Эцэг эхчүүд, хүүхдүүдэд нэг гоёхон номыг заавал аваарай гэж санал болгоё. Одоогоор дөрвөн цуврал нь хэвлэгдээд буй, цаашид таван цуврал нэмж гарах “МАТЕМАТИКЧ ХҮҮХДҮҮД” адал явдалт, уран зохиолын цувралын гоё ном байна гэхээр нь бас ч өөрийнхөө хэмжээнд математикт дуртайн хувьд сонирхож үзсэн юм. Долоогоос дээш насны хүүхдийн ном болохоор дөрвөн ном зузаан биш, 122-166 хуудастай аж. Хөгжилтэй математикч ч бил үү, хөгжилтэй бодлого ч бил үү нэг тиймэрхүү, тоо бодлого л гараад байх болов уу гэж бодсон чинь үгүй байна шүү. Математикийн түгээмэл ойлголт (анхны тоо, пи тоо, код, шифр, факториал тоо гэх мэт), зарим нэг таавар, сэтгэхгүйн бодлого (Тагтааны үүр, Кёнигсбергийн гүүр, ижил орноор эхэлсэн хоёр оронтой хоёр тоог хурдан үржүүлэх аргачлал гэх мэт)-ыг дөрвөн найзын адал явдалд оруулснаар зохиол маш сонирхолтой болсны дээр математик бидний амьдралын суурь шинжлэх ухаан болдог, амьдралаас салангид зүйл биш, эргэн тойронд маань оршин байдаг гэдгийг ойлгуулжээ. Дээрхээс гадна тус цуврал хүүхдэд багаар ажиллах гэж юу болох, багаар ажиллахын ач тус, мөн багаар ажиллахын тулд биенээ хэрхэн хүндлэхийг, бусдыг ойлгож, туслах, эерүү зөөлөн байх гээд л ёс зүй, хүмүүжлийн зүйлсийг үйл явдалдаа оруулж өгснөөр хүүхдэд зөв үлгэр дуурайл болсон ном болжээ. Төсөөлж байснаас минь давсан бүтээл байсан учир дор нь уншаад дууслаа. Цуврал дөрвөн номын тухай товч дурдвал, Жастин, Жордан, Стефани гурав нэг ангийн найзууд, математикт дуртай, ангидаа математикт толгой цохидог хүүхдүүд. Математикийн хэцүү бодлого бодож, өөрсдийгөө сорих зорилготойгоор Жордан “МАТЕМАТИКЧ ХҮҮХДҮҮД” клуб байгуулах санал гаргахад хоёр найз нь ч дуртай зөвшөөрнө. Ийм клуб байгуулах нь Жорданы санаа болохоор гурван гишүүнтэй тус клубийн ерөнхийлөгчөөр түүнийг сонгох нь хоёр найзынх нь санал байв.
Нэгдүгээр дэвтэр болох “ОРГИЛ ЦАГИЙН ХУЛГАЙ”-д клубийн сурагчид санамсаргүй тохиолдлоор цагдаа нарын ч илрүүлж чадахгүй байсан, хотод гараад буй айл дээрэмддэг хулгайн цуврал хэргийг математик ашиглан, ангийнхаа дэггүй сурагч Роббигийн цагдаа аавтай нь хамтран илрүүлж буй тухай гардаг. Тэд хулгайчийг барихдаа “Анхны тоо” ашиглаж байгаа нь тун чиг сонирхолтой юм. Мундаг байна шүү. Уншаад үзээрэй.
Хоёрдугаар дэвтэр болох “ҮЙЛ ЯВДЛЫН ДАРААЛАЛ”-д клубийн шинэ гишүүн болох манай гурвын ангийн охин Кэтриний аавыг хүн барьцаалагчид барьцаална. Математикч хүүхдүүд найзынхаа аавын илгээсэн нууц зурвасыг математик ашиглан тайлж, аавыг нь авран найздаа тусалж буй тухай гарах болно. Зурвасыг тайлахдаа тэд факториал тоо, тооны загвар зэргийг ашиглана.
