Author: АВИДЫН МӨНХЗУЛ

Өнгөрөгч мягмар гарагийн өглөө ОХУ-ын алс Дорнод дахь хүүхдийн зуслан шатаж, дөрвөн хүүхэд амь үрэгджээ.

Москва хотоос зүүншээ 6000 км-ийн зайтай Хабаровск мужид байрлах энэхүү хувийн зуслан нь асар хэлбэрийн сууцуудтай. Тухайн үед зусланд 189 хүүхэд амарч байснаас гал гарах үед 61 нь асар дотор байжээ. Уг гал түймрийн улмаас гурван охин, нэг эрэгтэй хүүхэд амь үрэгдэж, 20 асар шатсан байна. Амиа алдсан хүүхдүүд 11-13 насныхан байсан бөгөөд газар дээрээ нас барсан охин тэр өдөр 11 нас хүрж байжээ. Бусад гурван хүүхэд нь эмнэлэгт очоод шархаа даалгүй өнгөрсөн байна. Гал гарах үеэр 11 настай Александр хэмээх хүү өөрөө түлэгдэж, гэмтэн байж олон хүүхдийг галаас аварч, чирч гаргаж байсан гэнэ. Харамсалтай нь, хүү эмнэлэгт хүргэгдсэнийхээ дараа шархаа дийлэлгүй нас баржээ.

Зуслангийн захирлыг баривчилж, мөрдөн шалгах ажиллагааг эхлүүлээд байгаа юм байна. Бүс нутгийн захирагч Сергей Фурал нь энэ хэргийн талаар нэлээн сүүлд мэдсэн бөгөөд үүнийг нь ОХУ-ын Ерөнхий сайд Дмитрий Медведев буруушаасан байна. Харин захирагч “Хувийн зуслан байсан болохоор тэнд үйл ажиллагаа явуулдаг ийм зуслан байдаг гэдгийг нь хэн ч мэдээгүй” хэмээн тайлбар хийжээ. Уг харамсалтай хэргийн улмаас Хабаровск муж даяар гурав хоногийн гашуудал зарлаад байгаа аж.

А.МӨНХЗУЛ

Казахстаны Ерөнхийлөгч асан Нурсултан Назарбаевын зээ хүү Айсултаныг Лондонд саатуулаад байна хэмээн Metro UK хэвлэл мэдээлжээ.

Тодруулбал, Айсултан нь өнгөрсөн зургаадугаар сарын 5-ны өдөр цагдаагийн ажилтанг хазаж, хүндээр гэмтээсэн байна. Скотленд-Ярд буюу Их Британийн цагдаагийн албаны зүгээс түүнийг амиа хорлохыг завдсан, цагдаагийн ажилтан болиулах гэж оролдоход нь ийнхүү хазаж гэмтээсэн хэмээн мэдэгджээ.

Энэ хэрэг Ковент-Гарден дүүрэг дэх Айсултаны танил эмэгтэйн гэрт болжээ. Айсултаны найз Азамат гэгч харин цагдаа нараас огт өөр тайлбар өгчээ. Тэрээр “Цагдаа нар гэнэт орж ирэн шууд л хэсэг дээр аваачин байцаахыг оролдсон. Тэд ямар ч тайлбар сонсохыг хүсээгүй, ази царайтай хүмүүст гаргадаг таагүй хандлагыг бидэнд үзүүлсэн. Айсултан гэрийн эзэгтэйд өрөөнөөс гарахад нь туслахыг л хүссэн болохоос амиа хорлох гэж оролдоогүй” хэмээн ярьсан байна. Ерөнхийлөгч асны зээ хүүд холбогдох хэргийн шүүх хуралдаан өнөөдөр Лондон хотод болох аж.

Айсултан нь Н.Назарбаевын том охин Дарига Назарбаевын хүү юм. Түүний эцэг Рахат Алиев 2015 онд Австрийн шоронд амиа алдсан байдаг. Айсултаны хувьд Их Британийн цэргийн академийг дүүргээд Казахстаны Батлан хамгаалах яаманд дээгүүр албан тушаал хашсан. Мөн хөлбөмбөгийн ”Челси” клубын идэрчүүдийн багт тоглож чамгүй амжилттай явж байсан. Харамсалтай нь архи, мансууруулах бодист донтож улмаар өвөө нь ач хүүгээ “тоохгүй орхисон” гэгддэг.

