албагүй юм.
-Өөрсдийн цахим хаягаар дамжуулж бараа бүтээгдэхүүн сурталчлах нь ёс зүйтэй үйлдэл үү?
-Нийгэмд өгөөж өндөр, цаг хугацаа, санхүүгийн хувьд олон нийтийн хэрэгцээ, амьдралд нийцэхүйц бол байх боломжтой, гол нь нийгмийн болон өөрийн эрх ашиг хоёр нь тэнцвэртэй байх нь маш чухал.
-Инфлүүнсер хүмүүс хүүхэд, залуу үеийнхэнд ямар нөлөөлөл үзүүлж байна вэ?
-Мэдээж сайн талаас ч, сөрөг талаас ч нөлөөлөл үзүүлж байна, гэвч сөрөг нь илүү хүчтэй үр дагавар дагуулж байгаа нь цахим орчинд илэрч байна. Салбар бүрийн удирдах түвшний нөлөөлөх хүн бүр л хүрээлэл бүрдээ зөв цэгцтэй мэдээлэл олгох, түгээх, үлгэрлэх оролдлогуудыг илүү их хүчтэй, идэвхтэй зохион байгуулах нь сөрөг үр дагавруудыг давамгайлах боломж олгож байна. Гэр бүлийн орчин л бүх үед зөвөөр нөлөөлдөг, гэр бүл бол маш том нөлөөтэй инфлүүнсерүүд юм. Хүн бүр л өөрийгөө соёлжуулж, мэдлэгжүүлж, зөв мэдээлэл олж авч сурах маш чухал. Ялангуяа өсвөр үеийн хүүхэд, залуучууд руу хандсан зөв нөлөөлөл хэрэгтэй. Оновчтой зөв мэдээлэл гэр бүл бүрд түгээгдэх хэрэгтэй.
-Хэт их мэдээллийн орчин нь мэдлэггүй иргэдийг төрүүлж байна?
-Нөлөөлөгч хүмүүс үнэ цэнэтэй мэдээллийг иргэдэд өгч чадаж байгаа. Бүх юм хоёр талтай байдаг. Influencer хүмүүс мэдлэг мэдээлэл өгч байна, мэдлэггүй хүмүүсийг мөн мэдлэгжүүлж байна.
Н.НАРВАНЧИН