Гуравдугаар дэвтэр нь “ЕР БУСЫН ЗАГВАР” гэдэг нэртэй. 15 жилийн өмнө гарсан банк дээрэмдсэн, хаагдаагүй хэрэг дээр математикийн чадвараа ашиглан сайн дураараа туслахыг Холбооны Мөрдөх Товчоо хүүхдүүдээс хүссэнээр тэд ажиллаж эхэлнэ. Банк дээрэмдсэн хоёр хүний нэг нь нас барахынхаа өмнө нөгөө хамтрагчаа олоход туслах нууцлаг нэгэн шүлгийг Холбооны Мөрдөх Товчоонд үлдээснийг тоочин хүүхдүүд мөр тус бүрээр пи тоо зэргийг ашиглан тайлна. Мөн шударга бусаар ажлаасаа халагдсан, найрсаг зантай сургуулийн жижүүртээ тооны загвар ашиглан тусална.
Цувралын дөрөвдүгээр ном болох “ШИФРЛЭГДСЭН СЭЖҮҮР”-т хүүхдүүд номын сангийн нэгэн хуучны номын захаас гараар бичсэн нууц тэмдэгтүүд олсноор шифр, кодын тухай судалж мэдэн, улмаар тайлж чаддаг. Тайлсан шифр нь тэднийг хотынхны сүнстэй гэлцдэг толгодын хуучны харш тийш хөтөлснөөр хүүхдүүд нууцыг тайлаад зогсохгүй хотдоо тус болох үйл хэрэг бүтээдэг.
Дараагийн цувралд нь яах бол гэж догдолж хүлээхээр, томчууд ч уншчихаар тун давгүй зохиол байлаа. Хүүхдэд дэргэд нь байдаг, нийгэмд гараад шууд хэрэг болохоор зүйлсийн талаар бичсэн, ёс зүй хүмүүжлийн зөв үлгэр дуурайлтай ийм л номыг одоо цагт хүүхдүүддээ уншуулах хэрэгтэй гэж бодогддог шүү, эцэг эхчүүд ээ.
Тэрбээр герман хүмүүс ч гайхан шагшихаар хатуу дэглэмээр өөрийгөө шахан ажилладаг байв. Тэр бүү хэл Кантыг гудамжаар явахад хотын хүмүүс цагаа тааруулдаг ёс хүртэл тогтсон гэдэг. Нэг ёсондоо тэрээр хэт аскетик буюу амьдралын тав тухыг үл тоогч, эгэл амьдралыг шүтэгч, өөрийгөө хэт хатамжлагч ч байсан гэхэд болохоор. Түүхэн сурвалжуудад түүнийг бие бялдрын талаасаа чийрэг нэгэн биш авч чанд хатуу дэглэмийнхээ ачаар элдэв өвчин зовлонгоос ангид байж чадсан хэмээн өгүүлсэн нь бий. Кант “Sapere aude! буюу өөрийн оюун ухааныг ашиглах эр зоригтой бай” гэдэг соён гэгээрлийн гайхамшигт уриатай байлаа. Хүн бүр ийм уриагаар ажилладаг бол гэж ч бодохоор. И.Кант ёс зүйн сургаалдаа хүн гэгчийг “Хүн бол үзэгдэл юм. Хүн бол өөртөө байгаа юм” гэж авч үздэг. Яг эндээс хөөж үзвээс “Шашин бол өөрийн агуулгаар ёс суртахуунаас юугаараа ч ялгагдахгүй“ гэж дүгнэсэн байдаг. Эндээс үргэлжлүүлэн “Хичнээн ч бай хамаагүй, юуны тухай ч бай хамаагүй эргэцүүл, харин захирагд” гэх сонирхолтой гаргалгааг хийсэн байдаг. 