А.МӨНХЗУЛ

Үзэсгэлэнт далайн эрэг дээр амьдарсныхаа төлөө сар бүр 565 долларын тэтгэмж авна гэвэл та итгэх үү. Тэгвэл Грекийн Антикитера арал дээр оршин суух хүсэлтэй иргэдийг ийнхүү урамшуулахаар болсон байна. Үүгээр ч зогсохгүй амьдрах байшин, газраар хангана гэж байгаа. Гэхдээ энэ хөтөлбөр нь зөвхөн Грекийн иргэншилтэй хүмүүст л хамааралтай аж.

Хэдийгээр цэв цэнхэр тэнгисийн эрэг дээр орших үзэсгэлэнт тогтоцтой, зөөлөн дулаан уур амьсгалтай боловч энэхүү арлын оршин суугчид сүүлийн жилүүдэд 300-гаас 24 болтлоо цөөрчээ. Тиймээс арлын удирдлагууд хүн амынхаа тоог нэмэгдүүлэх зорилгоор ийнхүү арга хэмжээ авахаар болжээ. “Lonely planet” хэмээх сайтын мэдэгдсэнээр уг зардлыг Грекийн Ортодокс сүмээс гаргах гэнэ.

Оршин суугчид нэмэгдсэнээр хүмүүс загас агнаж, барилга барьж, талх нарийн боов хийж борлуулснаар арлын эдийн засагт хувь нэмэр оруулна гэдэгт итгэж байгаагаа арлын удирдлага хэлсэн байна.

Энэхүү өвөрмөц арал нь Крета, Киттира хоёрын хооронд оршдог бөгөөд Афинаас 45 минутын зайд нисэж хүрдэг. Хэдий үзэсгэлэнтэй байгальтай боловч ийшээ очиход нэлээд бэрхшээлтэй, усан завь тогтмол явдаггүй. Гэхдээ өөрийн гэсэн цахилгааны эх үүсгэвэр, цэвэр усны нөөцтэй бөгөөд утасны шугам, интернетэд холбогдсон нь уг арал дээр амьдрах таатай нөхцөлийг бүрдүүлж байгаа юм. Зам харилцаа муу учраас жуулчид Антикитера арал руу очих нь ховор боловч геологичид болон цаг уурын эрдэмтэд судалгаа шинжилгээ хийхээр тус арлыг зорих нь элбэг байдаг аж.

Арлын удирдагчийн ээж дурсахдаа “Хуучин цагт энд 70 орчим хүүхэд сургуульд явдаг, 800 гаад оршин суугчтай байлаа. Одоо бараг хүүхэд алга даа” хэмээжээ. Мөн Антикитерагийн оршин суугчдыг гурав болон түүнээс дээш хүүхэдтэй болохыг удирдлагын зүгээс ихээхэн дэмжиж, уриалдаг гэнэ. Ямартай ч ийм шийдвэр гарснаас хойш 15 гэр бүл уг арал дээр амьдрах хүсэлтээ ирүүлээд байгаа юм байна. Арал руу нүүх шийдвэр гаргахаасаа өмнө очиж танилцахыг хүссэн хүн бүрийг арлын оршин суугчид тун найрсгаар хүлээж авч гэртээ байрлуулдаг гэсэн.

А.МӨНХЗУЛ

АНУ-ын Ерөнхийлөгч Дональд Трамп Их Британид төрийн айлчлал хийж байгаа билээ. Тэгвэл тэрээр айлчлалынхаа хоёр дахь өдөр буюу мягмар гаригт Элчин сайдын яамандаа хүндэтгэлийн оройн зоог зохион байгуулсан байна.

Хүндэтгэлийн оройн зоогт нийтдээ 16 зочин уригдсан бөгөөд хунтайж Чарльз болон түүний гэргий Камилла, Их Британийн Ерөнхий сайд Тереза Мэй нөхөр Филипийн хамт хүндэт зочны хувиар хүрэлцэн иржээ.

