Нийслэлийн Иргэдийн Төлөөлөгчдийн хурлын Тэргүүлэгчдийн хуралдаанаар “Авто худалдааны цогцолбор”-т мөрдөгдөх үнэ тарифыг хэлэлцэн баталлаа.
Тодруулбал, Авто худалдааны цогцолборт авто зогсоол түрээслэн авто машин худалдаалах иргэдийн нэг хоногийн түрээсийг 1000 төгрөг, цогцолборт автомашины зогсоол худалдан авсан өмчлөгчдөөс авах ашиглалт, үйлчилгээний төлбөрийг нэг хоногт 200 төгрөгөөр, худалдан авагч, үйлчлүүлэгчдийн авто машины зогсоолын тарифыг нэг цагийн 100 төгрөг байхаар батлажээ.
Хэдийгээр Авто худалдааны цогцолбор энэ сарын 3-нд ашиглалтад орсон ч одоогоор ганц машины худалдаачин нүүж очоогүй байна. Түүнээс гадна машины худалдаачид яаж ч байсан нүүхгүй гэх мэтээр байр сууриа илэрхийлж байгаа. Тэгвэл Авто худалдааны цогцолбор” ОНӨААТҮГ-ын маркетингийн менежер О.Цэлмэг шаардлага биелүүлж, нүүхгүй байгаа нөхдүүдийг торгохыг сануулжээ.
Тэрбээр “Шаардлага биелүүлээгүй иргэнийг хөдөлмөрийн хөлсний доод хэмжээтэй тэнцэх хэмжээний төгрөгөөр, эсхүл түүнийг 2-3 дахин нэмэгдүүлсэнтэй тэнцэх хэмжээний төгрөгөөр, Албан тушаалтныг хөдөлмөрийн хөлсний доод хэмжээг 2-4 дахин нэмэгдүүлсэнтэй тэнцэх хэмжээний төгрөгөөр торгох тухай Нийслэлийн мэргэжлийн хяналтын газраас тараасан шаардлагад нь тусгасан байгаа.
Тэгэхээр Нийслэлийн мэргэжлийн хяналтын газраас нүүгээгүй иргэдэд торгуулийн арга хэмжээ авна. Мөн Нийслэлийн өмчийн харилцааны газраас газраа зориулалтын бусаар ашиглаж байгаа захын эздийн газрыг нь хураах хүртэлх арга хэмжээг авах байх” хэмээн ярьсан байна.