Хүн төрөлхтний соёлын гайхамшигт үнэт өвийн нэг бол баатарлаг туульс юм. Цаг хугацааны хувьд яг хэдийнээс үүссэн нь тодорхой биш боловч хүй нэгдлийн үед, эцгийн эрхт ёсны үеэс болов уу гэж таамагладаг. Тэгэхээр 15 000-8 000 орчим жилийн өмнө байх нь. Тухайн үед овгийнхоо ахлагч ч юм уу хамгийн баатарлаг эрийн баатарлаг үйлийг магтан дуулах, алдаршуулан магтах зан үйлээс үүссэн байх гэж үздэг. Улс үндэстэн бүр өөрсдийн хэв маягийг агуулсан баатарлаг туульстай. Жишээ нь, Кухулингийн дуулал, Английн баатарлаг туульс “Беовульф”, Францын баатарлаг туульс “Роландын дуулал”, Испанийн баатарлаг тууль “Сидийн дуулал”, Оросын баатарлаг тууль “Игорын хорооны тууж”, Германы баатарлаг тууль, “Нибелунгудын дуулал” зэргийг дурдаж болно. Эдгээрээс чамгүй олон нь монгол хэлнээ орчуулагдан гарсан. Ер нь Монголын уншигчид Гомерийн “Одиссей”, “Илиад”-ыг л түлхүү мэдэхээс өрнө дахины бусад баатарлаг туульсын талаар төдийлөн мэддэггүй юм шиг санагддаг. Хэдийгээр дунд сургуулийн уран зохиолын хичээл дээр баатарлаг туульсын талаар үздэг ч тэгсхийгээд өнгөрчихөөд ч байгаа юм шиг санагдаад байдаг. Уг нь эдгээрийг ядаж л нэг удаа уншаад үзвэл аль аль нь тунчиг сонирхолтой бүтээлүүд юм. Дэлхий дахинд одоогоор мэдэгдэж байгаагаар хамгийн эртний баатарлаг туульс бол “Гилгамеш”. Судлаачид НТӨ 2000 оны орчимд бичигдсэн гэж үздэг юм билээ. Шавар хавтан дээр бичигдсэн нь өнөө цагийн бидэнд хадгалагдан ирснээрээ хосгүй үнэт өв болж таарна. Энэхүү бүтээл нь тун саяхан буюу XVIII зуунд л олдсон юм. Тийм ч учраас саяхныг болтол нийтийн хүртээл болж чадаагүй аж. Туулийн гол агуулга нь НТӨ 2700 орчим оны үеийн Шумерийн Урук гэх хот улсын хаан Гилгамешийн баатарлаг үйл явдлыг магтан дуулна. Гилгамеш хааны бие бялдар, гоо үзэсгэлэн, эрх мэдлийн талаар өгүүлнэ. Харин эртний шумер хэлнээс Шин лег Юнини гэгч бичээч НТӨ 700 оны орчимд вавилон хэлнээ буулгасан байх юм. Тухайн үеийнхээ орчин цагийн хэлэнд буулгаснаа Ашурбанидал хэмээх хааны номын санд хавтан хэлбэрээр хадгалжээ. Тухайн үед цаас ч байсан биш. Аливааг бичгийн хэлбэрээр үлдээх ганц арга нь шавар хавтангууд байсан байх нь. Уг нь энэ тууль одоо байгаагаас ч илүү урт байсан нь тодорхой болсон бөгөөд төгсгөл хэсэг эрдэмтдийн дунд багагүй маргаан тарьдаг. Яруу найргийн хэлбэр талаас нь авч үзвэл аман зохиолын гаралтай бөгөөд магтуу хэлбэртэй байдаг нь аман хүүрнэл зохиол болохыг нь баталдаг гэнэ. Уг нь бол Гилгамешийн тууль нь хайрын сэтгэл, үнэнхүү нөхөрлөл, уй гуниг, хүн гэгч амьтанд ямагт байх бардам байдал, мөнх бус гэгчийг яруухнаар харуулсан бүтээл билээ. Энэ туулийг 2018 онд монгол хэлнээ бүрэн эхээр нь орчуулан гаргасан учраас олоод уншихад гэмгүй. 
