Итали улсын Сицилл хотод арванхоёрдугаар сарын 4-8-нд “Этна-2015” хоёр дахь удаагийн олон улсын нээлттэй тэмцээн боллоо.
Тэмцээнд 11 орны 100 гаруй шатарчид өрсөлдлөө. Монгол Улсаа төдийгүй Ази тивээ төлөөлөн үндэсний шигшээ баг, “Шунхлай” группийн тамирчин их мастер Б.Гүндаваа оролцлоо.
Тэрбээр тэмцээний “А” ангилалд амжилттай оролцон 7 өргөөс гурав хожиж дөрөв тэнцэн III байр эзэллээ.
Дөрвөн их мастер тэмцээнд урилгаар оролцсоноос Украйны их мастер ЗХУ-ын дэд аварга, Дэлхийн шатрын олимпиадын 2 мөнгө, 2 хүрэл медаль, Европын багийн аваргын 6 удаагийн алт, 1 мөнгөн медальт нэрт шатарчин Олег Романишин оролцсон нь тэмцээнийг чимлээ. Мөн Унгарын шилдэг их мастер 2607 чансаатай Петер Прохазка, Голландын шилдэг их мастер 2542 чансаатай Ян Верле нарын шилдгүүд оролцлоо.
Ази тивээ төлөөлж амжилттай оролцсон Б.Гүндавааг чансаагаа нэг оноогоор ахиулсан байна.