Айлчлалын сүүлийн өдөр буюу лхагва гарагт АНУ-ын Ерөнхийлөгч гэргийн хамтаар Портсмут хотод Нормандад холбоотны цэрэг буусны ойд зориулсан үйл ажиллагаанд оролцох юм байна. Их Британи дахь айлчлалаа дуусгаад тэндээсээ Ирландыг зорих бөгөөд тус улсын Ерөнхий сайд Лео Варадкартай хэлэлцээ хийх юм.

А.МӨНХЗУЛ

Пакистаны нэгэн жижиг тосгонд 1400 орчим хүн дохын халдвараар бүртгэгдсэний 494 нь нэг сартайгаас тав хүртэлх насны хүүхдүүд байна гэж “www.npr.org” сайт мэдээллээ.

Өмнөд Пакистаны Ларкана хоттой хөршлөн оршдог ядуу буурай Рато-Деро тосгоны Мүцэфэр Гэнхаро эмчээр эмчлүүлж байсан хүүхдүүдийн халуун буурахгүй байсанд санаа нь зовсон эцэг эхчүүд өөр эмнэлэгт хандсан байна.

Ларкана хотод байрлах эмнэлгийн Эмч Имран Арбани өндөр халуурсан хүүхдүүдэд цусны шинжилгээ хийж үзэхэд гарсан хариу нь эмчийг болон эцэг, эхчүүдийг шоконд оруулжээ. Учир нь тэдгээр хүүхдүүд бүгд ДОХ-ын халдвар авсан байжээ.

Хачирхалтай нь халдвар авсан хүүхдүүдийн аав, ээжийн цуснаас ДОХ-ын халдвар илрээгүй байна. Ингээд хүүхдүүдийг эмчилж байсан эмчээс шижилгээ авахад ДОХ-оор өвчилсөн болох нь тогтоогджээ.

Түүнийг дөрөвдүгээр сарын 30-нд баривчилсан ба шоронд байхдаа өгсөн мэдүүлэгтээ “Энэ бүхэнд би буруутай. Гэхдээ би өөрийгөө ДОХ-ын халдвартай гэдгээ огт мэдээгүй. Би өөрөө мэргэжлийн эмч хүн шүү дээ. Гэтэл надад энэ өвчний ямар ч шинж тэмдэг ажиглагдаагүй. Би маш эрч хүчтэй байсан. Тэгээд ч эдгээр гэм зэмгүй хүүхдүүдэд яалаа гэж албаар энэ өвчнийг тараах билээ дээ” хэмээн ярьжээ.

Цагдаа нар харин Гэнхарог хэдэн жилийн өмнө автын осолд орж цус сэлбүүлэхдээ энэ халдварыг авсан байж болзошгүй хэмээн үзэж байгаа аж.

А.МӨНХЗУЛ

Хятадын “HUAWEI” компанийн шинэ загвар болох Р30 гар утсыг Японы зах зээл дээр худалдаалахыг түр хойшлуулсан талаар тус улсын үүрэн холбооны хоёр компани өнөөдөр зарлажээ.

Softbank болон KDDI компаниуд баасан гарагаас эхлэн уг загварын утсыг худалдаалах гэж байсан юм.

Softbank компанийн зүгээс P30 загварыг хүмүүсийн хэрэгцээ шаардлагад бүрэн нийцэж чадах эсэхийг шалгаж, нягтлах хэрэгтэй болсон тул хойшлуулсан хэмээн байр сууриа илэрхийлжээ. Гэхдээ “Google”-ийн Андроид систем шинэ гар утсанд цаашдаа ажиллах эсэх нь эргэлзээтэй болсноос үүдэн хойшлуулахад хүрсэн байх магадлалтай аж.

Тэгвэл Японы хоёр дахь том үүрэн холбооны оператор KDDI ийнхүү хойшлуулах болсон шалтгаанаа мөн л АНУ-ын зүгээс “HUAWEI” компанид тавьсан хоригтой холбон тайлбарлажээ.

“HUAWEI” компани P30 загварын утсаа баасан гарагаас эхлэн Японы зах зээлд борлуулах болсноо мөн тус улсад одоо байгаа нэрийн долоон дэлгүүр дээрээ нэмж 20 үйлчилгээний цэг байгуулах төлөвлөгөөтэй байгаагаа өчигдөр Токио хотод болсон хэвлэлийн хурлын үеэр зарлаад байсан билээ.

А.МӨНХЗУЛ