Author: ДАВААДОРЖИЙН ОТГОНТУЯА

“Outlaw” хамтлагийн “Зүрхэн тэнгэрийн наран” 20 жилийн ойн тоглолт энэ сарын 20- нд Hit раrk-д болох юм. Энэхүү тоглолтын талаар мэдээлэл өглөө.

Хамтлагийн ахлагч Э.Ариун-Эрдэнэ “Outlaw” хамтлаг өнгөрсөн жилээс эхлэн 20 жилийн ойн тоглолтоо хийнэ гэдгээ цахим сүлжээгээр дамжуулан мэдэгдэж байсан. Бидний төрсөн өдөр энэ сарын 20-нд ХитПаркт болно.

Тоглолтод 20 орчин уран бүтээлч оролцоно. Хамтлагийн хувьд 35 уран бүтээлээ үзэгчдэдээ хүргэнэ. Энэ зүгээр нэг тоглолт биш харин  “Outlaw” хамтлаг 20 жилийн турш юу хийснээ сонсогчдодоо хүргэх чухал тоглолт. Хамтлагийн гишүүд зохион байгуулалтын багт ажиллаж байгаа. Бид 35 дуунаас 10 дууг нь амьд хөгжмийн хамтлагтай хамтарч дуулахаар бэлдсэн” гэв.

Хамтлагийн гишүүн Г.Чинзориг “Энэ тоглолтын хувьд “Outlaw” хамтлагийн ойн баяр учраас өөр түвшинд хийхийг хичээж байна. Бүгдээрээ ирээд үзээрэй. Тоглолт маань үзэгчдэдээ хүргэх том бэлэг гэж бодож байна” хэмээн ярилаа.

Хамтлагийн гишүүн  Б.Жаргал “Тоглолт маань болоход тун ойртсон байна. Манай хамтлаг 20 жилийн ой, үзэгч фенүүддээ зориулж Respeck ticket гаргасан. Сүүлийн үед зам тээврийн осолтой холбоотой харамсалтай мэдээллийг их авсан. Тиймээс энэ тасалбарын орлогоос 20 сая төгрөгийг нийгмийн хариуцлагын хүрээнд ЦЕГ-ын урьдчилан сэргийлэх газарт өгнө” гэв.

Мөн Хамтлагийн ахлагч Э.Ариун-Эрдэнэ “All In Hit” тоглолт давхцаж буйтай холбоотойгоор мэдээлэл өгсөн юм.  Тэрбээр “All In hit-2 тоглолт болсны дараа зохион байгуулагчдын зүгээс манай хамтлагтай ирж уулзаж All In hit-3 тоглолтыг хийе гэдэг санал тавьсан юм. Үүнд манай хамтлагийн зүгээс “Ийм зүйл байж болохгүй. Ирэх жил болно” гэдэг саналыг хэлсэн. Гэвч манай хамтлагийн тоглолтын тов “All In Hit-1” дээр аман байдлаар гарчихсан байсан учраас боломжгүй гэдэг байр суурийг илэрхийлсэн.

Миний санаж байгаагаар есдүгээр сарын 21-ний өдрийг өөрсдийнх нь өдөр гэж ойлгосон. Гэвч найзууд маань “Outlaw” хамтлагт маш том гэнэтийн бэлэг барилаа. Найзууддаа баярлалаа, тоглолтод маань хамгийн том бэлэг байлаа, амжилт хүсье гэж хэлье” гэсэн юм.

Сонирхуулахад, Тус тоглолт 62м метр урт тайз, 2100 ширхэг лед, “All in hit-1” тоглолтын Жак-ын хөгжим болон өөр компаниас нэмэлт сет авч ашиглаж буйгаараа давуу талтай. Түүнчлэн 2100 лед дэлгэцэн дээр гарах дүрс нь 4К-аар цацагдах аж.

Гадаадын иргэн, харьяатын газар өнгөрөгч наймдугаар сард гадаадын 5140 иргэнд визийн зөвшөөрөл, 1497 иргэнд виз, цахим визийн evisa.mn системээр 34 улсын 11866 иргэнд виз олголоо. Мөн эрх бүхий байгууллагын зөвшөөрлийг үндэслэн гадаадын 2429 иргэнд Монгол Улсад оршин суух зөвшөөрөл олгож, 3923 иргэний оршин суух зөвшөөрлийн хугацааг сунган, 912 иргэний бүртгэлд хасалт хийв.