Дунд сургуульд сурч байхад чинь хамгийн хэцүү, толгой өвтгөсөн хичээл аль нь байсан бэ гэж асуувал бараг 80-аад хувь нь “Математик” хэмээн шуудхан хариулах байх. Уг нь эхлэлээс нь сайн ойлгоод авчихвал тийм дааж давшгүй хэцүү хичээл ч бас биш. Дунд сургуульд зааж байгаа хичээл мэдээж тийм аймаар байхгүй нь ойлгомжтой. Тэгвэл “Нэпко”-гоос цуврал болгон гаргасан “Математик 30 секундэд” номын “Математик”-ийн тухай товчхон өгүүлье. Уг ном нь математикийн нэлээн гүнзгий сонгодог 50 ойлголтыг багтаасан тайлбар юм. Үнэхээр сонирхолтой. Жишээ нь, та Фермагийн агуу теорем, Паскалын гурвалжин, Пи тоо зэргийн талаар найз нөхөдтэйгөө хөгжилдөж суухдаа эвтэйхээн тайлбарлаад өгчихөж чаддаг, мэдлэгээ сайхан хуваалцчихдаг байхыг хүсвэл “Математик 30 секунд” номыг уншчихад болоод явчихна. Заримдаа зочидтойгоо ярилцчих сэдэв, эсвэл яриа хагалах зүйл олддоггүй шүү дээ. За тэгээд эдгээрээс гадна магадгүй таны төдийлөн сайн ойлгож чадаагүй байсныг тас хийтэл ойлгуулж чадах тун аятайхан тайлбар бүхий ном юм. Хүн төрөлхтний түүхэнд лут лут тоочид үй олноороо төрөн гарч байсан. Тэд энэ шинжлэх ухааныг онолын ухаан дахь урлаг хэмээн нэрлэгдэх хүртэл нь зүтгэсэн байж таарна. Хамгийн наад захын нэмэх хасах үйлдлээс эхлээд бүх зүйлсэд математик заавал байна. Математикгүй юм гэж үгүй дээ. Ер нь энэ их тоо, томьёо үзээд яг юунд хэрэгтэй гэж… Хамгийн их хэрэгтэй. Ядаж л хүний уураг тархийг арай хурдан сэтгэдэг, логик дэс дараалалтай бодоход тустай билээ. Уг ном “Тоо тоолол” гэх бүлгээс эхлээд “Теорем, баталгаа” зэрэг долоон бүлэгтэй. Эхний бүлэгт “алгебрь, бинар тоо, бодит тоо, бүхэл тоо, дэс тоо, коэффициент, олон гишүүнт, хуваагч” гээд бүгдийг нь сайхан тайлбарлаад өгнө. Жишээ нь, Фермагийн их теорем. Энэ талаар та бүхэн дуулсан л байх. Уг теорем нь “Хэрэв n>2 бол xn+yn=zn тэгшитгэлийг хангах /тэг биш шийд/ натурал тоон шийд байхгүй.” Харахад нэг л ойлгомжтой юм шиг хэрнээ уг илэрхийллийг батлахын тулд үе үеийн агуу тоочид бүхэл бүтэн гурван зууныг зарцуулаад байна. Уг теорем хэдийгээр амьдралд өгөөж гэхээр зүйлгүй ч тайлагдагшүй баталгаа нь тоочдын гижгийг хүргэсээр иржээ. Гэтэл уг теоремын эзэн нь хуульч, тоо сонирхогч хүн байж. 1994 онд Английн тоочин Э.Вайлс яг таг батлах хүртэл уг теорем ердөө таамаглалд тооцогдож байжээ. Бидний сайн мэдэх рубикийн шоог 1997 онд Унгарын иргэн Эрно Рубик кохион бүтээжээ. Өдгөө дэлхий даяар 300 сая орчим зарагдсан уг тоглоомын 26 нүдийг 43 их энгүүмэл буюу 1018 зэрэгт янзаар эвлүүлэх боломжтой аж. Ой тоонд багтамгүй олон хувилбар. Гэтэл уг шооны өнгүүдийг яаж ч хольсон дээд тал нь 20 үйлдлээр эвлүүлэх боломжтой гэх таамаг явсаар 2010 онд математик баталгаа нь гарчээ. Сонирхуулахад, уг шоог хамгийн хурдан эвлүүлсэн дээд амжилтыг Ф.Земдегс эзэмшдэг. Тэрээр долоон секундэд уг шоог эвлүүлжээ, гэхдээ энэ амжилт 2011 оны байдлаар. Өөр хэн нэгэн үүнээс хурдан эвлүүлсэн байж ч болох. Тоонд “Хязгааргүй” гэх ойлголт бий. Натурал тоо хязгааргүй гэийг харахад хялбар. Ямар нэгэн тоог хамгийн их гэж үзэхэд тэрнээс их тоо гараад л ирнэ. Бас 0-ээс 1 хүртэлх завсарт хязгааргүй тоо оршин байхыг ойлгож мөн болно. Хязгааргүйн цаана гарахын тулд эхлээд хязгааргүйд хүрэх хэрэгтэй гэх үг хүртэл бий. Гэх мэт тооны шинжлэх ухааны гол 50 ойлголтыг багтаасан эл бүтээлийг танд санал болгож байна. Нэгэн цагт агуу их математикч Карл Фридрих Гаусс “Математик бол бүх шинжлэх ухааны хаан юм” гэсэн үгээр энэ бичвэрээ өндөрлөе.