УИХ-ын Эдийн засгийн байнгын хороогоор Монголбанкны 2012-2016 онд явуулсан үйл ажиллагаанд хийсэн шалгалтын дүнг хэлэлцэв.
Энэ үеэр Б.Пүрэвдорж гишүүн ийнхүү хэллээ. “Ардын нам Хөгжлийн банкаар асар их улстөржсөн. АН л будилуулаад хаячихлаа гэсэн чинь шалгалтын эцсийн дүнг харахад Хөгжлийн банкны 16 хөтөлбөрийн ихэнхийг Ардын намынхан авчихсан байсан шүү дээ. Та нар тэгээд гурав нольдуулаа биз дээ. Та нар өнөөдөр Ерөнхийлөгчийн сонгуулийг угтаад “Үнэ тогтворжуулах хөтөлбөр”-ийг улстөржүүлж байна. Би дөнгөж сая энэ жагсаалтыг харахад миний мэдэх зөндөө олон улстөрчдийн хамаатан садны компани байна. 57 тэрбум төгрөг танай хамгийн том компани чинь авчихсан байна шүү дээ. Нууц учраас би нэрийг нь хэлэхгүй. Гэхдээ авчихсан байна. Ардын намын гишүүд баланд дурласан зөгий шиг, баасанд дурласан батгана шиг юм. Хямд эх үүсвэртэй зээл гэхээр дандаа Ардын намын гишүүд, дарга, сайд нар нь очоод холбогдчихсон байх юм. Энэ мэдээллийг тараахгүй гэж байна. Яагаад тараахгүй гэхээр энд байгаа компаниуд миний харсанаар нэлээд олонхи нь танай намын компаниуд байна шүү дээ. Гишүүдийн, ах дүү нарын чинь компаниуд байна шүү дээ. Үүнийгээ олон нийтэд зарлаж, нууцаас гаргах хэрэгтэй. Монгол банк хамтарсан удирдлагатай байсан. 2012-2016 онд хамтарч засаг барьсан. Монгол банкны дэд ерөнхийлөгчөөр бараг дөрвөн жил одоогийн УИХ-ын гишүүн ажилласан. “Үнэ тогтворжуулах хөтөлбөр”-ийг улстөржүүлээд амжилт олно гэвэл эндүүрэл. Хариуцлагаа хамтдаа хүлээнэ, ярина” гэлээ.