Засгийн газрын ээлжит хуралдаанаар автозамын төслүүдийг хянах ажлын хэсэг байгууллаа. Тодруулбал Засгийн газрын Хэрэг эрхлэх газрын дарга Ж.Мөнхбат автозамын салбарт төр, хувийн хэвшлийн түншлэл, концессын гэрээгээр хэрэгжүүлсэн болон хэрэгжиж байгаа төслүүдийн талаар Засгийн газрын гишүүдэд танилцуулав.
Засгийн газрын Хэрэг эрхлэх газрын дарга Ж.Мөнхбат:
Төрийн өмчийн концессын зүйлийн жагсаалтаар автозамын 30 төсөл баталсан. Уг жагсаалтад барих, шилжүүлэх төрлөөр хэрэгжих 27, барих, ашиглах, шилжүүлэх төрлөөр хэрэгжих гурван төсөл байна. Барих, шилжүүлэх төрлөөр хэрэгжих 27 төслөөс, улсын комисст хүлээлгэн өгсөн 2, гэрээ хүчин төгөлдөр болж барилгын ажил явж буй 7, гэрээ хүчин төгөлдөр болох хугацаа нь болоогүй 4, концессын гэрээ байгуулаагүй 2, тогтоол албажаагүй 2, барих-ашиглах-шилжүүлэх эрхтэй 3, ажил эхлээгүй 7 төсөл байна хэмээн танилцууллаа.
Автозамын салбарт төр, хувийн хэвшлийн түншлэл, концессын гэрээгээр хэрэгжүүлсэн болон хэрэгжиж байгаа төслүүдийн хэрэгжилтийн явцад дүн шинжилгээ хийх, төслүүд улсын хөгжлийн төлөвлөлттэй нийцсэн эсэх талаар дүгнэлт гаргах, эдийн засгийн хүндрэлтэй нөхцөл байдалтай уялдуулан цаашид авч хэрэгжүүлэх арга хэмжээний талаар санал боловсруулах үүрэг бүхий ажлын хэсгийг Зам, тээврийн хөгжлийн сайд Д.Ганбат холбогдох яам, газруудын төлөөллийг оролцуулан байгуулж, үр дүнг нь энэ оны дөрөвдүгээр улиралд багтаан танилцуулахаар боллоо.