Аюултай хог хаягдлыг хадгалах, саармагжуулах агуулахын барилгын гүйцэтгэл, ажлын явцтай танилцлаа. Байгаль орчин, аялал жуулчлалын яам, Орчны бохирдлыг бууруулах үндэсний хорооноос аймаг, нийслэлийн зургаан байрлалд аюултай хог хаягдал хадгалах, саармагжуулах агуулах барих ажлыг эхлүүлээд байна. Үүний нэг нь Улаанбаатар хотын Баянзүрх дүүргийн Цагаан давааны хогийн цэгийг түшиглэн барьж байгаа нэг давхар 315м2 талбай бүхий 3 өрөө зориулалтын байгууламж юм.
Эм, эмнэлэг болон төрөл бүрийн үйлдвэрлэлээс гарах аюултай хог хаягдлаас гадна бидний өдөр тутмын хэрэглээ, сургууль, эрдэм шинжилгээний лаборатори зэргээс гарч байгаа аюултай хог хаягдлыг ангилан тусгайлан хадгалах, саармагжуулах нь нийгмийн эрүүл мэндийг хамгаалах болоод байгаль орчны бохирдлыг бууруулахад чухал үүрэгтэй.
Иймээс энэ ажлыг цаашид үргэлжлүүлэн бүх аймаг, дүүрэгт стандартад нийцсэн хадгалах, саармагжуулах байгууламж барих боломжийг судалж, байгуулахаар төлөвлөж байна.