Түүнчлэн төрийн үйлчилгээний хүртээмжийг нэмэгдүүлэх, үйлчлүүлэгчдийн цаг, зардлыг хэмнэx, үйлчилгээний төвлөрлийг сааруулаx зорилгоор гадаадын иргэний оршин суух үнэмлэхийг хотын төвд буюу Чингэлтэй дүүргийн Улсын бүртгэлийн нэг цэгийн үйлчилгээний төвд нэгдсэн байдлаар олгож байгаа бөгөөд өнгөрөгч сард 4913 үнэмлэхийг шинээр хэвлэж, 1524 иргэний үнэмлэхийг олгосон байна.

Цахим үйлчилгээний нэгдсэн системээр 14382 иргэний хүсэлтийг хүлээн авч хянан шийдвэрлэж, Монгол Улсад албан болон хувийн хэргээр оршин суух зөвшөөрөл, түүний сунгалт, түр ирэгчийн бүртгэл, хасалт, визийн хугацааны сунгал, бүртгэлийн дугаарын олголт, ашиглалт, оршин суух үнэмлэх олгох, хэвлэх, төлбөрийн буцаалтын асуудлаар нийт 7769 иргэнд зөвлөгөө, мэдээлэл өглөө.

2024 оны наймдугаар сарын байдлаар Монгол Улсад албан болон хувийн хэргээр оршин суух бүртгэлтэй 36807 гадаадын иргэн байна. Үүнээс хөдөлмөр эрхлэгч 15895, хөрөнгө оруулагч 4532, гэр бүлийн зорилгоор 4256, цагаач 1879, суралцагч 7830, хувийн бусад зорилгоор 1832,  түр ирэгчээр бүртгэлтэй 7082 гадаадын иргэн байна.

Энэ сарын 21-ний Бямба гаригт “Автомашингүй өдөр-2024″ болно. Зам тээврийн ослоос сэргийлэх, иргэдэд автомашинаас татгалзахыг уриалах зорилгоор энэ өдрийг манай улс 12 дахь жилдээ зохион байгуулж байна.

Энэ өдрийг 46 улсын 2000 гаруй хот тэмдэглэн өнгөрүүлдэг юм.

Автомашингүй өдрөөр зах худалдааны төвүүд ажиллахгүй бөгөөд 07.00-18.00 цагийн хооронд дараах гудамж, авто замуудыг хаана. Үүнд:

• Д.Сүхбаатарын гудамж,
• Их сургуулийн гудамж,
• Сөүлийн гудамж,
• Партизаны гудамж,
• Бөмбөгөр худалдааны төвийн уулзвар,
• Төмөрчний гудамж,
• Гэсэр сүмийн уулзвар,
• Самбуугийн гудамж,
• Анкарагийн гудамж,
• Бага тойруу,
• Бээжингийн гудамж,
• Токиогийн гудамж,
• Залуучуудын гудамж,
• Зүүн дөрвөн замын уулзвараас Баруун дөрвөн замын уулзвар,
• Чагдаржавын гудамж,
• Элчингийн гудамж,
• Олимпийн гудамж,
• Гэндэнгийн гудамж,
• Монголын хүүхдийн ордны уулзвараас Монгол шуудангийн уулзвар зэрэг байршлуудад автомашины хөдөлгөөнийг дээрх хугацаанд түр хязгаарлана.

Мөн автомашингүй өдрөөр дээрх хаасан авто замуудад цахилгаан мотоцикл, цахилгаан дугуй, цахилгаан скүүтэр, суррон зэргийг хөдөлгөөнд оролцуулахгүй.

2023 оны 7,8 дугаар сард болсон үерийн улмаас нийслэлийн 7 дүүргийн 120 хорооны 34 мянган иргэн, 146 аж ахуй нэгж, байгууллага үерт өртөж, нийт 35.5 тэрбум төгрөгийн хохирол учирсан.

Монгол Улсад хүчин төгөлдөр мөрдөгдөж буй хуульд зааснаар гамшгийн улмаас учирсан хохирлыг төр хариуцаж , барагдуулах эрх зүйн зохицуулалтгүй. Харин буцалтгүй тусламж олгох боломжтой. Үүнтэй холбогдуулж Засгийн газраас үерт хохирсон иргэн, аж ахуйн нэгж байгууллагуудад татварын хөнгөлөлт үзүүлэх, жижиг дунд үйлдвэрлэлийг дэмжих санд хамруулах ажлыг зохион байгуулснаас гадна үерт хамгийн их хохирол амссан Дарь-Эх орчмын иргэдэд 2.2 тэрбум төгрөгийн буцалтгүй тусламжийг олгосон байна. Мөн үерт өртсөн гэр, орон сууц, тавилга, эд хогшил, цахилгаан эрчим хүч, авто замын болон үерийн хамгаалалтын байгууламжийн засварт 7.7 тэрбум төгрөгийн хохирлыг барагдуулсан болохыг нийслэлийн Онцгой байдлын газраас мэдээллээ.