Балба улсад болсон газар хөдлөлтийн дараа тус улсад байсан гадны иргэд эх орноо зорьцгоосон юм. Үүнд Португалийн хоёр аялагч ч мөн багтсан байсан аж. Гэсэн ч нислэгээ хүлээн тус улсад хоёр хонох хугацаандаа газар хөдлөлтийн улмаас хохирсон иргэдийг хараад бодлоо өөрчилсөн байна. Ингээд 33 настай Петр, 35 настай Сантос нар Балбад үлдэж тэндэхийн иргэдэд туслах аяныг эхлүүлсэн байна. Тэд Ичангу тосгоны иргэдэд тусламж, хандив цуглуулж буяны ажил хийж эхэлжээ. Балба улсад аялахаар ирсэн явган аялагч хоёр залуугийн мэдээ цахим орчинд тарсан бөгөөд тэдэнд туслах тусламж нэмэгдсээр байгаа аж. Сантос өөрийн цахим хуудсандаа Португаличуудыг уриалж сайн үйлсийн аян өрнүүлсэн бөгөөд хандивын данс нээж цугласан мөнгөөр хоол хүнсний бүтээгдэхүүн худалдан авч иргэдэд тарааж өгчээ. Одоогийн байдлаар хоёр найз 10 мянга орчим хүнд туслаад байгаа гэнэ.